ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠠᠯᠢᠮᠠᠭ ᠮᠣᠩᠭᠤᠯ ᠤᠨ ᠵᠢᠭᠡ ᠬᠦᠦ ᠯᠧᠨᠢᠨ᠂ ᠬᠠᠷᠠᠴᠢᠨ ᠸᠠᠩ ᠭᠦᠩᠰᠡᠩᠨᠤᠷᠪᠤ ᠶᠢᠨ ᠵᠢᠭᠡ ᠣᠬᠢᠨ ᠮᠠᠨᠯᠢᠨ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/2/22
     ᠨᠢᠭᠡ᠂ ᠬᠠᠯᠢᠮᠠᠭ ᠮᠤᠩᠭᠤᠯ ᠭᠡᠵᠦ ᠰᠣᠨᠤᠰᠴᠤ ᠭᠠᠷ ᠪᠠᠷᠢᠯᠴᠠᠭᠰᠠᠨ      ᠭᠠᠯ ᠵᠠᠯᠠᠭᠤ ᠽᠠᠨᠳᠠᠨ ᠰᠠᠶᠢᠬᠠᠨ ᠨᠠᠰᠤᠨ᠎ᠠ ᠬᠠᠯᠢᠮᠠᠭ ᠮᠤᠩᠭᠤᠯ ᠭᠡᠰᠡᠨ ᠨᠡᠷ᠎ᠡ ᠶᠢ ᠰᠠᠶ᠋ᠢ ᠤᠯᠵᠤ ᠰᠤᠨᠤᠰᠴᠤ ᠬᠠᠯᠢᠮᠠᠭᠴᠣᠳ ᠣᠶᠢᠷᠠᠳ ᠮᠤᠩᠭᠤᠯ ᠪᠤᠯᠬᠤ ᠶᠢ ᠠᠩᠬ᠎ᠠ ᠤᠯᠵᠤ ᠮᠡᠳᠡᠭᠰᠡᠨ ᠶᠤᠮᠰᠠᠨ᠃ ᠬᠠᠯᠢᠮᠠᠭ ᠡᠮᠡᠭᠳᠠᠢ ᠶᠢᠨ ᠬᠠᠯᠠᠭᠤᠨ ᠭᠠᠷ ᠢ ᠠᠳᠬᠤᠵᠤ ᠳᠠᠨᠢᠯᠴᠠᠭᠰᠠᠨ ᠢ ᠬᠤᠷᠤᠭᠤ ᠳᠠᠷᠤᠨ ᠡᠷᠭᠢᠴᠡᠭᠦᠯᠦᠨ ᠪᠤᠳᠤᠪᠠᠰᠤ ᠵᠢᠷᠠ ᠰᠢᠬᠠᠮ ᠵᠢᠯ  ᠤᠨ ᠡᠮᠦᠨᠡᠬᠢ ᠤᠴᠠᠷᠠᠯ᠃ ᠮᠡᠬᠦᠰ ᠪᠢ 1956 ᠤᠨ ᠳᠤ ᠠᠶᠢᠮᠠᠭ ᠬᠤᠰᠢᠭᠤᠨ ᠤ ᠭᠤᠤᠯᠳᠠᠯᠭ᠎ᠠ ᠲᠠᠢ ᠪᠦᠷᠢᠨ ᠪᠠᠭ᠎ᠠ ᠰᠤᠷᠭᠠᠠᠭᠤᠯᠢ ᠪᠤᠯᠬᠤ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠬᠤᠨᠳᠤ ᠪᠦᠷᠢᠨ ᠪᠠᠭ᠎ᠠ ᠰᠤᠷᠭᠠᠠᠭᠤᠯᠢ ᠳᠤ ᠳᠠᠷᠤᠭᠠᠯᠠᠵᠤ ᠪᠠᠶᠢᠭᠰᠠᠨ ᠦᠶ᠎ᠡ ᠳᠤ᠂ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠤᠳᠠᠰᠤ ᠢᠷᠡᠭᠦᠯᠵᠦ ᠨᠠᠮᠠᠢᠢ××  ᠤ ᠡᠳᠦᠷ ᠠᠶᠢᠮᠠᠭ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ —  ᠤᠯᠠᠭᠠᠨᠬᠠᠳᠠ ᠳᠤ ᠨᠡᠷ᠎ᠡ ᠮᠡᠳᠡᠭᠦᠯᠦᠨ ︽ᠬᠦᠬᠡᠬᠤᠳᠠᠨ᠎ᠠ ᠪᠦᠬᠦ ᠤᠯᠤᠰ ᠤᠨ ᠮᠤᠩᠭᠤᠯ ᠦᠬᠡ ᠬᠡᠯᠡ᠂ ᠦᠰᠦᠭ ᠪᠢᠴᠢᠭ ᠤᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠰᠣᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ ᠳᠤ ᠤᠷᠤᠯᠴᠠᠳᠤᠭᠠᠢ︾ ᠭᠡᠪᠡ᠃ ᠡᠷᠳᠡᠮ ᠰᠢᠨᠵᠢᠯᠡᠭᠡ ᠭᠡᠵᠦ ᠶᠠᠭᠤ ᠶᠢ ᠴᠦ ᠮᠡᠳᠡᠬᠦ ᠦᠭᠡᠢ᠃ ᠢᠯᠠᠩᠭᠤᠶ᠎ᠠ ︽ᠪᠦᠬᠦ ᠤᠯᠤᠰ ᠤᠨ︾ ᠭᠡᠰᠡᠨ ᠢ ᠰᠣᠨᠤᠰᠤᠭᠠᠳ ᠪᠠᠶᠠᠷᠯᠠᠬᠤ᠂ ᠬᠡᠯᠮᠡᠭᠳᠡᠬᠦ ᠵᠡᠷᠭᠡᠴᠡᠨ ᠲᠤᠩ ᠠᠯᠮᠠᠶᠢᠷᠠᠪᠠ᠃ ᠭᠡᠪᠡᠴᠦ 25 ᠨᠠᠰᠤᠨ ᠤ ᠡᠮᠨᠢᠭ ᠤᠷᠤᠭ᠎ᠠ ᠳᠤ ᠤᠮᠤᠭᠳᠠᠶᠢᠬᠠᠨ ᠭᠠᠷ ᠰᠠᠵᠢᠵᠦ ᠠᠶᠢᠮᠠᠭ ᠤᠨ ᠲᠦᠪ ᠲᠤ ᠳᠠᠯᠪᠢᠭᠠᠳ ᠬᠦᠷᠬᠦ ᠳᠤ᠂ ᠤᠷᠤᠨ ᠠᠶᠢᠮᠠᠭ ᠤᠨ ᠭᠤᠤᠯᠳᠠᠯᠭ᠎ᠠ ᠲᠠᠢ ᠮᠤᠩᠭᠤᠯ ᠠᠩᠬ᠎ᠠ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶᠢᠨ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠤᠨ ᠡᠷᠬᠢᠯᠡᠭᠴᠢ ᠮᠢᠨᠤ ᠪᠠᠭᠰᠢ ᠲᠡᠭᠦᠰᠪᠢᠯᠢᠭ ᠬᠢᠭᠡᠳ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠡᠪ ᠬᠠᠮᠳᠤ ᠵᠠᠯᠠᠭᠤᠴᠤᠳ ᠤᠨ ᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠦᠯᠵᠡᠢ ᠨᠠᠷ ᠲᠠᠢ ᠭᠠᠯ ᠨᠡᠶᠢᠯᠡᠵᠦ ᠬᠦᠬᠡᠬᠤᠳᠠ ᠶᠢ ᠴᠢᠭᠯᠡᠯ᠎ᠡ᠃      ᠡᠨᠡ ᠬᠤᠷᠠᠯ ᠳᠤ ᠬᠤᠶᠠᠷ ᠵᠠᠭᠤᠭᠠᠳ ᠬᠦᠮᠦᠨ ᠤᠷᠤᠯᠴᠠᠵᠠᠢ᠃ ᠲᠦᠪ ᠠᠴᠠ ᠤᠷᠤᠯᠴᠠᠭᠰᠠᠳ ᠢ ᠳᠠᠨᠢᠯᠴᠠᠭᠤᠯᠬᠤ ᠳᠤ ᠮᠠᠤ ᠵᠦᠰᠢ ᠶᠢᠨ ᠪᠠᠭᠰᠢ᠂ ᠨᠠᠮ ᠤᠨ ᠬᠡᠳᠦᠨ ᠨᠠᠰᠣᠳᠠᠨ ᠤ ᠨᠢᠭᠡ᠂ ᠪᠦᠬᠦ ᠤᠯᠤᠰ ᠤᠨ ᠦᠰᠦᠭ ᠪᠢᠴᠢᠭ ᠢ ᠦᠭᠡᠷᠡᠴᠢᠯᠡᠬᠦ ᠵᠦᠪᠯᠡᠯ ᠤᠨ ᠳᠠᠷᠤᠭ᠎ᠠ ᠡᠦ ᠢᠦᠢ ᠵᠠᠩ ᠭᠡᠵᠦ ᠳᠠᠨᠢᠯᠴᠠᠭᠤᠯᠬᠤ ᠳᠤ ᠤᠷᠤᠨ ᠤ ᠨᠠᠮ ᠤᠨ ᠬᠤᠷᠢᠶ᠎ᠠ ᠶᠢᠨ ᠱᠦᠵᠢ ᠸᠠᠩ ᠳ᠋ᠥᠸᠧ ᠳᠠᠶᠠᠭ ᠢ ᠨᠢ ᠪᠠᠷᠢᠵᠤ ᠡᠮᠦᠨ᠎ᠡ ᠬᠤᠶᠢᠨ᠎ᠠ ᠨᠢ ᠪᠠᠷ᠎ᠠ ᠪᠤᠯᠵᠤ ᠪᠠᠶᠢᠭᠰᠠᠨ᠃      ᠬᠤᠷᠠᠯ ᠳᠤ ᠪᠦᠬᠦ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠲᠦᠯᠦᠭᠡᠯᠡᠭᠴᠢᠳ ᠮᠤᠩᠭᠤᠯ ᠦᠭᠡ ᠬᠡᠯᠡ᠂ ᠦᠰᠦᠭ ᠪᠢᠴᠢᠭ ᠢᠶᠠᠨ ᠬᠡᠷᠡᠭᠯᠡᠵᠦ ᠪᠠᠶᠢᠭ᠎ᠠ ᠮᠤᠵᠢ᠂ ᠬᠤᠳᠠ᠂ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ᠂ ᠵᠸᠦ᠂ ᠰᠢᠶᠠᠨ ᠤ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠳ ᠰᠣᠳᠤᠯᠭᠠᠳᠠᠳ ᠠᠴᠠ ᠭᠠᠳᠠᠨ᠎ᠠ ᠵᠦᠪᠯᠡᠯᠳᠦ ᠬᠤᠯᠪᠤᠭᠠᠳᠤ ᠤᠯᠤᠰ ᠤᠨ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠨ ᠳᠠᠳᠠᠶᠠᠸᠠ᠂ ᠴᠤᠷᠴᠤᠽᠤᠩᠬᠸ᠎ᠠ ᠤᠷᠤᠯᠴᠠᠪᠠ᠃ ᠬᠤᠷᠠᠯ ᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠬᠡᠯᠡᠨ ᠤ ᠠᠯᠳᠠᠷᠳᠤ ᠡᠷᠳᠡᠮᠳᠡᠨ ᠴᠡᠩᠬᠡᠯᠳᠠᠢ᠂ ᠡᠷᠳᠡᠨᠢᠳᠤᠭᠳᠠᠬᠤ ᠪᠠᠭᠰᠢ ᠴᠦ ᠨᠠᠭᠠᠰᠢ ᠴᠠᠭᠠᠰᠢ ᠬᠦᠯ ᠪᠤᠯᠵᠤ ᠯᠡ ᠪᠠᠶᠢᠭᠰᠠᠨ᠃      ᠬᠤᠷᠠᠯ ᠤᠨ ᠭᠤᠤᠯ ᠠᠭᠤᠯᠭ᠎ᠠ ᠨᠢ ᠪᠤᠰᠤᠭ᠎ᠠ ᠮᠤᠩᠭᠤᠯ ᠦᠰᠦᠭ ᠢ ᠦᠭᠡᠷᠡᠴᠢᠯᠡᠵᠦ ᠺᠢᠷᠢᠯ ᠦᠰᠦᠭ ᠢ ᠬᠡᠷᠡᠭᠯᠡᠬᠦ ᠪᠠ ᠡᠰᠡᠬᠦ ᠶᠢ ᠰᠣᠳᠤᠯᠤᠨ ᠶᠠᠷᠢᠯᠴᠠᠪᠠ᠃ ᠤᠷᠤᠰ ᠬᠦᠮᠦᠨ ᠲᠠᠢ ᠬᠤᠷᠠᠯ ᠳᠤ ᠬᠠᠮᠳᠤ ᠰᠠᠭᠤᠭᠰᠠᠨ ᠢᠶᠠᠨ ᠶᠡᠭᠡ ᠭᠠᠶᠢᠬᠠᠯ ᠪᠤᠯᠭᠠᠵᠤ᠂ ᠬᠤᠷᠠᠯ ᠤᠨ ᠵᠠᠪᠰᠠᠷ ᠲᠤ ᠬᠠᠯᠢᠮᠠᠭ ᠮᠤᠩᠭᠤᠯ ᠳᠠᠳᠠᠶᠠᠸᠠ ᠲᠠᠢ ᠳᠠᠨᠢᠯᠴᠠᠬᠤ ᠪᠠᠷ ᠵᠠᠯᠠᠭᠤ ᠨᠠᠰᠤᠨ ᠤ ᠰᠤᠨᠢᠭᠤᠴᠢ ᠬᠡᠬᠦ ᠦᠦ︖ ᠮᠤᠩᠭᠤᠯ ᠭᠡᠰᠡᠨ ᠳᠤ᠂ ᠡᠯᠢᠭᠡ ᠳᠠᠳᠠᠭᠳᠠᠭᠰᠠᠨ ᠤ ᠦᠦ︖ ᠡᠷᠢᠨ ᠬᠦᠷᠬᠦ  ᠳᠤ ᠳᠠᠳᠠᠶᠠᠸᠠ ᠲᠤᠩ ᠬᠠᠯᠠᠭᠤᠮᠰᠤᠭ ᠢᠶᠠᠷ ᠬᠦᠯᠢᠶᠡᠨ ᠠᠪᠴᠤ᠄ ︽ᠪᠢ ᠬᠠᠯᠢᠮᠠᠭ ᠮᠤᠩᠭᠤᠯ᠂ ᠮᠢᠨᠤ ᠡᠷᠡᠭᠳᠠᠢ ᠴᠤᠷᠴᠤᠽᠤᠩᠬᠸ᠎ᠠ ᠪᠤᠯ ᠤᠷᠤᠰ ᠬᠦᠮᠦᠨ᠃ ᠪᠢᠳᠡ ᠬᠠᠮᠳᠤ ᠪᠠᠷ ᠮᠤᠩᠭᠤᠯ ᠦᠰᠦᠭ ᠪᠢᠴᠢᠭ ᠲᠤ ᠰᠣᠳᠤᠯᠭᠠᠨ ᠬᠢᠵᠦ ᠪᠠᠶᠢᠨ᠎ᠠ︾ ᠭᠡᠵᠦ ᠭᠠᠷ ᠠᠳᠬᠤᠯᠴᠠᠪᠠ᠃ ᠨᠠᠳᠠ ᠶᠢ ᠬᠠᠮᠢᠭᠠᠬᠢ ᠶᠢ ᠰᠣᠨᠤᠰᠤᠭᠠᠳ ᠲᠡᠷᠡ᠄ ︽ᠤᠤᠬᠠᠢ︕ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠬᠢ ᠦᠦ︖ ᠪᠢ ᠡᠨᠡ ᠬᠠᠪᠤᠷ ᠯᠢᠨᠳᠦ᠋ᠩ ᠳᠤ ᠬᠦᠷᠦᠭᠰᠡᠨ ᠳᠤ ᠪᠠᠨ ᠳᠠᠨ ᠤ ᠬᠤᠰᠢᠭᠤᠨ  ᠤ ᠮᠠᠨᠢᠵᠠᠪ ᠲᠠᠢ ᠠᠭᠤᠯᠵᠠᠨ ᠶᠠᠷᠢᠯᠴᠠᠭᠰᠠᠨ ᠰᠢᠦ︾ ᠭᠡᠪᠡ᠃ ᠡᠨᠡ ᠪᠤᠯ ᠮᠢᠨᠤ ᠬᠠᠯᠢᠮᠠᠭ ᠬᠦᠮᠦᠨ ᠲᠠᠢ ᠬᠠᠮᠤᠭ ᠠᠩᠬᠠᠳᠤᠭᠴᠢ ᠤᠳᠠᠭ᠎ᠠ ᠶᠢᠨ ᠠᠭᠤᠯᠵᠠᠯᠳᠠ᠂ ᠮᠦᠨ ᠴᠦ ᠬᠠᠯᠢᠮᠠᠭ ᠡᠮᠡᠭᠳᠠᠢ ᠶᠢᠨ ᠬᠠᠯᠠᠭᠤᠨ ᠭᠠᠷ ᠢ ᠪᠠᠷᠢᠭᠰᠠᠨ ᠠᠩᠬ᠎ᠠ ᠤᠳᠠᠭ᠎ᠠ᠃ ᠳᠠᠳᠠᠶᠠᠸᠠ ᠨᠠᠮ ᠭᠡᠰᠡᠨ ᠪᠡᠶ᠎ᠡ ᠲᠠᠢ᠂ ᠴᠡᠪᠡᠷ ᠴᠡᠮᠴᠡᠭᠡᠷ ᠠᠰᠤᠷᠤ ᠭᠤᠸ᠎ᠠ ᠭᠡᠭᠡᠨᠴᠢᠷ ᠬᠦᠮᠦᠨ᠃ ᠤᠷᠴᠢᠮ ᠮᠢᠨᠤ ᠨᠢᠭᠡᠨ ᠨᠠᠶᠢᠵᠠ ᠲᠧᠯᠸᠢᠰ ᠠᠴᠠ ᠡᠯᠡᠰᠦᠳᠠᠢ ᠬᠤᠳᠠ ᠭᠡᠰᠡᠨ ᠢ ᠦᠵᠡᠭᠡᠳ ᠬᠠᠮᠢᠭᠠᠬᠢ ᠶᠢ ᠯᠠᠪᠯᠠᠭᠰᠠᠨ  ᠳᠤ ᠠᠯᠳᠠᠨ ᠶᠠᠰᠤᠨ ᠤ ᠬᠡᠯᠬᠢᠶ᠎ᠡ᠂ ᠠᠯᠠᠭ ᠮᠢᠬᠠᠨ ᠤ ᠳᠠᠰᠤᠷᠬᠠᠢ ᠭᠡᠵᠦ ᠠᠮᠳᠠᠷᠬᠠᠨ ᠤᠩᠰᠢᠵᠤ ᠳᠡᠮᠳᠡᠭᠯᠡᠭᠰᠡᠨ ᠢᠶᠠᠷ   ᠢᠶᠠᠨ ᠡᠯᠡᠰᠦᠳᠠᠢ ᠬᠤᠳᠠ ᠬᠠᠯᠢᠮᠠᠭ ᠤᠨ ᠲᠤᠬᠠᠢ ᠪᠦᠦᠷ ᠲᠦᠦᠷ ᠳᠠᠨᠢᠯᠴᠠᠭᠤᠯᠤᠭᠰᠠᠨ ᠶᠤᠮ᠃      ᠬᠤᠶᠠᠷ᠂ ᠬᠠᠯᠢᠮᠠᠭ ᠮᠤᠩᠭᠤᠯ ᠤᠨ ᠡᠬᠢ ᠡᠭᠦᠰᠦᠯ      ᠬᠠᠯᠢᠮᠠᠭ ᠮᠤᠩᠭᠤᠯ ᠤᠳᠤ ᠤᠷᠤᠰ ᠤᠨ ᠬᠤᠯᠪᠤᠭᠠᠨ ᠤ ᠪᠦᠭᠦᠳᠡ ᠨᠠᠶᠢᠷᠠᠮᠳᠠᠬᠤ ᠬᠠᠯᠢᠮᠠᠭ ᠤᠯᠤᠰ᠃ ᠨᠡᠶᠢᠰᠯᠡᠯ ᠨᠢ ᠡᠯᠡᠰᠦᠳᠠᠢ ᠬᠤᠳᠠ᠃ ᠬᠠᠯᠢᠮᠠᠭ ᠨᠡᠷ᠎ᠡ ᠶᠢᠨ ᠡᠬᠢ ᠡᠭᠦᠰᠦᠯ ᠢ ᠯᠠᠪᠯᠠᠬᠤ ᠳᠤ 17 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢ ᠪᠠᠷ ᠡᠷᠴᠢᠰ ᠮᠦᠷᠡᠨ ᠳᠠᠭᠠᠤ ᠨᠤᠳᠤᠭᠰᠢᠨ ᠮᠠᠯᠵᠢᠵᠤ ᠪᠠᠶᠢᠭᠰᠠᠨ ᠣᠶᠢᠷᠠᠳ ᠮᠤᠩᠭᠤᠯᠴᠤᠳ ᠦᠷᠦᠨᠡᠰᠢᠯᠡᠵᠦ ᠸᠤᠯᠭ᠎ᠠ ᠮᠦᠷᠡᠨ ᠬᠦᠷᠴᠦ ᠨᠤᠳᠤᠭᠰᠢᠨ ᠳᠠᠬᠢᠨ ᠳᠤᠷᠤᠨᠠᠰᠢ ᠪᠤᠴᠠᠬᠤ ᠳᠤ ᠦᠯᠡᠳᠡᠵᠦ ᠬᠤᠴᠤᠷᠤᠭᠰᠠᠨ ᠤᠶᠢᠷᠠᠳ ᠮᠤᠩᠭᠤᠯ ᠠᠶᠢᠮᠠᠭ ᠪᠤᠯᠤᠨ᠎ᠠ᠃ ᠲᠦᠷᠺ ᠬᠡᠯᠡ ᠪᠠᠷ ᠳᠡᠳᠡᠨ ᠢ ︽ᠬᠠᠯᠢᠮᠠᠭ︾ ᠭᠡᠵᠦ ᠳᠠᠭᠤᠳᠠᠳᠠᠭ ᠠᠴᠠ ᠡᠶᠢᠮᠦ ᠨᠡᠷ᠎ᠡ ᠲᠠᠢ ᠪᠤᠯᠪᠠ᠃ ︽ᠤᠶᠢᠷᠠᠳ︾ ᠭᠡᠰᠡᠨ ᠨᠡᠷ᠎ᠡ ᠶᠢ ᠰᠣᠳᠤᠯᠵᠤ ᠰᠢᠨᠵᠢᠬᠦ ᠳᠤ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾ ᠳᠤ᠄ ︽ᠳᠠᠬᠢᠶ᠎ᠠ ᠵᠢᠯ ︵1201 ᠤᠨ︶ ᠳᠤ ᠡᠷᠭᠦᠨ᠎ᠡ ᠮᠦᠷᠡᠨ ᠳᠤ ᠴᠢᠳᠬᠤᠬᠤ ᠭᠡᠭᠡᠨ ᠮᠦᠷᠡᠨ  ᠤ ᠰᠢᠨᠡ ᠶᠢᠨ ᠠᠭᠤ ᠨᠤᠭᠤ ᠳᠤ ᠵᠠᠮᠤᠬ᠎ᠠ ᠶᠢ ᠬᠠᠨ ᠡᠷᠭᠦᠮᠵᠢᠯᠡᠬᠦ ᠳᠤ ︿ᠤᠶᠢᠷᠠᠳ ᠤᠨ ᠬᠤᠳᠤᠭ᠎ᠠ ᠪᠠᠬᠢ ᠁﹀ ︾ ᠭᠡᠰᠡᠨ ᠠᠩᠬᠠᠨ ᠤ ᠳᠡᠮᠳᠡᠭᠯᠡᠯ ᠪᠤᠢ︹1︺᠂ ᠳᠠᠬᠢᠪᠠᠯ ︽ᠳᠠᠤᠯᠠᠢ ᠵᠢᠯ ︵1207︶ ᠵᠦᠴᠢ ᠶᠢ ᠪᠠᠷᠠᠭᠤᠨ ᠭᠠᠷ  ᠤᠨ ᠴᠡᠷᠢᠭ ᠢ ᠳᠠᠶᠢᠴᠢᠯᠠᠭᠤᠯᠵᠤ ᠤᠢ ᠶᠢᠨ ᠢᠷᠭᠡᠳ ᠲᠤ ᠮᠤᠷᠳᠠᠭᠤᠯᠬᠤ ᠳᠤ ᠣᠶᠢᠷᠠᠳ ︵ᠣᠢ ᠶᠢᠨ ᠢᠷᠭᠡᠳ︶  ᠤᠨ ᠬᠤᠳᠤᠭ᠎ᠠ ᠪᠠᠬᠢ ᠲᠦᠮᠡᠨ ᠣᠶᠢᠷᠠᠳ ᠢᠶᠠᠨ ᠠᠪᠴᠤ ᠳᠠᠭᠠᠷ᠎ᠠ ᠢᠷᠡᠪᠡ᠃ ᠁ ᠬᠤᠳᠤᠭ᠎ᠠ ᠪᠠᠬᠢ ᠢᠷᠡᠭᠡᠳ ᠵᠦᠴᠢ ᠶᠢ ᠤᠳᠤᠷᠢᠳᠴᠤ ᠲᠦᠮᠡᠨ ᠣᠶᠢᠷᠠᠳ ᠤᠨ ᠨᠤᠳᠤᠭ ᠢᠶᠠᠷ ᠭᠠᠵᠠᠷᠴᠢᠯᠠᠨ ᠁ ᠤᠶᠢᠷᠠᠳ᠂ ᠪᠤᠷᠢᠶᠠᠳ᠂ ᠪᠠᠷᠭᠤᠳ᠂ ᠲᠤᠷᠰᠤᠳ᠂ ᠬᠠᠪᠠᠭ᠋ᠠᠨᠤᠨ᠂ ᠬᠠᠩᠭᠢᠨᠠᠭ᠂ ᠲᠤᠪᠰ ᠠᠶᠢᠮᠠᠭ ᠢ ᠤᠷᠤᠭᠤᠯᠵᠤ ᠁ ᠴᠢᠩᠭᠢᠰ ᠬᠠᠭᠠᠨ  ᠳᠤ ᠵᠤᠯᠭᠠᠭᠰᠠᠨ᠎ᠠ ᠬᠠᠭᠠᠨ ᠤᠶᠢᠷᠠᠳ ᠤᠨ ᠬᠤᠳᠤᠭ᠎ᠠ ᠪᠠᠬᠢ ᠶᠢ ᠲᠦᠮᠡᠨ ᠣᠶᠢᠷᠠᠳ ᠢᠶᠠᠨ ᠳᠠᠭᠠᠭᠤᠯᠵᠤ ᠲᠦᠷᠦᠭᠦᠯᠦᠨ ᠢᠷᠡᠪᠡ ᠭᠡᠵᠦ ᠁ ᠳᠡᠭᠦᠨ ᠤ ᠬᠦᠪᠡᠭᠦᠨ ᠢᠨᠠᠯᠴᠢ ᠳᠤ ᠴᠢᠴᠡᠶᠢᠬᠡᠨ ᠢ ᠦᠭᠴᠦ ᠢᠨᠠᠯᠴᠢ ᠶᠢᠨ ᠠᠬ᠎ᠠ ᠲᠦᠷᠦᠯᠴᠢ ᠳᠤ᠂ ᠵᠦᠴᠢ ᠶᠢᠨ ᠦᠬᠢᠨ ᠬᠤᠯᠤᠶᠢᠬᠠᠨ ᠢ ᠦᠭᠪᠡ ᠁︾ ︹2︺᠃ ᠢᠩᠭᠢᠭᠡᠳ ᠤᠶᠢᠷᠠᠳ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠯᠳᠠᠨ ᠶᠠᠰᠤ᠂ ᠬᠠᠰ ᠤᠨ ᠰᠠᠯᠠᠭ᠎ᠠ ᠶᠢᠨ ᠶᠠᠰᠤ ᠮᠢᠬ᠎ᠠ ᠶᠢᠨ ᠨᠢᠭᠳᠠ ᠬᠠᠷᠢᠴᠠᠭ᠎ᠠ  ᠲᠠᠢ ᠪᠤᠯᠪᠠ᠃      ᠣᠶᠢᠷᠠᠳ ᠠᠶᠢᠮᠠᠭ ᠨᠢ ᠵᠦᠪᠬᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠠᠯᠳᠠᠨ ᠤᠷᠤᠭ ᠪᠤᠯᠤᠭᠰᠠᠨ ᠳᠡᠳᠦᠢ ᠪᠢᠰᠢ᠂ ᠴᠡᠷᠢᠭ  ᠤᠨ ᠬᠢᠨᠢ ᠭᠤᠤᠯ ᠬᠦᠴᠦᠨ ᠤ ᠨᠢᠭᠡ ᠪᠤᠯᠵᠤ ᠮᠤᠩᠭᠤᠯ ᠬᠠᠭᠠᠨᠳᠤ ᠲᠦᠷᠦ ᠶᠢᠨ ᠬᠦᠭᠵᠢᠯ ᠮᠠᠨᠳᠤᠯ ᠳᠤ ᠪᠠᠯᠠᠷᠠᠰᠢ ᠦᠭᠡᠢ ᠶᠡᠭᠡ ᠭᠠᠪᠢᠶ᠎ᠠ ᠵᠢᠳᠬᠦᠯ ᠭᠠᠷᠭᠠᠵᠠᠢ᠃      ᠤᠶᠢᠷᠠᠳᠴᠤᠳ ᠢ ᠪᠠᠰᠠ ︽ᠲᠤᠷᠭᠤᠳ︾ ᠭᠡᠳᠡᠭ᠂ ᠤᠴᠢᠷ ᠨᠢ ᠠᠷᠪᠠᠨ ᠳᠠᠪᠤᠳᠤᠭᠠᠷ ᠵᠠᠭᠤᠨ ᠤ ᠦᠶᠡᠰ  ᠢᠶᠠᠷ ᠲᠤᠷᠭᠤᠳ ᠲᠤᠭᠤᠨ ᠳᠠᠶᠢᠱᠢ ᠶᠢ ᠲᠦᠰᠢᠬᠦ ᠳᠤ᠂ ᠲᠤᠭᠤᠨ ᠳᠠᠶᠢᠱᠢ᠄ ︽ᠨᠤᠳᠤᠭ ᠠᠴᠠ ᠰᠠᠯᠤᠭᠰᠠᠨ ᠨᠤᠶᠠᠨ᠂ ᠡᠭᠦᠷ ᠠᠴᠠ ᠰᠠᠯᠤᠭᠰᠠᠨ ᠰᠢᠪᠠᠭᠤᠳ ᠲᠤᠷᠤᠭ ᠭᠦᠷᠦᠭᠡᠰᠦ ᠰᠢᠭ ᠦᠩᠭᠡ ᠴᠢᠷᠠᠢ ᠰᠠᠶᠢᠬᠠᠨ ᠁︾ ᠭᠡᠰᠡᠨ  ᠠᠴᠠ ︽ᠲᠤᠷᠭᠤᠳ︾ ᠭᠡᠵᠦ ᠨᠡᠷᠡᠯᠡᠪᠡ ᠭᠡᠳᠡᠭ ᠰᠠᠨ᠃      ᠤᠷᠤᠰ ᠠᠴᠠ ᠠᠯᠳᠠᠷᠳᠤ ᠮᠤᠩᠭᠤᠯ ᠡᠷᠳᠡᠮᠳᠡᠨ ᠸᠯᠠᠳᠢᠮᠢᠷᠼᠤᠸ᠋ ᠠᠴᠠ ᠤᠶᠢᠷᠠᠳ ᠤᠨ ᠲᠤᠬᠠᠢ ᠳᠡᠮᠳᠡᠭᠯᠡᠭᠰᠡᠨ  ᠨᠢ᠄ ︽ᠲᠦᠷᠪᠡᠨ ᠤᠶᠢᠷᠠᠳ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ ᠤᠶᠢᠷᠠᠳ ᠤᠨ ᠲᠦᠷᠪᠡᠨ ᠲᠦᠮᠡᠨ ᠠᠴᠠ ᠡᠭᠦᠰᠦᠯᠳᠠᠢ︾ ᠭᠡᠰᠡᠨ ᠪᠠ ᠲᠤᠳᠤ ᠦᠰᠦᠭ ᠤᠨ ᠲᠤᠯᠭᠤᠷ ᠪᠢᠴᠢᠭ ︽ᠮᠤᠩᠭᠤᠯ ᠤᠨ ᠤᠭ ᠡᠬᠢᠨ ᠲᠤᠭᠤᠵᠢ︾ ᠳᠤ᠄ ︽ᠬᠤᠱᠤᠳ᠂ ᠲᠤᠷᠭᠤᠳ᠂ ᠳᠦᠷᠪᠡᠳ᠂ ᠵᠡᠭᠦᠠᠭᠠᠷ ᠨᠡᠶᠢᠯᠡᠭᠡᠳ ᠨᠢᠭᠡ ᠤᠶᠢᠷᠠᠳ᠂ ᠲᠦᠮᠡᠳ᠂ ᠬᠤᠶᠢᠳ᠂ ᠪᠠᠳᠤᠳ ᠨᠡᠶᠢᠯᠡᠭᠡᠳ ᠨᠢᠭᠡ ᠤᠶᠢᠷᠠᠳ᠂ ᠪᠠᠷᠭᠤ᠂ ᠪᠤᠷᠢᠶᠠᠳ ᠮᠦᠨ ᠨᠢᠭᠡ ᠣᠶᠢᠷᠠᠳ᠂ ᠪᠦᠬᠦ ᠮᠤᠩᠭᠤᠯ ᠨᠡᠶᠢᠯᠡᠭᠡᠳ ᠪᠠᠰᠠ ᠨᠢᠭᠡᠨ ᠣᠶᠢᠷᠠᠳ ᠭᠡᠵᠦ ᠳᠦᠷᠪᠡᠨ ᠤᠶᠢᠷᠠᠳ ᠢ ᠦᠭᠦᠯᠡᠵᠠᠢ︾︹3︺᠃      ᠮᠤᠩᠭᠤᠯ ᠬᠠᠭᠠᠨᠳᠤ ᠤᠯᠤᠰ ᠤᠨ ᠰᠡᠭᠦᠯᠴᠢ ᠦᠶ᠎ᠡ ᠪᠠᠷ ᠤᠶᠢᠷᠠᠳ ᠮᠤᠩᠭᠤᠯ ᠢ ᠬᠤᠱᠤᠳ᠂ ᠵᠡᠭᠦᠠᠭᠠᠷ᠂ ᠳᠦᠷᠪᠡᠳ᠂ ᠲᠤᠷᠭᠤᠳ ᠭᠡᠬᠦ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠡᠷᠳᠡᠨ ᠤ ᠳᠦᠷᠪᠡᠳ ᠤᠶᠢᠷᠠᠳ ᠤᠨ ᠨᠤᠳᠤᠭ ᠭᠡᠪᠡᠯ᠂ ᠪᠠᠯᠺᠠᠨ ᠬᠤᠶᠢᠭ ᠤᠨ ᠵᠡᠭᠦᠨ ᠳᠠᠯ᠎ᠠ ᠪᠤᠯᠤᠨ ᠡᠮᠦᠨ᠎ᠡ ᠳᠠᠯ᠎ᠠ᠂ ᠢᠯᠢ ᠭᠤᠤᠯ ᠤᠨ ᠰᠠᠪᠠ ᠭᠠᠵᠠᠷ ᠨᠢ ᠵᠦᠩᠭᠠᠷ ᠤᠨ ᠨᠤᠳᠤᠭ︔ ᠡᠷᠴᠢᠰ ᠮᠦᠷᠡᠨ ᠤ ᠬᠤᠶᠠᠷ ᠬᠦᠪᠡᠭᠡ ᠨᠢ ᠳᠦᠷᠪᠡᠳ ᠤᠨ ᠨᠤᠳᠤᠭ︔ ᠦᠷᠦᠮᠴᠢ ᠤᠷᠴᠢᠮ ᠨᠢ ᠬᠤᠱᠤᠳ ᠤᠨ ᠨᠤᠳᠤᠭ︔ ᠳᠠᠷᠪᠠᠭᠠᠳᠠᠢ ᠬᠠᠪᠢ ᠶᠢᠨ ᠬᠢᠨᠢ ᠲᠤᠷᠭᠤᠳ ᠤᠨ ᠨᠤᠳᠤᠭ ᠪᠠᠶᠢᠵᠠᠢ᠃      ᠤᠶᠢᠷᠠᠳ ᠤᠨ ᠳᠡᠦᠬᠡᠨ ᠳᠠᠬᠢ ᠬᠠᠮᠤᠭ ᠬᠦᠭᠵᠢᠯ ᠲᠠᠢ ᠦᠶ᠎ᠡ ᠭᠡᠪᠡᠯ ᠳᠡᠳᠡ ᠳᠡᠭᠷᠢ ᠠᠭᠤᠯᠠ ᠶᠢᠨ ᠠᠷᠤ ᠦᠪᠦᠷ᠂ ᠬᠦᠬᠡᠨᠠᠭᠤᠷ᠂ ᠦᠪᠦᠷ ᠮᠤᠩᠭᠤᠯ ᠪᠤᠯᠤᠨ ᠬᠠᠯᠬ᠎ᠠ ᠶᠢᠨ ᠬᠡᠰᠡᠭ ᠭᠠᠵᠠᠷ᠂ ᠴᠢᠨᠠᠭᠰᠢᠯᠠᠭᠠᠳ ᠡᠮᠦᠨ᠎ᠡ ᠰᠢᠪᠧᠷᠢᠶ᠎ᠠ᠂ ᠳᠤᠮᠳᠠ ᠠᠽᠢᠶ᠎ᠠ᠂ ᠢᠵᠢᠯ ᠮᠦᠷᠡᠨ ᠤ ᠳᠤᠤᠷᠠᠳᠤ ᠰᠠᠪᠠ ᠭᠠᠵᠠᠷ ᠬᠦᠷᠳᠡᠯ᠎ᠡ ᠦᠷᠭᠡᠵᠢᠨ ᠴᠢᠩ ᠤᠯᠤᠰ  ᠤᠨ ᠬᠠᠷᠢᠶᠠᠳᠤ ᠭᠠᠵᠠᠷ ᠠᠴᠠ ᠦᠷᠭᠡᠨ ᠮᠦᠷᠳᠡᠭᠡᠨ ᠴᠢᠩ ᠤᠯᠤᠰ ᠳᠤ ᠬᠠᠷᠢᠶᠠᠯᠠᠭᠳᠠᠭᠰᠠᠨ ᠦᠭᠡᠢ᠂ ᠡᠷᠬᠡ ᠳᠡᠭᠰᠢ ᠤᠷᠤᠰᠢᠵᠤ ᠪᠠᠶᠢᠪᠠ᠃      ᠮᠤᠩᠭᠤᠯ ᠤᠨ ᠬᠠᠭᠠᠨ ᠲᠦᠷᠦ ᠪᠡᠭᠡᠵᠢᠩ ᠠᠴᠠ ᠤᠬᠤᠷᠢᠨ ᠮᠤᠩᠭᠤᠯ ᠤᠨ ᠦᠯᠦᠭᠡᠢ ᠨᠤᠳᠤᠭ ᠲᠤ ᠪᠠᠨ ᠪᠤᠴᠠᠵᠤ ︽ᠤᠮᠠᠷᠠᠳᠤ ᠶᠤᠸᠠᠨ ᠤᠯᠤᠰ︾ ᠭᠡᠵᠦ ᠮᠢᠩ ᠤᠯᠤᠰ ᠲᠠᠢ ᠵᠡᠷᠭᠡᠴᠡᠨ ᠲᠤᠭᠳᠠᠨᠢᠭᠰᠠᠨ ᠴᠦ ᠤᠮᠠᠷᠠᠳᠤ ᠲᠦᠷᠦ ᠶᠢᠨ ᠹᠸᠤᠳᠠᠯ ᠢᠵᠠᠭᠤᠷᠳᠠᠨ ᠬᠤᠭᠤᠷᠤ ᠬᠤᠭᠤᠷᠤᠨᠳᠤ ᠪᠠᠨ ᠡᠷᠬᠡ ᠠᠰᠢᠭ ᠪᠤᠯᠢᠶᠠᠯᠳᠤᠨ ᠵᠦᠷᠢᠴᠡᠯ ᠳᠡᠮᠡᠴᠡᠯ ᠬᠤᠷᠴᠠᠳᠤᠭᠰᠠᠨ ᠠᠴᠠ ᠤᠮᠠᠷᠠᠳᠤ ᠲᠦᠷᠦ ᠠᠴᠠ ᠪᠠᠷᠠᠭᠤᠨ ᠬᠤᠶᠢᠨᠠᠬᠢ ᠣᠶᠢᠷᠠᠳ ᠢ ᠵᠠᠬᠢᠷᠬᠤ ᠬᠦᠴᠦᠨ ᠮᠡᠭᠦᠰᠳᠡᠵᠦ᠂ ᠣᠶᠢᠷᠠᠳᠴᠤᠳ ᠨᠢᠭᠡ ᠦᠶ᠎ᠡ ᠬᠦᠴᠦᠷᠬᠡᠭᠵᠢᠨ ᠮᠠᠨᠳᠤᠵᠤ ᠲᠤᠭᠤᠨ ᠳᠠᠶᠢᠱᠢ ᠬᠢᠭᠡᠳ ᠡᠰᠡᠨ ᠬᠠᠨ ᠨᠢᠭᠡ ᠦᠶ᠎ᠡ ᠲᠦᠷᠦ ᠪᠠᠷᠢᠨ ᠵᠡᠭᠦᠨ᠂ ᠪᠠᠷᠠᠭᠤᠨ ᠮᠤᠩᠭᠤᠯ ᠢ ᠨᠢᠭᠡᠳᠬᠡᠨ ᠵᠠᠬᠢᠷᠴᠤ᠂ ᠮᠢᠩ ᠤᠯᠤᠰ ᠤᠨ 50 ᠲᠦᠮᠡᠨ ᠴᠡᠷᠢᠭ ᠢ ᠬᠢᠶᠠᠷᠠᠳᠠᠯ᠎ᠠ ᠴᠤᠬᠢᠵᠤ ᠮᠢᠩ ᠤᠯᠤᠰ ᠤᠨ ᠢᠩᠽᠦ᠋ᠩ ᠬᠠᠭᠠᠨ ᠢ ᠠᠮᠢᠳᠤ ᠪᠠᠷ ᠪᠠᠷᠢᠪᠴᠢᠯᠠᠭᠰᠠᠨ ᠲᠡᠦᠬᠡ ᠲᠠᠢ ᠪᠢᠯᠡ᠃      ᠭᠤᠷᠪᠠ᠂ ᠤᠶᠢᠷᠠᠳ ᠤᠨ ᠦᠷᠦᠨᠡᠰᠢᠯ ᠪᠠ ᠲᠤᠷᠤᠨᠠᠰᠢᠯ      17 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢ ᠪᠠᠷ ᠮᠢᠩ ᠤᠯᠤᠰ᠂ ᠤᠮᠠᠷᠠᠳᠤ ᠶᠤᠸᠠᠨ ᠤᠯᠤᠰ ᠤᠨ ᠲᠦᠷᠦ ᠬᠢᠭᠡᠳ ᠴᠢᠩ ᠤᠯᠤᠰ ᠨᠢᠭᠡᠨ ᠬᠤᠭᠤᠴᠠᠭ᠎ᠠ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠮᠡᠳᠦ ᠵᠡᠷᠭᠡᠴᠡᠨ ᠤᠷᠤᠰᠢᠵᠤ ᠬᠤᠭᠤᠷᠤᠨᠳᠤ ᠪᠠᠨ ᠰᠢᠷᠦᠭᠦᠨ ᠢᠶᠠᠷ ᠲᠡᠮᠡᠴᠡᠯᠳᠦᠨ ᠪᠠᠶᠢᠭᠰᠠᠨ ᠵᠠᠪᠰᠠᠷ ᠤᠨ ᠬᠤᠭᠤᠴᠠᠭ᠎ᠠ ᠳᠤ᠂ ᠲᠤᠷᠭᠤᠳ ᠤᠨ ᠲᠦᠷᠦᠭᠦᠦ ᠬᠤ᠂ ᠦᠷᠯᠦᠭ 1628 ᠤᠨ ᠳᠤ ᠦᠪᠡᠷ ᠤᠨ ᠬᠠᠷᠢᠶᠠᠳᠤ ᠠᠶᠢᠮᠠᠭ ᠪᠠ ᠳᠡᠭᠦᠨ ᠢ ᠳᠤᠷᠠᠳᠠᠶ᠎ᠠ ᠳᠠᠭᠠᠵᠤ ᠨᠡᠭᠦᠳᠡᠯᠯᠡᠬᠦ ᠬᠤᠱᠤᠳ᠂ ᠳᠦᠷᠪᠡᠳ᠂ ᠬᠤᠶᠢᠳ ᠤᠨ ᠳᠠᠪᠤᠨ ᠲᠦᠮᠡ ᠢᠯᠡᠭᠦᠦ ᠡᠷᠦᠬᠡ ᠢᠷᠭᠡᠳ ᠢ ᠳᠠᠭᠠᠭᠤᠯᠤᠨ ᠲᠦᠷᠦᠭᠰᠡᠨ ᠨᠤᠳᠤᠭ ᠳᠠᠷᠪᠠᠭᠠᠳᠠᠢ ᠠᠴᠠ ᠪᠠᠨ ᠰᠠᠯᠵᠤ ᠨᠠᠷᠠᠨ ᠰᠢᠩᠭᠡᠬᠦ ᠵᠦᠭ ᠢ ᠴᠢᠭᠯᠡᠨ ᠦᠷᠦᠨᠡᠰᠢᠯᠡᠵᠦ᠂ 1631 ᠤᠨ ᠳᠤ ᠢᠵᠢᠯ ᠵᠠᠢ ᠶᠢᠨ ᠦᠷᠭᠡᠨ ᠠᠭᠤᠳᠠᠮ ᠦᠩᠭᠡ ᠰᠢᠮᠡᠯᠢᠭ ᠳᠠᠯ᠎ᠠ ᠨᠤᠳᠤᠭ ᠢ ᠡᠷᠭᠡᠰᠢᠶᠡᠪᠡ᠃ ᠵᠡᠭᠦᠨ ᠳᠠᠯ᠎ᠠ ᠨᠢ ᠵᠠᠢ ᠭᠤᠤᠯ ︵ᠦᠷᠡᠯ︶᠂ ᠪᠠᠷᠠᠭᠤᠨᠰᠢ ᠢᠵᠢᠯ ᠭᠤᠤᠯ ︵ᠸᠤᠯᠭ᠎ᠠ ᠮᠦᠷᠡᠨ︶᠂ ᠡᠮᠦᠨᠡᠰᠢ ᠪᠠᠨ ᠠᠰᠲ᠋ᠠᠷᠬᠠᠨ ᠠᠴᠠ ᠬᠤᠶᠢᠰᠢ ᠰᠠᠮᠠᠯᠠ ᠬᠦᠷᠴᠠᠢ᠃ ᠤᠷᠤᠰᠴᠤᠳ ᠡᠨᠡ ᠭᠠᠵᠠᠷ ᠮᠠᠨ ᠤ ᠬᠢ ᠬᠡᠵᠦ ᠳᠡᠳᠡᠨ ᠢ ᠬᠦᠭᠡᠭᠡᠭᠰᠡᠨ ᠳᠤ ᠬᠤ᠂ ᠦᠷᠯᠦᠭ᠄ ︽ᠡᠨᠡ ᠪᠤᠯ ᠮᠠᠨ ᠤ ᠡᠪᠦᠭᠡ ᠳᠡᠭᠡᠳᠦᠰ — ᠴᠢᠩᠭᠢᠰ ᠬᠠᠭᠠᠨ ᠤ ᠨᠤᠳᠤᠭ︾ ᠭᠡᠵᠦ ᠠᠰ ᠲᠤᠯᠵᠤ ᠠᠪᠤᠨ ᠬᠠᠷᠢᠭᠤᠴᠠᠵᠤ ᠪᠠᠶᠢᠪᠠ᠃      1641 ᠤᠨ ᠳᠤ ᠬᠤ᠂ ᠦᠷᠯᠦᠭ ᠠᠰᠲ᠋ᠠᠷᠬᠠᠴᠤᠳ ᠲᠠᠢ ᠪᠠᠶᠢᠯᠳᠤᠵᠤ ᠪᠠᠶᠢᠭᠠᠳ ᠪᠠᠭᠠᠳᠤᠷᠯᠢᠭ ᠪᠠᠷ ᠪᠡᠶ᠎ᠡ ᠦᠷᠡᠭᠳᠠᠵᠠᠢ᠃ ᠳᠡᠭᠦᠨ ᠤ ᠠᠬᠠᠮᠠᠳ ᠬᠦᠦ ᠱᠦᠬᠦᠷ ᠳᠠᠶᠢᠴᠢᠩ ᠬᠠᠨ ᠣᠷᠤ ᠶᠢ ᠵᠠᠯᠭᠠᠮᠵᠢᠯᠠᠵᠤ ᠲᠤᠰᠠᠭᠠᠷ ᠲᠤᠭᠳᠠᠨᠢᠭᠰᠠᠨ ᠤᠯᠤᠰ ᠢ ᠪᠠᠶᠢᠭᠤᠯᠪᠠ᠃ ᠳᠡᠭᠦᠨ ᠤ ᠬᠦᠦ ᠠᠶᠤᠰᠢ 1690 ᠤᠨ ᠳᠤ ᠳᠠᠯᠠᠢ ᠯᠠᠮᠠ ᠠᠴᠠ ᠬᠠᠨ ᠡᠷᠭᠦᠮᠵᠢᠯᠡᠭᠰᠡᠨ ᠠᠴᠠ ᠨᠠᠭᠠᠰᠢ ᠲᠤᠷᠭᠤᠳ ᠤᠨ ᠲᠦᠷᠦᠭᠦᠦ ᠶᠢ ᠬᠠᠨ ᠭᠡᠬᠦ ᠪᠤᠯᠵᠠᠢ᠃ ᠠᠶᠤᠰᠢ 55 ᠵᠢᠯ ᠬᠠᠨ ᠰᠠᠭᠤᠷᠢᠨ ᠳᠤ ᠰᠠᠭᠤᠵᠤ ᠸᠤᠯᠭ᠎ᠠ ᠮᠦᠷᠡᠨ᠂ ᠳ᠋ᠤᠨ ᠮᠦᠷᠡᠨ ᠤ ᠬᠤᠭᠤᠷᠤᠨᠳᠤ ᠦᠷᠭᠡᠨ ᠰᠠᠷᠠᠭᠤᠯ ᠨᠤᠳᠤᠭ ᠢ ᠡᠵᠡᠮᠰᠢᠨ᠂ ᠤᠷᠤᠰ ᠤᠨ ᠴᠠᠭᠠᠨ ᠬᠠᠨ ᠲᠠᠢ ᠨᠠᠶᠢᠷᠠᠮᠳᠠᠯ ᠢᠶᠠᠷ ᠣᠷᠤᠰᠢᠵᠤ᠂ ᠠᠳᠡᠬᠢ ᠨᠤᠳᠤᠭ ᠤᠰᠤᠨ ᠳᠤ ᠭᠦᠨ ᠵᠤᠵᠠᠭᠠᠨ ᠬᠠᠶᠢᠷ᠎ᠠ ᠰᠡᠳᠬᠢᠯᠭᠡ ᠲᠠᠢ ᠪᠤᠯᠵᠤ᠂ ᠸᠤᠯᠭ᠎ᠠ ᠮᠦᠷᠡᠨ ᠢ ︽ᠡᠬᠡ ᠭᠤᠤᠯ︾᠂ ᠺᠠᠰᠫᠢ ᠳᠠᠩᠭᠢᠰ ᠢ ︽ᠬᠦᠬᠡ ᠨᠠᠭᠤᠷ︾ ᠡᠮᠡᠬᠦ ᠰᠠᠶᠢᠬᠠᠨ ᠮᠤᠩᠭᠤᠯ ᠨᠡᠷ᠎ᠡ ᠦᠭᠴᠦ᠂ ᠵᠤᠨ ᠳᠤ ᠪᠠᠨ ᠭᠤᠤᠯ ᠤᠨ ᠵᠡᠭᠦᠨ᠎ᠡ ᠵᠤᠰᠠᠵᠤ᠂ ᠡᠪᠦᠯ ᠳᠤ ᠪᠠᠨ ᠮᠦᠷᠡᠨ ᠤ ᠪᠠᠷᠠᠭᠤᠨ ᠡᠷᠭᠢ ᠳᠤ ᠨᠡᠭᠦᠳᠡᠯᠯᠡᠨ ᠲᠤᠬᠢᠳᠠᠢ ᠰᠠᠶᠢᠬᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠪᠠ᠃ ᠭᠡᠳᠡᠯ᠎ᠡ ᠤᠷᠤᠰ ᠤᠨ ᠴᠠᠭᠠᠨ ᠬᠠᠭᠠᠨ ᠭᠠᠳᠠᠭᠰᠢ ᠲᠦᠷᠢᠨ ᠲᠤᠪᠳᠤᠯᠬᠤ ᠳᠠᠶᠢᠨ ᠳᠤ ᠤᠶᠢᠷᠠᠳᠴᠤᠳ ᠢ ᠡᠮᠦᠨ᠎ᠡ ᠪᠠᠨ ᠲᠦᠯᠬᠢᠨ ᠠᠯᠪᠠᠳᠠᠨ ᠭᠠᠴᠢᠵᠤ ᠳᠠᠶᠢᠨ ᠤ ᠦᠷᠡᠭᠳᠡᠯ ᠪᠤᠯᠭᠠᠵᠤ ᠪᠠᠶᠢᠪᠠ᠃ ᠵᠢᠱᠢᠶᠡᠯᠡᠪᠡᠯ᠂ 1767 —1799 ᠤᠨ ᠤ ᠬᠤᠭᠤᠷᠤᠨᠳᠤ 32 ᠤᠳᠠᠭ᠎ᠠ ᠴᠡᠷᠢᠭ ᠡᠯᠰᠡᠬᠦ ᠳᠤ 125 ᠲᠦᠮᠡᠨ ᠬᠦᠮᠦᠨ ᠢ ᠡᠯᠰᠡᠵᠠᠢ᠃ ᠨᠢᠭᠡᠨ ᠤᠳᠠᠭ᠎ᠠ  ᠶᠢᠨ ᠳᠠᠶᠢᠨ ᠳᠤ 7 —8 ᠲᠦᠮᠡᠨ ᠣᠶᠢᠷᠠᠳᠴᠤᠳ ᠪᠡᠶ᠎ᠡ ᠦᠷᠡᠭᠳᠡᠭᠰᠡᠨ ᠪᠠᠶᠢᠪᠠ᠃ ᠢᠩᠭᠢᠵᠦ ᠬᠦᠮᠦᠨ ᠤ ᠭᠠᠷ  ᠢᠶᠠᠷ ᠲᠤᠷᠭᠤᠳ ᠢ ᠬᠢᠳᠤᠨ ᠰᠦᠨᠦᠭᠡᠵᠦ᠂ ᠦᠷᠦᠨᠡᠳᠠᠬᠢᠨ ᠤ ᠬᠢᠨ ᠤ ︽ᠳᠠᠶᠢᠨ ᠤ ᠰᠠᠬᠢᠭᠤᠯᠰᠤᠨ︾ ᠭᠡᠮᠡᠭᠴᠢ ᠨᠠᠫᠣᠯᠢᠶᠣᠨ ᠲᠠᠢ ᠳᠠᠶᠢᠳᠤᠬᠤ ᠳᠤ ᠴᠦ ᠮᠦᠨ ᠬᠤᠰᠢᠭᠤᠴᠢ ᠪᠤᠯᠭᠠᠨ ᠴᠦᠯᠡᠵᠦ ᠪᠠᠶᠢᠪᠠ︹4︺᠃ ᠬᠦᠮᠦᠨ ᠠᠷᠠᠳ ᠨᠢ ᠳᠠᠶᠢᠨ ᠳᠤ ᠶᠡᠭᠡ ᠤᠯᠠᠨ ᠬᠤᠬᠢᠷᠠᠨ ᠠᠮᠢᠳᠤᠷᠠᠯ ᠨᠢ ᠴᠦ ᠳᠤᠷᠤᠶᠢᠳᠠᠪᠠ᠃ ᠶᠠᠭ ᠡᠨᠡ ᠦᠶ᠎ᠡ ᠳᠤ ᠡᠬᠡ ᠦᠯᠦᠭᠡᠢ ᠨᠤᠳᠤᠭ ᠲᠤᠨᠢ ᠴᠢᠩ ᠤᠯᠤᠰ ᠤᠨ ᠨᠤᠶᠠᠷᠬᠠᠯ ᠢ ᠡᠰᠡᠷᠭᠦᠴᠡᠭᠰᠡᠨ ᠦᠨᠳᠦᠰᠦᠳᠡᠨ ᠤ ᠪᠠᠭᠠᠳᠤᠷ ᠭᠠᠯᠳᠠᠨ ᠪᠤᠱᠤᠭᠳᠤ᠂ ᠠᠮᠤᠷᠰᠠᠨᠠᠭ᠎ᠠ ᠨᠠᠷ ᠤᠨ ᠤᠳᠤᠷᠢᠳᠤᠭᠰᠠᠨ ᠠᠷᠠᠳ ᠤᠨ ᠪᠤᠰᠤᠯᠭ᠎ᠠ ᠶᠢ ᠳᠠᠷᠤᠩᠭᠤᠶᠢᠯᠠᠭᠰᠠᠨ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ 1758 —1760 ᠤᠨ ᠳᠤ ᠬᠡᠳᠦᠨ ᠵᠠᠮ ᠢᠶᠠᠷ ᠵᠦᠩᠭᠠᠷ ᠤᠨ ᠨᠤᠳᠤᠭ ᠲᠤ ᠲᠦᠷᠢᠨ ᠤᠷᠤᠵᠤ ᠡᠷᠳᠡ ᠡᠳᠦᠭᠡᠬᠢ ᠳᠡᠦᠬᠡ ᠳᠤ ᠶᠡᠷᠦ ᠭᠠᠷᠤᠭ᠎ᠠ ᠦᠭᠡᠢ ᠴᠢᠰᠤᠳᠤ ᠬᠢᠳᠤᠯᠭ᠎ᠠ ᠶᠠᠪᠤᠭᠤᠯᠵᠠᠢ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠵᠦᠩᠭᠠᠷᠴᠤᠳ 62 ᠲᠦᠮᠡᠨ ᠬᠦᠮᠦᠨ ᠲᠠᠢ ᠭᠡᠳᠡᠭ ᠰᠠᠨ᠃ ︽ᠴᠢᠩ ᠤᠯᠤᠰ ᠤᠨ ᠭᠤᠤᠽᠦ᠋ᠩ ︵ᠲᠡᠭᠷᠢ ᠳᠡᠳᠭᠦᠭᠴᠢ︶ ᠬᠠᠭᠠᠨ ᠤ ᠮᠠᠭᠠᠳ ᠬᠠᠤᠯᠢᠳᠦ ᠪᠢᠴᠢᠭ︾ ᠵᠡᠷᠭᠡ ᠬᠢᠳᠠᠳ᠂ ᠮᠠᠨᠵᠤ ᠰᠤᠳᠤᠷ ᠲᠤ ︽᠁ ᠠᠭᠤᠯᠠ ᠭᠠᠩᠭ᠎ᠠ ᠠᠯᠢ ᠪᠤᠶᠢᠳᠠ ᠭᠠᠵᠠᠷ ᠪᠠ ᠤᠰᠤ ᠮᠦᠷᠡᠨ ᠤ ᠬᠦᠪᠡᠭᠡ ᠳᠠᠭᠠᠤ ᠵᠢᠭᠠᠰᠤ ᠠᠩᠨᠠᠨ ᠠᠮᠢ ᠵᠢᠭᠤᠳᠠᠭᠰᠠᠨ ᠭᠠᠵᠠᠷ ᠢ ᠴᠦ ᠦᠯᠡᠳᠡᠭᠡᠯ ᠦᠭᠡᠢ ᠨᠠᠩᠵᠢᠨ ᠠᠯᠠᠵᠠᠢ︾ ᠭᠡᠰᠡᠨ ᠶᠤᠮ᠃      ᠠᠯᠳᠠᠷᠳᠤ ᠮᠤᠩᠭᠤᠯ ᠳᠡᠦᠬᠡᠴᠢᠨ ᠬᠤᠸᠠᠩ ᠵᠢᠩ ᠲᠤᠤ ︵ᠲᠤᠭᠳᠠᠬᠤ︶ ᠠᠴᠠ᠄ ︽ᠵᠦᠩᠭᠠᠷ ᠠᠶᠢᠮᠠᠭ ᠤᠨ ᠠᠯᠠᠭᠳᠠᠭᠰᠠᠨ ᠬᠦᠮᠦᠨ ᠤ ᠲᠤᠭ᠎ᠠ 40 ᠭᠠᠷᠤᠢ ᠲᠦᠮᠡ ᠳᠤ ᠬᠦᠷᠴᠠᠢ︾ ᠭᠡᠰᠡᠨ ᠪᠠ ᠵᠠᠷᠢᠮ ᠳᠡᠦᠬᠡ ᠳᠤ ᠪᠠᠰᠠ ︽ᠳᠠᠶᠢᠴᠢᠩ ᠬᠦᠷᠦᠨ ᠤ ᠨᠤᠶᠠᠷᠬᠠᠭᠴᠢᠳ ᠵᠦᠩᠭᠠᠷ ᠤᠨ ᠠᠷᠠᠳ ᠲᠦᠮᠡᠨ ᠤ ᠭᠤᠯᠤᠮᠳᠠ ᠶᠢ ᠨᠢ ᠬᠠᠷᠠᠯᠠᠭᠤᠯᠵᠤ᠂ ᠦᠨᠡᠰᠦ ᠶᠢ ᠨᠢ ᠬᠡᠶᠢᠰᠬᠡᠵᠦ ᠤᠭ ᠢ ᠨᠢ ᠳᠠᠰᠤᠯᠬᠤ ᠪᠠᠷ ᠬᠡᠷᠴᠡᠭᠡᠶᠢᠯᠡᠪᠡ︾ ᠭᠡᠰᠡᠨ᠃ ᠢᠩᠭᠢᠭᠡᠳ ᠵᠦᠩᠭᠠᠷ ᠤᠨ ᠨᠤᠳᠤᠭ ᠢ ︽ᠰᠢᠨ᠎ᠡ ᠬᠢᠵᠠᠭᠠᠷ︾ ᠰᠢᠨᠵᠢᠶᠠᠩ ᠭᠡᠵᠦ 1760 ᠤᠨ ᠳᠤ ᠳᠠᠶᠢᠴᠢᠩ ᠤᠯᠤᠰ ᠤᠨ ᠵᠢᠩᠭᠢᠨᠢ ᠨᠤᠳᠤᠭ  ᠢᠶᠠᠨ ᠪᠤᠯᠭᠠᠪᠠ᠃      ᠤᠶᠢᠷᠠᠳ ᠨᠤᠳᠤᠭ ᠬᠦᠮᠦᠨ ᠠᠮᠠ ᠴᠦᠬᠡᠷᠡᠵᠦ ᠡᠵᠡᠭᠦᠢ ᠵᠠᠯᠢᠭᠦᠳ ᠪᠤᠯᠤᠭᠰᠠᠨ ᠪᠠ ᠳᠡᠳᠡᠨ ᠤ ᠦᠯᠦᠭᠡᠢ ᠨᠤᠳᠤᠭ᠂ ᠤᠳᠤᠮ ᠭᠠᠷᠤᠯ ᠢᠶᠠᠨ ᠰᠠᠨᠠᠵᠤ ᠮᠦᠷᠦᠭᠡᠳᠬᠦ ᠬᠠᠶᠢᠷ᠎ᠠ ᠰᠡᠳᠬᠢᠯᠭᠡ ᠵᠢᠴᠢ ᠣᠷᠤᠰ ᠤᠨ ᠬᠠᠪᠴᠢᠯ ᠳᠤᠷᠤᠮᠵᠢᠯᠠᠯ ᠢ ᠳᠡᠰᠴᠦ ᠶᠠᠳᠠᠬᠤ ᠳᠤ ᠪᠠᠨ ᠠᠶᠤᠰᠢ ᠬᠠᠨ ᠤ ᠤᠮᠪᠤᠯ ᠤᠪᠰᠢ ᠬᠠᠨ ᠪᠠᠷ 1771 ᠤᠨ ᠤ  1 ᠰᠠᠷ᠎ᠠ ᠶᠢᠨ 5 ᠤ ᠡᠳᠦᠷ᠂ ᠤᠷᠤᠰ ᠤᠨ ᠨᠤᠳᠤᠭ ᠠᠴᠠ ᠰᠠᠯᠵᠤ ᠬᠠᠷᠢᠶᠠᠳᠤ ᠠᠷᠠᠳ 17 ᠲᠦᠮᠡᠨ ᠢᠶᠠᠨ ᠳᠠᠶᠢᠴᠢᠯᠠᠨ ᠲᠤᠷᠤᠨᠠᠰᠢ ᠪᠤᠴᠠᠬᠤ ᠵᠠᠮ ᠢ ᠡᠯᠭᠦᠪᠡ᠃ ᠮᠦᠷᠡᠨ ᠤ ᠪᠠᠷᠠᠭᠤᠨ ᠳᠠᠬᠢ ᠨᠢ ᠶᠠᠮᠠᠷ ᠨᠢᠭᠡᠨ ᠰᠢᠯᠳᠠᠭᠠᠨ ᠢᠶᠠᠷ ᠬᠦᠳᠡᠯᠦᠭᠰᠡᠨ ᠦᠭᠡᠢ ᠦᠯᠡᠳᠡᠪᠡ᠃ ᠡᠳᠡᠨᠦᠰ ᠢ ︽ᠬᠠᠯᠢᠮᠠᠭ︾ ᠭᠡᠵᠦ ᠲᠦᠷᠺ ᠬᠡᠯᠡ ᠪᠠᠷ ︽ᠬᠤᠴᠤᠷᠴᠤ ᠦᠯᠡᠳᠡᠭᠰᠡᠳ︾ ᠭᠡᠰᠡᠨ ᠨᠢ ᠡᠨᠡ ᠪᠦᠯᠦᠭᠡ᠃      ᠤᠪᠰᠢ ᠬᠠᠨ ᠤ ᠲᠤᠷᠤᠨᠠᠰᠢ ᠪᠤᠴᠠᠬᠤ ᠡᠩᠨᠡᠭᠡ ᠵᠠᠮ ᠮᠦᠷ ᠲᠤ ᠪᠠᠨ ᠳᠠᠶᠢᠨ ᠲᠤᠯᠤᠯᠳᠤᠭᠠᠨ᠂ ᠤᠷᠤᠰ᠂ ᠺᠠᠽᠠᠭᠴᠤᠳ ᠤᠨ ᠬᠤᠷᠢᠭᠯᠠᠯ ᠳᠡᠮᠡᠴᠡᠯ ᠵᠢᠴᠢ ᠤᠯᠠᠨ ᠵᠦᠢᠯ ᠤᠨ ᠭᠠᠢ ᠭᠠᠮᠰᠢᠭ ᠤᠨ ᠦᠷᠡᠭᠳᠡᠯ ᠰᠦᠢᠳᠦᠯ ᠳᠤ ᠲᠤᠯᠭᠠᠷᠠᠵᠤ 7 ᠲᠦᠮᠡᠨ ᠬᠦᠮᠦᠨ ᠨᠢ ᠡᠷᠡᠭᠦᠯ ᠰᠠᠷᠠᠭᠤᠯ ᠢᠶᠠᠷ ᠡᠬᠡ ᠨᠤᠳᠤᠭ ᠲᠠᠭᠠᠨ ᠡᠭᠡᠵᠦ ᠢᠷᠡᠵᠠᠢ᠃ ᠤᠪᠰᠢ ᠬᠠᠨ ᠤ ᠲᠤᠷᠤᠨᠠᠰᠢᠯᠠᠭᠰᠠᠨ ᠢ ᠴᠢᠩ ᠤᠯᠤᠰ ᠰᠣᠷᠠᠭ ᠠᠪᠴᠤ ᠰᠤᠴᠢᠨ ᠬᠡᠯᠮᠡᠭᠳᠡᠨ ᠢᠯᠢ᠂ ᠳᠠᠷᠪᠠᠭᠠᠳᠤ᠂ ᠦᠷᠦᠮᠴᠢ  ᠳᠤ ᠴᠡᠷᠢᠭ ᠳᠠᠳᠠᠵᠤ ᠰᠡᠷᠭᠡᠶᠢᠯᠡᠪᠡ᠃ ᠤᠪᠠᠰᠢ ᠬᠠᠨ ᠡᠨᠡ ᠪᠠᠶᠢᠳᠠᠯ ᠳᠤᠤᠷ᠎ᠠ ᠴᠢᠩ ᠤᠯᠤᠰ ᠢ ᠳᠠᠭᠠᠪᠠ᠃ ᠡᠭᠦᠨ  ᠳᠤ ᠡᠩᠭᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠬᠤᠪᠢ ᠶᠢᠨ ᠭᠠᠳᠠᠨ᠎ᠠ ᠪᠠᠶᠠᠰᠤᠨ ᠬᠠᠯᠠᠭᠤᠨ ᠢᠶᠠᠷ ᠬᠦᠯᠢᠶᠡᠨ ᠠᠪᠴᠤ ᠠᠭᠤᠯᠵᠠᠨ ᠳᠡᠳᠡ ᠨᠠᠷ ᠢ ᠲᠦᠪᠬᠢᠨᠡᠭᠦᠯᠦᠨ᠎ᠡ ᠭᠡᠵᠦ ᠠᠮᠠᠯᠠᠪᠠ᠃ ᠢᠩᠭᠢᠭᠡᠳ ᠴᠢᠩ ᠤᠯᠤᠰ ᠤᠨ ᠢᠮᠠᠭᠳᠠ ᠶᠢᠨ ᠬᠡᠷᠡᠭᠯᠡᠳᠡᠭ ᠠᠷᠭ᠎ᠠ ᠪᠠᠰᠢᠷ ᠢᠶᠠᠷ ᠢᠶᠠᠨ ︽ᠬᠡᠰᠡᠭᠯᠡᠨ ᠵᠠᠬᠢᠷᠬᠤ︾ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠪᠠᠨ ᠤᠯᠠᠷᠢᠭᠤᠯᠤᠨ ᠬᠡᠷᠡᠭᠯᠡᠵᠦ ᠲᠤᠯᠤᠭᠠᠨ ᠲᠦᠮᠡᠨ ᠤᠶᠢᠷᠠᠳ ᠢ ᠤᠯᠠᠨ ᠤᠪᠤᠭ ᠠᠶᠢᠮᠠᠭ ᠲᠠᠢ ᠬᠤᠳᠬᠤᠨ ᠬᠤᠯᠢᠯᠳᠤᠭᠤᠯᠵᠤ᠂ ᠦᠨᠡᠨ ᠰᠦᠵᠦᠭᠳᠦ ᠴᠢᠭᠤᠯᠭᠠᠨ᠂ ᠴᠢᠩ ᠰᠡᠳᠬᠢᠯᠳᠦ ᠴᠢᠭᠤᠯᠭᠠᠨ᠂ ᠪᠠᠳᠤ ᠰᠡᠳᠬᠢᠯᠳᠦ ᠦᠨᠡᠨ ᠴᠢᠭᠤᠯᠭᠠᠨ ᠭᠡᠰᠡᠨ ᠰᠤᠨᠤᠰᠪᠤᠷᠢ ᠲᠠᠢ ᠰᠠᠶᠢᠬᠠᠨ ᠨᠡᠷ᠎ᠡ ᠲᠠᠢ ᠭᠤᠷᠪᠠᠨ ᠴᠢᠭᠤᠯᠭᠠᠨ 16 ᠬᠤᠰᠢᠭᠤ᠂ 94 ᠰᠤᠮᠤ ᠬᠤᠪᠢᠶᠠᠨ ᠤᠷᠬᠢᠭᠰᠠᠨ ᠠᠮᠤ ᠮᠡᠳᠦ ᠪᠤᠳᠠᠷᠭᠠᠨ ᠰᠠᠷᠨᠢᠭᠤᠯᠵᠠᠢ᠃ ᠬᠤᠶᠠᠷ ᠵᠢᠯ ᠤᠨ ᠳᠠᠷᠠᠭ᠎ᠠ ᠲᠤᠷᠤᠨᠠᠰᠢ ᠪᠤᠴᠠᠭᠰᠠᠨ ᠪᠠᠭᠠᠳᠤᠷ ᠤᠪᠠᠰᠢ ᠬᠠᠨ ᠬᠢᠭᠡᠳ ᠪᠠᠮᠪᠠᠷ ᠨᠤᠶᠠᠨᠳᠠᠨ ᠭᠡᠨᠡᠳᠳᠡ ᠨᠠᠰᠤ ᠪᠠᠷᠠᠭᠰᠠᠨ ᠪᠠᠶᠢᠨ᠎ᠠ︹5︺᠃ ︵ᠦᠷᠭᠦᠯᠵᠢᠯᠡᠯ ᠪᠤᠢ︶                                                          ᠬᠤᠳᠤᠷᠠᠩᠭ᠎ᠠ ᠵᠤᠬᠢᠶᠠᠪᠠ᠃                 ︽ᠳᠤᠷᠠᠰᠤᠯ ᠳᠤ ᠮᠦᠩᠬᠡᠷᠡᠬᠦ ᠬᠤᠷᠸ᠎ᠠ︾ ︵ᠦᠪᠦᠷ ᠮᠤᠩᠭᠤᠯ ᠤᠨ ᠬᠡᠪᠯᠡᠯ ᠤᠨ ᠪᠦᠯᠦᠭᠯᠡᠯ ᠦᠪᠦᠷ ᠮᠤᠩᠭᠤᠯ ᠤᠨ ᠰᠤᠶᠤᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ 2014 ᠤᠨ ᠤ 3 ᠰᠠᠷ᠎ᠠ ᠶᠢᠨ ᠠᠩᠬᠠᠳᠤᠭᠠᠷ ᠬᠡᠪ︶ ᠭᠡᠬᠦ ᠨᠤᠮ ᠠᠴᠠ ᠰᠤᠩᠭᠤᠪᠠ᠃
  
ᠢᠷᠡᠯᠲᠡ᠄ ᠠᠷᠣ ᠬᠤᠷᠴᠢᠨ ᠬᠤᠰᠢᠭᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠮᠣᠭᠤᠯᠠᠩ ᠰᠠᠶᠢᠬᠠᠨ ᠴᠠᠭᠠᠯᠠᠵᠣ ᠪᠠᠶᠢᠡᠨᠣ︖
ᠴᠠᠭᠠᠨ ᠬᠤᠯᠣᠭᠠᠨ᠎ᠠ ᠵᠢᠯ ᠢᠶᠠᠨ ᠣᠡᠡᠳᠣᠬᠤ ᠢᠷᠣᠭᠡᠯ ᠮᠬᠠᠳᠠᠭᠠᠯ
ᠪᠣᠷᠬᠠᠨ ᠠᠪᠤ ᠮᠢᠨᠢ
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠠᠷᠪᠠ︶
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠶᠢᠰᠦ︶
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05003979号