| ᠠᠳᠡ ᠶᠠᠷᠢᠬᠤ ᠭᠡᠵᠤ ᠪᠠᠶᠢᠭᠠ ᠮᠡᠯᠡᠭᠡᠢ ᠴᠢᠯᠠᠭᠤ ᠨᠢ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠪᠠᠶ᠋ᠬᠠᠦ᠋ᠨᠳᠤᠷ ᠰᠤᠮᠤᠨ | ᠤ ᠮᠠᠨᠢᠳᠤ ᠭᠠᠴᠠᠭᠠ ᠶᠢᠨ ᠡᠮᠤᠨᠡ ᠵᠠᠬᠠ᠂ ᠡᠷᠳᠡᠨᠢ ᠠᠭᠤᠯᠠ ᠠᠴᠠ ᠪᠠᠷᠠᠭᠤᠨ ᠬᠤᠶᠢᠨᠠ᠂ ᠠᠪᠠᠭᠠ ᠬᠠᠷᠠ ᠠᠭᠤᠯᠠ | ᠶᠢᠨ ᠵᠡᠭᠦᠨ ᠰᠤᠭᠤ ᠶᠢᠨ ᠲᠠᠯᠠ ᠲᠤᠮᠳᠠ᠂ ᠤᠳᠤ ᠶᠢᠨ ᠴᠢᠪᠠᠭᠠ ᠠᠴᠠ ᠪᠠᠶ᠋ᠬᠠᠦ᠋ᠨᠳᠤᠷ ᠰᠤᠮᠤ ᠬᠦᠷᠬᠦ ᠵᠠᠰᠠᠮᠠᠯ ᠵᠠᠮ | ᠠᠴᠠ ᠵᠡᠭᠦᠨᠰᠢ ᠬᠤᠶᠠᠷ ᠵᠠᠭᠤ ᠰᠢᠬᠠᠮ ᠮᠧᠲᠷ ᠲᠤ ᠪᠠᠶᠢᠵᠤ᠂ ᠬᠠᠨᠰᠦ᠋ᠮᠡ ᠰᠤᠮᠤᠨ ᠤ ᠪᠠᠶᠠᠨᠬᠤᠰᠢᠭᠤ ᠭᠠᠴᠠᠭᠠ ᠶᠢᠨ | ᠪᠠᠷᠠᠭᠤᠨ ᠡᠮᠤᠨᠡ ᠪᠠᠶᠢᠬᠤ ᠬᠦᠬᠡ ᠱᠤᠷᠤᠩ ᠠᠭᠤᠯᠠ ᠶᠢᠨ ᠱᠤᠪᠬᠤ ᠤᠷᠭᠢᠯ ᠵᠦᠭ ᠵᠡᠭᠦᠨ ᠬᠤᠶᠢᠨᠠ ᠠᠴᠠ | ᠪᠠᠷᠠᠭᠤᠨ ᠡᠮᠤᠨᠡᠰᠢ ᠪᠠᠨ ᠬᠠᠨᠳᠤᠨ ᠬᠡᠪᠳᠡᠭᠰᠡᠨ ᠮᠤᠷᠢᠨ ᠮᠡᠯᠡᠬᠡᠢ ᠲᠠᠢ ᠠᠪ ᠠᠳᠠᠯᠢᠬᠠᠨ ᠲᠤᠮᠤ ᠴᠢᠯᠠᠭᠤ ᠶᠤᠮ᠃ | ᠲᠡᠷᠡ ᠨᠢ ᠨᠤᠭᠤᠭᠠᠨ ᠦᠩᠭᠡ ᠲᠠᠢ ᠪᠦᠭᠡᠳ ᠬᠦᠨᠳᠤ ᠨᠢ ᠬᠤᠶᠠᠷ ᠲᠤᠨ ᠢᠯᠡᠭᠦᠤ ᠪᠠᠶᠢᠵᠤ᠂ ᠨᠢᠷᠤᠭᠤᠨ ᠤ ᠬᠡᠰᠡᠭ | ᠲᠤ ᠨᠢ ᠬᠠᠳᠠᠨ ᠤ ᠨᠤᠭᠤᠭᠠᠨ ᠬᠠᠭ ᠰᠠᠭᠤᠭᠰᠠᠨ ᠢᠶᠠᠷ ᠦᠵᠡᠬᠦ ᠳᠤ ᠤᠳᠠᠭᠠᠨ ᠤᠨ ᠤ ᠴᠢᠯᠠᠭᠤ ᠪᠤᠯᠬᠤ ᠨᠢ | ᠲᠠᠮᠵᠢᠭ ᠦᠭᠡᠢ᠃ ᠡᠨᠡ ᠬᠦ ᠴᠢᠯᠠᠭᠤ ᠶᠢ ᠤᠤᠭᠠᠯ ᠰᠠᠭᠤᠭᠠᠯᠢ ᠮᠠᠯᠴᠢᠳ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠰᠢᠳᠦᠭᠡᠨ ᠭᠡᠵᠤ | ᠦᠵᠡᠳᠡᠭ ᠠᠴᠠ ᠮᠡᠯᠡᠬᠡᠢ ᠴᠢᠯᠠᠭᠤ ᠭᠡᠵᠤ ᠲᠠᠬᠢᠯ ᠲᠠᠪᠢᠭ ᠡᠷᠭᠦᠳᠡᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃ | ᠡᠨᠡ ᠬᠦ ᠴᠢᠯᠠᠭᠤ ᠨᠢ ᠮᠠᠨᠢᠳᠤ ᠭᠠᠴᠠᠭᠠᠨ ᠤ ᠤᠤᠯ ᠤᠨ ᠵᠤᠰᠠᠯᠠᠩ ᠤᠨ ᠭᠠᠵᠠᠷ ᠪᠠᠶᠢᠬᠤ ᠲᠤᠯᠠ ᠮᠠᠯᠴᠢᠳ | ᠴᠠᠭᠠᠨ ᠪᠠᠯᠢᠩ ᠡᠷᠭᠦᠵᠤ ᠰᠢᠳᠦᠳᠡᠭ ᠪᠠᠶᠢᠭᠰᠠᠨ ᠪᠠ ᠤᠶᠢᠷᠠ ᠤᠷᠴᠢᠮ ᠳᠤ ᠨᠢ ᠪᠤᠵᠠᠷ ᠪᠤᠷᠳᠠᠭ ᠬᠤᠭ ᠨᠤᠪᠰᠢ ᠪᠠᠨ | ᠬᠠᠶᠠᠬᠤ ᠦᠭᠡᠢ ᠪᠦᠭᠡᠳ ᠬᠡᠤᠬᠡᠳ ᠪᠠᠭᠠᠴᠤᠳ ᠢᠶᠠᠨ ᠡᠨᠡ ᠴᠢᠯᠠᠭᠤᠨ ᠤ ᠬᠠᠪᠢ ᠪᠠᠷ ᠨᠠᠭᠠᠳᠤᠭᠤᠯᠳᠠᠭ ᠦᠭᠡᠢ ᠭᠡᠨᠡ | ᠃ ᠬᠡᠷᠪᠡ ᠪᠠᠭᠠ ᠨᠠᠰᠤᠨ ᠤ ᠭᠡᠤᠭᠡᠳ ᠬᠠᠵᠠᠭᠤ ᠬᠠᠪᠢ ᠪᠠᠷ ᠨᠢ ᠨᠠᠭᠠᠳᠴᠤ ᠲᠤᠭᠯᠠᠬᠤ᠂ ᠲᠡᠭᠡᠷᠡ ᠨᠢ ᠶᠠᠭᠤᠮᠠ | ᠬᠡᠤᠮᠡ ᠤᠷᠬᠢᠬᠤ᠂ ᠰᠢᠭᠡᠵᠤ ᠪᠠᠭᠠᠬᠤ ᠳᠤ ᠬᠦᠷᠪᠡᠯ ᠲᠡᠷᠡ ᠲᠤᠤᠷᠠ ᠪᠠᠨ ᠬᠠᠭᠰᠢᠭᠤᠷ ᠬᠠᠨᠢᠶᠠᠳᠤ ᠬᠦᠷᠴᠦ ᠬᠠᠯᠠᠭᠤ | ᠪᠦᠯᠢᠶᠡᠨ ᠤᠷᠬᠢᠳᠠᠭ ᠠᠴᠠ ᠭᠡᠷ ᠤᠨ ᠠᠬᠠᠮᠠᠳ ᠪᠠ ᠨᠠᠰᠤᠳᠠᠨ ᠪᠤᠭᠤᠷᠤᠯᠴᠤᠳ ᠨᠢ ᠬᠡᠤᠭᠡᠳ ᠲᠡᠭᠡᠨ ᠡᠨᠡ ᠬᠦ ᠴᠡᠭᠡᠷ | ᠶᠤᠰᠤ ᠶᠢ ᠤᠯᠠᠮᠵᠢᠯᠠᠨ ᠰᠤᠷᠭᠠᠳᠠᠭ ᠰᠠᠨ᠃ | ᠡᠷᠳᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ ᠡᠷᠳᠡᠨᠢ ᠠᠭᠤᠯᠠ ᠪᠠ ᠬᠦᠬᠡ ᠱᠤᠷᠤᠩ ᠤᠨ ᠬᠤᠭᠤᠷᠤᠨᠳᠤ ᠨᠢᠭᠡ ᠠᠯᠳᠠᠨ | ᠢᠯᠠᠭᠠ ᠨᠢᠰᠴᠤ ᠤᠶᠢᠷᠠ ᠤᠷᠴᠢᠨ ᠤ ᠮᠠᠯᠴᠢᠨ ᠠᠷᠠᠳ ᠲᠤ ᠭᠠᠢ ᠭᠠᠮᠰᠢᠭ ᠲᠠᠷᠢᠵᠤ ᠰᠦᠢᠳ ᠪᠤᠯᠵᠤ ᠵᠤᠪᠠᠭᠠᠵᠤ | ᠪᠠᠶᠢᠭᠰᠠᠨ ᠲᠤᠯᠠ ᠲᠡᠭᠡᠳᠤ ᠦᠶᠡ ᠶᠢᠨ ᠠᠬᠠᠮᠠᠳ ᠲᠤᠮᠤᠭᠠᠳᠠᠳ ᠬᠤᠪᠢᠯᠭᠠᠨ ᠭᠡᠭᠡᠨ ᠢ ᠵᠠᠯᠠᠵᠤ᠂ ᠡᠨᠡ ᠬᠦ᠋ ᠮᠡᠯᠡᠬᠡᠢ | ᠴᠢᠯᠠᠭᠤᠨ ᠳᠤ ᠱᠦᠩ ᠲᠠᠷᠤᠵᠤ ᠲᠠᠷᠨᠢ ᠨᠤᠮ ᠤᠩᠰᠢᠭᠤᠯᠤᠨ ᠠᠮᠢᠯᠠᠭᠤᠯᠤᠭᠰᠠᠨ ᠠᠴᠠ ᠰᠠᠢᠢ ᠦᠨᠦᠬᠢ ᠭᠠᠢ | ᠲᠠᠷᠢᠵᠤ ᠪᠠᠶᠢᠭᠰᠠᠨ ᠠᠯᠳᠠᠨ ᠢᠯᠠᠭᠠ ᠲᠠᠷᠤᠭᠳᠠᠵᠤ᠂ ᠠᠮᠤᠷ ᠲᠦᠪᠰᠢᠨ ᠪᠤᠯᠵᠤ ᠠᠷᠠᠳ ᠤᠯᠠᠨ ᠤ ᠵᠤᠪᠠᠯᠠᠩ | ᠠᠷᠢᠯᠤᠭᠰᠠ ᠠᠴᠠ ᠠᠳᠡᠬᠢ ᠮᠠᠯᠴᠢᠳ ᠲᠤᠰ ᠮᠡᠯᠡᠭᠡᠢ ᠴᠢᠯᠠᠭᠤ ᠶᠢ ᠨᠤᠲᠤᠭ ᠤᠨ ᠰᠠᠬᠢᠭᠤᠰᠤ ᠰᠢᠭ᠋ ᠢᠶᠠᠨ ᠰᠢᠳᠦᠨ | ᠲᠠᠬᠢᠳᠠᠭ ᠪᠤᠯᠤᠭᠰᠠᠨ ᠭᠡᠨᠡ᠃ | ᠬᠤᠶᠠᠷ ᠮᠢᠩᠭᠠᠨ ᠤᠨ ᠤ ᠡᠬᠢᠨ ᠢᠶᠠᠷ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠲᠦᠪ ᠠᠴᠠ ᠪᠠᠶ᠋ᠬᠠᠦ᠋ᠨᠳᠤᠷ ᠬᠦᠷᠬᠦ | ᠵᠠᠰᠠᠮᠠᠯ ᠵᠠᠮ ᠢ ᠵᠠᠰᠠᠬᠤ ᠶᠠᠪᠤᠴᠠ ᠳᠤ ᠰᠢᠷᠤᠢ ᠮᠠᠯᠳᠠᠬᠤ ᠲᠤᠮᠤ ᠮᠠᠰᠢᠨ ᠲᠡᠷᠭᠡᠨ ᠤ ᠵᠢᠯᠤᠭᠤᠴᠢ ᠨᠠᠷ ᠮᠡᠯᠡᠭᠡᠢ | ᠴᠢᠯᠠᠭᠤᠨ ᠤ ᠲᠤᠤᠷᠠ ᠯᠠᠪ ᠡᠷᠳᠡᠨᠢᠰ ᠤᠨ ᠵᠦᠢᠯ ᠪᠠᠶᠢᠨᠠ ᠭᠡᠵᠤ ᠪᠤᠳᠤᠭᠰᠠᠨ ᠶᠤᠮ ᠤᠤ ᠪᠤᠤ ᠮᠡᠳᠡ᠂ ᠤᠭ ᠤᠷᠤᠨ | ᠠᠴᠠ ᠨᠢ ᠬᠡᠳᠤᠨ ᠠᠷᠪᠠᠨ ᠮᠧᠲᠷ ᠲᠦᠯᠬᠢᠵᠤ᠂ ᠡᠯᠢᠭᠡ ᠶᠢ ᠨᠢ ᠲᠡᠭᠡᠭᠰᠢ ᠪᠠᠨ ᠬᠠᠨᠳᠤᠭᠤᠯᠵᠤ ᠬᠠᠶᠠᠭᠠᠳ᠂ ᠮᠡᠯᠡᠬᠡᠢ | ᠴᠢᠯᠠᠭᠤᠨ ᠤ ᠲᠦᠷᠪᠡᠨ ᠬᠦᠯ ᠲᠤᠤᠷᠠ ᠨᠢ ᠲᠠᠯᠪᠢᠵᠤ ᠪᠠᠶᠢᠭᠰᠠᠨ ᠯᠤᠤ ᠲᠠᠢ ᠠᠶᠠᠭᠠᠨ ᠤ ᠲᠤᠳᠤᠷᠠᠬᠢ ᠶᠠᠭᠤᠮᠠ ᠲᠠᠢ | ᠨᠢ ᠠᠪᠤᠭᠠᠳ ᠵᠤᠭᠰᠤᠭᠰᠠᠨ ᠦᠭᠡᠢ᠂ ᠪᠠᠰᠠ ᠲᠤᠭᠤᠭᠰᠢ ᠪᠠᠨ ᠮᠠᠯᠳᠠᠵᠤ ᠭᠤᠷᠪᠠᠨ ᠮᠧᠲᠷ ᠭᠦᠨ᠂ ᠬᠤᠶᠠᠷ ᠮᠧᠲᠷ | ᠢᠯᠡᠭᠦᠤ ᠦᠷᠭᠡᠨ᠂ ᠭᠤᠷᠪᠠᠨ ᠮᠧᠲᠷ ᠤᠷᠳᠤ ᠲᠤᠮᠤ ᠨᠦᠬᠡ ᠭᠠᠷᠭᠠᠵᠠᠢ᠃ ᠬᠤᠵᠢᠮ ᠨᠢ ᠡᠨᠡ ᠬᠦ ᠨᠦᠭᠡᠨ ᠳᠤ | ᠬᠦᠮᠤᠰ ᠮᠠᠭᠤ ᠰᠠᠶᠢᠨ ᠬᠤᠭ ᠨᠤᠪᠰᠢ ᠬᠠᠶᠠᠭᠳᠠᠮᠠᠯ ᠵᠦᠢᠯ ᠡᠯᠳᠡᠪ ᠵᠦᠢᠯ ᠤᠨ ᠱᠠᠬᠠᠢ ᠭᠤᠳᠤᠯ᠂ ᠬᠤᠪᠴᠠᠰᠤ | ᠬᠤᠨᠠᠷ ᠵᠡᠷᠭᠡ ᠶᠠᠭᠤᠮᠠᠰ ᠢᠶᠠᠨ ᠬᠠᠶᠠᠭᠰᠠᠭᠠᠷ ᠲᠦᠭᠦᠷᠬᠦ ᠰᠢᠬᠠᠵᠠᠢ᠃ | ᠳᠡᠭᠦᠨ ᠠᠴᠠ ᠠᠪᠤᠭᠠᠳ ᠮᠠᠨᠢᠳᠤ ᠶᠢᠨ ᠠᠶᠢᠯ ᠪᠠ ᠪᠠᠶᠠᠨ ᠬᠤᠰᠢᠭᠤ ᠠᠶᠢᠯ ᠤᠨ ᠨᠠᠰᠤᠳᠠᠨ ᠲᠤᠮᠤᠭᠠᠳᠠᠳ᠂ | ᠠᠭᠤᠯᠠ ᠤᠰᠤᠨ ᠤ ᠰᠢᠳᠦᠬᠡᠨ ᠪᠤᠯᠵᠤ᠂ ᠮᠠᠭᠤ ᠶᠠᠭᠤᠮᠠᠰ ᠤᠨ ᠲᠠᠷᠤᠯᠭᠠ ᠪᠤᠯᠵᠤ ᠪᠠᠶᠢᠭᠰᠠᠨ ᠮᠡᠯᠡᠬᠡᠢ ᠴᠢᠯᠠᠭᠤ ᠶᠢ | ᠰᠢᠯᠵᠢᠭᠦᠯᠤᠨ ᠤᠷᠪᠠᠭᠤᠯᠵᠤ ᠬᠠᠶᠠᠭᠠᠳ ᠤᠷᠤᠨ ᠳᠤ ᠨᠢ ᠮᠠᠭᠤ ᠬᠠᠶᠠᠭᠳᠠᠮᠠᠯ ᠢᠶᠠᠷ ᠲᠦᠭᠦᠷᠭᠡᠵᠤ | ᠪᠤᠬᠢᠷᠳᠤᠭᠤᠯᠤᠭᠰᠠᠨ ᠠᠴᠠ ᠪᠤᠯᠵᠤ ᠠᠳᠡ ᠬᠤᠷᠠ ᠪᠤᠷᠤᠭᠠᠨ ᠤᠷᠤᠬᠤ ᠨᠢ ᠡᠳᠤᠷ ᠠᠴᠠ ᠡᠳᠤᠷ ᠪᠠᠭᠠᠰᠴᠤ ᠭᠠᠩ | ᠭᠠᠴᠢᠭ ᠪᠤᠯᠵᠤ ᠤᠷᠴᠢᠨ ᠲᠤᠭᠤᠷᠢᠨ ᠮᠠᠭᠤᠳᠠᠯᠠ ᠭᠡᠵᠤ ᠭᠠᠴᠢᠭᠳᠠᠨ ᠶᠠᠷᠢᠯᠴᠠᠬᠤ ᠪᠤᠯᠵᠠᠢ᠃ | ᠬᠤᠶᠠᠷ ᠮᠢᠩᠭᠠ ᠪᠦᠭᠡᠳ ᠲᠤᠯᠤᠭᠠᠨ ᠤᠨ ᠤ ᠵᠤᠨ ᠪᠢ ᠨᠢᠭᠡ ᠨᠠᠶᠢᠵᠠ ᠶᠢᠨ ᠢᠶᠠᠨ ᠨᠠᠶᠢᠳᠠᠯᠭᠠ ᠪᠠᠷ ᠲᠡᠭᠦᠨ | ᠤ ᠮᠠᠨᠢᠳᠤ ᠭᠠᠴᠠᠭᠠᠨ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠠᠪᠤᠭᠰᠠᠨ ᠬᠠᠶᠢᠷ ᠴᠢᠯᠠᠭᠤ ᠶᠢᠨ ᠲᠠᠯᠠᠪᠠᠢ ᠶᠢ ᠬᠠᠷᠠᠵᠤ ᠰᠠᠭᠤᠭᠰᠠᠨ | ᠶᠤᠮ᠃ ᠮᠢᠨᠤ ᠰᠠᠭᠤᠭᠰᠠᠨ ᠮᠠᠶᠢᠬᠠᠨ ᠨᠢ ᠮᠡᠯᠡᠬᠡᠢ ᠴᠢᠯᠠᠭᠤᠨ ᠠᠴᠠ ᠪᠠᠷᠠᠭᠤᠨᠰᠢ ᠪᠠᠷᠤᠭ ᠬᠤᠶᠠᠷ ᠭᠠᠵᠠᠷ ᠵᠠᠢ ᠲᠠᠢ | ᠵᠠᠰᠠᠮᠠᠯ ᠵᠠᠮ ᠤᠨ ᠪᠠᠷᠠᠭᠤᠨ ᠲᠠᠯᠠ ᠳᠤ ᠪᠠᠶᠢᠪᠠ᠃ ᠨᠢᠭᠡ ᠡᠳᠤᠷ ᠬᠠᠨᠰᠦ᠋ᠮᠡ ᠰᠤᠮᠤᠨ ᠤ ᠠᠵᠢᠯ ᠠᠴᠠ ᠪᠠᠨ | ᠠᠮᠠᠷᠠᠭᠰᠠᠨ ᠠᠬᠠᠮᠠᠳ ᠪᠠᠭᠰᠢ ᠳ᠋ᠠᠭᠳᠠᠨ ᠮᠠᠯ ᠳᠤ ᠪᠠᠨ ᠶᠠᠪᠤᠵᠤ ᠪᠠᠶᠢᠭᠠᠳ ᠮᠢᠨᠤ ᠲᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠡᠳ | ᠬᠠᠭᠤᠴᠢ ᠲᠡᠯᠭᠡᠬᠦ ᠵᠠᠪᠰᠠᠷ ᠲᠠᠭᠠᠨ ᠬᠤᠶᠠᠭᠤᠯᠠ ᠪᠠᠨ ᠤᠯᠠᠨ ᠲᠦᠮᠡᠨ ᠳᠤ ᠨᠢᠭᠡ ᠰᠠᠶᠢᠨ ᠶᠠᠪᠤᠳᠠᠯ ᠬᠢᠶᠡ ᠭᠡᠯᠡ᠃ | ᠲᠡᠭᠡᠭᠡᠳ ᠲᠡᠷᠡ ᠮᠡᠯᠡᠬᠡᠢ ᠴᠢᠯᠠᠭᠤ ᠶᠢ ᠬᠡᠨ ᠬᠦᠮᠤᠨ ᠶᠠᠭᠠᠬᠢᠵᠤ ᠬᠦᠷᠪᠡᠭᠦᠯᠦᠨ ᠬᠠᠶᠠᠭᠰᠠᠨ ᠪᠠ ᠶᠠᠭᠠᠬᠢᠵᠤ ᠤᠤᠯ | ᠤᠷᠤᠨ ᠳᠤ ᠨᠢ ᠤᠷᠤᠭᠤᠯᠵᠤ ᠲᠠᠯᠪᠢᠬᠤ ᠲᠤᠬᠠᠢ ᠶᠠᠷᠢᠭᠰᠠᠨ ᠪᠦᠬᠡᠳ ᠪᠠᠷᠤᠭ ᠬᠦᠮᠤᠨ ᠤ ᠬᠦᠴᠦ ᠪᠠᠷ ᠰᠢᠯᠵᠢᠭᠦᠯᠵᠤ | ᠲᠡᠶᠢᠯᠬᠦ ᠦᠬᠡᠢ᠂ ᠴᠢᠨᠤ ᠠᠳᠡ ᠬᠠᠶᠢᠷ ᠴᠢᠯᠠᠭᠤ ᠤᠳᠬᠤᠬᠤ ᠲᠤᠮᠤ ᠮᠠᠰᠢᠨ ᠲᠡᠷᠭᠡ ᠴᠢᠨᠢ ᠢᠷᠡᠪᠡᠯ ᠲᠠ ᠨᠢᠭᠡ | ᠬᠡᠯᠡᠵᠤ ᠦᠵᠡᠬᠦ ᠦᠭᠡᠢ ᠤᠤ ᠭᠡᠯᠡ᠃ ᠪᠢ ᠪᠠᠶᠠᠷ ᠲᠠᠢ ᠬᠦᠯᠢᠶᠡᠨ ᠠᠪᠤᠯᠠ᠃ | ᠬᠤᠶᠠᠷ ᠡᠳᠤᠷ ᠤᠨ ᠲᠠᠷᠠᠭᠠ ᠦᠨᠡᠭᠡᠷ ᠲᠤᠮᠤ ᠮᠠᠰᠢᠨ ᠲᠠᠢ ᠬᠤᠶᠠᠷ ᠵᠢᠯᠤᠭᠤᠴᠢ ᠢᠷᠡᠭᠰᠡᠨ ᠳᠤ ᠪᠢ ᠲᠡᠷᠡ | ᠬᠤᠶᠠᠷ ᠲᠤ ᠮᠤᠩᠭᠤᠯ ᠠᠶᠠᠯᠭᠤ ᠲᠠᠢ ᠬᠢᠳᠠᠳ ᠦᠭᠡ ᠪᠠᠷ ᠡᠪᠯᠡᠭᠦᠯᠤᠨ ᠬᠡᠯᠡᠵᠤ ᠭᠤᠶᠤᠵᠤ ᠦᠵᠡᠭᠰᠡᠨ ᠳᠤ ᠲᠡᠳᠡ | ᠬᠠᠷᠢᠨ ᠵᠦᠪᠰᠢᠶᠡᠷᠡᠴᠢᠬᠡᠯᠡ᠃ ᠪᠢ ᠲᠡᠷᠡ ᠲᠠᠷᠤᠢ ᠳᠤ ᠨᠢ ᠳ᠋ᠠᠭᠳᠠᠨ ᠪᠠᠭᠰᠢ ᠳᠤ ᠤᠳᠠᠰᠤᠳᠠᠵᠤ᠂ ᠮᠡᠯᠡᠬᠡᠢ ᠴᠢᠯᠠᠭᠤ | ᠶᠢ ᠲᠤᠰ ᠡᠳᠤᠷ ᠲᠡᠭᠡᠨ ᠪᠤᠰᠬᠠᠬᠤ ᠶᠢ ᠮᠡᠳᠡᠭᠳᠡᠪᠡ᠃ ᠡᠨᠡ ᠡᠳᠤᠷ ᠨᠢ ᠶᠠᠭ ᠬᠤᠶᠠᠷ ᠮᠢᠩᠭᠠ ᠪᠦᠭᠡᠳ ᠲᠤᠯᠤᠭᠠᠨ | ᠤᠨ ᠤ ᠨᠠᠢᠮᠠᠨ ᠰᠠᠷᠠ ᠶᠢᠨ ᠲᠦᠷᠪᠡᠨ ᠤ ᠡᠳᠤᠷ᠂ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠤᠯᠠᠭᠴᠢᠨ ᠭᠠᠭ᠋ᠠᠢ ᠵᠢᠯ ᠤᠨ | ᠵᠢᠷᠭᠤᠭᠠᠨ ᠰᠠᠷᠠ ᠶᠢᠨ ᠬᠤᠷᠢᠨ ᠬᠤᠶᠠᠷ ᠤᠨ ᠴᠠᠭᠠᠨ ᠮᠤᠭᠠᠢ ᠡᠳᠤᠷ ᠪᠠᠶᠢᠪᠠ᠃ ᠳ᠋ᠠᠭᠳᠠᠨ ᠪᠠᠭᠰᠢ ᠪᠢᠳᠡ | ᠬᠤᠶᠠᠭᠤᠯᠠ ᠶᠠᠭᠤ ᠴᠦ ᠪᠤᠯᠤᠭ ᠪᠡᠯᠭᠡ ᠶᠢ ᠪᠤᠳᠤᠵᠤ᠂ ᠲᠤᠰ ᠡᠳᠤᠷ ᠤᠨ ᠭᠤᠤᠯ ᠦᠳᠡ ᠶᠢᠨ ᠮᠤᠷᠢᠨ ᠴᠠᠭ ᠲᠤ | ᠮᠡᠯᠡᠬᠡᠢ ᠴᠢᠯᠠᠭᠤ ᠪᠠᠨ ᠤᠤᠯ ᠤᠷᠤᠨ ᠳᠤ ᠨᠢ ᠵᠠᠯᠠᠬᠤ ᠪᠠᠷ ᠲᠤᠭᠳᠠᠵᠤ᠂ ᠬᠤᠶᠠᠷ ᠵᠢᠯᠤᠭᠤᠴᠢ ᠲᠠᠢ ᠨᠦᠭᠡᠨ ᠤ | ᠬᠠᠵᠠᠭᠤ ᠳᠤ ᠬᠦᠷᠦᠭᠡᠳ ᠶᠠᠭᠤᠨ ᠤ ᠤᠷᠢᠳᠠ ᠨᠦᠭᠡᠨ ᠲᠤᠳᠤᠷᠠᠬᠢ ᠬᠤᠭ ᠨᠤᠪᠰᠢ ᠶᠢ ᠮᠠᠰᠢᠨ ᠢᠶᠠᠷ ᠨᠢ | ᠮᠠᠯᠳᠠᠭᠤᠯᠤᠨ ᠭᠠᠷᠭᠠᠵᠤ᠂ ᠨᠦᠭᠡᠨ ᠤ ᠢᠷᠤᠭᠠᠷ ᠤᠨ ᠴᠡᠪᠡᠷ ᠰᠢᠷᠦᠢ ᠶᠢ ᠨᠢ ᠭᠠᠷᠭᠠᠭᠠᠳ᠂ ᠮᠤᠩᠭᠤᠯ ᠤᠨ ᠠᠷᠢᠭᠤᠨ | ᠵᠠᠩᠰᠢᠯ ᠢᠶᠠᠷ ᠢᠶᠠᠨ ᠰᠠᠩ ᠲᠠᠯᠪᠢᠨ ᠠᠷᠢᠭᠤᠳᠬᠠᠭᠰᠠᠨ ᠤ ᠲᠠᠷᠠᠭᠠ ᠮᠠᠰᠢᠨ ᠢᠶᠠᠷ ᠤᠤᠯ ᠤᠨ ᠤᠪᠤᠭᠠᠯᠠᠵᠤ | ᠬᠠᠶᠠᠭᠰᠠᠨ ᠰᠢᠷᠤᠢ ᠶᠢ ᠨᠢ ᠤᠷᠤᠭᠤᠯᠵᠤ ᠲᠡᠭᠰᠢᠯᠡᠭᠡᠳ᠂ ᠰᠢᠷᠤᠢ ᠲᠡᠭᠡᠭᠡᠬᠦ ᠮᠠᠰᠢᠨ ᠤ ᠤᠤᠬᠤᠭᠤᠷ ᠢᠶᠠᠷ | ᠲᠦᠯᠬᠢᠭᠦᠯᠦᠨ ᠠᠪᠴᠢᠷᠠᠵᠤ ᠤᠤᠯ ᠤᠷᠤᠨ ᠳᠤ ᠨᠢ ᠵᠠᠯᠠᠪᠠ᠃ ᠲᠡᠭᠡᠭᠡᠳ ᠳ᠋ᠠᠭᠳᠠᠨ ᠪᠠᠭᠰᠢ ᠪᠢᠳᠡ ᠬᠤᠶᠠᠷ ᠮᠡᠯᠡᠬᠡᠢ | ᠴᠢᠯᠠᠭᠤᠨ ᠤ ᠡᠯᠢᠭᠡᠨ ᠲᠤᠤᠷᠠ ᠨᠢ ᠲᠡᠮᠦᠷᠯᠢᠭ ᠵᠤᠭᠤᠰ ᠪᠠ ᠴᠠᠭᠠᠰᠤᠨ ᠵᠤᠭᠤᠰ᠂ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ᠂ | ᠲᠤᠳᠤᠷᠭᠠ ᠵᠡᠷᠭᠡ ᠪᠠᠷ ᠲᠠᠪᠤᠨ ᠲᠠᠷᠢᠶᠠ ᠶᠢᠨ ᠦᠷᠡ ᠵᠡᠷᠭᠡ ᠶᠢ ᠤᠷᠤᠯᠠᠭᠤᠯᠤᠨ ᠲᠠᠷᠤᠵᠤ ᠲᠠᠯᠪᠢᠭᠠᠳ ᠲᠠᠬᠢᠨ ᠰᠠᠩ | ᠲᠠᠯᠪᠢᠵᠤ ᠠᠷᠢᠭᠤᠯᠠᠭᠠᠳ ᠠᠷᠢᠬᠢ ᠰᠡᠷᠵᠢᠮᠯᠡᠨ᠂ ᠭᠤᠷᠪᠠᠨ ᠮᠤᠳᠤ ᠪᠠᠷ ᠴᠢᠭ ᠲᠠᠳᠠᠵᠤ᠂ ᠤᠤᠯ ᠤᠨ ᠬᠠᠷᠠᠭᠠ ᠶᠢ ᠨᠢ | ᠲᠠᠭᠠᠷᠠᠭᠤᠯᠤᠨ ᠬᠦᠬᠡ ᠱᠤᠷᠤᠩ ᠠᠭᠤᠯᠠ ᠶᠢᠨ ᠵᠦᠭ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠪᠠ᠃ | ᠮᠠᠨ ᠢ ᠮᠡᠯᠡᠬᠡᠢ ᠴᠢᠯᠠᠭᠤ ᠶᠢ ᠵᠠᠯᠠᠵᠤ ᠲᠠᠭᠤᠰᠬᠤ ᠶᠢᠨ ᠵᠡᠷᠭᠡ ᠪᠠᠷ ᠤᠶᠢᠷᠠ ᠬᠠᠪᠢ ᠶᠢᠨ ᠮᠠᠯᠴᠢᠳ ᠠᠷᠪᠠ | ᠭᠠᠷᠤᠢ ᠬᠦᠮᠤᠨ ᠭᠤᠷᠪᠠᠨ ᠬᠦᠷᠳᠦᠳᠦ ᠲᠡᠷᠭᠡ᠂ ᠮᠤᠲ᠋ᠤᠷ ᠪᠤᠶᠤ ᠮᠤᠷᠢ ᠪᠠᠷ ᠬᠦᠷᠦᠯᠴᠡᠨ ᠢᠷᠡᠵᠡᠭᠡᠵᠤ᠂ ᠴᠠᠭᠠᠨ | ᠢᠳᠡᠭᠡ᠂ ᠠᠷᠢᠬᠢ ᠰᠠᠷᠬᠤᠳ ᠵᠡᠷᠭᠡ ᠶᠢ ᠡᠷᠭᠦᠵᠤ ᠪᠠᠶᠢᠪᠠ᠃ ᠲᠡᠭᠡᠭᠡᠳ ᠪᠢᠳᠡ ᠬᠤᠵᠢᠮᠳᠠᠵᠤ ᠢᠷᠡᠭᠰᠡᠨ ᠲᠡᠭᠦᠤ ᠨᠡᠷ | ᠮᠢᠨᠢ ᠡ᠂ ᠲᠠ ᠨᠠᠷ ᠬᠡᠷᠪᠡ ᠬᠤᠶᠠᠷ ᠡᠪᠤᠭᠡᠨ ᠤ ᠡᠨᠡ ᠡᠳᠤᠷ ᠤᠨ ᠬᠢᠭᠰᠡᠨ ᠦᠢᠯᠡ ᠠᠵᠢᠯᠯᠠᠭᠠ ᠶᠢ ᠲᠡᠮᠵᠢᠳᠡᠭ ᠲᠤ | ᠬᠦᠷᠪᠡᠯ᠂ ᠡᠨᠡ ᠨᠦᠭᠡᠨ ᠠᠴᠠ ᠮᠠᠯᠳᠠᠵᠤ ᠭᠠᠷᠭᠠᠭᠰᠠᠨ ᠬᠤᠭ ᠨᠤᠪᠰᠢ ᠶᠢ ᠬᠤᠯᠠᠬᠠᠨ ᠰᠢᠭ᠋ ᠨᠢᠳᠤᠨ ᠲᠠᠯᠳᠠ ᠭᠠᠵᠠᠷ | ᠠᠪᠠᠴᠢᠵᠤ ᠬᠠᠶᠠᠭᠠᠳ ᠦᠭᠪᠡᠯ ᠮᠠᠨᠤᠰ ᠤᠨ ᠠᠵᠢᠯ ᠳᠤ ᠶᠡᠭᠡ ᠲᠤᠰᠠ ᠪᠤᠯᠬᠤ ᠮᠦᠷᠲᠡᠭᠡᠨ ᠪᠤᠶᠠᠨ ᠪᠤᠯᠤᠨᠠ ᠰᠢᠤ | ᠭᠡᠰᠡᠨ ᠳᠤ ᠲᠡᠳᠡᠨᠡᠷ ᠪᠠᠶᠠᠷᠲᠠᠢ ᠪᠠᠷ ᠬᠦᠯᠢᠶᠡᠨ ᠠᠪᠴᠤ ᠲᠡᠷᠡ ᠬᠦ ᠬᠤᠭ ᠨᠤᠪᠰᠢ ᠶᠢ ᠪᠦᠬᠦᠨ ᠢ ᠴᠡᠪᠡᠷᠯᠡᠨ | ᠠᠷᠢᠯᠭᠠᠵᠠᠢ᠃ ᠳ᠋ᠠᠭᠳᠠᠨ ᠪᠠᠭᠰᠢ ᠪᠢᠳᠡ ᠬᠤᠶᠠᠭᠤᠯᠠ ᠪᠠᠨ ᠮᠠᠰᠢᠨ ᠲᠡᠷᠭᠡᠨ ᠤ ᠬᠤᠶᠠᠷ ᠵᠢᠯᠤᠭᠤᠴᠢ ᠳᠤ ᠪᠠᠭᠠ | ᠪᠤᠯᠪᠠᠴᠤ ᠰᠡᠳᠬᠢᠯ ᠪᠤᠯᠭᠠᠵᠤ ᠲᠤᠰ ᠲᠤᠰ ᠬᠤᠶᠠᠷ ᠬᠡᠪ ᠬᠤᠷᠤᠳ᠂ ᠴᠢᠪᠠᠭᠠ ᠶᠢᠨ ᠬᠠᠷᠠ ᠠᠷᠢᠬᠢ ᠲᠠᠢ ᠦᠭᠭᠦᠭᠡᠳ | ᠡᠨᠡ ᠬᠦ ᠬᠦᠰᠡᠭᠰᠡᠨ ᠠᠵᠢᠯᠯᠠᠭᠠ ᠪᠠᠨ ᠪᠡᠶᠡᠯᠡᠭᠦᠯᠦᠭᠰᠡᠨ ᠶᠤᠮ᠃ | ᠮᠦᠨ ᠡᠳᠤᠷ ᠤᠨ ᠦᠳᠡ ᠶᠢᠨ ᠬᠤᠶᠢᠨᠠ ᠲᠡᠭᠷᠢ ᠲᠤᠤᠭᠠᠷᠴᠤ ᠠᠯᠳᠠᠨ ᠡᠮᠡᠭᠡᠯ ᠪᠠ ᠮᠠᠨᠢᠳᠤ ᠭᠠᠴᠠᠭᠠᠨ ᠳᠤ | ᠪᠤᠷᠤᠭᠠᠨ ᠤᠷᠤᠪᠠ᠃ ᠬᠤᠶᠠᠷ ᠡᠳᠤᠷ ᠤᠨ ᠲᠠᠷᠠᠭᠠ ᠨᠢ ᠴᠤᠬᠤᠮ ᠲᠡᠭᠷᠢ ᠠᠪᠤ ᠶᠢᠨ ᠪᠤᠷᠤᠭᠠᠨ ᠤᠷᠤᠬᠤ ᠴᠠᠭ ᠨᠢ | ᠪᠤᠯᠤᠭᠰᠠᠨ ᠤ ᠶᠤᠮ ᠤᠤ᠂ ᠮᠡᠯᠡᠭᠡᠢ ᠴᠢᠯᠠᠭᠤ ᠶᠢ ᠤᠷᠤᠨ ᠳᠤ ᠨᠢ ᠵᠠᠯᠠᠭᠰᠠᠨ ᠤ ᠤᠴᠢᠷ ᠶᠤᠮ ᠤᠤ ᠪᠤᠤ ᠮᠡᠳᠡ | ᠭᠤᠷᠪᠠᠨ ᠡᠳᠤᠷ ᠤᠨ ᠦᠷᠭᠦᠯᠵᠢᠯᠡᠭᠰᠡᠨ ᠪᠤᠷᠤᠭᠠᠨ ᠤᠷᠤᠵᠤ ᠭᠠᠩ ᠲᠠᠶᠢᠯᠤᠭᠳᠠᠵᠤ᠂ ᠮᠠᠨᠢᠳᠤ ᠭᠠᠴᠠᠭᠠ ᠪᠠ ᠪᠠᠶᠠᠨ | ᠬᠤᠰᠢᠭᠤ ᠭᠠᠴᠠᠭᠠ ᠶᠢᠨ ᠮᠠᠯᠴᠢᠳ ᠳ᠋ᠠᠭᠳᠠᠨ ᠪᠠᠭᠰᠢ ᠪᠢᠳᠡ ᠬᠤᠶᠠᠷ ᠢ ᠤᠯᠠᠨ ᠲᠦᠮᠡᠨ ᠳᠤ ᠪᠤᠶᠠᠨ ᠦᠢᠯᠡᠳᠦᠯᠡ | ᠭᠡᠵᠤ ᠪᠠᠶᠠᠷ ᠲᠠᠯᠠᠷᠬᠠᠯ ᠲᠡᠪᠰᠢᠭᠦᠯᠵᠤ ᠪᠠᠶᠢᠯᠠ᠃ | ᠡᠪᠤᠭᠡᠨ ᠪᠠᠭᠰᠢ ᠳ᠋ᠠᠭᠳᠠᠨ ᠤ ᠰᠠᠨᠠᠭᠠᠴᠢᠯᠠᠨ ᠨᠠᠶᠢᠳᠠᠭᠰᠠᠨ ᠢᠶᠠᠷ | ᠡᠬᠡ ᠪᠠᠶᠢᠭᠠᠯᠢ ᠳᠤ ᠪᠠᠨ ᠤᠨᠴᠠ ᠶᠢᠨ ᠬᠠᠶᠢᠷᠠ ᠲᠠᠢ ᠪᠢ | ᠬᠦᠮᠤᠨ ᠤ ᠬᠦᠷᠪᠡᠭᠦᠯᠦᠨ ᠬᠠᠶᠠᠭᠰᠠᠨ ᠮᠡᠯᠡᠬᠡᠢ ᠴᠢᠯᠠᠭᠤ ᠶᠢ | ᠬᠦᠬᠡ ᠱᠤᠷᠤᠩ ᠤᠨ ᠦᠭᠡᠳᠡ ᠤᠤᠯ ᠶᠠᠩᠵᠤ ᠪᠠᠷ ᠨᠢ ᠲᠠᠬᠢᠨᠳᠠ ᠵᠠᠯᠠᠪᠠᠢ᠃ | ᠬᠦᠮᠤᠰ ᠡ᠂ ᠡᠬᠡ ᠪᠠᠶᠢᠭᠠᠯᠢ ᠤᠷᠴᠢᠨ ᠠᠬᠤᠢ ᠪᠠᠨ ᠲᠡᠭᠡᠳᠦᠯᠡᠵᠤ ᠶᠠᠪᠤᠵᠠᠭᠠᠶᠠ︕ | ᠠᠭᠤᠯᠠ ᠤᠰᠤᠨ ᠤ ᠡᠵᠡᠳ ᠰᠠᠭᠢᠭᠤᠰᠤᠨ ᠳᠤ ᠪᠠᠨ ᠰᠦᠰᠦᠭᠯᠡᠨ ᠲᠠᠭᠠᠳᠬᠠᠶᠠ︕ | ᠤᠮ ᠰᠠᠶᠢᠨ ᠠᠮᠤᠭᠤᠯᠠᠩᠳᠠᠨ ᠪᠤᠯᠳᠤᠭᠠᠢ︕ | ᠤᠯᠠᠮ ᠰᠠᠶᠢᠨ ᠵᠢᠷᠭᠠᠯᠠᠩᠳᠠᠨ ᠪᠤᠯᠳᠤᠭᠠᠢ︕ | 2019.10.11 | ᠪᠤᠷᠵᠢᠭᠢᠨ ᠰᠠᠮᠪᠠᠯ ᠵᠤᠬᠢᠶᠠᠪᠠ |