ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠠᠯᠢᠮᠠᠭ ᠮᠣᠩᠭᠤᠯ ᠤᠨ ᠵᠢᠭᠡ ᠬᠦᠦ ᠯᠧᠨᠢᠨ᠂ ᠬᠠᠷᠠᠴᠢᠨ ᠸᠠᠩ ᠭᠦᠩᠰᠡᠩᠨᠤᠷᠪᠤ ᠶᠢᠨ ᠵᠢᠭᠡ ᠣᠬᠢᠨ ᠮᠠᠨᠯᠢᠨ ︵ᠳᠦᠷᠪᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/2/22
     ᠶᠢᠰᠦ᠂ ᠬᠠᠷᠠᠴᠢᠨ ᠸᠠᠩ ᠭᠦᠩᠰᠡᠩᠨᠤᠷᠪᠤ ᠶᠢᠨ ᠵᠢᠭᠡ ᠦᠬᠢᠨ ᠮᠠᠨᠯᠢᠨ      ᠲᠤᠷᠭᠤᠳ ᠭᠦᠩᠵᠦ ᠮᠠᠨᠯᠢᠨ ᠤ ᠲᠦᠷᠦᠭᠰᠡᠨ ᠡᠬᠡ ᠡᠦ ᠵᠢᠩ ᠪᠢᠨ ᠪᠤᠯ ᠦᠪᠦᠷ ᠮᠤᠩᠭᠤᠯ ᠤᠨ ᠤᠤᠯ ᠤᠨ ᠵᠤᠰᠤᠳᠤ ᠶᠢᠨ ᠴᠢᠭᠤᠯᠭᠠᠨ ᠤ ᠬᠠᠷᠠᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤ᠂ ᠦᠨᠦ ᠶᠢᠨ ᠤᠯᠠᠭᠠᠨᠬᠠᠳᠠ ᠬᠤᠳᠠ ᠶᠢᠨ ᠬᠠᠷᠠᠴᠢᠨ ᠬᠤᠰᠢᠭᠤ ᠶᠢᠨ ᠴᠢᠨ ᠸᠠᠩ ᠭᠦᠩᠰᠡᠩᠨᠤᠷᠪᠤ ᠶᠢᠨ ᠬᠤᠶᠠᠳᠤᠭᠠᠷ ᠳᠠᠳᠠᠪᠤᠷᠢ ᠠᠴᠠ ᠲᠦᠷᠦᠭᠰᠡᠨ ᠦᠬᠢᠨ᠃ ᠭᠡᠷ ᠨᠤᠳᠤᠭ ᠨᠢ ᠮᠦᠨ ᠬᠠᠷᠠᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠮᠤᠵᠠᠩ ᠳᠠᠪᠠᠭ᠎ᠠ ᠶᠢᠨ ᠴᠠᠮᠠᠯᠠᠬᠠᠢ ᠳᠠᠬᠢ ᠸᠠᠩ ᠵᠢᠶᠠ ᠳ᠋ᠢᠶᠠᠨ ᠤ ᠵᠢᠢ ᠰᠢᠶᠠᠩ ᠵᠤᠸᠠᠩ ᠲᠤᠰᠬᠤᠨ ᠤ ᠬᠦᠮᠦᠨ᠂ ᠪᠠᠢ ᠣᠪᠤᠭᠳᠠᠢ᠂ ᠵᠢᠢ ᠡᠯ ᠭᠡᠰᠡᠨ ᠨᠡᠷ᠎ᠡ ᠲᠠᠢ᠂ ᠶᠡᠷᠦ ᠳᠡᠭᠡᠨ ᠪᠠᠢ ᠭᠦᠨᠢᠶᠠᠩ ᠭᠡᠨ᠎ᠡ ︹17︺᠃ ᠪᠠᠢ ᠭᠦᠨᠢᠶᠠᠩ ᠤᠨ ᠠᠷᠪᠠᠨ ᠬᠤᠶᠠᠷ ᠨᠠᠰᠤᠨ᠎ᠠ ᠭᠦᠩ ᠸᠠᠩ ᠤᠨ ᠤᠷᠳᠤᠨ᠎ᠠ ᠢᠷᠡᠵᠦ ᠭᠦᠩ ᠸᠠᠩ ᠤᠨ ᠹᠦᠵᠢᠨ ᠬᠠᠳᠤᠨ ᠱᠠᠨ ᠭᠦᠨ ᠢ ᠰᠤᠪᠢᠯᠠᠬᠤ ᠵᠠᠷᠤᠴᠠ ᠬᠡᠦᠬᠡᠨ ᠪᠤᠯᠵᠠᠢ᠃ ᠤᠷᠳᠤᠨ ᠤ ᠳᠤᠳᠤᠷ᠎ᠠ ᠳᠡᠭᠦᠨ ᠢ ᠤᠪᠤᠭ ᠢᠶᠠᠷ   ᠨᠢ ︽ᠪᠠᠢ ᠭᠦᠨᠢᠶᠠᠩ︾ ᠭᠡᠳᠡᠭ᠃ ᠲᠤᠬᠠᠢ ᠶᠢᠨ ᠤᠷᠳᠤᠨ ᠤ ᠲᠦᠷᠪᠡᠨ ᠰᠠᠶᠢᠬᠠᠨ ᠬᠡᠦᠬᠡᠨ ᠤ ᠬᠠᠮᠤᠭ ᠤᠨ ᠭᠤᠶᠤ ᠬᠡᠬᠡᠨᠴᠢᠷ ᠨᠢ ᠪᠠᠶᠢᠪᠠ᠃ ᠳᠡᠭᠦᠨ ᠤ ᠮᠡᠯᠮᠡᠯᠵᠡᠬᠦ ᠬᠤᠶᠠᠷ ᠨᠢᠳᠦ  ᠨᠢ ᠬᠤᠪᠢ ᠶᠢᠨ ᠭᠠᠳᠠᠨ᠎ᠠ ᠭᠤᠶᠤ ᠰᠠᠶᠢᠬᠠᠨ ᠪᠠᠶᠢᠳᠠᠭ ᠭᠡᠨ᠎ᠡ᠃ 16 ᠨᠠᠰᠤᠨ᠎ᠠ ᠳᠠᠰᠤᠷᠬᠠᠢ ᠰᠠᠶᠢᠬᠠᠨ ᠬᠡᠦᠬᠡᠨ ᠪᠤᠯᠵᠤ ᠭᠦᠩ ᠸᠠᠩ ᠤᠨ ᠬᠠᠶᠢᠷ᠎ᠠ ᠶᠢ ᠳᠠᠳᠠᠵᠠᠢ᠃      ᠡᠨᠡ ᠦᠶ᠎ᠡ ᠳᠤ ᠭᠦᠩ ᠸᠠᠩ᠂ ᠱᠠᠨ ᠭᠦᠨ ᠠᠴᠠ ᠭᠠᠳᠠᠨ᠎ᠠ ᠬᠤᠶᠠᠷ ᠬᠠᠳᠤᠨ ᠲᠠᠢ ᠬᠦᠦ ᠦᠭᠡᠢ᠃ ᠱᠠᠨ ᠭᠦᠨ ᠨᠢᠭᠡ ᠭᠦᠦ ᠲᠦᠷᠦᠭᠰᠡᠨ ᠴᠦ ᠤᠢ ᠳᠤᠯᠬᠤ ᠠᠴᠠ ᠪᠠᠨ ᠡᠮᠦᠨ᠎ᠡ ᠭᠡᠭᠡᠭᠳᠡᠵᠠᠢ᠃ ᠭᠦᠩ ᠸᠠᠩ ᠭᠦᠦ ᠲᠠᠢ ᠪᠤᠯᠬᠤ ᠶᠢ ᠡᠳᠦᠷ ᠤᠨ ᠬᠤᠭᠤᠯᠠ᠂ ᠰᠦᠨᠢ ᠶᠢᠨ ᠵᠡᠭᠦᠳᠦᠨ ᠳᠤ ᠬᠦᠰᠡᠵᠦ ᠪᠠᠶᠢᠳᠠᠯ᠎ᠠ ᠭᠦᠩ ᠸᠠᠩ᠂ ᠪᠠᠢ ᠭᠦᠨᠢᠶᠠᠩ ᠵᠡᠷᠭᠡ ᠪᠠᠷ ᠭᠡᠷ ᠳᠤᠳᠤᠷ᠎ᠠ ᠨᠢ ᠨᠠᠷᠠ ᠮᠠᠨᠳᠤᠵᠤ ᠢᠷᠡᠯ᠎ᠡ ᠭᠡᠵᠦ ᠵᠡᠭᠦᠳᠦᠯᠡᠨ ᠪᠠᠢ ᠭᠦᠨᠢᠶᠠᠩ ᠵᠢᠷᠮᠦᠰᠦᠯᠡᠭᠰᠡᠨ ᠳᠤ᠂ ᠱᠠᠨ ᠭᠦᠨ ᠰᠤᠨᠤᠰᠤᠭᠠᠳ ᠶᠡᠬᠡᠯ᠎ᠡ ᠪᠠᠶᠠᠷᠯᠠᠵᠤ ᠪᠠᠢ ᠭᠦᠨᠢᠶᠠᠩ ᠢ ᠸᠠᠩ ᠳᠤ ᠳᠠᠳᠠᠪᠤᠷᠢ ᠪᠤᠯᠭᠠᠬᠤ ᠶᠢ ᠵᠦᠪᠳᠡᠪᠡ᠃ ᠭᠦᠩ ᠸᠠᠩ᠂ ᠪᠠᠢ ᠭᠦᠨᠢᠶᠠᠩ ᠳᠤ ᠮᠠᠰᠢ ᠬᠠᠶᠢᠷᠠᠳᠠᠢ ᠲᠤᠯᠠ ᠪᠠᠶᠠᠷᠯᠠᠵᠤ ᠳᠡᠭᠦᠨ ᠢ ᠬᠦᠦ ᠲᠠᠢ ᠪᠤᠯᠪᠠᠯ ᠹᠦᠵᠢᠨ ᠪᠤᠯᠭᠠᠶ᠎ᠠ ᠭᠡᠵᠦ ᠳᠠᠩᠭᠠᠷᠢᠭᠯᠠᠪᠠ︹18︺᠃      ᠭᠦᠩ ᠸᠠᠩ᠂ ᠪᠠᠢ ᠭᠦᠨᠢᠶᠠᠩ ᠬᠤᠶᠠᠭᠤᠯᠠ ᠶᠠᠭ ᠴᠢᠩ ᠤᠯᠤᠰ ᠤᠨ ᠭᠤᠷᠪᠠᠨ ᠦᠶ᠎ᠡ ᠶᠢᠨ ᠬᠠᠭᠠᠨ ᠢ ᠲᠦᠰᠢᠭ ᠲᠤᠯᠭᠠᠭᠤᠷᠢᠯᠠᠭᠰᠠᠨ ᠬᠤᠷᠴᠢᠨ ᠬᠡᠦᠬᠡᠨ ᠮᠤᠩᠭᠤᠯ ᠬᠤᠸᠠᠩᠬᠡᠦ — ᠪᠦᠮᠪᠡᠳᠠᠢ ᠶᠢᠨ ᠵᠡᠭᠦᠳᠦ ᠮᠠᠨᠠᠭᠰᠠᠨᠴᠢᠯᠠᠨ ᠬᠦᠦ ᠲᠠᠢ ᠪᠤᠯᠬᠤ ᠶᠢ ᠬᠦᠰᠡᠨ ᠬᠦᠰᠡᠨ ᠬᠦᠯᠢᠶᠡᠵᠦ ᠮᠦᠷᠦᠭᠡᠳᠦᠨ ᠪᠠᠶᠢᠳᠠᠯ᠎ᠠ ᠪᠠᠢ ᠭᠦᠨᠢᠶᠠᠩ ᠵᠢᠢ ᠡᠯ 1914 ᠤᠨ ᠤ 7 ᠰᠠᠷ᠎ᠠ ᠶᠢᠨ 1 ᠤ ᠡᠳᠦᠷ ᠴᠢᠩ ᠤᠯᠤᠰ ᠤᠨ ᠨᠡᠶᠢᠰᠯᠡᠯ ᠪᠡᠭᠡᠵᠢᠩ ᠤᠨ ᠵᠢᠨᠱᠠᠨ ᠴᠡᠴᠡᠷᠯᠢᠭ  ᠤᠨ ᠠᠷᠤ ᠶᠢᠨ ᠳᠠᠶᠢᠫᠢᠩ ᠵᠡᠭᠡᠯᠢ ᠳᠠᠬᠢ ᠭᠦᠩᠰᠠᠩᠨᠤᠷᠪᠤ ᠴᠢᠨ ᠸᠠᠩ ᠤᠨ ᠤᠷᠳᠤᠨ ᠳᠤ ᠬᠦᠩᠭᠡᠵᠢᠭᠰᠡᠨ ᠨᠢ ᠬᠦᠦ ᠪᠢᠰᠢ᠂ ᠬᠠᠷᠢᠨ ᠦᠬᠢᠨ ᠪᠠᠶᠢᠵᠠᠢ᠃      ᠱᠠᠨ ᠭᠦᠨ ᠬᠡᠦᠬᠡᠨ ᠬᠡᠰᠡᠨ ᠢ ᠰᠤᠨᠤᠰᠤᠭᠠᠳ ︽ᠭᠤᠷᠪᠠᠨ ᠡᠳᠦᠷ ᠲᠤ ᠬᠦᠦ ᠪᠠᠨ ᠳᠤᠰᠢᠶᠠ᠂ ᠳᠡᠭᠡᠬᠦ ᠦᠭᠡᠢ ᠪᠤᠯ ᠠᠮᠢᠳᠤᠷᠠᠨ᠎ᠠ ᠭᠡᠵᠦ ᠪᠤᠤ ᠰᠠᠨᠠ︕︾ ︹19︺ᠭᠡᠵᠦ ᠵᠠᠷᠯᠢᠭ ᠳᠠᠮᠵᠢᠭᠤᠯᠪᠠ᠃      ᠬᠦᠭᠡᠷᠦᠬᠦᠢ︕ ᠪᠠᠢ ᠭᠦᠨᠢᠶᠠᠩ — ᠵᠢᠢ ᠡᠯ᠂ ᠱᠠᠨ ᠭᠦᠨ ᠠᠴᠠ ᠠᠶᠤᠨ ᠡᠮᠢᠶᠡᠭᠰᠡᠭᠡᠷ ᠮᠡᠳᠡᠭᠡ ᠨᠢ ᠪᠠᠯᠠᠷᠠᠵᠤ ᠬᠡᠰᠡᠭ ᠢᠨᠢᠶᠡᠵᠦ ᠬᠡᠰᠡᠭ ᠤᠬᠢᠯᠠᠬᠤ ᠪᠠ ᠭᠡᠩᠰᠢᠨ ᠳᠠᠭᠤᠯᠠᠬᠤ ᠪᠤᠯᠪᠠ᠃ ᠱᠠᠨ ᠭᠦᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠪᠠᠢ ᠭᠦᠨᠢᠶᠠᠩ ᠢ ᠠᠷᠤ ᠬᠦᠷᠢᠶᠡᠨ ᠳᠤ ᠬᠤᠷᠢᠭᠠᠳ ᠬᠠᠷᠠᠭᠤᠯ ᠮᠠᠨᠠᠭ᠎ᠠ ᠵᠤᠭᠰᠤᠭᠠᠭᠰᠠᠨ ᠠᠴᠠ ᠭᠦᠩ ᠸᠠᠩ ᠴᠦ ᠤᠴᠠᠷᠠᠬᠤ ᠲᠤᠬᠢᠶᠠᠯ ᠦᠭᠡᠢ ᠪᠤᠯᠪᠠ᠃      ᠤᠯᠠᠨ ᠤ ᠮᠡᠳᠡᠭᠡᠵᠢ ᠪᠠᠷ ᠱᠠᠨ ᠭᠦᠨ ᠪᠣᠯ ᠴᠢᠩ ᠤᠯᠤᠰ ᠤᠨ ᠲᠦᠷᠦ ᠶᠢᠨ ᠰᠦ᠋ ᠴᠢᠨ ᠸᠠᠩ ᠤᠨ ᠬᠡᠦᠬᠡᠨ ᠳᠡᠭᠦᠦ᠂ ᠳᠡᠭᠦᠨ ᠲᠠᠢ ᠬᠡᠨ ᠴᠦ ᠬᠠᠯᠳᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠡᠷᠡ ᠪᠠᠢ ᠭᠦᠨᠢᠶᠠᠩ ᠢ ᠠᠷᠤ ᠬᠦᠷᠢᠶᠡᠨ ᠳᠤ ᠬᠤᠷᠢᠭᠠᠳ᠄ ︽ᠲᠡᠷᠡ ᠦᠬᠦᠯ ᠳᠠᠭᠠᠷᠢᠭᠰᠠᠨ ᠵᠤᠯᠵᠠᠭ᠎ᠠ ᠪᠠᠷ ᠴᠢᠨ᠋ᠸ᠎ᠠ ᠳᠡᠵᠢᠭᠡ︾ ᠭᠡᠵᠦ ᠤᠯᠠᠭᠠᠨ ᠨᠢᠯᠬ᠎ᠠ ᠶᠢ ᠨᠢ ᠬᠠᠷᠢᠶᠠᠨ ᠭᠠᠯᠵᠠᠭᠤᠷᠠᠵᠤ ᠪᠠᠶᠢᠭᠰᠠᠨ ᠪᠦᠭᠡᠳ ᠪᠠᠢ ᠭᠦᠨᠢᠶᠠᠩ᠂ ᠱᠠᠨ ᠭᠦᠨ ᠤ ᠬᠠᠯᠠ ᠳᠠᠮᠤᠯᠠᠯ ᠢ ᠳᠠᠭᠠᠭᠠᠭᠰᠠᠨ ᠦᠭᠡᠢ ᠬᠦᠩᠭᠡᠵᠢᠭᠰᠡᠨ ᠤ ᠳᠠᠷᠠᠭᠠᠬᠢ ᠳᠤᠯᠤᠭᠠᠨ ᠬᠤᠨᠤᠭ ᠳᠡᠭᠡᠷ᠎ᠡ ᠪᠠᠨ ᠤᠷᠴᠢᠯᠠᠩ ᠠᠴᠠ ᠰᠠᠯᠵᠠᠢ︹20︺᠃      ᠡᠵᠢ ᠠᠴᠠ ᠪᠠᠨ ᠦᠨᠦᠴᠢᠷᠡᠨ ᠬᠤᠴᠤᠷᠤᠭᠰᠠᠨ ᠡᠨᠡ ᠬᠦ ᠤᠯᠠᠭᠠᠨ ᠨᠢᠯᠬ᠎ᠠ ᠬᠡᠦᠬᠡᠨ ᠡᠵᠢ ᠶᠢᠨ ᠢᠶᠠᠨ ᠠᠩᠭᠢᠷ ᠤᠭᠤᠷᠠᠭ ᠢ ᠴᠦ ᠤᠯᠵᠤ ᠠᠮᠳᠠᠯᠠᠭᠰᠠᠨ ᠦᠭᠡᠢ᠃ ︽ᠳᠡᠭᠦᠨ ᠤ ᠤᠯᠠᠭᠠᠨ ᠨᠢᠯᠬ᠎ᠠ ᠶᠢᠨ ᠠᠮᠢᠳᠤᠷᠠᠯ ᠨᠢ ᠪᠠᠭᠠᠯ ᠨᠤᠬᠠᠢ ᠶᠢ ᠴᠦ ᠬᠦᠷᠬᠦ ᠦᠭᠡᠢ᠃ ᠲᠦᠷᠪᠡᠨ ᠨᠠᠰᠤᠳᠠᠢ ᠵᠢᠩ ᠪᠢᠨ ᠢᠶᠠᠷ ᠱᠠᠨ ᠭᠦᠨ ᠵᠤᠨ ᠰᠠᠯᠬᠢ ᠳᠡᠪᠢᠭᠦᠷᠳᠡᠭᠦᠯᠵᠦ ᠂ ᠡᠪᠦᠯ ᠬᠦᠯ ᠤᠭᠢᠶᠠᠬᠤ ᠤᠰᠤ ᠵᠦᠭᠡᠭᠡᠯᠭᠡᠵᠦ᠂ ᠨᠢᠭᠤᠷ ᠨᠢᠳᠦ ᠦᠭᠡᠢ ᠴᠤᠬᠢᠵᠤ ᠬᠠᠷᠢᠶᠠᠨ᠂ ᠵᠡᠭᠦᠦ ᠪᠠᠷ ᠰᠢᠪᠡᠵᠦ ᠪᠠᠶᠢᠯ᠎ᠠ ᠁︾ ︹21︺ᠭᠡᠰᠡᠨ᠃      ᠦᠨᠦᠴᠢᠨ ᠪᠠᠭ᠎ᠠ ᠵᠢᠩ ᠪᠢᠨ ᠢ ᠭᠦᠩ ᠸᠠᠩ ᠤᠨ ᠬᠤᠶᠠᠳᠤᠭᠠᠷ ᠬᠠᠳᠤᠨ ᠬᠦᠭᠡᠷᠦᠬᠦᠶᠢᠯᠡᠨ ᠭᠠᠷ ᠳᠡᠭᠡᠷ᠎ᠡ  ᠪᠠᠨ ᠠᠪᠤᠭᠰᠠᠨ᠂ ᠱᠠᠨ ᠭᠦᠨ ᠬᠤᠶᠠᠳᠤᠭᠠᠷ ᠬᠠᠳᠤᠨ ᠬᠢᠭᠡᠳ ᠵᠢᠩ ᠪᠢᠨ ᠢ ᠠᠷᠤ ᠬᠦᠷᠢᠶᠡᠨ ᠳᠤ ᠪᠠᠨ ᠴᠤᠭᠭᠠᠷ ᠬᠤᠷᠢᠭᠠᠳ ᠭᠠᠷᠭᠠᠬᠤ ᠦᠭᠡᠢ ᠪᠤᠯᠪᠠ᠃ ᠭᠡᠳᠡᠷᠭᠦ ᠳᠤ ᠪᠠᠨ ︽ᠡᠨᠡ ᠬᠡᠦᠬᠡᠨ ᠢ ᠮᠢᠨᠤ ᠨᠢᠳᠦ ᠴᠢᠬᠢ ᠠᠴᠠ ᠳᠠᠯᠳᠠ ᠪᠤᠯᠭ᠎ᠠ︾ ᠭᠡᠵᠦ ᠵᠠᠷᠯᠢᠭᠳᠠᠨ ᠪᠠᠶᠢᠯ᠎ᠠ᠃ ᠨᠢᠯᠬ᠎ᠠ ᠪᠠᠭ᠎ᠠ ᠵᠢᠩ ᠪᠢᠨ ᠤᠴᠢᠷ ᠤᠬᠠᠭᠠᠨ ᠢ ᠲᠦᠰᠦᠪᠯᠡᠵᠦ ᠬᠤᠶᠠᠳᠤᠭᠠᠷ ᠬᠠᠳᠤᠨ ᠳᠤ᠄ ︽ᠨᠠᠮᠠᠢᠢ ᠳᠡᠳᠡᠨ ᠳᠤ ᠳᠤᠰᠢᠶᠠᠴᠢᠬ᠎ᠠ︾ ᠭᠡᠵᠦ ᠭᠤᠶᠤᠨ ᠬᠤᠶᠠᠳᠤᠭᠠᠷ ᠬᠠᠳᠤᠨ ᠢ ᠬᠤᠯᠪᠤᠭᠳᠠᠭᠤᠯᠤᠨ ᠵᠤᠪᠠᠭᠠᠵᠤ ᠪᠠᠶᠢᠬᠤ ᠳᠤ ᠲᠤᠩ ᠰᠠᠨᠠᠭ᠎ᠠ ᠰᠡᠳᠬᠢᠯ ᠪᠤᠯᠵᠤ ᠪᠠᠶᠢᠭᠰᠠᠨ ᠭᠡᠨ᠎ᠡ᠃      ᠭᠦᠩ ᠸᠠᠩ ᠤᠯᠠᠭᠠᠨ ᠨᠢᠯᠬ᠎ᠠ ᠬᠡᠦᠬᠡᠨ ᠤ ᠪᠠᠨ ᠳᠠᠮᠤᠯᠠᠭᠳᠠᠨ ᠬᠤᠤᠷ ᠠᠮᠰᠠᠵᠤ ᠪᠠᠶᠢᠬᠤ ᠶᠢ ᠦᠵᠡᠵᠦ ᠰᠤᠨᠤᠰᠤᠭᠠᠳ ᠳᠡᠰᠬᠦ ᠦᠭᠡᠢ ᠵᠢᠷᠦᠬᠡ ᠨᠢ ᠰᠢᠮᠰᠢᠷᠡᠨ ᠳᠤᠯᠤᠭᠠᠨ ᠨᠠᠰᠤᠳᠠᠢ ᠳᠤ ᠨᠢ ᠨᠤᠳᠤᠭ ᠲᠤᠨᠢ ᠰᠠᠭᠤᠭ᠎ᠠ ᠤᠪᠤᠭ ᠨᠢᠭᠡᠳᠡᠨ ᠱᠢ ᠵᠦᠩ ᠾᠧ ᠶᠢᠨ ᠳᠤ ᠬᠦᠷᠭᠡᠵᠦ ᠴᠢᠨ᠋ᠸ᠎ᠠ ᠶᠢᠨ ᠠᠮᠠᠨ ᠠᠴᠠ ᠰᠠᠯᠭᠠᠪᠠ᠃ ᠡᠨᠡ ᠦᠶ᠎ᠡ ᠳᠤ ᠱᠠᠨ ᠭᠦᠨ ᠮᠦᠨ ︽ᠡᠨᠡ ᠦᠬᠦᠯ ᠳᠠᠭᠠᠷᠢᠭᠰᠠᠨ ᠬᠡᠦᠬᠡᠨ ᠬᠡᠷᠪᠡ ᠬᠦᠮᠦᠨ ᠲᠦᠷᠢ ᠲᠠᠢ ᠪᠤᠯᠴᠢᠬᠠᠪᠠᠯ ᠪᠢ ᠬᠤᠶᠠᠷ ᠨᠢᠳᠦ ᠪᠠᠨ ᠤᠬᠤᠵᠤ ᠬᠠᠶᠠᠨ᠎ᠠ︾ ᠭᠡᠵᠦ ᠬᠤᠶᠢᠨ᠎ᠠ ᠠᠴᠠ ᠨᠢ ᠬᠠᠷᠢᠶᠠᠵᠤ ᠪᠠᠶᠢᠪᠠ᠃ ᠱᠢ ᠵᠦᠩ ᠾᠧ ᠪᠡᠭᠡᠵᠢᠩ  ᠳᠤ ᠨᠡᠭᠦᠵᠦ ᠰᠠᠭᠤᠭᠰᠠᠨ᠎ᠠ᠂ ᠭᠦᠩ ᠸᠠᠩ ᠳᠡᠳᠡᠨ ᠤ ᠳᠤ ᠮᠤᠷᠢᠯᠠᠨ ᠬᠦᠷᠴᠦ ᠦᠬᠢᠨ ᠢᠶᠠᠨ ᠬᠠᠯᠠᠭᠤᠨ ᠡᠯᠢᠭᠡᠨ ᠳᠤ  ᠪᠠᠨ ᠳᠡᠪᠡᠷᠢᠵᠦ ᠤᠬᠢᠯᠠᠨ᠄ ︽ᠬᠡᠦᠬᠡᠨ ᠮᠢᠨᠢ᠂ ᠡᠨᠡ ᠪᠦᠬᠦᠨ ᠴᠦᠮ ᠠᠷᠭ᠎ᠠ ᠦᠭᠡᠢ ᠳᠤ ᠪᠠᠨ ᠶᠤᠮ᠂ ᠠᠪᠤ ᠨᠢ ᠴᠢᠮ᠎ᠠ ᠶᠢ ᠪᠢᠴᠢᠭ ᠦᠵᠡᠭᠦᠯᠦᠶ᠎ᠡ᠂ ᠶᠤᠰᠤ ᠵᠦᠢ ᠮᠡᠳᠡᠭᠦᠯᠵᠦ ᠰᠤᠷᠭᠠᠶ᠎ᠠ︾︹21︺ ᠭᠡᠪᠡ᠃ ᠵᠢᠩ ᠪᠢᠨ ᠠᠷᠪᠠᠨ ᠭᠤᠷᠪᠠ ᠨᠠᠰᠤᠯᠠᠭᠠᠳ ᠰᠠᠶ᠋ᠢ ᠠᠪᠤ ᠶᠢᠨ ᠬᠠᠶᠢᠷ᠎ᠠ ᠶᠢ ᠮᠡᠳᠡᠵᠦ ᠠᠪᠤ ᠶᠢᠨ ᠢᠶᠠᠨ ᠬᠠᠯᠠᠭᠤᠨ ᠡᠯᠢᠭᠡᠨ ᠳᠤ ᠪᠦᠪᠡᠶᠢᠯᠡᠭᠳᠡᠭᠰᠡᠨ ᠨᠢ ᠡᠨᠡ ᠪᠠᠶᠢᠨ᠎ᠠ᠃      ᠦᠨᠦᠴᠢᠨ ᠪᠠᠭ᠎ᠠ ᠵᠢᠩ ᠪᠢᠨ ᠪᠡᠭᠡᠵᠢᠩ ᠪᠠ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠬᠤᠭᠤᠷᠤᠨᠳᠤ ᠬᠡᠳᠦᠨ ᠵᠢᠯ ᠲᠦᠷᠦᠯ ᠰᠠᠳᠤᠨ ᠢᠶᠠᠷ ᠢᠶᠠᠨ ᠦᠨᠦᠴᠢᠷᠡᠨ ᠲᠡᠨᠦᠭᠦᠴᠢᠯᠡᠵᠦ ᠬᠠᠳᠠᠭᠤᠵᠢᠨ ᠳᠠᠪᠳᠠᠭᠳᠠᠵᠤ ᠦᠭᠡᠯᠠᠢ ᠪᠤᠯᠤᠯ᠎ᠠ᠃ 1930 ᠤᠨ  ᠳᠤ ᠰᠢᠨᠵᠢᠶᠠᠩ ᠤᠨ ᠲᠤᠷᠭᠤᠳ ᠮᠤᠩᠭᠤᠯ ᠤᠨ ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠬᠠᠨ ᠸᠠᠩ ᠮᠠᠨᠴᠤᠭᠵᠠᠪ ᠲᠤ ᠬᠠᠷᠢᠯᠠᠵᠤ ᠮᠤᠷᠳᠠᠬᠤ ᠪᠤᠯᠪᠠ᠃ ᠤᠷᠤᠭ ᠳᠤᠷᠠᠳᠬᠤ ᠳᠤ 8000 ᠮᠦᠩᠭᠦᠨ ᠵᠤᠭᠤᠰ ᠤᠨ ᠰᠠᠭᠠᠯᠢ ᠶᠢᠨ ᠪᠡᠯᠡᠭ ᠲᠤᠰᠢᠶᠠᠵᠠᠢ᠃ ᠭᠦᠩ ᠸᠠᠩ ᠬᠡᠦᠬᠡᠨ ᠢᠶᠠᠨ 42 ᠳᠡᠮᠡᠭᠡᠨ ᠠᠴᠢᠶ᠎ᠠ ᠶᠢᠨ ᠬᠦᠨᠳᠦ ᠪᠡᠯᠡᠭ ᠲᠠᠢ ᠮᠤᠷᠳᠠᠭᠤᠯᠵᠠᠢ᠃      ᠡᠦ ᠵᠢᠩ ᠪᠢᠨ  ︵ᠵᠢᠢ ᠡᠯ︶ ᠬᠠᠪᠤᠷ ᠤᠨ ᠡᠬᠢᠨ ᠰᠠᠷ᠎ᠠ ᠳᠤ ᠲᠦᠷᠦᠭᠰᠡᠨ ᠨᠤᠳᠤᠭ ᠤᠰᠤ ᠪᠠ ᠭᠡᠷ ᠪᠦᠯᠢ  ᠠᠴᠠ ᠪᠠᠨ ᠰᠠᠯᠵᠤ ᠪᠡᠭᠡᠵᠢᠩ ᠠᠴᠠ ᠰᠢᠪᠧᠷᠢᠶ᠎ᠠ᠂ ᠢᠯᠢ ᠪᠠᠷ ᠳᠠᠮᠵᠢᠨ 10 ᠰᠠᠷ᠎ᠠ ᠳᠤ ᠨᠢ ᠳ᠋ᠢ ᠬᠤᠸᠠ ︵ᠦᠷᠦᠮᠴᠢ ︶ ᠳᠤ ᠬᠦᠷᠴᠦ ᠾᠧ ᠵᠢᠩ ᠳᠤ ᠮᠤᠩᠭᠤᠯ ᠬᠤᠷᠢᠮ ᠵᠠᠰᠠᠵᠠᠢ᠃ ᠬᠠᠳᠠᠮ ᠨᠢ ᠮᠧᠳᠡᠭ ︵ᠵᠤᠬᠢᠶᠠᠭᠴᠢ ᠮᠡᠳᠡᠳᠡᠭ ᠭᠡᠨ᠎ᠡ ︶ ᠬᠦᠰᠢᠨᠠᠢ ᠭᠡᠰᠡᠨ ᠨᠡᠷ᠎ᠡ ᠱᠠᠩᠨᠠᠪᠠ᠃      ᠡᠦ ᠵᠢᠩ ᠪᠢᠨ ᠬᠠᠯᠠᠭᠤᠨ ᠬᠠᠶᠢᠷᠠᠳᠤ ᠠᠪᠤ᠂ ᠠᠷᠤ ᠦᠪᠦᠷ ᠲᠤ ᠠᠯᠳᠠᠷ ᠴᠤᠤᠳᠠᠢ ᠨᠢᠭᠡᠨ ᠦᠶ᠎ᠡ ᠶᠢᠨ ᠪᠤᠳᠤᠯᠭᠠᠳᠠᠨ᠂ ᠰᠤᠷᠭᠠᠨ ᠬᠦᠮᠦᠵᠢᠯᠳᠡᠨ᠂ ᠦᠨᠳᠦᠰᠦᠳᠡᠨ ᠤ ᠤᠮᠤᠭᠰᠢᠯ ᠪᠤᠯᠤᠭᠴᠢ ᠡᠴᠢᠭᠡ ᠭᠦᠩᠰᠡᠩᠨᠤᠷᠪᠤ ᠲᠠᠢ  ᠪᠠᠨ ᠳᠠᠬᠢᠨ ᠤᠯᠵᠤ ᠠᠭᠤᠯᠵᠠᠨ ᠬᠠᠯᠠᠭᠤᠨ ᠡᠯᠢᠭᠡᠨ ᠳᠤ ᠨᠢ ᠪᠦᠪᠡᠶᠢᠯᠡᠭᠳᠡᠬᠦ ᠠᠵᠠ ᠲᠤᠬᠢᠶᠠᠯ ᠤᠯᠤᠭᠰᠠᠨ ᠦᠭᠡᠢ᠃ ᠳᠡᠭᠦᠨ ᠤ ᠬᠠᠷᠢ ᠳᠤ ᠮᠤᠷᠳᠠᠭᠰᠠᠨ ᠤ ᠳᠠᠷᠠᠭ᠎ᠠ ᠵᠢᠯ ᠨᠢ ᠠᠰᠠᠷᠠᠯᠳᠤ ᠠᠪᠤ ᠭᠦᠩᠰᠡᠩᠨᠤᠷᠪᠤ ᠨᠢ ᠳᠡᠭᠷᠢ ᠨᠠᠷᠠᠨ ᠳᠤ ᠭᠠᠷᠴᠤ ᠳᠡᠷᠳᠡᠭᠡᠬᠢ ᠶᠢᠷᠳᠢᠨᠴᠦ ᠳᠤ ᠰᠢᠯᠵᠢᠪᠡ᠃ ᠡᠦ ᠵᠢᠩ ᠪᠢᠨ ᠬᠠᠷᠢ ᠬᠤᠯᠠ ᠰᠢᠨᠵᠢᠶᠠᠩ ᠳᠤ ᠢᠷᠡᠭᠡᠳ ᠮᠤᠩᠭᠤᠯ ᠦᠭᠡ ᠪᠠᠨ ᠡᠬᠢᠯᠡᠨ ᠰᠤᠷᠴᠠᠢ᠃      ᠡᠦ ᠵᠢᠩ ᠪᠢᠨ ᠡᠷᠡᠭᠳᠠᠢ ᠪᠠᠨ ᠳᠠᠭᠠᠵᠤ ᠳ᠋ᠢ ᠬᠤᠸᠠ ᠳᠤ ᠢᠷᠡᠭᠡᠳ 1935 ᠣᠨ ᠳᠤ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠪᠠ᠃ ᠰᠢᠨᠵᠢᠶᠠᠩ ᠳᠤ ᠬᠠᠷᠢᠯᠠᠭᠰᠠᠨ ᠡᠳᠦᠷ ᠠᠴᠠ ᠡᠬᠢᠯᠡᠨ ᠳᠡᠭᠦᠨ ᠤ ᠤᠷᠴᠢᠨ ᠲᠤᠭᠤᠷᠢᠨ ᠠᠮᠢᠳᠤᠷᠠᠯ ᠳᠤ ᠰᠢᠨ᠎ᠡ ᠬᠤᠪᠢᠷᠠᠯᠳᠠ᠂ ᠵᠤᠯ ᠵᠢᠷᠭᠠᠯ ᠲᠠᠢ ᠪᠤᠯᠵᠠᠢ᠃ ᠢᠯᠠᠩᠭᠤᠶ᠎ᠠ ᠳ᠋ᠢ ᠬᠤᠸᠠ   ᠶᠢᠨ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠭᠰᠠᠨ ᠨᠢ ᠲᠦᠢᠯ ᠤᠨ ᠶᠡᠭᠡ ᠰᠠᠶᠢᠨ ᠠᠵᠠ ᠲᠤᠬᠢᠶᠠᠯ ᠪᠤᠯᠵᠤ ᠤᠯᠠᠨ ᠤᠯᠠᠨ ᠡᠪ ᠬᠠᠮᠳᠤ ᠨᠠᠮ ᠤᠨ ᠭᠡᠰᠢᠭᠦᠨ ᠲᠠᠢ ᠳᠠᠨᠢᠯᠴᠠᠨ ᠳᠡᠳᠡᠨ ᠤ ᠬᠠᠯᠠᠭᠤᠨ ᠬᠠᠪᠰᠤᠷᠤᠯᠭ᠎ᠠ ᠪᠠ ᠨᠦᠯᠦᠭᠡ ᠶᠢ ᠭᠦᠨ ᠵᠤᠵᠠᠭᠠᠨ ᠬᠦᠷᠳᠡᠵᠦ ᠤᠯᠤᠰ ᠦᠨᠳᠦᠰᠦᠳᠡᠨ ᠢᠶᠠᠨ ᠬᠠᠶᠢᠷᠠᠯᠠᠨ ᠬᠦᠨᠳᠦᠳᠬᠡᠬᠦ ᠪᠠ ᠬᠦᠭᠵᠢᠭᠡᠨ ᠮᠠᠨᠳᠤᠭᠤᠯᠬᠤ ᠶᠢᠷᠳᠢᠨᠴᠦ ᠶᠢᠨ ᠦᠵᠡᠯ ᠤᠨ ᠰᠠᠭᠤᠷᠢ ᠶᠢ ᠳᠠᠯᠪᠢᠪᠠ᠃ ᠳᠡᠭᠦᠨ ᠤ ᠠᠩᠬᠢ ᠶᠢᠨ ᠡᠷᠬᠢᠯᠡᠭᠴᠢ ᠨᠢ ᠬᠤᠸᠠᠩ ᠢ᠂ ᠡᠪ ᠬᠠᠮᠳᠤ ᠨᠠᠮ ᠤ ᠬᠡᠰᠢᠭᠦᠨ᠂ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠤᠨ ᠡᠷᠬᠢᠯᠡᠭᠴᠢ ᠨᠢ ᠵᠦ ᠳ᠋ᠠᠨ ᠬᠤᠸᠠ ᠪᠤᠯ ᠡᠷᠭᠦᠭᠳᠡᠭᠰᠡᠨ ᠪᠠᠭᠠᠳᠤᠷ ᠮᠠᠤ ᠽᠧ ᠮᠢᠨ ᠤ ᠬᠠᠳᠤᠨ᠂ ᠪᠠᠭᠰᠢ ᠷᠧᠨ ᠶᠤᠸᠠᠨ ᠭᠤᠸᠠᠩ ᠨᠢ ᠷᠧᠨ ᠪᠢ ᠱᠢ ᠶᠢᠨ ᠠᠴᠢ ᠬᠡᠦᠬᠡᠨ᠂ ᠳᠡᠳᠡᠨᠦᠰ ᠡᠦ ᠵᠢᠩ ᠪᠢᠨ ᠢ ᠶᠡᠭᠡ ᠳᠤᠭᠤᠵᠤ ᠠᠩᠬᠢ ᠶᠢᠨ ᠠᠵᠢᠯ ᠪᠦᠬᠦᠨ ᠢᠶᠠᠨ ᠳᠡᠭᠦᠨ ᠳᠤ ᠨᠠᠶᠢᠳᠠᠵᠤ ᠲᠤᠰᠢᠶᠠᠨ ᠬᠢᠯᠭᠡᠳᠡᠭ ᠭᠡᠨ᠎ᠡ᠃ ᠢᠩᠭᠢᠭᠡᠳ ᠲᠡᠷᠡ ᠰᠤᠷᠭᠠᠭᠤᠯᠢ ᠶᠢᠨ ᠰᠤᠷᠤᠭᠴᠢ ᠶᠢᠨ ᠬᠤᠷᠠᠯ ᠤᠨ ᠳᠠᠷᠤᠭ᠎ᠠ᠂ ᠤᠬᠠᠭᠤᠯᠬᠤ ᠭᠡᠰᠢᠭᠦᠨ ᠪᠠ ᠰᠢᠨᠵᠢᠶᠠᠩ ᠤᠨ ᠡᠮᠡᠭᠳᠠᠶᠢᠴᠤᠳ ᠤᠨ ᠬᠤᠯᠪᠤᠭ᠎ᠠ ᠶᠢᠨ ᠭᠡᠰᠢᠭᠦᠨ᠂ ᠰᠢᠨᠵᠢᠶᠠᠩ ᠠᠷᠠᠳ ᠤᠨ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠶᠢᠳᠡᠨ ᠢ ᠡᠰᠡᠷᠭᠦᠴᠡᠬᠦ ᠬᠤᠯᠪᠤᠭᠠᠨ ᠤ ᠭᠡᠰᠢᠭᠦᠨ ᠵᠡᠷᠭᠡ ᠠᠵᠢᠯ ᠲᠤᠰᠢᠶᠠᠯ ᠲᠠᠢ ᠪᠠᠶᠢᠪᠠ᠃ ᠳᠡᠷᠡ ᠶᠠᠨ ᠠᠨ ᠳᠤ ᠬᠦᠷᠴᠦ ᠬᠤᠪᠢᠰᠬᠠᠯ ᠬᠢᠬᠦ ᠭᠡᠰᠡᠨ ᠳᠤ᠂ ᠳᠡᠭᠦᠨ ᠤ ᠭᠡᠷ ᠪᠦᠯᠢ ᠶᠢᠨ ᠤᠨᠴᠠᠭᠠᠢ ᠭᠠᠷᠤᠯ ᠠᠴᠠ ᠪᠤᠯᠵᠤ ᠬᠦᠰᠡᠯ ᠨᠢ ᠬᠦᠰᠡᠷᠳᠡᠪᠡ᠃      ᠡᠦ ᠵᠢᠩ ᠪᠢᠨ᠂ ᠡᠷ᠎ᠡ ᠨᠦᠬᠦᠷ ᠮᠠᠨᠴᠤᠭᠵᠠᠪ ᠲᠠᠢ ᠪᠠᠨ ᠮᠤᠩᠭᠤᠯ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠵᠤ ᠮᠠᠯᠴᠢᠳ ᠤᠨ ᠬᠡᠦᠬᠡᠳ ᠢ ᠠᠪᠴᠢᠷᠠᠨ ᠡᠷᠳᠡᠮ ᠰᠤᠶᠤᠯ ᠢ ᠬᠢᠴᠢᠶᠡᠯᠭᠡᠬᠦ ᠳᠤ ᠰᠤᠷᠭᠠᠭᠤᠯᠢ ᠪᠠ ᠰᠤᠷᠤᠭᠴᠢᠳ ᠤᠨ ᠪᠤᠢ ᠪᠦᠬᠦᠢ ᠵᠠᠷᠤᠳᠠᠯ ᠢ ᠦᠪᠡᠷ ᠤᠨ ᠬᠦᠷᠦᠩᠭᠡ ᠬᠤᠭᠰᠢᠯ ᠢᠶᠠᠷ ᠢᠶᠠᠨ ᠭᠠᠷᠭᠠᠵᠤ ᠪᠠᠶᠢᠪᠠ᠃ ᠰᠤᠷᠤᠭᠴᠢᠳ ᠢᠶᠠᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠵᠤ ᠵᠡᠭᠡᠯᠢ ᠳᠤ ᠭᠠᠷᠭᠠᠨ ᠶᠠᠫᠤᠨ ᠢ ᠡᠰᠡᠷᠭᠦᠴᠡᠬᠦ ᠤᠬᠠᠭᠤᠯᠤᠯ ᠬᠢᠬᠦ᠂ ᠵᠦᠴᠦᠭᠡ ᠲᠤᠭᠯᠠᠬᠤ᠂ ᠵᠤᠭᠤᠰ ᠮᠦᠩᠭᠦ ᠴᠤᠭᠯᠠᠭᠤᠯᠬᠤ᠂ ᠴᠢᠨᠠᠭᠰᠢᠯᠠᠭᠠᠳ ᠦᠪᠡᠷ ᠤᠨ ᠵᠠᠰᠠᠯ ᠵᠢᠮᠰᠡᠭ ᠢᠶᠠᠨ ᠬᠦᠷᠳᠡᠯ᠎ᠡ ᠬᠤᠳᠠᠯᠳᠤᠨ ᠴᠡᠷᠢᠭ ᠳᠠᠶᠢᠨ  ᠢ ᠳᠤᠰᠠᠯᠠᠵᠤ ᠳᠠᠪᠢᠨ ᠯᠠᠩ ᠠᠯᠳᠠ᠂ ᠮᠢᠩᠭᠠᠨ ᠯᠠᠩ ᠮᠦᠩᠭᠦ᠂ ᠵᠠᠭᠤᠨ ᠠᠭᠳᠠ᠂ ᠵᠠᠭᠤᠨ ᠦᠬᠡᠷ᠂ ᠬᠤᠶᠠᠷ ᠵᠠᠭᠤᠨ ᠬᠤᠨᠢ ᠴᠤᠭᠯᠠᠭᠤᠯᠤᠨ ᠳᠤᠰᠠᠯᠠᠵᠤ ᠪᠠᠶᠢᠯ᠎ᠠ᠃      ᠾᠧ ᠵᠦᠩ ᠤᠨ ᠨᠢᠭᠡᠨ ᠰᠤᠶᠤᠯ ᠳᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ ᠳᠤ᠄ ︽ᠡᠦ ᠵᠢᠩ ᠪᠢᠨ ᠲᠤᠰᠢᠶᠠᠯ ᠢ ᠠᠰᠢᠭᠯᠠᠨ ᠮᠦᠩᠭᠦ ᠵᠤᠭᠤᠰ ᠭᠠᠷᠭᠠᠨ ᠬᠠᠭᠤᠴᠢᠨ ᠲᠤᠷᠭᠤᠳ ᠲᠤ ᠡᠯ᠎ᠡ ᠲᠦᠷᠦᠯ ᠤᠨ ᠰᠤᠷᠭᠠᠭᠤᠯᠢ ᠨᠡᠶᠢᠳᠡ ᠠᠷᠪᠠᠭᠠᠳ ᠪᠠᠶᠢᠭᠤᠯᠤᠭᠰᠠᠨ ᠶᠤᠮ︾︹22︺ ᠭᠡᠵᠦ ᠳᠡᠮᠳᠡᠭᠯᠡᠪᠡ᠃      ᠡᠨᠡ ᠨᠢ ᠡᠦ ᠵᠢᠩ ᠪᠢᠨ ᠤ ᠡᠴᠢᠭᠡ ᠭᠦᠩᠰᠡᠩᠨᠤᠷᠪᠤ ᠴᠢᠩ ᠸᠠᠩ ᠤᠷᠳᠤᠨ ᠳᠤ ᠪᠠᠨ ᠬᠡᠳᠦᠨ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠵᠤ᠂ ᠦᠭᠡᠷᠡᠴᠢᠯᠡᠯᠳᠡ ᠬᠢᠵᠦ ᠰᠢᠨ᠎ᠡ ᠶᠢ ᠰᠠᠨᠠᠭᠠᠰᠢᠷᠠᠨ ᠰᠤᠷᠭᠠᠨ ᠬᠦᠮᠦᠵᠢᠯ᠂ ᠡᠷᠳᠡᠮ ᠰᠤᠶᠤᠯ ᠢᠶᠠᠷ ᠦᠨᠳᠦᠰᠦᠳᠡᠨ ᠢᠶᠠᠨ ᠮᠠᠨᠳᠤᠭᠤᠯᠬᠤ᠂ ᠮᠤᠩᠭᠤᠯ ᠬᠤᠰᠢᠭᠤᠳ ᠦᠪᠡᠷ ᠤᠨ ᠴᠡᠷᠢᠭ ᠠᠩᠬᠢ ᠪᠠᠶᠢᠭᠤᠯᠤᠨ ᠬᠤᠰᠢᠭᠤ ᠨᠤᠳᠤᠭ ᠢᠶᠠᠨ ᠬᠠᠮᠠᠭᠠᠯᠠᠬᠤ ᠭᠡᠰᠡᠨ ᠠᠭᠤᠤ ᠰᠠᠨᠠᠭ᠎ᠠ ᠪᠤᠳᠤᠯ ᠨᠢ ᠦᠨᠦᠴᠢᠨ ᠪᠠᠭ᠎ᠠ ᠤᠯᠠᠭᠠᠨ ᠨᠢᠯᠬ᠎ᠠ ᠡᠦ ᠵᠢᠩ ᠪᠢᠨ  ᠤ ᠤᠭᠤᠷᠠᠭ ᠳᠠᠷᠢᠬᠢ ᠳᠤ ᠰᠠᠭᠤᠭᠳᠠᠵᠤ ᠦᠵᠡᠯ ᠰᠠᠨᠠᠭᠠᠨ ᠤ ᠬᠢᠨᠢ ᠰᠠᠭᠤᠷᠢ ᠪᠤᠯᠤᠭᠰᠠᠨ ᠤ ᠬᠢᠨᠢ ᠦᠷ᠎ᠡ ᠪᠦᠳᠦᠭᠡᠯ ᠪᠤᠶᠤ᠃ ᠲᠡᠷᠡ ᠰᠤᠷᠭᠠᠭᠤᠯᠢ ᠶᠢᠨ ᠢᠶᠠᠨ ᠰᠤᠷᠤᠯᠭ᠎ᠠ ᠰᠠᠶᠢᠳᠠᠢ᠂ ᠳᠠᠪᠰᠢᠩᠭᠤᠢ ᠰᠤᠷᠤᠭᠴᠢᠳ ᠢᠶᠠᠨ ᠯᠠᠨᠵᠸᠦ᠂ ᠪᠡᠭᠡᠵᠢᠩ᠂ ᠨᠠᠨᠵᠢᠩ ᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠪᠠ ᠬᠤᠸᠠᠩ ᠫᠦ᠋ ᠴᠡᠷᠢᠭ ᠤᠨ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠭᠡᠵᠦ ᠰᠤᠷᠤᠯᠴᠠᠭᠤᠯᠵᠤ ᠪᠠᠶᠢᠭᠰᠠᠨ︹23︺ ᠭᠡᠨ᠎ᠡ᠃      ᠰᠢᠨᠵᠢᠶᠠᠩ ᠤᠨ ᠤᠶᠢᠭᠤᠷ ᠦᠨᠳᠦᠰᠦᠳᠡᠨ ᠤ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠳᠡᠳ᠋ ᠳᠡᠷᠢᠭᠦᠯᠡᠭᠴᠢ ᠪᠠᠶᠢᠭᠰᠠᠨ ᠪᠠᠨᠳᠢ ᠭᠤᠸᠠᠢ 1997 ᠤᠨ ᠳᠤ ᠮᠠᠨᠯᠢᠨ ᠲᠠᠢ ᠠᠭᠤᠯᠵᠠᠭᠠᠳ ᠳᠡᠭᠦᠨ ᠳᠤ᠄ ︽ᠪᠢ᠂ ᠴᠢᠨᠤ ᠡᠵᠢ ᠶᠢᠨ ᠡᠷᠬᠢᠯᠡᠭᠰᠡᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠭᠰᠠᠨ᠃ ᠪᠢ ᠨᠢᠭᠡᠨ ᠤᠳᠠᠭ᠎ᠠ ᠶᠢᠨ ᠰᠢᠯᠭᠠᠯᠳᠠ ᠳᠤ ᠲᠡᠷᠢᠭᠦᠯᠡᠭᠰᠡᠨ ᠳᠤ ᠲᠡᠷᠡ ᠮᠢᠨᠤ ᠲᠤᠯᠤᠭᠠᠢ ᠶᠢ ᠢᠯᠪᠢᠵᠦ ᠰᠠᠶᠢᠨ ᠰᠤᠷᠤᠯᠴᠠᠭᠠᠷᠠᠢ︕ ᠢᠷᠡᠭᠡᠳᠦᠢ ᠳᠤ ᠯᠠᠪ ᠶᠡᠭᠡ ᠦᠢᠯᠡᠰ ᠢ ᠪᠦᠳᠦᠭᠡᠬᠦ ᠶᠤᠮ ᠭᠡᠵᠦ ᠵᠤᠷᠢᠭᠵᠢᠭᠤᠯᠵᠤ ᠨᠠᠳᠠ ᠳᠤ ᠬᠠᠷᠠᠨᠳᠠ ᠶᠢᠨ ᠱᠠᠩᠨᠠᠯ ᠦᠭᠭᠦᠭᠰᠡᠨ ᠶᠤᠮ︾︹24︺ ᠭᠡᠵᠦ ᠲᠤᠷᠠᠳᠬᠠᠨ ᠪᠠᠶᠢᠪᠠ ᠭᠡᠰᠡᠨ᠃      1942 ᠤᠨ ᠳᠤ ᠡᠦ ᠵᠢᠩ ᠪᠢᠨ ᠳ᠋ᠢ ᠬᠤᠸᠠ ᠬᠤᠳᠠ ᠶᠢᠨ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠬᠤ ᠳᠤ ᠰᠢᠨᠵᠢᠶᠠᠩ ᠤᠨ ᠡᠵᠡᠷᠬᠡᠭᠴᠢ ᠱᠧᠩ ᠱᠢ ᠽᠠᠢ᠂ ᠰᠦᠨ ᠵᠦᠩ ᠱᠠᠨ ᠤ ᠰᠢᠨ᠎ᠡ ᠠᠷᠠᠳᠴᠢᠯᠠᠭᠰᠠᠨ ︽ᠭᠤᠷᠪᠠᠨ ᠦᠵᠡᠯᠳᠡ︾᠂ ︽ᠡᠪ ᠬᠠᠮᠳᠤ ᠨᠠᠮ ᠲᠠᠢ ᠬᠤᠯᠪᠤᠭᠠᠯᠠᠬᠤ︾᠂ ︽ᠵᠦᠪᠯᠡᠯᠳᠦ ᠶᠢ ᠳᠤᠳᠤᠨᠤᠴᠢᠯᠠᠬᠤ︾ ᠭᠡᠰᠡᠨ ᠦᠵᠡᠯᠳᠡ ᠠᠴᠠ ᠡᠷᠬᠢᠵᠦ ᠵᠢᠶᠠᠩ ᠵᠢᠶᠧ ᠱᠢ ᠶᠢ ᠲᠦᠰᠢᠪᠡ᠃ ᠳᠡᠭᠦᠨ ᠤ ᠬᠠᠳᠤᠨ ᠴᠢᠦ ᠢᠦᠢ ᠪᠠᠩ ᠴᠦ ᠡᠷ᠎ᠡ ᠶᠢᠨ ᠢᠶᠠᠨ ᠵᠤᠭᠰᠤᠯᠳᠠ ᠶᠢ ᠳᠠᠭᠠᠵᠤ ᠰᠤᠷᠭᠠᠭᠤᠯᠢ ᠶᠢᠨ ᠳᠠᠷᠤᠭ᠎ᠠ ᠪᠠᠶᠢᠭᠰᠠᠨ ᠡᠷᠬᠡ᠂ ᠪᠠᠶᠢᠷᠢ ᠰᠠᠭᠤᠷᠢ ᠪᠠᠷ  ᠢᠶᠠᠨ ᠨᠠᠰᠤ ᠬᠦᠷᠦᠭᠰᠡᠨ ᠡᠮᠡᠭᠳᠠᠢ ᠰᠤᠷᠤᠭᠴᠢᠳ ᠢ ᠪᠦᠯᠬᠦᠮ ᠪᠦᠯᠬᠦᠮ ᠢᠶᠠᠷ ᠭᠤᠮᠢᠨᠳᠠᠩ ᠨᠠᠮ ᠳᠤ ᠳᠠᠨᠢᠯᠴᠠᠭᠤᠯᠪᠠ᠃ ᠵᠦᠪᠬᠡᠨ 1943 ᠣᠨ ᠳᠤ ᠡᠨᠡ ᠰᠤᠷᠭᠠᠭᠤᠯᠢ ᠶᠢᠨ 720 ᠰᠤᠷᠤᠭᠴᠢ ᠶᠢ ᠭᠤᠮᠢᠨᠳᠠᠩ ᠨᠠᠮ ᠳᠤ ᠡᠯᠰᠡᠵᠠᠢ᠃ ᠡᠦ ᠵᠢᠩ ᠪᠢᠨ ᠴᠦ ᠰᠢᠨᠵᠢᠶᠠᠩ ᠤᠨ ᠣᠯᠣᠰ ᠲᠦᠷᠦ ᠶᠢᠨ ᠳᠠᠪᠴᠠᠩ ᠳᠤ ᠡᠷ᠎ᠡ ᠨᠦᠬᠦᠷ ᠤᠨ ᠢᠶᠠᠨ ᠤᠨᠴᠠᠭᠠᠢ ᠭᠡᠷ ᠭᠠᠷᠤᠯ᠂ ᠪᠠᠶᠢᠷᠢ ᠰᠠᠭᠤᠷᠢ ᠪᠠᠷ 1945 ᠤᠨ ᠠᠴᠠ 1947 ᠤᠨ ᠤ ᠬᠤᠭᠤᠴᠠᠭ᠎ᠠ ᠳᠤ ᠭᠤᠮᠢᠨᠳᠠᠩ ᠨᠠᠮ ᠤᠨ ᠳᠠᠪᠤᠳᠤᠭᠠᠷ᠂ ᠵᠢᠷᠭᠤᠳᠤᠭᠠᠷ ᠬᠤᠭᠤᠴᠠᠭᠠᠨ ᠤ ᠬᠤᠷᠠᠯ ᠪᠠ ᠪᠦᠬᠦ ᠤᠯᠤᠰ ᠤᠨ ᠢᠷᠭᠡᠨ ᠤ ᠲᠦᠯᠦᠭᠡᠯᠡᠭᠴᠢ ᠶᠢᠨ ᠬᠤᠷᠠᠯ ᠳᠤ ᠤᠷᠤᠯᠴᠠᠵᠤ᠂ ᠵᠢᠶᠠᠩ ᠵᠢᠶᠧ ᠱᠢ ᠪᠠ ᠴᠧᠨ ᠭᠥᠸᠧ ᠹᠦ᠋᠂ ᠴᠧᠨ ᠯᠢ ᠹᠦ᠋ ᠨᠠᠷ ᠲᠠᠢ ᠡᠮᠦᠨ᠎ᠡ ᠬᠤᠶᠢᠨ᠎ᠠ ᠠᠭᠤᠯᠵᠠᠭᠰᠠᠨ ᠳᠡᠦᠬᠡ ᠲᠠᠢ᠃ 1947 ᠤᠨ ᠳᠤ ᠵᠢᠶᠠᠩ ᠵᠢᠶᠧ ᠱᠢ ᠲᠠᠢ ᠠᠭᠤᠯᠵᠠᠬᠤ ᠳᠤ ᠪᠠᠨ 10 ᠨᠠᠰᠤᠳᠠᠢ ᠬᠡᠦᠬᠡᠨ ᠮᠠᠨᠯᠢᠨ ᠢᠶᠠᠨ ᠳᠠᠭᠠᠭᠤᠯᠵᠤ ᠬᠦᠷᠦᠭᠰᠡᠨ᠎ᠡ᠂ ᠵᠢᠶᠠᠩ ᠵᠢᠶᠧ ᠱᠢ ᠮᠠᠨᠯᠢᠨ ᠤ ᠲᠤᠯᠤᠭᠠᠢ ᠶᠢ ᠢᠯᠢᠵᠦ ︽ᠬᠡᠴᠢᠨᠡᠭᠡᠨ ᠭᠤᠶᠤ ᠲᠦᠷᠦᠭᠰᠡᠨ ᠮᠤᠩᠭᠤᠯ ᠭᠦᠩᠵᠦ ᠪᠤᠢ︾ ︹25︺ᠭᠡᠵᠦ ᠦᠬᠦᠭᠡᠷᠳᠡᠭᠰᠡᠨ ᠭᠡᠨ᠎ᠡ᠃      1947 ᠤᠨ ᠤ 7 ᠰᠠᠷ᠎ᠠ ᠳᠤ ᠡᠦ ᠵᠢᠩ ᠪᠢᠨ ᠢᠯᠢ ᠤᠷᠤᠨ ᠤ ᠲᠤᠰᠬᠠᠢ ᠲᠤᠰᠢᠶᠠᠯᠳᠠᠨ᠂ ᠭᠤᠮᠢᠨᠳᠠᠩ  ᠤᠨ ᠴᠡᠷᠢᠭ ᠤᠨ ᠶᠠᠪᠤᠳᠠᠯ ᠤᠨ ᠬᠤᠷᠢᠶᠠᠨ ᠤ ᠪᠠᠶᠢᠴᠠᠭᠠᠨ ᠪᠦᠷᠢᠳᠬᠡᠭᠴᠢ ᠲᠤᠪᠴᠢᠶᠠᠨ ᠤ ᠳᠠᠩᠨᠠᠭᠤᠯ ᠽᠦᠸᠧ ᠱᠦ ᠫᠢᠩ ᠵᠡᠷᠭᠡ ᠠᠷᠪᠠᠨ ᠳᠤᠯᠤᠭᠤᠯᠠ ᠴᠢᠰᠤ ᠪᠠᠨ ᠤᠤᠭᠤᠵᠤ ᠠᠬ᠎ᠠ ᠳᠡᠭᠦᠦ ᠪᠠᠷᠢᠯᠳᠤᠵᠠᠢ᠃ ᠲᠡᠷᠡ ᠪᠠᠰᠠ ᠳᠠᠩᠨᠠᠭᠤᠯ ᠪᠤᠯᠬᠤ ᠭᠡᠳ ᠡᠭᠦᠳᠡ ᠶᠢ ᠨᠢ ᠤᠯᠤᠭᠰᠠᠨ ᠦᠭᠡᠢ᠃ ᠠᠬ᠎ᠠ ᠳᠡᠭᠦᠦ ᠪᠠᠷᠢᠯᠳᠤᠭᠰᠠᠳ ᠤᠨ ᠤᠯᠠᠩᠬᠢ ᠨᠢ ᠠᠯᠠᠭᠳᠠᠵᠠᠢ ᠃ ᠽᠦᠸᠧ ᠱᠦ ᠫᠢᠩ ᠳᠠᠶᠢᠸᠠᠨ ᠳᠤ ᠳᠤᠳᠠᠭᠠᠪᠠ᠃ ᠡᠨᠡ ᠤᠴᠢᠷ ᠨᠢ ᠳᠡᠭᠦᠨ ᠢ ᠦᠬᠦᠨ ᠦᠬᠦᠳᠡᠯ᠎ᠡ ᠪᠠᠷᠠᠭᠠᠨ ᠰᠡᠭᠦᠳᠡᠷ ᠪᠤᠯᠵᠤ ᠤᠯᠠᠨ ᠤᠳᠠᠭ᠎ᠠ ᠶᠢᠨ ᠤᠯᠤᠰ ᠲᠦᠷᠦ ᠶᠢᠨ ᠬᠦᠳᠡᠯᠭᠡᠭᠡᠨ ᠳᠤ ᠳᠡᠭᠦᠨ ᠢ ᠵᠤᠪᠠᠭᠠᠨ ᠳᠠᠷᠴᠢᠯᠭᠠᠪᠠ᠃ 1950 —1953 ᠤᠨ ᠳᠤ ᠡᠦ ᠵᠢᠩ ᠪᠢᠨ ᠢ ᠪᠠᠷᠢᠪᠴᠢᠯᠠᠨ ᠬᠢᠨᠳᠠᠨ ᠳᠤ ᠬᠤᠷᠢᠪᠠ᠃ ᠵᠤᠯ ᠢᠶᠠᠷ ᠲᠤᠬᠠᠢ ᠶᠢᠨ ᠨᠠᠮ ᠤᠨ ᠪᠠᠷᠠᠭᠤᠨ ᠬᠤᠶᠢᠳᠤ ᠬᠤᠪᠢᠶᠠᠷᠢ ᠲᠤᠪᠴᠢᠶ᠎ᠠ ᠶᠢᠨ ᠱᠦᠵᠢ ᠱᠢ ᠵᠦᠩ ᠰᠢᠶᠦ᠋ᠨ ᠳᠡᠭᠦᠨ ᠲᠠᠢ ᠨᠢᠭᠤᠷᠳᠠᠨ ᠶᠠᠷᠢᠯᠴᠠᠭᠠᠳ ᠳᠡᠭᠦᠨ ᠢ ᠶᠠᠯ᠎ᠠ ᠦᠭᠡᠢ ᠭᠡᠵᠦ ᠬᠢᠨᠳᠠᠨ ᠠᠴᠠ ᠰᠤᠯᠠᠯᠠᠨ ᠭᠠᠵᠠᠷ ᠰᠢᠷᠤᠢ ᠶᠢᠨ ᠦᠭᠡᠷᠡᠴᠢᠯᠡᠯᠳᠡ ᠳᠤ ᠤᠷᠤᠯᠴᠠᠭᠤᠯᠤᠭᠰᠠᠨ ᠭᠡᠨ᠎ᠡ᠃ ︽ᠰᠤᠶᠤᠯ ᠤᠨ ᠶᠡᠭᠡ ᠬᠤᠪᠢᠰᠬᠠᠯ︾ ᠳᠤ ᠮᠦᠨ ᠭᠡᠷ ᠭᠠᠷᠤᠯ᠂ ᠳᠠᠩᠨᠠᠭᠤᠯ ᠭᠡᠵᠦ ᠪᠠᠷᠢᠪᠴᠢᠯᠠᠨ ᠬᠠᠯᠠ ᠳᠠᠮᠤ ᠦᠵᠡᠭᠦᠯᠪᠡ᠃ ᠳᠡᠭᠦᠨ ᠢ ᠬᠤᠪᠢᠰᠬᠠᠯ ᠤᠨ ᠡᠰᠡᠷᠭᠦᠦ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠳᠠ ᠳᠤ ᠤᠷᠤᠯᠴᠠᠭᠰᠠᠨ ᠢᠶᠠᠨ ᠲᠤᠰᠢᠶᠠ ᠭᠡᠪᠡ᠃ ᠲᠡᠷᠡ ︽ᠪᠢ ᠳᠡᠦᠬᠡ ᠶᠢᠨ ᠬᠤᠪᠢᠰᠬᠠᠯ ᠢ ᠡᠰᠡᠷᠭᠦᠴᠡᠭᠴᠢ ᠁ ᠬᠠᠭᠤᠴᠢᠨ ᠨᠡᠶᠢᠭᠡᠮ ᠳᠤ ᠰᠢᠶᠠᠨ ᠤ ᠳᠠᠷᠤᠭ᠎ᠠ᠂ ᠱᠦᠵᠢ᠂ ᠤᠯᠤᠰ ᠤᠨ ᠶᠡᠭᠡ ᠬᠤᠷᠠᠯ ᠤᠨ ᠲᠦᠯᠦᠭᠡᠯᠡᠭᠴᠢ᠂ ᠬᠠᠤᠯᠢ ᠲᠤᠭᠳᠠᠭᠠᠬᠤ ᠵᠦᠪᠯᠡᠯ ᠤᠨ ᠭᠡᠰᠢᠭᠦᠨ ᠪᠠᠶᠢᠭᠰᠠᠨ ᠴᠢᠨᠢ ᠳᠡᠦᠬᠡ ᠶᠢᠨ ᠬᠤᠪᠢᠰᠬᠠᠯ ᠢ ᠡᠰᠡᠷᠭᠦᠴᠡᠭᠴᠢ ᠮᠦᠨ ᠁ ᠪᠢ ᠲᠡᠷᠡ ᠦᠶ᠎ᠡ ᠦᠨᠡᠬᠡᠷ ᠳᠠᠩᠨᠠᠭᠤᠯ ᠪᠤᠯᠤᠶ᠎ᠠ ᠭᠡᠵᠦ ᠬᠦᠰᠡᠵᠦ ᠪᠠᠶᠢᠭᠰᠠᠨ ᠴᠦ ᠨᠠᠮ᠎ᠠ ᠶᠢ ᠠᠪᠬᠤ ᠬᠦᠮᠦᠨ ᠦᠭᠡᠢ ᠶᠤᠮ ᠴᠢᠨᠢ ᠶᠠᠭᠠᠬᠢᠬᠤ ᠪᠤᠢ︖ ᠪᠢ ᠬᠡᠷᠪᠡ ᠪᠡᠶ᠎ᠡ ᠪᠠᠨ ᠭᠤᠮᠢᠨᠳᠠᠩ ᠤᠨ ᠶᠡᠭᠡ ᠬᠠᠭᠤᠷᠠᠢ ᠳᠤ ᠦᠯᠡᠳᠡᠭᠡᠭᠰᠡᠨ ᠳᠠᠩᠨᠠᠭᠤᠯ ᠭᠡᠵᠦ ᠬᠡᠯᠡᠪᠡᠯ ᠨᠠᠳᠠ ᠡᠭᠦᠷᠭᠡ ᠲᠤᠰᠢᠶᠠᠭᠰᠠᠨ ᠬᠦᠮᠦᠨ ᠢ ᠬᠡᠨ ᠭᠡᠵᠦ ᠬᠡᠯᠡᠬᠦ ᠪᠤᠢ︖ ᠳᠠᠩᠨᠠᠭᠤᠯ ᠪᠤᠯᠤᠭᠰᠠᠨ ᠴᠠᠭ᠂ ᠤᠷᠤᠨ᠂ ᠳᠠᠨᠢᠯᠴᠠᠭᠤᠯᠤᠭᠰᠠᠨ ᠬᠦᠮᠦᠨ ᠵᠡᠷᠭᠡ ᠶᠢ ᠪᠢ ᠲᠤᠷ᠎ᠠ ᠪᠠᠷ ᠢᠶᠠᠨ ᠵᠤᠬᠢᠶᠠᠵᠤ ᠬᠡᠷᠬᠢᠨ ᠪᠤᠯᠬᠤ ᠪᠤᠢ ᠁ ᠵᠦᠪᠬᠡᠨ ᠳᠠᠶᠢᠸᠠᠨ ᠴᠢᠯᠦᠭᠡᠯᠡᠭᠳᠡᠬᠦ ᠶᠢ ᠬᠦᠯᠢᠶᠡᠨ᠎ᠡ᠂ ᠳᠠᠶᠢᠸᠠᠨ ᠴᠢᠯᠦᠭᠡᠯᠡᠭᠳᠡᠪᠡᠯ ᠰᠠᠶ᠋ᠢ ᠡᠨᠡ ᠬᠡᠷᠡᠭ ᠦᠨᠡᠨ ᠴᠠᠭᠠᠨ ᠢᠯᠭᠠᠷᠠᠨ᠎ᠠ᠃ ᠪᠢ ᠦᠨᠦ ᠶᠠᠭᠤ ᠬᠡᠯᠡᠭᠰᠡᠨ ᠴᠦ ᠨᠠᠮᠠᠢᠢ ᠢᠳᠡᠭᠡᠬᠦ ᠬᠦᠮᠦᠨ ᠦᠭᠡᠢ︾ ᠭᠡᠵᠦ ᠬᠡᠯᠡᠵᠦ ᠪᠠᠶᠢᠪᠠ︹26︺ ᠭᠡᠨ᠎ᠡ᠃      ᠡᠦ ᠵᠢᠩ ᠪᠢᠨ ︽ᠰᠤᠶᠤᠯ ᠤᠨ ᠶᠡᠭᠡ ᠬᠤᠪᠢᠰᠬᠠᠯ︾ ᠤᠨ ᠰᠡᠭᠦᠯᠴᠢ ᠪᠠᠷ ᠡᠮᠨᠡᠯᠭᠡ ᠳᠤ ᠪᠠᠶᠢᠬᠤ ᠳᠤ ᠦᠬᠢᠨ ᠮᠠᠨᠯᠢᠨ ᠳᠤ ᠪᠠᠨ 1947 ᠤᠨ ᠳᠤ ᠪᠡᠭᠡᠵᠢᠩ ᠴᠢᠯᠦᠭᠡᠯᠡᠭᠳᠡᠬᠦ ᠠᠴᠠ ᠡᠮᠦᠨ᠎ᠡ ᠳᠡᠬᠦᠨ ᠤ ᠰᠠᠶᠢᠨ ᠨᠠᠶᠢᠵᠠ ᠨᠠᠷ ᠨᠢ ᠳᠡᠭᠦᠨ ᠢ ᠳᠠᠶᠢᠸᠠᠨ ᠳᠤ ᠶᠠᠪᠤᠭᠠᠷᠠᠢ ᠭᠡᠵᠦ ᠤᠯᠠᠨ ᠤᠳᠠᠭ᠎ᠠ ᠢᠳᠬᠠᠭᠰᠠᠨ ᠴᠦ ᠲᠡᠷᠡ ᠶᠠᠪᠤᠭᠰᠠᠨ ᠦᠭᠡᠢ᠃ ᠳᠡᠳᠡ ︽ᠡᠪ ᠬᠠᠮᠳᠤ ᠨᠠᠮ ᠤᠷᠤᠵᠤ ᠢᠷᠡᠭᠰᠡᠭᠡᠷ ᠴᠢᠮ᠎ᠠ ᠶᠢ ᠬᠠᠮᠤᠭ ᠤᠷᠢᠳ ᠢᠶᠠᠷ ᠠᠯᠠᠨ᠎ᠠ︾ ᠭᠡᠵᠦ ᠪᠠᠶᠢᠭᠰᠠᠨ᠃ ᠡᠪ ᠬᠠᠮᠳᠤ ᠨᠠᠮ ᠨᠠᠮᠠᠢᠢ ᠠᠯᠠᠬᠤ ᠦᠭᠡᠢ ᠭᠡᠵᠦ ᠬᠡᠳᠦᠢ ᠬᠠᠯᠠ ᠠᠮᠰᠠᠵᠤ ᠳᠠᠷᠴᠢᠯᠠᠭᠠᠭᠳᠠᠨ ᠵᠤᠪᠠᠵᠤ ᠪᠠᠶᠢᠭᠰᠠᠨ ᠴᠦ ᠡᠪ ᠬᠠᠮᠳᠤ ᠨᠠᠮ ᠢ ᠪᠠᠳᠤ ᠢᠳᠡᠬᠡᠵᠦ ᠪᠠᠶᠢᠯ᠎ᠠ᠃ ᠳᠡᠭᠦᠨᠴᠢᠯᠡᠨ ᠡᠭᠦᠨ ᠠᠴᠠ ᠡᠮᠦᠨ᠎ᠡ ᠪᠡᠭᠡᠵᠢᠩ ᠳᠤ ᠤᠷᠤᠭᠰᠠᠨ᠎ᠠ ᠬᠤᠶᠠᠷ ᠠᠬ᠎ᠠ ᠨᠢ ᠴᠦ ᠳᠡᠭᠦᠨ ᠲᠠᠢ ᠬᠠᠮᠳᠤ ᠪᠠᠷ ᠳᠠᠶᠢᠸᠠᠨ ᠳᠤ ᠳᠤᠳᠠᠭᠠᠬᠤ ᠪᠠᠷ ᠵᠦᠪᠯᠡᠭᠰᠡᠨ ᠳᠤ ᠡᠦ ᠵᠢᠩ ᠪᠢᠨ ᠤᠭᠳᠤ ᠵᠦᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠶᠤᠮ᠃      ᠮᠠᠨᠯᠢᠨ ᠤ ᠡᠬᠡ ᠡᠦ ᠵᠢᠩ ᠪᠢᠨ ᠬᠡᠳᠦᠢ ᠤᠯᠤᠰ ᠤᠨ ᠨᠡᠶᠢᠰᠯᠡᠯ ᠪᠡᠭᠡᠵᠢᠩ ᠳᠤ ᠸᠠᠩ ᠤᠨ ᠤᠷᠳᠤᠨ᠎ᠠ ᠲᠦᠷᠦᠪᠡ ᠭᠡᠰᠡᠨ ᠴᠦ ᠤᠯᠠᠭᠠᠨ ᠨᠢᠯᠬ᠎ᠠ ᠠᠴᠠ ᠪᠠᠨ ᠡᠬᠡ ᠪᠠᠨ ᠠᠯᠳᠠᠵᠤ ᠦᠨᠦᠴᠢᠷᠡᠨ ᠬᠠᠯᠠ ᠵᠤᠪᠠᠯᠠᠩ ᠢ ᠬᠠᠰᠢᠷᠠᠳᠠᠯ᠎ᠠ ᠠᠮᠰᠠᠵᠠᠢ᠃ ᠮᠠᠨᠴᠤᠭᠵᠠᠪ ᠬᠠᠨ ᠸᠠᠩ ᠤᠨ ᠬᠠᠳᠤᠨ ᠪᠤᠯᠤᠭᠰᠠᠨ ᠠᠴᠠ ᠬᠤᠶᠢᠰᠢ ᠳᠡᠭᠦᠨ ᠤ ᠤᠷᠴᠢᠨ ᠲᠤᠭᠤᠷᠢᠨ᠂ ᠪᠠᠶᠢᠷᠢ ᠰᠠᠭᠤᠷᠢ ᠦᠰᠦᠳ ᠦᠭᠡᠷ᠎ᠡ ᠪᠤᠯᠵᠤ᠂ ᠰᠢᠨᠵᠢᠶᠠᠩ ᠤᠨ ᠤᠯᠤᠰ ᠲᠦᠷᠦ ᠶᠢᠨ ᠳᠠᠪᠴᠠᠩ ᠳᠤ ᠭᠢᠯᠠᠷᠠᠭᠤᠯᠤᠭᠰᠠᠨ ᠡᠮᠡᠭᠳᠠᠢ ᠪᠤᠯᠪᠠ᠃ ᠲᠡᠷᠡ ᠬᠤᠪᠢ ᠪᠡᠶ᠎ᠡ ᠪᠠ ᠭᠡᠷ ᠪᠦᠯᠢ ᠶᠢᠨ ᠡᠷᠬᠡ ᠠᠰᠢᠭ᠂ ᠪᠠᠶᠢᠷᠢ ᠰᠠᠭᠤᠷᠢ  ᠶᠢᠨ ᠲᠦᠯᠦᠭᠡ ᠪᠤᠰᠤ᠂ ᠪᠦᠷ ᠯᠡ ᠲᠤᠷᠭᠤᠳ ᠮᠤᠩᠭᠤᠯ ᠤᠨ ᠠᠷᠠᠳ ᠲᠦᠮᠡᠨ ᠤ ᠡᠷᠬᠡ ᠠᠰᠢᠭ᠂ ᠲᠤᠷᠭᠤᠳ ᠮᠤᠩᠭᠤᠯ ᠤᠨ ᠨᠤᠳᠤᠭ ᠤᠷᠤᠨ ᠢᠶᠠᠨ ᠬᠠᠮᠠᠭᠠᠯᠠᠵᠤ ᠬᠦᠭᠵᠢᠭᠦᠯᠦᠨ ᠮᠠᠨᠳᠤᠭᠤᠯᠬᠤ ᠪᠠᠷ ᠨᠢᠭᠡ ᠨᠠᠰᠤᠨ᠎ᠠ ᠭᠤᠶᠠᠴᠢ ᠦᠭᠡᠢ᠂ ᠴᠦᠬᠦᠷᠡᠯ ᠦᠭᠡᠢ ᠴᠢᠷᠮᠠᠶᠢᠵᠤ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠨ ᠲᠤᠷᠠᠳᠠᠶ᠎ᠠ ᠦᠷᠡᠭᠳᠡᠭᠦᠯᠦᠭᠰᠡᠨ ᠮᠤᠩᠭᠤᠯ ᠭᠠᠷᠮᠠᠭᠠᠢ ᠵᠢᠳᠬᠦᠯᠳᠡᠨ ᠮᠦᠨ᠃      ᠰᠢᠨᠵᠢᠶᠠᠩ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠳᠠᠩᠰᠠ ᠡᠪᠬᠡᠮᠡᠯ ᠤᠨ ᠭᠠᠵᠠᠷ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠬᠤ  ᠪᠠᠷ᠄ ᠡᠦ ᠵᠢᠩ ᠪᠢᠨ ᠪᠤᠯ᠄ 1. ᠰᠢᠶᠠᠨ ᠤ ᠲᠦᠷᠢᠮ ᠢ ᠦᠭᠡᠷᠡᠴᠢᠯᠡᠨ ᠠᠶᠢᠮᠠᠭ ᠤᠨ ᠲᠦᠷᠢᠮ ᠢ ᠰᠡᠷᠭᠦᠭᠡᠬᠦ︔ 2. ᠵᠠᠰᠠᠭ ᠤᠨ ᠤᠷᠳᠤᠨ ᠠᠴᠠ 2000 ᠫᠤᠤ ᠵᠡᠪᠰᠡᠭ ᠬᠠᠩᠭᠠᠨ ᠦᠭᠴᠦ ᠦᠪᠡᠷᠳᠡᠭᠡᠨ ᠬᠠᠮᠠᠭᠠᠯᠠᠬᠤ ᠠᠩᠬᠢ ᠪᠠᠶᠢᠭᠤᠯᠬᠤ︔ 3. ᠶᠡᠭᠡ ᠬᠡᠮᠵᠢᠶ᠎ᠡ ᠪᠠᠷ ᠵᠢᠭᠡᠯᠡᠯᠭᠡ ᠤᠯᠭᠤᠨ ᠮᠤᠩᠭᠤᠯ ᠤᠷᠤᠨ ᠤ ᠠᠵᠤ ᠠᠬᠤᠢ ᠶᠢ ᠬᠦᠭᠵᠢᠭᠦᠯᠬᠦ︔ 4. ᠰᠤᠶᠤᠯ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠵᠠᠷᠤᠳᠠᠯ ᠮᠦᠩᠭᠦ ᠤᠯᠭᠤᠨ ᠦᠨᠳᠦᠰᠦᠳᠡᠨ ᠤ ᠳᠤᠮᠳᠠᠳᠤ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠤᠨ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠬᠢᠷᠢ ᠲᠦᠪᠰᠢᠨ ᠢ ᠳᠡᠭᠡᠭᠰᠢᠯᠡᠭᠦᠯᠬᠦ ᠁ ᠴᠢᠬᠤᠯᠠ ᠲᠠᠢ ᠭᠡᠵᠦ ᠤᠯᠠᠨ ᠤᠳᠠᠭ᠎ᠠ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠪᠠ ᠡᠷᠭᠦᠳᠡᠯ ᠡᠷᠭᠦᠨ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ ᠳᠡᠮᠵᠢᠯᠭᠡ ᠤᠯᠬᠤ ᠪᠠᠷ ᠴᠢᠷᠮᠠᠶᠢᠵᠤ ᠪᠠᠶᠢᠵᠠᠢ᠃ ᠲᠡᠷᠡ ᠵᠢᠶᠠᠩ ᠵᠢᠶᠧ ᠱᠢ ᠳᠤ ᠡᠶᠢᠮᠦ ᠰᠢᠭᠤᠳ ᠮᠡᠳᠡᠭᠦᠯᠦᠯᠳᠡ ᠪᠠᠨ ᠭᠠᠷᠳᠠᠭᠤᠯᠤᠭᠰᠠᠨ ᠪᠠᠶᠢᠵᠠᠢ︹27︺᠃      ᠡᠦ ᠵᠢᠩ ᠪᠢᠨ 1944 —1945 ᠤᠨ ᠤ ᠬᠤᠭᠤᠷᠤᠨᠳᠤ ᠭᠤᠷᠪᠠ ᠤᠳᠠᠭ᠎ᠠ ᠵᠢᠶᠠᠩ ᠵᠢᠶᠧ ᠱᠢ ᠳᠤ ᠪᠢᠴᠢᠭ ᠡᠷᠭᠦᠨ ᠲᠤᠷᠭᠤᠳ ᠲᠤ ︽ᠦᠨᠡᠨᠰᠦ᠋ᠵᠦᠭᠳᠦ ᠠᠶᠢᠮᠠᠭ︾ ᠢ ᠪᠠᠶᠢᠭᠤᠯᠬᠤ ᠪᠠ ︽ᠸᠠᠩ ᠤᠨ ᠡᠷᠬᠡ ᠪᠠᠶᠢᠷᠢ  ᠶᠢ ᠰᠡᠷᠭᠦᠭᠡᠬᠦ︾ ᠵᠡᠷᠭᠡ ᠶᠢ ᠱᠠᠭᠠᠷᠳᠠᠵᠤ 1947 ᠤᠨ ᠤ 7 ᠰᠠᠷ᠎ᠠ ᠳᠤ ︽ᠦᠨᠡᠨᠰᠦ᠋ᠵᠦᠭᠲᠦ ᠠᠶᠢᠮᠠᠭ︾ ᠢ ᠰᠡᠷᠭᠦᠭᠡᠨ ᠮᠠᠨᠴᠤᠭᠵᠠᠪ ᠸᠠᠩ᠂ ᠠᠶᠢᠮᠠᠭ ᠤᠨ ᠳᠠᠷᠤᠭ᠎ᠠ ᠪᠤᠯᠵᠤ ᠡᠦ ᠵᠢᠩ ᠪᠢᠨ ᠢ ᠳᠡᠳ᠋ ᠳᠠᠷᠤᠭ᠎ᠠ ᠶᠢ ᠲᠤᠰᠢᠶᠠᠯ ᠢ ᠡᠭᠦᠷᠭᠡᠯᠡᠭᠦᠯᠵᠠᠢ︹28︺᠃      ᠡᠦ ᠵᠢᠩ ᠪᠢᠨ 1945 ᠤᠨ ᠳᠤ ᠰᠢᠨᠵᠢᠶᠠᠩ ᠤᠨ ᠭᠤᠷᠪᠠᠨ ᠤᠷᠤᠨ ᠤ ᠬᠤᠪᠢᠰᠬᠠᠯ ᠾᠧ ᠵᠢᠩ ᠤᠨ ᠪᠠᠶᠠᠨᠪᠤᠯᠠᠭ ᠲᠤ ᠲᠦᠷᠢᠨ ᠤᠷᠤᠬᠤ ᠳᠤ ᠭᠤᠷᠪᠠᠨ ᠵᠠᠭᠤᠨ ᠮᠤᠩᠭᠤᠯ ᠴᠡᠷᠢᠭ ᠵᠤᠬᠢᠶᠠᠨ ᠪᠠᠶᠢᠭᠤᠯᠵᠤ ᠬᠤᠪᠢᠰᠬᠠᠯ ᠢ ᠬᠦᠷᠢᠶᠡᠯᠡᠨ ᠨᠤᠳᠤᠭ ᠤᠷᠤᠨ ᠢᠶᠠᠨ ᠬᠠᠮᠠᠭᠠᠯᠠᠭᠰᠠᠨ ᠡᠷᠡᠯᠬᠡᠭ ᠪᠠᠭᠠᠳᠤᠷ ᠡᠮᠡᠭᠳᠠᠢ ᠶᠤᠮ᠃      1949 ᠤᠨ ᠳᠤ ᠰᠢᠨᠵᠢᠶᠠᠩ ᠢ ︽ᠨᠠᠶᠢᠷᠠᠮᠳᠠᠯ ᠢᠶᠠᠷ ᠴᠢᠯᠦᠭᠡᠯᠡᠬᠦ︾ ᠳᠤ ᠢᠳᠡᠪᠬᠢᠳᠠᠢ ᠤᠷᠤᠯᠴᠠᠨ ᠵᠤᠷᠢᠭᠳᠤ ᠬᠠᠨ ᠸᠠᠩ ᠤᠨ ᠤᠷᠳᠤᠨ ᠬᠠᠷᠰᠢ ᠶᠢ ᠪᠦᠷᠢᠨ ᠪᠦᠷᠢᠨ ᠢᠶᠠᠷ ᠨᠢ ᠬᠠᠮᠠᠭᠠᠯᠠᠵᠤ ᠰᠤᠶᠤᠯ ᠤᠨ ᠦᠪ ᠬᠦᠷᠦᠩᠭᠡ ᠪᠠᠨ ᠬᠠᠮᠠᠭᠠᠯᠠᠭᠰᠠᠨ ᠪᠠᠶᠢᠯ᠎ᠠ᠃ ᠲᠤᠰ ᠵᠢᠯ ᠠᠷᠠᠳ ᠤᠨ ᠴᠢᠯᠦᠭᠡᠯᠡᠬᠦ ᠴᠡᠷᠢᠭ ᠤᠷᠤᠨ ᠨᠤᠳᠤᠭ ᠲᠤᠨᠢ ᠬᠦᠷᠬᠦ ᠳᠤ ᠲᠡᠷᠡ ᠦᠪᠡᠷ ᠤᠨ ᠦᠩᠭᠡ ᠰᠢᠮᠡᠯᠢᠭ ᠲᠦᠷᠪᠡᠨ ᠲᠦᠮᠡᠨ ᠮᠦ ᠭᠠᠵᠠᠷ ᠳᠠᠷᠢᠶ᠎ᠠ ᠪᠠ ᠪᠠᠭ᠎ᠠ ᠵᠤᠯᠠᠳᠤ ᠶᠢᠨ ᠳᠠᠯ᠎ᠠ ᠨᠤᠳᠤᠭ ᠢᠶᠠᠨ ᠡᠷᠭᠦᠵᠦ ᠴᠡᠷᠢᠭ ᠠᠩᠭᠢ ᠶᠢᠨ ᠪᠦᠳᠦᠭᠡᠨ ᠪᠠᠶᠢᠭᠤᠯᠤᠯᠳᠠ ᠶᠢ ᠳᠠᠮᠵᠢᠵᠠᠢ᠃      ᠡᠪ ᠬᠠᠮᠳᠤ ᠨᠠᠮ ᠢ ᠤᠭᠳᠤᠬᠤ ᠶᠡᠭᠡ ᠬᠤᠷᠠᠯ ᠳᠡᠭᠡᠷ᠎ᠡ ᠲᠡᠷᠡ᠄ ︽ᠠᠯᠢᠪᠠ ᠲᠦᠷᠦ ᠶᠢᠨ ᠡᠷᠬᠡ ᠶᠢ ᠴᠦᠮ ᠠᠷᠠᠳ ᠲᠦᠮᠡᠨ ᠳᠤ ᠪᠤᠴᠠᠭᠠᠨ᠎ᠠ︾ ᠭᠡᠵᠦ ᠲᠤᠩᠬᠠᠭᠯᠠᠵᠠᠢ᠃      ᠮᠠᠨᠯᠢᠨ ᠤ ᠡᠬᠡ ᠡᠦ ᠵᠢᠩ ᠪᠢᠨ ᠡᠪ ᠬᠠᠮᠳᠤ ᠨᠠᠮ ᠳᠤ ᠤᠷᠤᠬᠤ ᠭᠡᠰᠡᠨ ᠳᠤ᠂ ᠸᠠᠩ ᠷᠧᠨ ᠮᠤᠤ᠄ ︽ᠡᠪ ᠬᠠᠮᠳᠤ ᠨᠠᠮ ᠳᠤ ᠤᠷᠤᠬᠤ ᠦᠭᠡᠢ ᠪᠤᠯ ᠨᠡᠩ ᠢᠯᠡᠭᠦᠦ ᠨᠠᠮ ᠤᠨ ᠲᠦᠯᠦᠭᠡ ᠰᠠᠶᠢᠨ ᠠᠵᠢᠯᠯᠠᠵᠤ ᠳᠡᠶᠢᠯᠦᠨ᠎ᠡ︾ ᠭᠡᠰᠡᠨ ᠠᠴᠠ ᠬᠦᠰᠡᠯ ᠨᠢ ᠪᠡᠶᠡᠯᠡᠭᠳᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠨᠠᠮ᠂ ᠠᠷᠠᠳ ᠲᠦᠮᠡᠨ ᠢ ᠢᠳᠡᠭᠡᠨ ᠲᠦᠰᠢᠭᠯᠡᠵᠦ ᠬᠦᠦ ᠦᠬᠢᠨ ᠢᠶᠠᠨ ᠪᠦᠷ ᠨᠠᠮ ᠠᠷᠠᠳ ᠲᠦᠮᠡᠨ ᠳᠤ ᠲᠤᠰᠢᠶᠠᠨ ᠨᠠᠶᠢᠳᠠᠵᠤ ᠬᠤᠪᠢᠰᠬᠠᠯ ᠳᠤ ᠤᠷᠤᠯᠴᠠᠭᠤᠯᠪᠠ᠃ ᠡᠦ ᠵᠢᠩ ᠪᠢᠨ ᠤ ᠬᠡᠦᠬᠡᠨ ᠮᠠᠨᠯᠢᠨ᠂ ᠡᠬᠡ ᠶᠢᠨ ᠢᠶᠠᠨ ᠬᠦᠰᠡᠯ ᠢ ᠲᠡᠷᠭᠡᠯᠰᠢᠭᠦᠯᠦᠨ ᠡᠪ ᠬᠠᠮᠳᠤ ᠨᠠᠮ ᠤᠨ ᠭᠡᠰᠢᠭᠦᠨ ᠪᠤᠯᠵᠠᠢ᠃      ᠡᠦ ᠵᠢᠩ ᠪᠢᠨ ᠡᠷᠬᠢᠮ ᠳᠡᠭᠡᠳᠦ ᠵᠠᠩ ᠴᠢᠨᠠᠷ ᠲᠠᠢ᠂ ᠪᠤᠯᠪᠠᠰᠤᠨ ᠶᠤᠰᠤ ᠮᠤᠷᠠᠯ ᠲᠠᠢ ᠮᠤᠩᠭᠤᠯ ᠡᠮᠡᠭᠳᠠᠢ ᠪᠠᠶᠢᠵᠠᠢ᠃ ᠨᠢᠭᠡ ᠤᠳᠠᠭ᠎ᠠ ᠳᠡᠭᠦᠨ ᠤ ᠵᠠᠷᠤᠴᠠ ᠨᠢ ᠡᠦ ᠵᠢᠩ ᠪᠢᠨ ᠤ ᠲᠦᠷᠬᠦᠮ ᠤᠨ ᠮᠤᠷᠳᠠᠭᠤᠯ ᠤᠨ ᠪᠡᠯᠡᠭ ᠪᠤᠯᠬᠤ ᠬᠠᠮᠤᠭ ᠦᠨᠡᠳᠠᠢ ᠡᠳ᠋ — ᠹᠠᠷᠠᠨᠼᠢ ᠶᠢᠨ ᠠᠯᠳᠠᠨ ᠴᠠᠭ ᠢ ᠬᠠᠭᠠᠯᠤᠭᠠᠳ ᠠᠶᠤᠨ ᠰᠠᠨᠳᠤᠷᠴᠤ ᠳᠡᠭᠦᠨ ᠳᠤ ᠰᠦᠭᠦᠳᠴᠦ ᠠᠭᠤᠴᠢᠯᠠᠯ ᠭᠤᠶᠤᠭᠰᠠᠨ᠎ᠠ᠂ ᠳᠡᠷᠡ ᠳᠡᠭᠦᠨ ᠢ ᠡᠷᠭᠦᠨ ᠪᠤᠰᠬᠠᠭᠠᠳ ︽ᠠᠯᠳᠠᠨ ᠴᠠᠭ ᠶᠠᠭᠠᠬᠢᠵᠤ ᠬᠤᠪᠤᠷ ᠦᠨᠡᠳᠠᠢ ᠡᠷᠬᠢᠮ ᠴᠦ ᠬᠡᠷᠬᠢᠨ ᠴᠢᠨᠤ ᠬᠢᠷᠢ ᠦᠨᠡᠳᠠᠢ ᠪᠤᠢ᠂ ᠴᠢᠮᠠᠢᠢ ᠶᠠᠭᠠᠬᠢᠨ ᠬᠦᠷᠬᠦ ᠪᠤᠢ︾ ᠭᠡᠰᠡᠨ ᠭᠡᠨ᠎ᠡ ᠃ ᠬᠡᠷᠪᠡ ᠱᠠᠨ ᠭᠦᠨ ᠪᠤᠯᠤᠭᠰᠠᠨ ᠪᠤᠯ ᠪᠠᠷᠠᠯ᠎ᠠ᠂ ᠬᠦᠭᠡᠷᠦᠬᠦᠢ ᠡᠨᠡ ᠵᠠᠷᠤᠴᠠ ᠶᠢᠨ ᠠᠮᠢ ᠶᠢ ᠠᠪᠤᠭᠰᠠᠨ ᠪᠠᠶᠢᠬᠤ ᠳ᠋ᠠ︹29︺᠃      ᠡᠦ ᠵᠢᠩ ᠪᠢᠨ ᠪᠠᠶᠠᠭᠭᠤᠤᠯ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠵᠸᠦ ᠶᠢᠨ ᠰᠣᠳᠤᠨ ᠬᠦᠮᠦᠨ  ᠢᠶᠠᠷ ᠰᠤᠩᠭᠤᠭᠳᠠᠨ ᠳᠡᠮᠳᠡᠭᠯᠡᠭᠳᠡᠵᠠᠢ᠃      ︽ᠰᠤᠶᠤᠯ ᠤᠨ ᠶᠡᠭᠡ ᠬᠤᠪᠢᠰᠬᠠᠯ︾ ᠤᠨ ᠡᠮᠦᠨ᠎ᠡ ᠡᠦ ᠵᠢᠩ ᠪᠢᠨ ᠰᠢᠨᠵᠢᠶᠠᠩ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠤᠯᠤᠰ ᠲᠦᠷᠦ ᠶᠢᠨ ᠵᠦᠪᠯᠡᠯᠭᠡᠨ ᠤ ᠨᠠᠷᠢᠨ ᠪᠢᠴᠢᠭ ᠤᠨ ᠳᠠᠷᠤᠭ᠎ᠠ᠂ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ ᠵᠦᠪᠯᠡᠭᠴᠢ ᠶᠢᠨ ᠲᠤᠰᠢᠶᠠᠯ ᠲᠠᠢ ᠪᠠᠶᠢᠵᠤ᠂ ᠦᠪᠡᠷ ᠤᠨ ᠭᠡᠷ ᠲᠦᠷᠦᠯ ᠤᠨ ᠳᠡᠦᠬᠡ ᠰᠤᠳᠤᠷ ᠢᠶᠠᠨ ᠡᠮᠬᠢᠯᠡᠵᠦ ᠪᠠᠶᠢᠪᠠ᠃ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠤᠨᠴᠠᠭᠠᠢ ᠬᠠᠷᠠᠭᠠᠯᠵᠠᠯ ᠬᠦᠷᠳᠡᠭᠡᠬᠦ ᠳᠤ ᠠᠪᠤᠭᠰᠠᠨ ᠦᠭᠡᠢ᠂ ︽ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ︾ ᠤᠨ ᠬᠢᠯᠢᠰ ᠢ ᠴᠠᠭᠠᠳᠬᠠᠭᠰᠠᠨ ᠳᠠᠷᠠᠭ᠎ᠠ ᠮᠦᠨ ᠲᠤᠰᠢᠶᠠᠯ ᠢ ᠨᠢ ᠰᠡᠷᠭᠦᠭᠡᠪᠡ᠃      ᠡᠦ ᠵᠢᠩ ᠪᠢᠨ 1975 ᠤᠨ ᠳᠤ ᠦᠷᠦᠮᠴᠢ ᠳᠤ ᠨᠠᠰᠤ ᠪᠠᠷᠠᠵᠠᠢ᠂ ᠨᠠᠰᠤᠨ ᠰᠡᠭᠦᠳᠡᠷ ᠰᠠᠶ᠋ᠢ ᠵᠢᠷᠠᠨ ᠨᠢᠭᠡ  ᠲᠠᠢ︹30︺᠃      ᠭᠦᠩᠰᠡᠩᠨᠤᠷᠪᠤ  ᠴᠢᠨ ᠸᠠᠩ ᠤᠨ ᠬᠡᠦᠬᠡᠨ ᠡᠦ ᠵᠢᠩ ᠪᠢᠨ ᠤ ᠨᠢᠭᠡ ᠨᠠᠰᠤ ᠠᠰᠤᠷᠤ ᠨᠠᠷᠢᠨ ᠪᠤᠳᠤᠯᠢᠶᠠᠨ ᠲᠠᠢ ᠭᠠᠰᠢᠭᠤᠨ ᠡᠭᠡᠭᠦᠨ᠂ ᠮᠦᠨ ᠴᠦ ᠪᠠᠶᠠᠨ ᠡᠷᠬᠢᠮ ᠵᠤᠯ ᠵᠢᠷᠭᠠᠯ ᠲᠠᠢ ᠭᠡᠵᠦ ᠴᠦ ᠪᠤᠯᠤᠨ᠎ᠠ᠃ ᠪᠠᠯᠴᠢᠷ ᠪᠠᠭ᠎ᠠ ᠨᠠᠰᠤᠨ  ᠳᠤ ᠦᠨᠦᠴᠢᠨ ᠦᠷᠦᠭᠡᠰᠦᠨ ᠤ ᠵᠤᠪᠠᠯᠠᠩ ᠢ ᠠᠮᠰᠠᠯ᠎ᠠ᠃ ᠬᠠᠷᠢ ᠳᠤ ᠮᠤᠷᠳᠠᠭᠠᠳ ᠬᠠᠨ ᠸᠠᠩ ᠤᠨ ᠬᠠᠳᠤᠨ ᠪᠤᠯᠵᠤ ᠤᠯᠤᠰ ᠲᠦᠷᠦ ᠶᠢᠨ ᠳᠠᠪᠴᠠᠩ ᠳᠡᠭᠡᠷ᠎ᠡ ᠦᠩᠭᠡ ᠵᠢᠪᠬᠤᠭ᠎ᠠ ᠲᠠᠢ ᠶᠠᠪᠤᠯ᠎ᠠ᠃ ᠭᠤᠮᠢᠨᠳᠠᠩ ᠪᠠ ᠡᠪ ᠬᠠᠮᠳᠤ ᠨᠠᠮ ᠳᠤ ᠪᠦᠷ ᠠᠩᠬᠠᠷᠤᠭᠳᠠᠨ ᠬᠦᠨᠳᠦᠳᠬᠡᠭᠳᠡᠭᠰᠡᠨ ᠡᠮᠡᠭᠳᠠᠢ ᠤᠯᠤᠰ ᠲᠦᠷᠦᠴᠢ᠃ ᠲᠡᠷᠡ ᠬᠠᠷ᠎ᠠ ᠭᠡᠷ ᠤᠨ ᠬᠠᠳᠠᠭᠠᠰᠤ ᠴᠦ ᠪᠤᠯᠵᠤ ᠰᠠᠭᠤᠯ᠎ᠠ᠃ ᠡᠨᠡ ᠪᠦᠬᠦᠨ ᠳᠡᠭᠦᠨ ᠤ ᠨᠢᠭᠡ ᠨᠠᠰᠤ ᠪᠤᠯ ᠲᠤᠷᠭᠤᠳ ᠮᠤᠩᠭᠤᠯ ᠤᠨ ᠡᠷᠬᠡ ᠠᠰᠢᠭ ᠬᠢᠭᠡᠳ ᠮᠤᠩᠭᠤᠯ ᠨᠤᠳᠤᠭ ᠤᠷᠤᠨ ᠢᠶᠠᠨ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠵᠤ ᠡᠷᠬᠡ ᠮᠡᠳᠡᠯ ᠲᠠᠢ᠂ ᠠᠷᠠᠳᠴᠢᠯᠠᠯ ᠲᠠᠢ ᠬᠦᠭᠵᠢᠯ ᠪᠠᠳᠠᠷᠠᠯ ᠲᠠᠢ ᠪᠤᠯᠭᠠᠬᠤ ᠶᠢᠨ ᠲᠦᠯᠦᠭᠡ ᠠᠯᠢᠪᠠ ᠪᠠᠨ ᠵᠤᠷᠢᠭᠤᠯᠤᠭᠰᠠᠨ ᠨᠢᠭᠡ ᠨᠠᠰᠤ ᠮᠦᠨ᠃ ᠡᠪ ᠬᠠᠮᠳᠤ ᠨᠠᠮ  ᠢᠶᠠᠨ ᠬᠦᠷᠢᠶᠡᠯᠡᠵᠦ᠂ ᠠᠷᠠᠳ ᠲᠦᠮᠡᠨ ᠢᠶᠠᠨ ᠬᠠᠶᠢᠷᠠᠯᠠᠨ᠂ ᠦᠨᠳᠦᠰᠦᠳᠡᠨ ᠢᠶᠠᠨ ᠬᠦᠭᠵᠢᠭᠦᠯᠦᠨ ᠮᠠᠨᠳᠤᠭᠤᠯᠬᠤ ᠶᠢᠨ ᠲᠤᠯᠠ ᠵᠢᠳᠬᠦᠭᠰᠡᠨ ᠡᠬᠡ ᠤᠷᠤᠨᠴᠢ ᠦᠵᠡᠯᠳᠡᠨ᠂ ᠭᠠᠷᠮᠠᠭᠠᠢ ᠵᠢᠳᠬᠦᠯᠳᠠᠢ ᠲᠤᠷᠭᠤᠳ ᠤᠨ ᠪᠡᠷᠢ᠂ ᠭᠦᠩᠰᠡᠩᠨᠤᠷᠪᠤ  ᠶᠢᠨ ᠰᠢᠯᠢᠳᠡᠭ ᠦᠬᠢᠨ᠂ ᠰᠢᠯᠢᠳᠡᠭ ᠮᠤᠩᠭᠤᠯ ᠬᠡᠦᠬᠡᠨ ᠭᠡᠵᠦ ᠪᠢ ᠬᠤᠪᠢᠨ ᠳᠤ ᠪᠠᠨ ᠬᠦᠨᠳᠦᠳᠬᠡᠨ ᠪᠢᠰᠢᠷᠡᠨ᠎ᠡ᠃ ︵ᠦᠷᠭᠦᠯᠵᠢᠯᠡᠯ ᠪᠤᠢ︶                                                          ᠬᠤᠳᠤᠷᠠᠩᠭ᠎ᠠ ᠵᠤᠬᠢᠶᠠᠪᠠ᠃                 ︽ᠳᠤᠷᠠᠰᠤᠯ ᠳᠤ ᠮᠦᠩᠬᠡᠷᠡᠬᠦ ᠬᠤᠷᠸ᠎ᠠ︾ ︵ᠦᠪᠦᠷ ᠮᠤᠩᠭᠤᠯ ᠤᠨ ᠬᠡᠪᠯᠡᠯ ᠤᠨ ᠪᠦᠯᠦᠭᠯᠡᠯ ᠦᠪᠦᠷ ᠮᠤᠩᠭᠤᠯ ᠤᠨ ᠰᠤᠶᠤᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ 2014 ᠤᠨ ᠤ 3 ᠰᠠᠷ᠎ᠠ ᠶᠢᠨ ᠠᠩᠬᠠᠳᠤᠭᠠᠷ ᠬᠡᠪ︶ ᠭᠡᠬᠦ ᠨᠤᠮ ᠠᠴᠠ ᠰᠤᠩᠭᠤᠪᠠ᠃
  
ᠢᠷᠡᠯᠲᠡ᠄ ᠠᠷᠣ ᠬᠤᠷᠴᠢᠨ ᠬᠤᠰᠢᠭᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠮᠣᠭᠤᠯᠠᠩ ᠰᠠᠶᠢᠬᠠᠨ ᠴᠠᠭᠠᠯᠠᠵᠣ ᠪᠠᠶᠢᠡᠨᠣ︖
ᠴᠠᠭᠠᠨ ᠬᠤᠯᠣᠭᠠᠨ᠎ᠠ ᠵᠢᠯ ᠢᠶᠠᠨ ᠣᠡᠡᠳᠣᠬᠤ ᠢᠷᠣᠭᠡᠯ ᠮᠬᠠᠳᠠᠭᠠᠯ
ᠪᠣᠷᠬᠠᠨ ᠠᠪᠤ ᠮᠢᠨᠢ
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠠᠷᠪᠠ︶
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠶᠢᠰᠦ︶
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05003979号