ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠰᠣᠪᠣᠷᠭ᠎ᠠ ᠪᠢᠴᠢᠭᠯᠡᠬᠦᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/4/22
                     ᠰᠣᠪᠣᠷᠭ᠎ᠠ ᠪᠢᠴᠢᠭᠯᠡᠬᠦᠨ                                          ︵ᠪᠯᠠᠮ᠎ᠠ ᠭᠠᠯᠰᠠᠩ ᠤᠨ ᠰᠣᠪᠣᠷᠭ᠎ᠠ ᠳᠤ ᠵᠤᠷᠢᠭᠤᠯᠪᠠ︶                                                                         ᠹ᠊ · ᠪᠦᠬᠡ      ᠡᠳᠦᠭᠡ ᠮᠠᠨᠣᠰ ᠠᠭᠤᠯᠠ ᠣᠪᠣᠭᠠᠨ ᠤ ᠲᠠᠬᠢᠯᠭ᠎ᠠ᠂ ᠯᠤᠤᠰ ᠪᠤᠯᠠᠭ ᠤᠨ ᠡᠷᠭᠦᠴᠡ᠂ ᠱᠠᠩᠰᠢ ᠰᠢᠪᠰᠢᠯ ᠤᠨ ᠠᠯᠢᠨ ᠴᠤ ᠪᠢᠰᠢ᠂ ᠬᠠᠷᠢᠨ ᠣᠢ ᠣᠬᠠᠭᠠᠨ ᠠᠴᠠ ᠵᠠᠶᠢᠳᠠᠭᠠᠳ ᠦᠭᠡᠰ ᠤᠨ ᠰᠠᠩ ᠳᠤ ᠡᠷᠡᠦ ᠪᠠᠷ ᠢᠶᠠᠨ ᠠᠷᠠᠶᠢᠬᠠᠨ ᠭᠤᠬᠠᠳᠠᠭ᠎ᠠ ᠬᠡᠮᠡᠷ ᠰᠢᠨ᠎ᠡ ᠠᠮᠢᠯᠠᠭᠰᠠᠨ ᠡᠷᠲᠡᠨ ᠤ ᠰᠣᠪᠣᠷᠭ᠎ᠠ ᠶᠢ ᠵᠣᠷᠢᠭ᠎ᠠ ᠶᠤᠮ ᠳ᠋ᠠ᠃      ᠲᠣᠯᠢ ᠪᠢᠴᠢᠭ ᠲᠤᠷ ︽ᠰᠣᠪᠣᠷᠭ᠎ᠠ ᠪᠤᠯᠪᠠᠰᠣ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠳᠤ ᠯᠠ ᠪᠠᠶᠢᠳᠠᠭ ᠳᠣᠷᠠᠰᠬᠠᠯ ᠤᠨ ᠰᠢᠲᠦᠭᠡᠨ ᠤ ᠪᠠᠷᠢᠯᠭ᠎ᠠ︾ ᠬᠡᠮᠡᠮᠦᠢ᠃ ᠰᠣᠪᠣᠷᠭ᠎ᠠ ᠬᠡᠮᠡᠭᠰᠡᠨ ᠢᠵᠠᠭᠤᠷ ᠦᠭᠡ ᠴᠣᠬᠤᠮ ᠬᠡᠵᠢᠶ᠎ᠡ ᠬᠠᠮᠢᠭ᠎ᠠ ᠠᠴᠠ ᠠᠯᠢ ᠦᠨᠳᠦᠰᠦᠲᠡᠨ ᠣᠭᠰᠠᠭ᠎ᠠ ᠠᠴᠠ ᠡᠭᠦᠰᠪᠤᠷᠢᠯᠡᠯᠲᠡᠢ ᠨᠢ ᠮᠢᠨᠤ ᠬᠤᠪᠢᠨ᠎ᠠ ᠦᠯᠦ ᠮᠡᠳᠡᠬᠦᠢ ᠲᠤᠭ᠎ᠠ᠃ ᠠᠵᠤᠭᠤ ᠠᠮᠤᠢ ‍ᠶ᠎ᠠ ᠣᠩᠭᠢᠷᠠᠨ ᠦᠯᠦ ᠪᠤᠯᠤᠮᠤᠢ᠃ ᠣᠳᠣ ᠵᠦᠪᠬᠡᠨ ᠰᠣᠨᠢᠨ ᠮᠡᠳᠡᠭᠡᠯᠡᠯ ᠠᠴᠠ ᠣᠯᠵᠠᠷᠬᠠᠭᠰᠠᠨ ᠪᠤᠶᠤ ᠰᠣᠨᠣᠰᠴᠣ ᠳᠣᠭᠤᠯᠣᠭᠰᠠᠨ ᠬᠡᠳᠦᠨ ᠮᠦᠷ ᠢᠶᠠᠷ ᠵᠤᠭᠤᠭ ᠤᠨ ᠣᠭᠤᠰᠣᠷ ᠡᠯᠭᠦᠨᠡᠮ᠃ ᠰᠣᠪᠣᠷᠭ᠎ᠠ ᠬᠡᠭᠦᠨᠡᠷ ᠨᠢ ᠳᠡᠯᠡᠬᠡᠢ ᠶᠢᠨ ᠨᠠᠢᠮᠠᠨ ᠭᠠᠶᠢᠬᠠᠮᠰᠢᠭ ᠤᠨ ᠨᠢᠭᠡ — ᠡᠷᠲᠡᠨ ᠤ ᠶᠧᠵᠢᠫᠲ ᠤᠨ ᠱᠣᠪᠣᠭᠤᠷ ᠣᠷᠣᠶᠢᠲᠦ ᠫᠢᠷᠠᠮᠢᠳ᠋ ᠰᠣᠪᠣᠷᠭ᠎ᠠ ᠠᠴᠠ ᠳᠠᠪᠠᠭᠰᠠᠨ ᠪᠠᠷᠢᠯᠭ᠎ᠠ ᠡᠳᠦᠶᠢᠲᠡᠯ᠎ᠡ ᠭᠠᠷᠤᠭ᠎ᠠ ᠦᠭᠡᠢ ᠪᠦᠭᠡᠳ ᠲᠡᠭᠦᠨ ᠤ ᠣᠷᠣᠢ ᠳᠤᠨᠢ ᠭᠠᠷᠬᠤ ᠬᠡᠰᠡᠨ ᠣᠯᠣᠰ ᠣᠯᠣᠰ ᠤᠨ ᠰᠦᠰᠦ ᠵᠣᠷᠢᠭᠲᠠᠳ ᠪᠦᠷ ᠴᠦ ᠠᠮᠢ ᠪᠠᠨ ᠠᠯᠳᠠᠪᠠ ᠭᠡᠵᠦ ᠳᠣᠳᠣᠷᠬᠠᠢ ᠳᠡᠮᠳᠡᠭᠯᠡᠮᠦᠢ᠃ ᠳᠡᠭᠦᠨ ᠳᠤᠷ ᠶᠠᠮᠠᠷᠬᠠᠨ ᠡᠴᠢᠨ᠎ᠡ ᠳᠠᠯᠳᠠ ᠠᠭᠤᠯᠤᠭᠳᠠᠭ᠎ᠠ ᠦᠦ᠃ ᠲᠡᠶᠢᠨᠬᠦ ᠲᠡᠳᠡᠭᠡᠷ ᠭᠠᠷᠮᠠᠭᠠᠢ ᠬᠠᠭᠤᠴᠢ ᠰᠣᠳᠣᠯᠭᠠᠲᠠᠨ ᠢ ᠬᠦᠷᠲᠡᠯ᠎ᠡ ᠭᠠᠴᠢᠭᠳᠠᠭᠤᠯᠣᠨ ᠭᠠᠷ ᠨᠤᠬᠤᠯᠠᠭᠤᠯᠤᠨ᠎ᠠ ᠠᠪᠠᠢ᠃ ᠡᠨᠡ ᠦᠨᠡᠬᠡᠷ ᠲᠠᠩ ᠤᠨ ᠲᠥᠷᠦ ᠶᠢᠨ ᠡᠮ᠎ᠡ ᠬᠠᠭᠠᠨ ᠡᠦ ᠽᠧ ᠲᠢᠶᠠᠨ ᠤ ᠤᠩᠭᠤᠨ ᠢ ᠴᠡᠷᠢᠭ ᠤᠨ ᠡᠷᠬᠡᠲᠡᠳ ᠴᠡᠷᠢᠭ ᠮᠣᠷᠢ ᠬᠦᠳᠡᠯᠭᠡᠵᠦ ᠫᠤᠤ ᠳᠠᠷᠢ ᠵᠠᠷᠣᠴᠠᠭᠤᠯᠣᠭᠠᠳ ᠴᠤ ᠳᠠᠯᠵᠢ ᠦᠭᠡᠢ ᠨᠢᠰᠣ ᠪᠠᠨ ᠳᠣᠯᠢᠶᠠᠭᠰᠠᠨ ᠭᠡᠰᠡᠨ ᠯᠦᠭᠡ ᠢᠵᠢᠯᠡᠬᠡᠨ᠃ ᠪᠢ ᠭᠡᠵᠦ ᠹᠸᠦᠳᠠᠯ ᠪᠣᠯᠣᠨ ᠬᠤᠪᠢᠰᠬᠠᠯ ᠤᠨ ᠰᠣᠯᠢᠭᠳᠠᠯ ᠤᠨ ᠡᠷᠡᠨ ᠤ ᠲᠦᠷᠦᠳᠡᠰᠦ᠃ ᠨᠡᠶᠢᠭᠡᠮ ᠠᠬᠤᠢ ᠯᠤᠭ᠎ᠠ ᠨᠢᠭᠤᠷᠳᠠᠬᠤ ᠳᠤ ᠱᠠᠰᠢᠨ ᠰᠣᠷᠲᠠᠬᠤᠨ ᠣᠷᠣᠭᠤᠳᠠᠯ ᠳᠤ ᠣᠷᠣᠵᠣ᠂ ᠰᠦᠮ᠎ᠡ ᠬᠡᠶᠢᠳ ᠤᠨ ᠬᠢᠨ ᠠᠮᠢᠨ ᠳᠠᠭᠠᠨ ᠵᠥᠪ ᠦᠭᠡᠢ ᠠᠷᠢᠶᠠᠪᠠᠯᠤᠴᠣᠳ ᠪᠣᠯᠴᠢᠬᠠᠭᠰᠠᠨ ᠬᠤᠶᠢᠨ᠎ᠠ ᠶᠠᠭᠤᠨ ᠰᠣᠪᠣᠷᠭ᠎ᠠ ᠮᠣᠪᠣᠷᠭ᠎ᠠ ᠲᠠᠢ ᠶᠤᠮ ᠳ᠋ᠠ᠃ ᠳᠡᠭᠡᠭᠡᠳ ᠡᠮᠡᠭᠡᠯ ᠠᠴᠠ ᠪᠠᠨ ᠦᠨᠳᠦᠷ ᠢ ᠳᠠᠪᠠᠭ᠎ᠠ ᠦᠭᠡᠢ ᠬᠡᠮᠡᠷᠬᠡᠨ ᠮᠢᠨᠤᠬᠢ ᠮᠡᠳᠡᠳᠡᠭ ᠨᠢ ᠪᠸᠶᠢᠬᠠᠢ ᠴᠡᠴᠡᠷᠯᠢᠭ ᠤᠨ ᠴᠠᠭᠠᠨ ᠰᠣᠪᠣᠷᠭ᠎ᠠ᠂ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠵᠢᠨᠵᠢᠨ ᠴᠠᠭᠠᠨ ᠰᠣᠪᠣᠷᠭ᠎ᠠ᠂ ᠯᠢᠨ ᠬᠤᠸᠠᠩ ᠹᠦ᠋ ᠪᠠᠭᠤᠷᠢ ᠶᠢᠨ ᠡᠮᠦᠨᠡᠬᠢ ᠦᠨᠦᠴᠢᠨ ᠴᠠᠭᠠᠨ ᠰᠣᠪᠣᠷᠭ᠎ᠠ᠂ ᠪᠦᠬᠦ ᠤᠯᠤᠰ ᠲᠤ ᠭᠤᠳᠠᠭᠠᠷᠯᠠᠭ᠎ᠠ 80 ᠮᠧᠲᠷ ᠭᠠᠷᠣᠢ ᠦᠨᠳᠦᠷ ᠨᠢᠩᠴᠧᠩ ᠤᠨ ᠳ᠋ᠠ ᠮᠢᠩ ᠲᠠ ᠰᠣᠪᠣᠷᠭ᠎ᠠ ᠪᠤᠯᠤᠨ ᠺᠠᠶᠢᠯᠤ ᠳᠠᠬᠢ ᠶᠤᠸᠠᠨ ᠤ ᠴᠠᠭᠠᠨ ᠰᠣᠪᠣᠷᠭ᠎ᠠ ᠠᠴᠠ ᠴᠠᠰᠢ ᠦᠭᠡᠢ ᠂ ᠲᠡᠳᠡᠭᠡᠷ ᠠᠴᠠ ᠮᠤᠬᠤᠷ ᠰᠣᠪᠣᠷᠭ᠎ᠠ ᠠᠴᠠ ᠪᠣᠰᠤ ᠶᠢ ᠵᠢᠷᠤᠭ ᠰᠡᠭᠦᠳᠡᠷ ᠠᠴᠠ ᠬᠠᠷᠠᠭᠰᠠᠨ ᠳᠡᠳᠦᠢ ᠯᠡ᠃ ᠮᠠᠨ ᠤ ᠬᠤᠰᠢᠭᠤ ᠨᠤᠲᠤᠭ ᠲᠤ ᠰᠣᠪᠣᠷᠭ᠎ᠠ ᠴᠦᠭᠡᠨ ᠪᠤᠯᠤᠯᠲᠠᠢ᠂ ᠬᠤᠨᠳᠣ ᠶᠢᠨ ᠰᠣᠪᠣᠷᠭ᠎ᠠ ᠭᠠᠴᠠᠭ᠎ᠠ ᠶᠢᠨ ᠨᠡᠷ᠎ᠡ ᠨᠢ ᠰᠣᠪᠣᠷᠭ᠎ᠠ ᠠᠴᠠ ᠢᠷᠡᠯᠲᠡᠢ ᠦᠦ᠂ ᠰᠣᠨᠣᠰᠬᠠᠯ ᠢᠶᠠᠷ ᠬᠠᠨ ᠰᠦᠮ᠎ᠡ ᠶᠢᠨ ᠳᠤᠭᠠᠩ ᠤᠨ ᠬᠦᠷᠢᠶᠡᠨ ᠳᠠᠬᠢ ᠰᠣᠪᠣᠷᠭ᠎ᠠ ᠠᠯᠠᠭ᠎ᠠ ᠪᠣᠯᠵᠠᠢ᠃ ᠰᠠᠭᠤᠭᠳᠠᠯ ᠲᠠᠢ ᠭᠡᠪᠡᠯ ᠬᠤᠨᠳᠣ ᠳᠤ ᠪᠢᠴᠢᠭ ᠦᠵᠡᠭᠡ ᠳᠤ ᠰᠣᠷᠭᠠᠭᠤᠯᠢ ︵ᠳᠣᠶᠢᠩᠬᠤᠷ ᠭᠡᠭᠡᠨ ᠤ ᠣᠷᠳᠣᠨ︶ ᠶᠢᠨ ᠠᠷᠣ ᠶᠢᠨ ᠨᠠᠢᠮᠠᠨ ᠵᠢᠵᠢᠭ ᠴᠠᠭᠠᠨ ᠰᠣᠪᠣᠷᠭ᠎ᠠ ᠵᠢᠴᠢ ᠵᠡᠭᠦᠨ ᠡᠮᠦᠨ᠎ᠡ ᠬᠤᠸᠠ ᠶᠢᠨ ᠣᠷᠣᠢ ᠳᠠᠬᠢ ᠪᠦᠳᠦᠭᠦᠨ ᠴᠠᠭᠠᠨ ᠰᠣᠪᠣᠷᠭ᠎ᠠ ︵ᠡᠨᠡ ᠴᠠᠭᠠᠨ ᠰᠣᠪᠣᠷᠭ᠎ᠠ ᠶᠢ ᠲᠠᠮᠢᠷᠯᠠᠯ ᠢᠶᠠᠷ ᠲᠣᠭᠤᠷᠢᠨ ᠬᠦᠶᠦᠵᠦ ᠪᠠᠶᠢᠵᠠᠢ︶ ᠪᠤᠯᠤᠨ᠎ᠠ᠃ ᠲᠡᠷᠡ ᠦᠶ᠎ᠡ ᠳᠤ ᠲᠡᠭᠦᠨ ᠢ ᠰᠣᠪᠢᠨ ᠰᠣᠨᠵᠢᠬᠤ ᠣᠬᠠᠭᠠᠨ ᠰᠠᠭᠤᠭᠠᠳᠣᠢ᠃ ᠭᠡᠲᠡᠯ᠎ᠡ ᠲᠡᠷᠡ ᠬᠤᠶᠠᠷ ᠰᠣᠪᠣᠷᠭ᠎ᠠ ᠰᠣᠶᠣᠯ ᠤᠨ ᠬᠤᠪᠢᠰᠬᠠᠯ ᠤᠨ ᠣᠯᠠᠩᠭᠠᠰᠣᠯ ᠳᠤ ᠠᠷᠴᠢᠭᠳᠠᠨ᠂ ᠢᠳᠡᠭᠡᠰᠢᠭᠰᠡᠨ ᠨᠣᠲᠤᠭ ᠠᠴᠠ ᠪᠠᠨ ᠭᠤᠮᠤᠳᠠᠯᠲᠠᠢ ᠠᠶᠠᠷᠯᠠᠪᠠᠢ᠃ ᠦᠵᠡᠭᠡᠳ ᠰᠣᠨᠣᠰᠣᠭᠠᠳ ᠪᠠᠶᠢᠬᠤᠨᠠᠷ ᠣᠨᠳᠣᠣ ᠣᠷᠣᠨ ᠤ ᠰᠣᠪᠣᠷᠭ᠎ᠠ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠤ ᠰᠣᠶᠣᠯ ᠤᠨ ᠥᠪ ᠢᠶᠠᠷ ᠬᠠᠮᠠᠭᠠᠯᠠᠭᠳᠠᠨ ᠰᠦᠨᠳᠡᠷᠯᠡᠭᠰᠡᠭᠡᠷ᠃ ᠭᠠᠭᠴᠠ ᠯᠢᠶᠣᠤ ᠶᠢᠨ ᠦᠶ᠎ᠡ ᠶᠢᠨ ᠰᠣᠪᠣᠷᠭ᠎ᠠ ᠤᠮᠠᠷᠠᠲᠣ ᠣᠷᠣᠨ᠎ᠠ ᠵᠠᠭᠤ ᠳᠦᠴᠢᠭᠡᠳ ᠪᠤᠢ ᠭᠡᠵᠦ ᠲᠡᠷᠡᠦᠬᠡᠨ ᠤ ︽ᠬᠤᠩᠱᠠᠨ ᠣᠷᠣᠢ ᠶᠢᠨ ᠰᠣᠨᠢᠨ︾ ᠳᠤ ᠣᠩᠰᠢᠭᠳᠠᠭᠰᠠᠨ ᠠᠪᠠᠢ᠃ ᠠᠷᠣ ᠬᠤᠷᠴᠢᠨ ᠤ ᠦᠨᠳᠦᠰᠦ ᠣᠯᠠᠭᠠᠨ ᠤᠵᠢᠭ ᠠᠰᠬᠠᠨ ᠦᠭᠡᠶᠢᠬᠦᠦ ᠠᠩᠬᠢᠳᠠᠨ ᠤ ᠬᠤᠪᠢᠰᠬᠠᠯᠲᠤ ᠤᠬᠠᠮᠰᠠᠷ ᠡ᠂ ᠦᠨᠡᠨᠬᠦ ᠬᠢᠷᠢ ᠲᠡᠩᠴᠡᠭᠰᠡᠨ ᠲᠠᠴᠢᠭᠢᠨᠠᠭᠰᠠᠳ ᠪᠠᠶᠢᠵᠠᠢ᠃ ᠲᠡᠷᠡᠬᠦ ᠠᠪᠤ ᠠᠬᠠᠰ ᠲᠠᠢ ᠪᠠᠨ ᠠᠩᠭᠢ ᠶᠢᠨ ᠵᠠᠭᠠᠭ ᠰᠤᠭᠤᠮ ᠢᠯᠭᠠᠨ ᠬᠦᠮᠦᠨ ᠴᠢᠳᠬᠦᠷ ᠢᠯᠭᠠᠭᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠪᠤᠭᠤᠷᠵᠠᠩᠯᠠᠯ ᠳᠤ ᠪᠠᠶᠠᠨᠬᠤᠯᠪᠣᠭ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠰᠣᠷᠣᠭᠴᠢ ᠠᠭᠰᠠᠨ ᠬᠠ᠊ · ᠪᠠᠶᠠᠷ ᠪᠤᠰᠣᠴᠣᠣᠯ ᠤᠨ ᠳᠦᠷᠪᠡᠭᠡᠨ ᠳᠤ ᠤᠪᠤᠬᠠᠢ ᠶᠢᠨ ᠰᠥᠮ᠎ᠡ ᠶᠢ ᠡᠪᠳᠡᠭᠰᠡᠨ ᠦᠢᠯᠡᠳᠬᠡᠯ ᠳᠤ ᠣᠷᠣᠯᠴᠠᠭᠰᠠᠨ ᠪᠠ ᠡᠪᠡᠷ ᠰᠡᠭᠦᠯᠲᠡᠳ ︽ᠣᠷᠪᠠᠯᠭ᠎ᠠ ᠭᠠᠷᠭᠠᠭᠴᠢ︾ ᠶᠢᠨ ᠡᠷᠡᠯᠬᠡᠭ ᠵᠣᠷᠢᠭ ᠪᠠᠳᠠᠷᠠᠭᠠᠭᠰᠠᠨ ᠡᠪᠳᠡᠯ ᠭᠠᠯᠳᠠᠯ ᠢ ᠦᠵᠡᠭᠳᠡᠵᠦ ᠬᠠᠷᠠᠭᠳᠠᠳᠠᠯ᠎ᠠ ᠵᠢᠷᠣᠭᠯᠠᠵᠠᠢ᠃ ᠪᠠᠰᠠ ᠨᠢᠭᠡᠨ ᠪᠢᠴᠢᠭᠳᠡᠨ ᠤ ᠭᠧᠮᠫᠢ ᠶᠢᠨ ᠰᠦᠮ᠎ᠡ ᠶᠢ ᠰᠦᠢᠳᠬᠡᠭᠰᠡᠨ ᠪᠢᠴᠢᠯᠭᠡ ᠶᠢ ᠠᠮᠲᠠᠷᠬᠠᠭᠰᠠᠨ᠃ ᠡᠨᠡ ᠪᠣᠯᠪᠠᠰᠣ ᠬᠤᠶᠠᠷ ᠪᠢᠴᠢᠭᠳᠡᠨ ᠤ ᠵᠢᠷᠦᠬᠡ ᠰᠡᠳᠬᠢᠯ ᠤᠨ ᠡᠮᠵᠡᠭᠯᠡᠯ᠂ ᠣᠶᠣᠨᠯᠢᠭ ᠲᠤᠩᠭᠠᠭᠠᠯᠲᠠ ᠠᠵᠠᠢ᠃ ᠡᠶᠢᠨᠬᠦ ᠪᠦᠲᠦᠭᠡᠯ ᠲᠤᠭᠤᠷᠪᠢᠯ ᠨᠢ ᠮᠤᠩᠭᠤᠯ ᠰᠣᠶᠣᠯ ᠤᠨ ᠮᠦᠩᠬᠡ ᠵᠤᠯᠠ ᠳᠤ ᠨᠡᠮᠡᠷᠢᠯᠡᠯ ᠪᠤᠯᠤᠨ ᠡᠨᠡ ᠰᠣᠪᠣᠷᠭ᠎ᠠ  ᠯᠤᠭ᠎ᠠ ᠲᠡᠦᠬᠡᠳᠦ ᠦᠨ᠎ᠡ ᠴᠠᠨ᠎ᠠ ᠪᠠᠨ ᠪᠠᠳᠠᠷᠠᠭᠤᠯᠣᠨ᠎ᠠ᠃ ︽ᠲᠡᠦᠬᠡ ᠶᠢ ᠠᠷᠠᠳ ᠲᠦᠮᠡᠨ ᠪᠢᠴᠢᠳᠡᠭ︾᠃ ᠲᠡᠳᠡᠭᠡᠷ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠤ ᠪᠤᠯᠪᠠᠰᠣᠨ ᠢ ᠡᠪᠳᠡᠬᠦ ᠪᠠᠷ ᠪᠠᠶᠠᠷ ᠵᠢᠷᠭᠠᠯ ᠪᠤᠯᠭᠠᠭᠰᠠᠨ ᠶᠠᠷᠢᠭᠠᠴᠢᠨ ᠤ ᠬᠢᠲᠤᠭ᠎ᠠ ᠢᠷᠯᠡᠭᠰᠡᠳ ᠲᠦᠮᠡᠨ ᠦᠶ᠎ᠡ ᠶᠠᠰᠣ ᠪᠠᠨ ᠶᠠᠩᠭᠢᠨᠠᠭᠤᠯᠬᠤ ᠨᠢ ᠪᠠᠲᠤᠶᠣᠰᠣᠨ᠃      ᠵᠠ ᠶᠠᠭᠠᠬᠢᠬᠤᠪ᠂ ᠡᠷᠲᠡᠨ ᠡᠳᠦᠭᠡ ᠠᠳᠡᠬᠢ ᠳᠡᠨᠳᠡᠬᠢ ᠡᠯᠬᠡᠨ ᠪᠤᠯᠬᠠᠨ ᠬᠡᠭᠰᠡᠭᠡᠷ ᠦᠬᠡᠷ ᠬᠤᠯᠠᠳᠠᠴᠢᠬᠠᠯ᠎ᠠ ᠦᠦ᠂ ᠣᠷᠵᠢᠨᠤᠨ ᠨᠠᠮᠣᠷ ᠤᠨ ᠤᠴᠢᠷ᠃ ᠬᠤᠰᠢᠭᠤ ᠮᠤᠩᠭᠤᠯ ᠡᠮᠴᠢ ᠶᠢᠨ ᠬᠤᠷᠢᠶᠠᠨ ᠤ ᠣᠨᠴᠠ ᠨᠦᠬᠦᠪᠦᠷᠢ ᠬᠦᠷᠲᠡᠭᠡ ᠨᠡᠷᠡᠲᠦ ᠡᠮᠴᠢ ᠰᠡᠷᠡᠩ ᠣᠲᠠᠴᠢ ︵ᠡᠷᠦᠬᠡ ᠳᠡᠭᠡᠨ ᠡᠮᠴᠢᠯᠡᠭᠡ︶ ᠲᠠᠯᠢᠢᠭᠴᠢ ᠪᠠᠭᠰᠢᠳᠠᠨ ᠭᠠᠯᠰᠠᠩ ᠤᠨ ᠢᠶᠠᠨ ᠲᠠᠭᠠᠯᠠᠯ ᠲᠡᠭᠦᠰᠦᠨ ᠡᠭᠦᠯᠡ ᠳᠠᠯᠳᠠᠯᠠᠭᠰᠠᠨ ᠬᠤᠷᠢᠨ ᠵᠢᠯ ᠳᠤ ᠲᠦᠷᠦᠭᠰᠡᠨ ᠨᠤᠲᠤᠭ ᠬᠠᠷᠠᠬᠠᠳᠠ ᠳᠠᠭᠠᠨ ᠳᠤᠷᠠᠰᠬᠠᠯ ᠤᠨ ᠰᠣᠪᠣᠷᠭ᠎ᠠ ᠴᠣᠭᠴᠠᠯᠠᠪᠠ ᠬᠡᠮᠡᠭᠰᠡᠨ ᠬᠠᠯᠠᠭᠤᠬᠠᠨ ᠲᠤᠭᠤᠯᠳᠠᠯ ᠳᠤ ᠰᠣᠨᠣᠷ ᠱᠦᠷᠭᠦᠭᠡᠭᠳᠡᠪᠡ᠃ ᠳᠡᠭᠡᠭᠡᠳ  ᠭᠠᠶᠢᠬᠠᠰᠢᠷᠠᠬᠠᠨ ᠲᠡᠷᠡ ᠭᠤᠸᠠᠢ ᠶᠢᠨ ᠬᠦᠮᠦᠨ ᠮᠦᠰᠦᠨ ᠠᠭᠤᠯᠬᠤᠨ ᠢ ᠪᠢᠰᠢᠷᠡᠩᠬᠡᠨ ᠪᠥᠭᠡᠳ ᠡᠨᠡ ᠪᠤᠯᠪᠠᠰᠣ ᠨᠤᠷᠤᠮᠰᠢᠭᠰᠠᠨ ᠴᠤᠭ ᠢ ᠣᠯᠠᠯᠵᠠᠭᠤᠯᠤᠭᠰᠠᠨ ᠭᠠᠶᠢᠬᠠᠮᠰᠢᠭ᠂ ᠪᠠᠯᠠᠷᠠᠭ᠎ᠠ ᠰᠣᠶᠣᠯ ᠤᠨ ᠠᠪᠣᠷᠠᠯᠲᠠ ᠭᠡᠵᠦ ᠰᠡᠳᠬᠢᠯ ᠤᠨ ᠭᠦᠨ ᠠᠴᠠ ᠪᠠᠭ᠋ᠠᠳᠣᠩᠭᠤᠶᠢᠯᠠᠪᠠᠢ᠃ ᠲᠡᠶᠢᠨ ᠪᠦᠭᠡᠳ ᠬᠡᠷᠪᠡ ᠴᠠᠭ ᠲᠠᠢ ᠪᠤᠯᠤᠭᠠᠳ ᠮᠣᠷᠢ ᠲᠠᠢ ᠰᠠᠨ ᠭᠡᠰᠡᠨ ᠵᠠᠯᠠᠭᠤ ᠽᠠᠨᠳᠠᠨ ᠤ ᠢᠳᠡ ᠠᠭᠠᠭ ᠴᠤ ᠴᠣᠬᠤᠯᠵᠠᠨ ᠪᠠᠶᠢᠯᠤᠭ᠎ᠠ᠃ ᠶᠠᠪᠤᠵᠤ ᠶᠠᠪᠤᠵᠤ ᠡᠨᠡ ᠨᠠᠮᠤᠷ ︵2018 ᠣᠨ︶ ᠤᠨ ᠲᠠᠷᠭᠤᠨ ᠲᠠᠪᠠᠲᠠᠢ ᠡᠷᠡᠨ᠎ᠡ ᠲᠡᠭᠦᠨ ᠤ ᠪᠦᠰᠡᠭᠦᠢ ᠠᠨᠠᠷ ᠤᠨ ︽ᠰᠣᠪᠣᠷᠭᠠᠨ ᠲᠠᠬᠢᠯᠭ᠎ᠠ︾ ᠶᠢᠨ ᠤᠷᠢᠯᠭ᠎ᠠ ᠳᠤ ᠮᠠᠰᠢᠳᠠ ᠬᠦᠪᠬᠦᠯᠵᠡᠪᠡᠢ᠃ ᠴᠢᠪᠠᠭ᠎ᠠ ᠶᠢᠨ ᠣᠣᠯ ᠤᠨ ︽ᠨᠠᠮᠨᠠᠭᠠᠴᠢ ᠲᠠᠪᠴᠠᠩ︾ ᠠᠴᠠ ᠬᠦᠳᠡᠯᠦᠭᠰᠡᠨ ᠬᠠᠷᠢ ᠬᠢᠴᠡᠲᠡᠢ ᠭᠤᠶᠤᠬᠠᠨ ᠮᠠᠰᠢᠨ ᠴᠠᠬᠢᠭᠤᠷᠲᠤ ᠶᠢᠨ ᠬᠦᠨᠳᠡᠢ ᠶᠢ ᠪᠠᠷᠠᠭᠤᠨ ᠢᠶᠠᠷ ᠬᠠᠭ᠎ᠠ ᠵᠦᠰᠦᠭᠰᠡᠨ ᠴᠠᠷᠳᠠᠮᠠᠯ ᠵᠠᠮ ᠢᠶᠠᠷ ᠤᠮᠠᠷᠠᠰᠢ ᠵᠢᠷᠪᠡᠯᠵᠡᠨ᠎ᠡ᠃ ᠲᠡᠷᠡᠬᠦ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠮᠤᠳᠣᠳ ᠲᠤ ᠪᠦᠷᠬᠦᠪᠴᠢᠯᠡᠭᠳᠡᠭᠰᠡᠨ ᠵᠠᠮ ᠶᠠᠭ ᠠᠭᠤᠶᠢᠲᠦ ᠵᠠᠮ ᠰᠢᠪᠲᠤᠯᠬᠤ ᠰᠢᠦ ᠰᠡᠷᠢᠬᠦᠦ ᠲᠠᠲᠠᠭᠤᠯᠣᠨ ᠨᠢᠭᠡ ᠯᠡ ᠲᠠᠭᠠᠲᠠᠢ᠃ ᠪᠠᠰᠠ ᠬᠡᠵᠢᠶ᠎ᠡ ᠬᠡᠵᠢᠶᠡᠨ ᠤ ᠮᠦᠰᠦᠨ᠎ᠡ ᠲᠡᠰᠢᠭᠦᠷᠯᠡᠭᠡ ᠵᠠᠯᠠᠭᠤ ᠨᠠᠰᠣᠨ ᠤ ᠢᠳᠡ ᠬᠠᠪᠤ ᠶᠢ ᠪᠤᠳᠣᠭᠳᠠᠭᠤᠯᠣᠨ᠎ᠠ᠃ ᠠᠰᠢᠬᠦᠢ᠂ ᠭᠡᠷ ᠤᠨ ᠮᠤᠬᠤᠷ ᠲᠠᠭᠠᠨ ᠦᠩᠭᠡᠷᠡᠬᠦ ᠮᠦᠴᠡ ᠲᠠᠢ ᠬᠠᠨᠢᠰᠠᠨ ᠦᠵᠡᠵᠦ ᠰᠣᠨᠣᠰᠬᠤ ᠬᠤᠪᠣᠷᠳᠠᠭ᠎ᠠ ᠦᠲᠡᠭᠦᠰ ᠲᠤ ᠦᠯᠵᠡᠢ ᠨᠢᠮ᠎ᠠ ᠦᠯᠦᠪ ᠳᠠᠭᠠᠷᠢᠭᠰᠠᠨ ᠯᠠ ᠪᠤᠯᠤᠯ᠎ᠠ᠃ ᠣᠯᠳᠠᠰᠢ ᠦᠭᠡᠢ ᠡᠨᠡᠦᠬᠡᠨ ᠵᠠᠪᠰᠢᠶᠠᠨ᠎ᠠ ᠥᠷᠦᠴᠡ ᠶᠦᠭᠡᠨ ᠠᠷᠢᠭᠤᠰᠲᠠᠯ᠎ᠠ ᠴᠡᠩᠬᠡᠭ ᠠᠭᠠᠷ ᠠᠮᠢᠰᠬᠤᠯᠯᠠᠶ᠎ᠠ᠂ ᠵᠣᠯ ᠬᠠᠷᠭᠤᠨ ᠲᠠᠨᠢᠳᠠᠭ ᠮᠡᠳᠡᠭᠳᠡᠭᠴᠢᠳ ᠵᠤᠯᠭᠠᠨ ᠦᠦ ᠴᠦ᠂ ᠮᠦᠨ ᠲᠡᠷᠡ ᠨᠤᠲᠤᠭ ᠤᠨ ᠬᠡᠯᠡᠯᠭᠡ ᠶᠠᠷᠢᠶ᠎ᠠ ᠳᠤ ᠰᠣᠨᠣᠷ ᠬᠠᠶᠠᠶ᠎ᠠ ︵ᠡᠨᠡ ᠪᠣᠯ ᠮᠢᠨᠤ ᠤᠶᠤᠨ ᠳᠠᠬᠢ ᠴᠢᠯᠠᠭᠤᠵᠢᠯ︶᠂ ᠲᠠᠬᠢᠯᠭᠠᠴᠢᠳ ᠤᠨ ᠴᠤᠭ ᠵᠣᠯᠢ ᠶᠢ ᠠᠩᠵᠠᠭᠠᠷᠠᠶ᠎ᠠ ᠭᠡᠬᠦ ᠠᠴᠠ ᠬᠦᠭᠰᠢᠷᠡᠭᠰᠡᠨ ᠡᠰ ᠨᠡᠭᠡᠳᠡᠰᠦ ᠬᠢᠷᠢ ᠠᠴᠠ ᠪᠠᠨ ᠬᠡᠲᠦᠷᠡᠬᠦᠦ ᠠᠪᠠᠭᠠᠨᠠᠴᠢᠬᠠᠭᠰᠠᠨ ᠲᠦᠷᠦᠭᠦᠦ ᠵᠠᠭᠤᠨ ᠤ ᠡᠬᠢᠨ ᠢᠶᠠᠷ ᠰᠣᠨᠢᠨ ᠭᠡᠳᠡᠭ ᠰᠢᠨᠡᠭᠡᠨ ᠶᠢᠷᠲᠢᠨᠴᠦ ᠲᠠᠢ ᠠᠩᠬᠠᠯᠠᠬᠤᠨ᠎ᠠ ᠪᠠᠭᠠᠷᠢᠨ ᠪᠢᠴᠢᠭᠲᠡᠨ ᠲ᠊ · ᠵᠢᠮᠪᠠ ᠶᠢᠨ ︽ᠬᠥᠬᠡ ᠸᠠᠭᠠᠷᠣᠨ ᠪᠠᠶᠢᠰᠢᠩ ᠦᠨᠴᠦᠭ ᠳᠠᠷᠣᠨ ᠵᠢᠭᠳᠡᠷᠡᠵᠦ\ ᠬᠥᠬᠡ ᠠᠯᠠᠭ ᠲᠠᠭᠲᠠᠭ᠎ᠠ ᠵᠢᠬᠦᠷ ᠬᠤᠯᠪᠤᠨ ᠨᠢᠰᠦᠯᠳᠦᠭᠡᠳ\ ᠬᠦᠭᠵᠢᠨ ᠪᠠᠶᠢᠭ᠎ᠠ ᠪᠠᠭᠠᠷᠢᠨ ᠨᠤᠲᠤᠭ ᠲᠤ\ ᠬᠦᠷᠭᠡᠨ ᠶᠠᠪᠤᠭ᠎ᠠ ᠶᠠᠭᠤᠨ ᠦᠦ ᠁︾ ᠭᠡᠰᠡᠨ ᠰᠠᠭᠤᠭᠳᠠᠯᠳᠣ ᠪᠠᠳᠠᠭ ᠢ ᠣᠩᠰᠢᠴᠢᠬᠠᠪᠠ ᠰᠢᠦ᠃ ᠦ᠂ ᠬᠠᠷᠢᠨ ᠳᠠᠯᠠᠭᠠᠳ ᠵᠢᠯ ᠤᠨ ᠡᠮᠦᠨᠡᠬᠢ ᠵᠦᠢᠯᠡᠰ ᠣᠢ ᠲᠣᠭᠲᠠᠭᠠᠮᠵᠢ ᠳᠤ ᠪᠤᠢ ᠬᠡᠮᠡᠨ ᠥᠪᠡᠷ ᠢ ᠪᠠᠨ ᠲᠣᠭᠤᠵᠣ ᠭᠠᠷᠣᠯ᠎ᠠ ᠬᠦᠭᠰᠢᠨ ᠵᠠᠶᠢᠯᠠᠭᠤᠯ ᠴᠢᠨᠢ᠃ ᠡᠪᠦᠭᠡᠨ ᠨᠠᠳᠠᠳᠣ ᠣᠢ ᠴᠡᠭᠡᠵᠢᠯᠡᠭᠦᠷ ᠬᠡᠰᠢᠭᠯᠡᠯ ᠢᠶᠠᠨ ᠡᠨᠡᠴᠢᠯᠡᠨ ᠬᠠᠶᠢᠷᠠᠯᠠᠭᠰᠠᠭᠠᠷ ᠡᠬᠡ ᠳᠡᠯᠡᠬᠡᠢ ᠶᠢᠨ ᠰᠣᠶᠣᠷᠬᠠᠯ ᠳᠤ ᠲᠠᠯᠠᠷᠬᠠᠬᠤ ᠶᠢᠨ ᠲᠡᠳᠡᠦᠬᠡᠨ᠎ᠡ ᠡᠮᠦᠨ᠎ᠡ ᠰᠠᠭᠤᠭ᠎ᠠ ᠲᠠᠬᠢᠯᠭ᠎ᠠ ᠶᠢᠨ ᠡᠵᠡᠨᠲᠡᠨ ᠰᠡᠷᠡᠩ ᠣᠲᠠᠴᠢ ᠳᠤ ᠪᠣᠳᠣᠯ ᠰᠢᠯᠵᠢᠴᠢᠬᠡᠭᠰᠡᠨ᠂ ᠮᠠᠨ ᠤ ᠬᠤᠶᠠᠭᠤᠯᠠ ᠲᠠᠨᠢᠯᠴᠠᠭᠠᠳ ᠭᠤᠴᠢᠭᠠᠳ ᠵᠢᠯ ᠪᠣᠯᠴᠢᠬᠠᠪᠠ᠃ ᠡᠨᠡ ᠮᠠᠨᠢ ᠢᠳᠡ ᠰᠠᠶᠢᠬᠠᠨ ᠨᠠᠰᠣᠨ᠎ᠠ ᠲᠠᠪᠤᠨ ᠴᠤᠯᠤ ᠵᠠᠰᠠᠯᠭ᠎ᠠ ᠳᠤ ᠵᠠᠭᠤᠢ ᠭᠠᠷᠰᠢᠭᠰᠠᠨ ᠢᠶᠠᠷ ᠦᠯᠦ ᠪᠠᠷᠠᠮ ᠰᠢᠷ᠎ᠠ ᠤᠰᠤ᠂ ᠴᠠᠭᠠᠨ ᠬᠤᠶᠠᠩ᠂ ᠮᠡᠳᠡᠷᠡᠯ᠂ ᠰᠣᠯᠢᠶ᠎ᠠ᠂ ᠭᠠᠯᠵᠠᠭᠤ ᠵᠡᠷᠭᠡ ᠶᠢᠨ ᠵᠠᠰᠠᠯᠭᠠᠨ ᠤ ᠣᠨᠣ ᠳᠣᠨᠣ ᠶᠢ ᠣᠯᠵᠣ ᠬᠡᠳᠦᠨ ᠠᠷᠪᠠᠨ ᠵᠢᠯ ᠳᠤ ᠭᠤᠴᠢ ᠭᠠᠷᠤᠢ ᠲᠦᠮᠡᠨ ᠬᠦᠮᠦᠨ ᠤᠳᠠᠭ᠎ᠠ ᠵᠠᠰᠠᠯᠭ᠎ᠠ ᠦᠭᠭᠦᠭᠰᠡᠨ ᠲᠡᠮᠳᠡᠭᠯᠡᠯ ᠲᠠᠢ᠃ ᠡᠮᠴᠢᠯᠡᠯ ᠤᠨ ᠶᠠᠪᠤᠴᠠᠨ᠎ᠠ ᠵᠠᠷᠢᠮ ᠤᠯᠠᠮᠵᠢᠯᠠᠯ ᠵᠣᠷ ᠲᠤ ᠨᠡᠮᠡᠯᠲᠡ ᠬᠠᠰᠣᠯᠲᠠ ︵ᠪᠠᠳᠭᠠᠨ ᠰᠣᠯᠢᠶ᠎ᠠ᠂ ᠬᠤᠷᠠᠮᠠᠯ ᠰᠣᠯᠢᠶ᠎ᠠ ᠶᠢᠨ ᠰᠣᠳᠠᠯ ᠤᠨ ᠲᠣᠭᠤᠯᠭᠠᠪᠣᠷᠢ ᠳᠤ ᠬᠢᠷᠢ ᠪᠠᠷᠣᠭᠴᠣᠣᠯ ᠰᠢᠷᠬᠡᠶᠢᠳᠡᠭ ᠠᠯᠠᠭ ᠪᠠᠮᠪᠤ ᠶᠢᠨ ᠵᠠᠪᠰᠠᠷ ᠤᠨ ᠵᠢᠪᠠᠷ ᠢ ᠠᠪᠴᠣ ᠨᠤᠮᠠᠳᠬᠠᠪᠠ︶ ᠬᠢᠵᠦ ᠵᠣᠷᠢᠭᠲᠠᠢ ᠬᠡᠷᠡᠭᠯᠡᠭᠡᠳ ᠠᠰᠣᠷᠣ ᠠᠮᠵᠢᠯᠲᠠ ᠪᠠᠷ ᠢᠶᠠᠨ ᠦᠪᠡᠷ ᠢ ᠪᠠᠨ ᠤᠯᠠᠮ ᠲᠠᠨᠢᠭᠤᠯᠤᠨ ᠪᠦᠬᠦ ᠬᠤᠷᠢᠶᠠᠨ ᠤ ᠪᠠᠨ ᠠᠯᠳᠠᠷ ᠨᠡᠷ᠎ᠡ ᠶᠢ ᠡᠷᠭᠦᠪᠡ᠃ ᠲᠡᠷᠡᠪᠡᠷ ᠡᠶᠢᠨᠬᠦ ᠠᠮᠵᠢᠯᠲᠠ ᠳᠠᠭᠤᠷᠢᠰᠬᠠᠯ ᠢᠶᠠᠷ ᠳᠡᠯᠡᠬᠡᠢ ᠶᠢᠨ ᠮᠤᠩᠭᠤᠯ ᠡᠮᠨᠡᠯᠭᠡ ᠶᠢᠨ ᠬᠤᠷᠠᠯ ᠳᠤ ︽ᠰᠣᠯᠢᠶ᠎ᠠ ᠵᠠᠰᠠᠭᠰᠠᠨ ᠦᠬᠦᠯᠡᠯ︾ ᠢᠶᠠᠨ ᠣᠩᠰᠢᠭᠰᠠᠨ ᠪᠠ ᠤᠯᠠᠭᠠᠨᠪᠠᠭᠠᠲᠣᠷ ᠤᠨ ᠬᠤᠷᠠᠯ ᠳᠤ ︽ᠬᠠᠳᠬᠤᠯᠠᠭ᠎ᠠ 6︾ ᠪᠠᠷ ᠵᠢᠷᠦᠬᠡᠨ ᠡᠪᠡᠳᠴᠢᠨ ᠵᠠᠰᠠᠭᠰᠠᠨ ᠣᠶᠢᠯᠠᠭᠠᠯᠲᠠ ᠪᠠᠨ ᠳᠡᠪᠰᠢᠭᠦᠯᠦᠨ ᠲᠡᠷᠡ ᠦᠬᠦᠯᠡᠯ ᠨᠢ ᠲᠥᠪᠡᠳ᠂ ᠺᠡᠷᠢᠯ᠂ ᠣᠶᠢᠭᠤᠷᠵᠢᠨ ᠦᠰᠦᠭ ᠢᠶᠠᠷ ᠬᠡᠪᠯᠡᠭᠳᠡᠨ ᠲᠠᠷᠬᠠᠭᠠᠭᠳᠠᠵᠠᠢ᠃ ᠲᠡᠷᠡ ᠮᠠᠨᠢ ᠰᠢᠨ᠎ᠡ ᠳᠡᠭᠲᠡᠷ ᠲᠡᠰᠢ ᠰᠢᠵᠠᠭᠤᠷᠯᠠᠨ ᠪᠦᠭᠡᠲᠡᠯ᠎ᠡ ᠶᠣᠷᠵᠤᠭᠲᠣ ᠲᠠᠯ᠎ᠠ ᠰᠠ ᠶᠠᠭᠤ ᠶᠦᠨᠦᠭ ᠦᠭᠡᠢ ᠳᠠᠭᠠᠷᠢᠵᠠᠢ᠃ ᠬᠡᠴᠢᠨᠡᠨ ᠡᠳᠦᠷ ᠮᠡᠳᠡᠭᠡ ᠰᠡᠭᠡᠭᠡ ᠦᠭᠡᠢ ᠪᠠᠨ ᠡᠮᠨᠡᠯᠭᠡ ᠶᠢᠨ ᠷᠢᠳᠢ᠂ ᠦᠪᠡᠷ ᠤᠨ ᠴᠢᠨᠰᠠᠭ᠎ᠠ ᠪᠠᠷ ᠡᠷᠯᠢᠭ ᠤᠨ ᠡᠯᠴᠢ ᠶᠢᠨ ᠡᠷᠢᠶᠡᠨ ᠴᠠᠯᠠᠮ᠎ᠠ ᠶᠢ ᠲᠠᠰᠣᠳᠠᠨ ᠠᠯᠳᠠᠨ ᠠᠶᠠᠭᠠᠨ ᠠᠴᠠ ᠤᠰᠤ ᠣᠣᠭᠤᠬᠤ ᠬᠤᠪᠢ ᠲᠦᠭᠡᠷᠭᠡ ᠪᠠᠨ ᠠᠬᠢᠨ ᠡᠳ᠋ᠯᠡᠭᠰᠡᠨ᠃ ᠲᠡᠭᠡᠭᠡᠳ ᠨᠡᠯᠢᠶᠡᠳ ᠡᠷᠡᠭᠦᠯᠵᠡᠩᠭᠦᠲᠡ ᠬᠢᠵᠢᠭ ᠤᠨ ᠡᠵᠡᠨ ᠯᠦᠭᠡ ᠦᠵᠡᠯᠴᠡᠳᠡᠭ ᠨᠦᠭᠦᠭᠡ ᠯᠡ ᠤᠷ᠎ᠠ ᠠᠪᠲᠠᠯ ᠢᠶᠠᠷ ᠡᠪᠡᠳᠴᠢᠨ ᠡᠮᠵᠡᠭᠳᠡᠨ ᠢ ᠵᠠᠰᠠᠨ ᠠᠮᠢ ᠨᠠᠰᠣᠨ ᠤ ᠭᠢᠯᠪᠠᠭ᠎ᠠ ᠪᠠᠨ ᠪᠠᠳᠠᠷᠠᠭᠤᠯᠠᠬᠤᠨ᠎ᠠ ᠠᠴᠢᠲᠣ ᠪᠠᠭᠰᠢ ᠭᠠᠯᠰᠠᠩ ᠤᠨ ᠢᠶᠠᠨ ᠠᠴᠢ ᠡᠨᠡᠷᠢᠯ ᠬᠡᠮᠡᠨ ᠪᠦᠯᠢ ᠶᠢᠨ ᠢᠶᠠᠨ ᠭᠤᠷᠪᠠᠨ ᠦᠶ᠎ᠡ ᠶᠢᠨ ᠠᠷᠪᠠᠨ ᠲᠠᠪᠤᠭᠤᠯᠠ ᠶᠢ ᠳᠠᠭᠠᠭᠤᠯᠣᠨ ᠪᠤᠷᠬᠠᠨ ᠤ ᠣᠷᠣᠨ ᠭᠦᠮᠪᠦᠮ ᠬᠦᠷᠴᠦ ᠷᠠᠪᠵᠠᠮᠪᠠ ᠶᠢᠨ ᠴᠢᠨᠳᠠᠷ ᠤᠨ ᠰᠣᠪᠣᠷᠭ᠎ᠠ ᠳᠤ ᠲᠠᠬᠢᠯᠭ᠎ᠠ ᠡᠷᠭᠦᠨ ᠦᠷ᠎ᠡ ᠬᠤᠶᠢᠴᠢᠰ ᠢᠶᠠᠨ ᠡᠪᠦᠭᠡ ᠪᠠᠭᠰᠢ ᠶᠢᠨ ᠢᠶᠠᠨ ᠰᠣᠷᠭᠠᠮᠵᠢᠯᠠᠯ ᠢ ᠶᠣᠰᠣᠴᠢᠯᠠᠰᠣᠭᠠᠢ ᠬᠡᠮᠡᠨ ᠬᠠᠲᠠᠭᠤᠬᠠᠨ ᠵᠠᠬᠢᠮᠵᠢᠯᠠᠪᠠᠢ᠃ ᠮᠦᠨ ᠪᠠᠭᠰᠢ ᠶᠢᠨ ᠰᠣᠪᠣᠷᠭ᠎ᠠ ᠴᠣᠭᠴᠠᠯᠠᠭᠠᠷ᠎ᠠ ᠮᠡᠷᠭᠡᠨ ᠭᠡᠭᠡᠨᠲᠡᠳ ᠤᠨ ᠦᠨᠡᠯᠡᠯ ᠵᠣᠷᠢᠭᠵᠢᠭᠤᠯᠤᠯ ᠢ ᠤᠯᠵᠠᠢ᠃ ᠬᠤᠶᠢᠨ᠎ᠠ ᠨᠢ ᠳᠡᠨᠳᠡᠴᠡ ᠰᠣᠪᠣᠷᠭ᠎ᠠ ᠳᠤ ᠲᠦᠰᠦᠭᠡᠲᠡᠢ ᠮᠠᠮᠠᠲᠠᠨ ᠢ ᠲᠣᠮᠢᠯᠠᠨ ᠵᠢᠷᠤᠵᠤ ᠲᠦᠯᠦᠪᠯᠡᠨ ᠵᠢᠯᠤᠭᠤᠳᠤᠭᠤᠯᠪᠠ ᠭᠡᠨ᠎ᠡ᠃      ᠪᠢ ᠪᠤᠳᠣᠯ ᠤᠨ ᠵᠢᠯᠣᠭᠤ ᠪᠠᠨ ᠲᠠᠳᠠᠰᠬᠢᠨ ᠵᠡᠬᠦᠨ ᠬᠤᠶᠢᠰᠢ ᠬᠠᠷᠠᠬᠤᠨ᠎ᠠ᠂ ᠦ ᠳ᠋ᠠ᠂ ᠵᠣᠷᠢᠭ᠎ᠠ ᠰᠣᠪᠣᠷᠭ᠎ᠠ ᠴᠢᠨᠢ ᠮᠦᠨᠦᠬᠡᠨ᠎ᠡ ᠬᠡᠮᠡᠨ ᠠᠷᠰᠯᠠᠨ ᠠᠭᠤᠯᠠ ᠪᠤᠭᠤᠷᠤᠯ ᠰᠠᠬᠠᠯ ᠳᠣᠲᠣᠷ᠎ᠠ ᠪᠠᠨ ᠮᠦᠰᠢᠶᠡᠯ ᠲᠣᠳᠣᠷᠠᠭᠤᠯᠣᠨ ᠲᠡᠷᠢᠬᠦᠨ ᠲᠤᠬᠢᠭ᠎ᠠ ᠰᠠᠨᠠᠭᠳᠠᠯ᠎ᠠ᠃ ᠲᠡᠷᠭᠡ ᠪᠠᠶᠢᠭᠠᠯ ᠠᠶᠢᠯ ᠢ ᠦᠩᠭᠡᠷᠡᠨ ᠶᠠᠯᠢᠬᠦᠢ ᠬᠤᠩᠰᠢᠶᠠᠷ ᠢ ᠣᠷᠢᠶᠠᠩᠭᠤᠲᠠ ᠦᠯᠵᠡᠶᠢᠲᠦ ᠬᠤᠸᠠ ᠶᠢᠨ ᠣᠷᠣᠢ ᠳᠤ ᠪᠤᠰᠬᠠᠭᠳᠠᠭᠰᠠᠨ ᠰᠢᠨ᠎ᠡ ᠰᠣᠪᠣᠷᠭ᠎ᠠ ᠲᠡᠷᠡ ᠲᠣᠭᠤᠷᠢᠮ ᠢ ᠪᠣᠳᠤᠭᠰᠢᠭᠤᠯᠤᠨ ᠲᠠᠩᠰᠤᠭ ᠰᠠᠶᠢᠬᠠᠨ ᠶᠢᠷᠲᠢᠨᠴᠦ ᠶᠢ ᠵᠢᠷᠤᠭᠯᠠᠴᠢᠬᠠᠭᠰᠠᠨ ᠪᠠᠶᠢᠬᠤ ᠦᠭᠡᠢ ᠦᠦ᠂ ᠮᠠᠨᠣᠰ ᠬᠦᠷᠬᠦᠯᠡᠷ ᠮᠠᠰᠢᠨ᠂ ᠮᠣᠲ᠋ᠣᠷ ᠂ ᠳᠤᠭᠤᠶᠢᠲᠠᠳ ᠨᠡᠯᠢᠶᠡᠳ ᠬᠠᠷᠠᠭᠳᠠᠨ᠎ᠠ᠃ ᠮᠠᠨ ᠤ ᠬᠡᠳᠦᠭᠦᠯᠡ ᠪᠠᠷᠢᠨ ᠲᠡᠮᠦᠷ ᠬᠡᠷᠡᠰᠭᠡᠲᠦ ᠬᠦᠷᠢᠶᠡᠨ ᠤ ᠠᠷᠣ ᠡᠭᠦᠳᠡ ᠪᠠᠷ ᠪᠤᠷᠵᠢᠨ ᠬᠠᠪᠲᠠᠰᠣ ᠵᠦᠭᠡᠭᠡᠪᠦᠷᠢᠯᠡᠯ ᠤᠨ ᠬᠤᠪᠬᠢ ᠶᠢ ᠲᠠᠭᠠᠨ ᠦᠭᠡᠳᠡᠯᠡᠬᠦ ᠳᠤ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠨᠢᠯᠵᠠᠷᠠᠭ᠎ᠠ ᠨᠠᠷᠠᠰᠣ ᠮᠦᠩᠬᠡ ᠨᠤᠭᠤᠭᠠᠨ ᠢᠶᠠᠷ ᠢᠨᠢᠶᠡᠮᠰᠦᠭᠯᠡᠨ ᠴᠠᠭᠠᠨ᠎ᠠ ᠠᠴᠠ ᠠᠷᠠᠴᠠ ᠽᠠᠨᠳᠠᠨ ᠤ ᠰᠣᠳᠣᠨ ᠦᠨᠦᠷ ᠰᠡᠩᠭᠢᠨᠡᠨ᠎ᠡ᠃ ᠳᠡᠭᠡᠯᠬᠦᠢ ᠳ᠋ᠠ᠂ ᠰᠣᠪᠣᠷᠭ᠎ᠠ ᠶᠢᠨ ᠡᠵᠡᠨᠲᠡᠢ ᠭᠠᠯᠰᠠᠩ ᠷᠠᠪᠵᠠᠮᠪᠠ ᠶᠢᠨ ᠰᠦᠭ ᠰᠦᠨᠡᠰᠦ ᠰᠠᠭᠠᠭᠳᠠᠴᠢᠬᠠᠭᠰᠠᠨ᠂ ᠲᠡᠶᠢᠨ ᠮᠦᠷᠲᠡᠭᠡᠨ ᠮᠠᠨᠢ ᠮᠢᠭᠰᠦᠮᠲᠣ ᠲᠠᠷᠨᠢᠳᠠᠯ ᠲᠠᠢ ᠬᠤᠶᠢᠨ᠎ᠠ ᠬᠡᠨ ᠪᠦᠬᠦᠨ᠎ᠡ ᠠᠮᠢᠯᠠᠭᠤᠬᠠᠨ ᠰᠠᠨᠠᠭᠳᠠᠨ ᠠᠮᠣᠷᠵᠢᠯ ᠬᠦᠷᠲᠡᠭᠦᠯᠳᠡᠭ ᠨᠢ ᠡ᠃ ᠲᠠᠬᠢᠯᠭᠠᠴᠢᠳ ᠤᠨ ᠵᠠᠷᠢᠮ ᠨᠢ ᠰᠠᠩ ᠤᠩᠭᠠᠰᠬᠠᠯ ᠳᠤ ᠡᠷᠭᠦᠴᠡ ᠪᠠᠷᠢᠴᠠ ᠡᠷᠭᠦᠨ ᠵᠠᠷᠢᠮ ᠨᠢ ᠰᠢᠪᠰᠢᠯ ᠳᠠᠭᠠᠳᠬᠠᠯ ᠬᠢᠨ᠎ᠡ᠃ ᠪᠢ ᠪᠠᠰᠠ ᠬᠢᠴᠢᠶᠡᠩᠭᠦᠶᠢᠯᠡᠨ ᠨᠠᠮᠠᠨᠴᠢᠯᠠᠵᠤ ᠭᠠᠷᠪᠠ᠃ ᠡᠨᠡ ᠬᠠᠮᠢᠶᠠᠲᠠᠢ ᠴᠠᠭᠠᠷᠠᠭᠤᠯᠬᠤᠢ ᠳᠤᠷ ᠮᠢᠨᠤᠬᠢ ᠪᠣᠯ ᠲᠠᠯᠶᠢᠭᠴᠢ ᠶᠢᠨ ᠡᠷᠡᠭᠦᠯ ᠡᠩᠬᠡ ᠡᠮᠨᠡᠯᠭᠡ ᠶᠢᠨ ᠤᠬᠠᠭᠠᠨ᠎ᠠ ᠡᠷᠭᠦᠭᠰᠡᠨ ᠰᠢᠨᠳᠠᠰᠤᠯᠠᠯ᠂ ᠬᠦᠴᠦ ᠬᠦᠯᠦᠰᠦᠨ ᠤ ᠠᠰᠬᠠᠷᠠᠭᠤᠯᠣᠯ ᠤᠨ ᠪᠢᠰᠢᠷᠡᠯ ᠬᠦᠨᠳᠦᠳᠬᠡᠯ ᠠᠴᠠ ᠪᠢᠰᠢ᠂ ᠨᠦᠬᠦᠭᠡ ᠯᠡ ᠴᠠᠭᠠᠰᠣᠨ ᠵᠢᠷᠤᠮᠠᠯ᠂ ᠰᠢᠪᠠᠷ ᠱᠤᠭᠤᠮᠠᠯ ᠳᠤ ᠣᠬᠠᠭᠠᠨ ᠪᠠᠯᠠᠷᠠᠲᠠᠯ᠎ᠠ ᠮᠦᠷᠭᠦᠳᠡᠭ ᠮᠡᠨᠡᠭᠰᠢᠷᠡᠯ ᠪᠢᠰᠢ᠃ ᠨᠡᠩᠳᠡ ︽ᠨᠠᠰᠣᠨ ᠤ ᠵᠠᠶᠠᠭ᠎ᠠ ᠪᠠᠨ ᠨᠠᠶᠢᠷᠠᠯᠲᠤ ᠨᠠᠶᠢᠷᠠᠮᠳᠠᠭᠤ ᠳᠤ ᠳᠠᠭᠠᠳᠬᠠᠨ᠂ ᠨᠠᠷᠢᠯᠠᠵᠤ ᠭᠠᠮᠨᠠᠭᠰᠠᠨ ᠢᠶᠠᠨ ᠤᠷᠬᠢᠮᠵᠢ ᠶᠢᠨ ᠬᠤᠷᠮᠤᠢ ᠳᠤ ᠡᠷᠭᠦᠳᠡᠭ︾ ᠪᠠᠯᠠᠶᠢᠷᠠᠯ ᠠᠴᠠ ᠦᠰᠦᠳ ᠣᠨᠳᠣᠣ᠃ ᠢᠩᠬᠢᠨ ᠬᠡᠯᠡᠬᠦ ᠶᠢ ᠲᠡᠳᠡᠭᠡᠷ ᠬᠦᠮᠦᠰ ᠢ ᠬᠥᠯ ᠳᠣᠣᠷ᠎ᠠ ᠪᠠᠨ ᠮᠦᠷᠭᠦᠭᠦᠯᠦᠨ ᠠᠳᠢᠰ ᠬᠦᠷᠲᠡᠭᠦᠯᠳᠡᠭ ᠮᠢᠨᠳᠠᠭᠲᠠᠳ ᠪᠤᠯᠤᠨ ᠮᠦᠷᠭᠦᠨ ᠰᠦᠭᠦᠳᠦᠭᠴᠢᠳ ᠢᠶᠠᠷ ᠶᠠᠮᠠᠷᠬᠠᠨ ᠡᠯᠳᠡᠪ ᠲᠤ ᠳᠤᠷᠠᠲᠠᠢ ᠬᠤᠲᠤᠭᠴᠢᠨ ᠭᠡᠵᠦ ᠰᠦᠰᠦ ᠪᠤᠴᠠᠯᠤᠨ ᠮᠡᠳᠡᠬᠦ ᠶᠤᠮ᠃ ᠮᠠᠨ ᠤ ᠤᠭᠰᠠᠭᠠᠲᠠᠨ ᠦᠩᠭᠡᠷᠡᠨ ᠤᠳᠤᠭᠰᠠᠨ ᠬᠡᠳᠦᠨ ᠵᠠᠭᠤᠭᠠᠳ ᠲᠤ ᠪᠣᠷᠬᠠᠨ ᠪᠣᠷᠬᠠᠨ ᠭᠡᠵᠦ ᠪᠤᠨᠲᠤᠭᠤᠷ ᠢᠶᠠᠨ ᠪᠣᠶᠣᠣᠲᠠᠲᠠᠯ᠎ᠠ ᠮᠦᠷᠭᠦᠭᠡᠳ ᠪᠦᠲᠦᠭᠰᠡᠨ ᠨᠢ ᠶᠠᠭᠤ︕ ᠮᠤᠩᠬᠠᠷᠠᠯ ᠮᠡᠨᠡᠭᠰᠢᠷᠡᠯ᠃ ᠪᠤᠷᠪᠢ ᠪᠠᠨ ᠬᠤᠯᠭᠤᠲᠠᠯ᠎ᠠ ᠰᠤᠳᠣᠷ ᠡᠭᠦᠷᠦᠨ ᠭᠤᠷᠢᠶ᠎ᠠ ᠡᠷᠭᠢᠭᠡᠳ ᠬᠦᠷᠲᠡᠭᠰᠡᠨ ᠨᠢ ᠶᠠᠭᠤ︕ ᠪᠠᠭᠤᠷᠠᠯ ᠳᠣᠷᠤᠶᠢᠲᠠᠯ᠃ ᠡᠷᠡᠨ ᠴᠠᠭ ᠤᠨ ︽ᠰᠢᠨ᠎ᠡ ᠬᠠᠭᠤᠴᠢᠨᠬᠦᠦ︾ ᠶᠢ ᠣᠶᠢᠯᠠᠭᠠᠨ ᠶᠠᠳᠠᠨ᠎ᠠ ᠡ᠃ ᠱᠠᠰᠢᠨ ᠰᠢᠲᠦᠭᠡᠨ ᠡᠷᠬᠡ ᠴᠢᠯᠦᠭᠡ ᠲᠠᠢ ᠴᠤ ᠲᠡᠭᠦᠨ ᠤ ᠬᠡᠷᠡᠭ ᠲᠠᠢ ᠵᠦᠢᠯᠡᠰ ᠢᠶᠠᠷ ᠦᠪᠡᠷ ᠢ ᠪᠠᠨ ᠲᠡᠭᠦᠰ ᠲᠡᠭᠦᠯᠳᠡᠷᠵᠢᠬᠦᠯᠬᠦ ᠨᠢ ᠵᠦᠢ᠂ ᠬᠡᠷᠡᠭ ᠦᠭᠡᠢ ᠶᠠᠭᠤᠮᠠᠰ ᠢᠶᠠᠷ ᠨᠢ ᠴᠢᠨᠠᠭᠰᠢᠯᠠᠭᠠᠳ ᠬᠤᠤᠷᠲᠠᠢ ᠵᠦᠢᠯᠡᠰ ᠢ ᠲᠠᠶᠠᠭᠳᠠᠵᠣ ᠲᠠᠭᠠᠷᠠᠨ᠎ᠠ᠃ ᠡᠳᠦᠢ ᠳᠤ ᠶᠡᠭᠡ ᠪᠣᠳᠣᠯᠭᠠᠲᠠᠨ ᠢᠨᠵᠠᠨᠨᠠᠰᠢ ᠶᠢᠨ ︽ᠮᠣᠩᠭᠤᠯᠴᠣᠳ ᠪᠤᠷᠬᠠᠨ ᠪᠣᠯᠬᠤ ᠶᠢ ᠬᠦᠰᠡᠭᠰᠡᠭᠡᠷ ᠪᠤᠬᠤᠷ ᠪᠣᠯᠪᠠᠢ︾ ᠬᠡᠮᠡᠭᠰᠡᠨ ᠮᠡᠷᠭᠡᠨ ᠦᠭᠦᠯᠡᠯᠲᠡ ᠶᠢ ᠨᠤᠬᠤᠴᠠᠬᠠᠨ ᠲᠠᠪᠲᠠᠯᠲᠠᠢ ᠠᠵᠢᠶᠠᠨᠠᠮ᠃      ᠪᠢ ᠶᠣᠰᠣ ᠨᠠᠮᠠᠨᠴᠢᠯᠠᠯ ᠢᠶᠠᠨ ᠭᠦᠢᠴᠡᠳᠬᠡᠩᠭᠦᠲᠡ ᠴᠢᠯᠠᠭᠤᠨ ᠢᠨᠳᠡᠷ ᠦᠭᠰᠦᠨ ᠣᠲᠠᠴᠢ ᠶᠢᠨ ᠰᠡᠶᠢᠯᠦᠮᠡᠯ ᠰᠢᠬᠢᠳᠬᠡᠷᠲᠦ ᠲᠤᠪᠴᠢ ᠲᠠᠨᠢᠯᠴᠠᠭᠤᠯᠭ᠎ᠠ ᠶᠢ ᠭᠦᠶᠦᠯᠭᠡᠨ ᠣᠩᠰᠢᠭᠠᠳ ᠱᠠᠯᠠᠮ ᠲᠤᠲᠤᠭᠰᠢᠯᠠᠵᠤ ᠰᠣᠪᠣᠷᠭ᠎ᠠ ᠶᠢ ᠨᠠᠷᠠᠨ ᠡᠷᠬᠢᠯᠲᠡ ᠪᠠᠷ ᠡᠷᠬᠢᠨ ᠦᠶᠡᠯᠡᠯ ᠪᠤᠯᠭᠠᠨ ᠢ ᠠᠵᠢᠨ ᠡᠭᠴᠡᠯᠡᠪᠡᠯ ᠭᠤᠤᠯ ᠣᠷᠣᠢ ᠶᠢᠨ ᠴᠢᠮᠡᠭ ᠨᠢ ᠰᠦᠮ᠎ᠡ ᠳᠣᠭᠠᠩ ᠤᠨ ᠭᠠᠨᠵᠢᠷ᠎ᠠ ᠯᠤᠭ᠎ᠠ ᠳᠠᠭᠠᠷᠠᠬᠤ ᠦᠭᠡᠢ ︽ᠨᠠᠷᠠᠨ ᠰᠠᠷᠠᠨ ᠣᠷᠣᠢ ᠶᠢᠨ ᠴᠢᠮᠡᠭ︾ ᠢᠶᠠᠷ ᠵᠤᠬᠢᠶᠠᠮᠵᠢᠯᠠᠭᠳᠠᠵᠠᠢ᠃ ᠡᠨᠡ ᠰᠣᠪᠣᠷᠭ᠎ᠠ ᠭᠡᠳᠦᠨ ᠵᠠᠭᠤᠨ ᠵᠢᠯ ᠤᠨ ᠳᠠᠷᠠᠭᠠᠬᠢ ᠦᠨᠦᠳᠦᠷ᠂ ᠦᠭᠡᠷ᠎ᠡ ᠪᠠᠷ ᠬᠡᠯᠡᠬᠦᠨ᠎ᠡ ᠠᠷᠣ ᠬᠤᠷᠴᠢᠨ ᠬᠤᠰᠢᠭᠤ ᠪᠦᠷᠢᠯᠳᠦᠨ ᠳᠣᠭᠲᠠᠭᠰᠠᠨ ᠠᠴᠠ ᠠᠪᠤᠭᠠᠳ ᠬᠤᠪᠢ ᠬᠦᠮᠦᠨ ᠪᠤᠰᠬᠠᠭᠰᠠᠨ᠂ ᠨᠡᠩ ᠳᠣᠳᠣᠷᠠᠭᠤᠯᠬᠤ ᠳᠤ ᠣᠳᠣ ᠡᠷᠡᠨ ᠤ ᠰᠣᠶᠣᠯ ᠠᠪᠣᠷᠠᠯ ᠤᠨ ᠪᠡᠯᠭᠡ ᠳᠡᠮᠳᠡᠭ᠂ ᠣᠰᠠᠳᠣᠯ ᠰᠡᠷᠭᠦᠯ ᠤᠨ ᠵᠠᠭᠠᠭᠯᠠᠯ᠂ ᠲᠡᠳᠡᠭᠡᠷ ᠪᠤᠭᠤᠷᠤᠯ ᠲᠡᠦᠬᠡ ᠠᠴᠢᠶᠠᠯᠠᠭᠰᠠᠨ ᠰᠣᠪᠣᠷᠭ᠎ᠠ ᠨᠤᠭᠤᠳ ᠲᠠᠢ ᠰᠠᠴᠠᠭᠤᠬᠠᠨ ᠣᠷᠣᠨ ᠪᠠᠶᠢᠷᠢ ᠡᠵᠡᠯᠡᠬᠦ ᠣᠴᠢᠷᠲᠠᠢ ᠭᠡᠬᠦ ᠠᠴᠠ ᠰᠡᠷᠡᠩ ᠡᠮᠴᠢ ᠳᠤ ᠡᠷᠡᠬᠡᠢ ᠭᠠᠷᠭᠠᠴᠢᠬᠠᠭᠰᠠᠨ᠂ ᠬᠠᠷᠠᠬᠠᠳᠠ ᠶᠢᠨ ᠡᠨᠡᠬᠦ ᠦᠭᠯᠢᠭᠡᠲᠦ ᠨᠤᠲᠤᠭ ᠣᠬᠠᠭᠠᠨᠳᠣ ᠬᠦᠦ ᠲᠦᠷᠦᠭᠦᠯᠵᠡᠢ ᠶᠡᠷᠦ ᠨᠢ᠃ ᠪᠢ ᠡᠶᠢᠨᠬᠦ ᠰᠡᠳᠬᠢᠯ ᠤᠨ ᠬᠠᠨᠠᠭᠠᠷᠳᠠᠯ ᠢᠶᠠᠷ ᠳᠦᠷᠪᠡᠨ ᠲᠡᠰᠢ ᠬᠠᠷᠠᠭ᠎ᠠ ᠪᠡᠯᠴᠢᠭᠡᠬᠦᠨ᠎ᠡ ᠦᠯᠵᠡᠶᠢᠲᠦ ᠬᠤᠸᠠ ᠠᠷᠰᠯᠠᠨ ᠠᠭᠤᠯᠠ ᠶᠢ ᠲᠦᠰᠢᠨ᠂ ᠪᠠᠷᠠᠭᠤᠨ ᠬᠤᠯᠪᠤᠭ᠎ᠠ ᠶᠢ ᠬᠠᠷᠠᠭᠠᠰᠣᠯᠠᠨ᠂ ᠬᠠᠷᠠᠬᠠᠳᠠ ᠪᠠᠷ ᠬᠠᠯᠬᠠᠪᠴᠢᠯᠠᠨ᠂ ᠤᠣ ᠮᠦᠷᠡᠨ ᠢ ᠢᠰᠭᠦᠯᠵᠡᠢ᠃ ᠠᠳᠡ ᠭᠠᠯᠰᠠᠩ ᠯᠠᠮᠪᠤᠭᠠᠢ ᠶᠢᠨ ᠠᠷᠢᠭᠤᠨ ᠰᠦᠨᠡᠰᠦ ᠶᠢᠨ ᠰᠠᠭᠠᠲᠠᠯ᠂ ᠱᠠᠪᠢ ᠰᠡᠷᠡᠩ ᠤᠨ ᠬᠢᠨ ᠠᠷᠣᠣᠬᠠᠨ ᠪᠤᠳᠣᠮᠣᠭᠯᠠᠯ ᠢ ᠬᠦᠯᠢᠶᠡᠪᠡ ᠭᠡᠵᠦ ᠠᠷᠭ᠎ᠠ ᠦᠭᠡᠢ ᠯᠡ ᠪᠤᠳᠣᠭᠳᠠᠭᠤᠯᠣᠨ᠎ᠠ᠃ ᠡᠪᠦᠭᠡᠨ ᠪᠢ ᠰᠠᠶ᠋ᠢᠬᠢ ᠠᠵᠢᠭᠯᠠᠯᠲᠠ ᠳᠠᠭᠠᠨ ᠬᠠᠨᠠᠭᠠᠷᠲᠠᠴᠢᠬᠠᠭᠰᠠᠨ ᠠᠬᠢᠨ ᠬᠠᠷᠠᠭ᠎ᠠ ᠬᠤᠯᠠᠳᠬᠠᠬᠤᠨ᠎ᠠ ᠲᠡᠷᠡ ᠵᠡᠬᠦᠨ ᠬᠤᠶᠢᠨ᠎ᠠ ᠡᠩᠭᠡᠷ ᠬᠤᠷᠮᠤᠢ ᠪᠠᠷ ᠨᠢ ᠴᠠᠭᠠᠨ ᠡᠭᠦᠯᠡᠰ ᠨᠡᠭᠦᠳᠡᠯᠯᠡᠨ ᠣᠷᠣᠢ ᠠᠰᠬ᠎ᠠ ᠶᠦᠭᠡᠨ ᠭᠠᠶᠢᠬᠠᠭᠤᠯᠣᠭᠰᠠᠨ ᠰᠢᠷᠠᠠᠦ᠋ᠨᠳᠦᠷ ᠬᠠᠶᠢᠷᠬᠠᠨ ︵ᠠᠷᠣ ᠬᠤᠷᠴᠢᠨ ᠲᠦᠷᠦᠭᠦᠨ ᠵᠠᠰᠠᠭᠲᠠᠳ ᠤᠨ ᠲᠠᠬᠢᠯᠭᠠᠲᠣ ᠠᠭᠤᠯᠠ︶᠂ ᠳᠡᠭᠦᠨ ᠠᠴᠠ ᠪᠠᠷᠠᠭᠤᠨ ᠣᠷᠤᠭᠰᠢ ᠭᠤᠵᠤᠩ ᠱᠣᠷᠤᠩ ᠱᠣᠪᠬᠤᠯᠠᠨ᠂ ᠪᠠᠷᠠᠭᠤᠨᠰᠢᠯᠠᠨ ᠪᠠᠶᠠᠨᠪᠤᠷᠠᠯᠵᠢ ᠬᠠᠨ ︵ᠰᠡᠭᠦᠯ ᠤᠨ ᠵᠠᠰᠠᠭᠳᠠᠳ ᠤᠨ ᠳᠠᠬᠢᠯᠭᠠᠳᠤ ᠠᠭᠤᠯᠠ︶᠂ ᠡᠨᠡ ᠬᠠᠨ ᠤ ᠡᠩᠭᠡᠷ ᠲᠠᠬᠢ ᠵᠦᠬᠢᠨᠬᠤᠳᠳᠤᠭ ᠠᠶᠢᠯ ᠪᠤᠯ ᠮᠢᠨᠤ ᠨᠢᠯᠬ᠎ᠠ ᠳᠠᠭᠤ ᠪᠠᠨ ᠠᠩᠬᠠᠯᠠᠭᠰᠠᠨ ᠬᠠᠯᠠᠭᠤᠨ ᠦᠯᠦᠭᠡᠢ ᠪᠤᠶᠤ᠃ ᠪᠠᠷᠠᠭᠤᠨᠰᠢᠯᠠᠪᠠᠯ ᠪᠠᠭᠠᠷᠢᠨ ᠠᠷᠤ ᠬᠤᠷᠴᠢᠨ ᠢ ᠵᠠᠭᠠᠭᠯᠠᠭᠰᠠᠨ ᠪᠦᠷᠬᠦᠭᠡᠰᠦᠳᠦ ᠬᠠᠨ ᠠᠭᠤᠯᠠ᠂ ᠨᠠᠭᠠᠰᠢᠯᠠᠭᠠᠳ ᠪᠠᠷᠳᠠᠭᠠᠳᠤ ᠤᠯᠠᠭᠠᠨ ᠤᠩᠬᠢ ᠠᠭᠤᠯᠠ᠂ ᠵᠡᠭᠦᠨ ᠤᠷᠢᠳᠠᠢ ᠨᠢ ᠬᠦᠯ ᠤᠨ ᠱᠤᠷᠤᠩ ᠪᠠ ᠵᠡᠭᠦᠨ ᠡᠮᠦᠨᠡᠰᠢᠯᠡᠨ ᠳᠤᠯᠤᠳᠤᠭᠠᠷ ᠵᠠᠰᠠᠭ ᠳᠠᠭᠳᠠᠨᠸᠠᠩᠴᠤᠭ ᠪᠠᠷᠰ ᠠᠪᠠᠯᠠᠨ ᠤᠳᠤᠭ᠎ᠠ ᠪᠠᠨ ᠭᠡᠭᠡᠭᠰᠡᠨ ᠤᠳᠤᠭ᠎ᠠ ᠠᠭᠤᠯᠠ᠂ ᠵᠡᠭᠦᠨᠳᠠᠢ ᠨᠢ ᠪᠠᠷᠠᠭᠤᠨ ᠬᠤᠯᠪᠤᠭ᠎ᠠ ᠁ ᠡᠨᠡ ᠰᠠᠶᠢᠬᠠᠨ ᠬᠠᠨ ᠬᠠᠶᠢᠷᠬᠠᠳ ᠪᠤᠯ ᠪᠠᠭ᠎ᠠ ᠬᠢᠩᠭᠠᠨ ᠤ ᠡᠨᠡ ᠬᠡᠰᠡᠭ ᠳᠤ ᠰᠡᠵᠢᠭᠦᠷᠯᠡᠨ ᠰᠠᠯᠪᠤᠷᠢᠯᠠᠭᠰᠠᠨ ᠠᠭᠤᠯᠠᠰ ᠪᠤᠯᠬᠤ ᠪᠠ ᠡᠳᠡᠭᠡᠷ ᠤᠨ ᠬᠤᠶᠠᠷ ᠬᠠᠨ ᠨᠢ ᠬᠤᠰᠢᠭᠤᠨ ᠳᠠᠬᠢᠯᠭᠠᠳᠤ ᠭᠠᠵᠠᠷ᠃ ᠦᠯᠵᠡᠶᠢᠳᠦ ᠬᠤᠸᠠ ᠡᠳᠡᠭᠡᠷ ᠠᠭᠤᠯᠠᠰ ᠢ ᠲᠦᠪᠯᠡᠭᠡ ᠬᠡᠮᠡᠷᠭᠡᠨ ᠲᠤᠭᠳᠠᠭᠰᠠᠨ ᠪᠤᠯᠬᠤᠨ᠎ᠠ ᠳᠡᠶᠢᠮᠦ ᠰᠠᠶᠢᠬᠠᠨ ᠨᠡᠷᠡᠯᠡᠭᠳᠡᠭᠰᠡᠨ ᠠᠵᠤᠭᠤ᠃ ᠡᠨᠡ ᠬᠡᠶᠢᠮᠦᠷᠢᠳᠦ ᠨᠤᠳᠤᠭ ᠤᠨ ᠡᠷᠳᠡᠨ ᠢ ᠮᠡᠳᠡᠬᠦ ᠦᠭᠡᠢ᠂ ᠤᠳᠤ ᠦᠶ᠎ᠡ ᠳᠤ ᠡᠮᠴᠢ ᠳᠣᠮᠴᠢ ᠴᠦᠭᠡᠨ ᠦᠭᠡᠢ᠂ ᠳᠡᠳᠡᠨᠦᠰ ᠠᠴᠠ ᠰᠢᠪᠠᠷᠳᠠᠢ ᠶᠢᠨ ᠪᠤᠷᠤ ᠮᠤᠷᠢᠳᠦ ᠪᠤᠶᠠᠨᠳᠠᠯᠠᠢ ︵ᠠᠤᠬᠠᠨ ᠨᠤᠳᠤᠭᠳᠠᠨ︶ ᠨᠢᠭᠡᠨ ᠬᠤᠭᠤᠴᠠᠭ᠎ᠠ ᠣᠳᠣᠲᠠᠢ ᠭᠢᠯᠠᠰᠬᠠᠭᠰᠠᠨ ᠷᠢᠳᠢ ᠰᠢᠳᠢᠳᠡᠨ᠃ ᠳᠠᠷᠠᠭᠠᠯᠠᠪᠠᠯ ᠭᠠᠯᠰᠠᠩ ᠤᠳᠠᠴᠢ ᠂ ᠭᠠᠷ ᠱᠠᠪᠢ ᠰᠠᠷᠠᠩ ᠢ ᠳᠤᠷᠠᠳᠤᠯᠳᠠᠢ᠃ ᠡᠨᠡ ᠳᠠᠰᠢᠷᠠᠮ ᠳᠤ ᠦᠯᠵᠡᠶᠢᠳᠦ ᠤᠷᠤᠨ ᠤ ᠪᠠᠶᠠᠨᠬᠤᠸᠠᠴᠤᠳ ᠠᠴᠠ ᠦᠰᠦᠭᠡᠢ ᠵᠠᠯᠭᠠᠭᠰᠠᠨ ᠡᠮᠴᠢᠳ ᠤᠯᠠᠨ ᠭᠠᠷᠤᠭᠠᠰᠠᠢ ᠬᠡᠮᠡᠨ ᠰᠡᠳᠬᠢᠯ ᠤᠨ ᠳᠡᠭᠷᠢ ᠳᠡᠭᠡᠨ ᠳᠠᠭᠠᠳᠬᠠᠪᠠᠢ᠃      ᠪᠢ ᠡᠨᠡ ᠤᠳᠠᠭ᠎ᠠ ᠴᠢᠪᠠᠭ᠎ᠠ ᠠᠴᠠ ᠨᠠᠭᠠᠰᠢᠯᠠᠬᠤᠨ᠎ᠠ ᠰᠢᠨ᠎ᠡ ᠰᠤᠪᠤᠷᠭ᠎ᠠ ᠶᠢᠨ ᠰᠤᠨᠢᠷᠬᠠᠯ ᠠᠴᠠ ᠪᠤᠰᠤ ᠡᠶᠢᠨ ᠳᠡᠶᠢᠨ ᠳᠡᠮᠡᠢ ᠶᠠᠭᠤᠮ᠎ᠠ ᠪᠤᠳᠤᠯᠬᠢᠯᠠᠭ᠎ᠠ ᠦᠭᠡᠢ᠃ ᠳᠡᠭᠡᠳᠡᠯ᠎ᠡ ᠰᠠᠶ᠋ᠢᠬᠢ ᠰᠤᠪᠤᠷᠭᠠᠨ ᠰᠡᠳᠬᠢᠭᠳᠡᠬᠦᠨ ᠵᠢᠴᠢ ᠰᠡᠷᠡᠩ ᠭᠤᠸᠠᠢ ᠶᠢᠨ ᠢᠨᠳᠡᠷ ᠪᠤᠶᠤ ᠳᠡᠷᠭᠡᠨ ᠳᠤ  ᠲᠦᠰᠢᠭᠡ ᠲᠠᠢ᠂ ᠳᠠᠶᠠᠭ ᠲᠠᠢ ᠳᠠᠬᠢᠯᠭ᠎ᠠ ᠪᠠᠨ ᠬᠡᠰᠡᠨ ᠭᠠᠭᠴᠠᠮᠤᠰᠤᠨ ᠰᠦᠰᠦᠯᠡᠯ ᠳᠤ ᠢᠭᠳᠦᠯᠵᠦ᠂ ᠡᠨᠡ ᠰᠤᠨᠢᠨ ᠤᠳᠤᠳᠠᠢ ᠯᠡ ᠬᠡᠮᠡᠨ ᠨᠢᠭᠡ ᠶᠡᠭᠡ ᠭᠠᠶᠢᠬᠠᠰᠢᠷᠠᠨ ᠳᠡᠭᠦᠨ ᠢ ᠲᠠᠪᠲᠠᠨ ᠳᠠᠨᠢᠬᠤ ᠴᠢᠬᠤᠯᠠᠳᠠᠢ᠂ ᠳᠠᠪᠳᠠᠨ ᠪᠢᠴᠢᠭᠦᠰᠢᠳᠠᠢ ᠭᠡᠰᠡᠨ ᠬᠠᠯᠠᠭᠤᠨ ᠤᠷᠤᠰᠬᠠᠯ ᠨᠢᠯᠭᠢᠪᠡ᠃ ᠡᠶᠢᠨᠬᠦ ᠰᠤᠴᠢᠭᠤᠬᠠᠨ ᠬᠠᠷᠪᠤᠨ ᠢᠷᠡᠭᠰᠡᠨ ᠪᠤᠳᠤᠯ ᠲᠠᠢ ᠵᠡᠷᠭᠡᠴᠡᠨ ᠬᠤᠷᠢᠭᠠᠳ ᠵᠢᠯ ᠤᠨ ᠡᠮᠦᠨ᠎ᠡ ᠰᠡᠷᠡᠩ ᠪᠤᠯᠤᠨ ᠪᠠᠭᠰᠢᠳᠠᠨ ᠳᠤᠨᠢ ᠵᠤᠷᠢᠭᠤᠯᠤᠭᠰᠠᠨ ᠪᠢᠴᠢᠭᠯᠡᠬᠦᠢ ᠴᠦ ᠪᠦᠷᠳᠦᠯᠵᠡᠪᠡ᠃ ᠪᠢ ᠶᠡᠷᠦ ᠨᠢ ︽ᠭᠤᠤᠯ ᠤᠨ ᠤᠰᠤ ᠶᠢ ᠭᠤᠷᠪᠠᠨᠳᠠ ᠤᠤᠭᠤᠪᠠᠯ ᠭᠠᠰᠢᠭᠤᠨ᠂ ᠦᠭᠡ ᠶᠢ ᠭᠤᠷᠪᠠᠨᠳᠠ ᠳᠠᠪᠳᠠᠪᠠᠯ ᠠᠮᠳᠠ ᠦᠭᠡᠢ ᠬᠡᠮᠡᠭᠰᠡᠨ︾ ᠰᠡᠴᠡᠡᠯᠢᠭ ᠦᠭᠦᠯᠡᠯᠳᠡ ᠢ ᠡᠷᠬᠢᠮᠨᠡᠭᠴᠢ᠃ ᠤᠳᠤ ᠬᠠᠷᠢᠨ ᠦᠪᠡᠷ ᠤᠨ ᠬᠡᠮᠡᠭᠰᠡᠨ ᠵᠢᠷᠦᠮᠯᠡᠯ ᠁ ᠶᠠᠭᠤ ᠠᠳᠤᠭᠠᠢ᠂ ᠡᠶᠢᠮᠦᠷᠬᠦᠦ ᠬᠤᠪᠤᠷᠬᠠᠨ ᠤᠴᠠᠷᠠᠯ ᠠᠬᠤᠢ ᠳᠤ ᠬᠡᠳᠦᠨ ᠮᠦᠷ ᠡᠪᠯᠡᠭᠦᠯᠬᠦ ᠦᠭᠡᠢ ᠪᠤᠯᠬᠤᠢ ᠳᠤᠷ ᠬᠡᠨ ᠠᠯᠢᠨ ᠳᠤ ᠴᠠᠯᠠᠭᠠᠶᠢᠳᠠᠨ ᠡᠬᠡ ᠰᠤᠶᠤᠯ  ᠤᠨ ᠬᠠᠷᠠᠮᠰᠠᠩᠨᠠᠯ ᠪᠤᠯᠭᠤᠵᠠᠢ᠃ ᠡᠶᠢᠨᠬᠦ ᠲᠦᠷᠦᠭᠳᠡᠬᠦᠨ ᠢᠶᠠᠷ ᠢᠨᠳᠡᠷ ᠠᠴᠠ ᠲᠠᠶᠠᠭᠯᠠᠨ ᠪᠠᠭᠤᠬᠤ ᠳᠤ ᠰᠤᠪᠤᠷᠭ᠎ᠠ  ᠶᠢᠨ ᠢᠶᠠᠨ ᠵᠡᠭᠦᠨ ᠡᠮᠦᠨ᠎ᠡ ᠲᠦᠰᠦᠷ ᠤᠳᠠᠴᠢ ᠰᠠᠷᠡᠩ ᠪᠦᠰᠡᠭᠦᠢ ᠠᠨᠠᠷ ᠲᠠᠢ ᠪᠠᠨ ᠮᠤᠩᠭᠤᠯ ᠵᠠᠰᠠᠯ ᠢᠶᠠᠷ ᠳᠠᠬᠢᠯᠭ᠎ᠠ  ᠶᠢᠨ ᠳᠤᠷᠠᠰᠬᠠᠯ ᠳᠠᠳᠠᠭᠤᠯᠤᠭ᠎ᠠ ᠨᠢ ᠠᠳᠡᠪᠡᠰᠢ ᠭᠤᠴᠤ᠂ ᠮᠤᠩᠭᠤᠯ ᠭᠤᠶᠤᠯᠳᠤ ᠬᠤᠶᠠᠭᠤᠯᠠ ᠶᠢᠨ ᠵᠢᠪᠬᠤᠭ᠎ᠠ ᠭᠡᠵᠢ ᠂ ᠡᠨᠡ ᠰᠠᠶᠢᠬᠠᠨ ᠰᠡᠭᠦᠳᠡᠷᠯᠡᠯ ᠨᠢ ᠰᠤᠪᠤᠷᠭ᠎ᠠ ᠲᠠᠢ ᠪᠠᠨ ᠴᠤᠭ ᠪᠠᠶᠢᠭᠠᠰᠠᠢ ᠭᠡᠵᠦ ᠵᠦᠩᠨᠡᠨ ᠠᠮᠵᠢᠭᠤᠯᠤᠭ᠎ᠠ᠃      ᠪᠢ ᠳᠡᠳᠡᠨ ᠤ ᠪᠦᠯᠢ ᠶᠢᠨ ᠬᠢ ᠲᠠᠢ ᠰᠡᠭᠦᠳᠡᠷᠯᠡᠩᠭᠦᠳᠡ ᠠᠬᠢᠨ ᠢᠨᠳᠡᠷ ᠦᠭᠰᠦᠨ ᠠᠩᠬ᠎ᠠ ᠶᠢᠨ ᠬᠠᠶᠢᠩᠭᠤᠳᠠᠭᠰᠠᠨ ᠳᠠᠨᠢᠯᠴᠠᠭᠤᠯᠭ᠎ᠠ ᠶᠢ ᠨᠠᠷᠢᠴᠠᠯᠠᠬᠤᠢ ᠳᠤᠷ ︽ᠵᠠᠷᠢᠮ ᠬᠦᠮᠦᠨ ᠠᠮᠢᠳᠤ ᠴᠦ ᠦᠬᠦᠭᠰᠡᠳ ᠠᠴᠠ ᠢᠯᠭᠠᠭ᠎ᠠ ᠦᠭᠡᠢ᠂ ᠵᠠᠷᠢᠮ ᠬᠦᠮᠦᠨ ᠦᠬᠦᠴᠢᠬᠡᠭᠰᠡᠨ ᠴᠦ ᠠᠮᠢᠳᠤᠷᠠᠭᠰᠠᠭᠠᠷ︾ ᠬᠡᠮᠡᠭᠰᠡᠨ ᠴᠢ ᠪᠢᠳᠡᠨ ᠤ ᠲᠦᠭᠡᠮᠡᠯ ᠮᠡᠳᠡᠷᠡᠳᠡᠭ ᠶᠤᠰᠤᠨ ᠢ ᠤᠯᠠᠮ ᠤᠬᠠᠭᠠᠪᠠᠢ᠃ ᠭᠠᠯᠰᠠᠩ ᠯᠠᠮᠠᠲᠠᠨ ᠪᠤᠯ ᠡᠨᠡᠬᠦ ᠪᠠᠳᠤ ᠶᠤᠰᠤᠨ ᠤ ᠬᠤᠶᠢᠨᠠᠬᠢ ᠨᠢ᠃ ᠡᠭᠦᠨ ᠳᠤ ᠤᠯᠠᠨ ᠶᠠᠭᠤᠮ᠎ᠠ ᠬᠡᠯᠡᠭᠰᠡᠨ ᠤ ᠠᠯᠠᠭ᠎ᠠ᠃ ᠰᠢᠨ᠎ᠡ ᠠᠮᠢᠯᠠᠯᠳᠤ ᠰᠤᠪᠤᠷᠭ᠎ᠠ ᠨᠢ ᠳᠡᠭᠦᠯᠳᠡᠷ ᠬᠠᠷᠢᠭᠤᠯᠳᠠ ᠬᠢᠭᠡᠳ ᠪᠤᠢ᠃ ᠨᠠᠰᠤᠨ ᠤ ᠵᠦᠷᠢᠭᠡᠨ ᠪᠦᠬᠦᠢ ᠯᠠᠮᠠ ᠬᠠᠷ᠎ᠠ ᠮᠠᠨ ᠤ ᠬᠤᠶᠠᠭᠤᠯᠠ ᠳᠠᠨᠢᠯᠴᠠᠨ ᠶᠠᠪᠤᠯᠴᠠᠭᠰᠠᠨ ᠳᠡᠩᠴᠢ ᠤᠬᠤᠷ ᠴᠦ ᠯᠠᠮᠠᠪᠤᠭᠠᠢ ᠶᠢᠨ ᠳᠡᠷᠡᠬᠦ ᠲᠤᠭᠤᠷᠭᠠᠳᠠᠳ ᠤᠨ ᠠᠰᠪᠤᠷᠢ ᠴᠠᠶᠢᠯᠭᠠᠨ ᠢ ᠭᠠᠶᠢᠬᠠᠭᠤᠯᠤᠭᠰᠠᠨ ᠠᠷᠠᠨᠰᠢᠨ᠂ ᠡᠷᠳᠡᠮ ᠪᠢᠰᠢᠯᠭᠠᠯ ᠤᠨ ᠬᠢᠨᠢ ᠬᠦᠨᠴᠡ ᠳᠤᠨᠢ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠳᠠᠳᠠᠭᠳᠠᠨ ᠪᠠᠶᠢᠭᠰᠠᠨ᠃ ᠳᠡᠭᠡᠬᠦ  ᠠᠴᠠ ᠳᠡᠭᠦᠨ ᠢ ᠬᠦᠮᠪᠦᠮ ᠳᠤ ᠪᠤᠴᠠᠭᠰᠠᠨ ᠤ ᠳᠠᠷᠠᠭ᠎ᠠ ︽ᠷᠠᠪᠵᠠᠮᠪᠠ ᠭᠠᠯᠰᠠᠩ ᠤᠳᠠᠴᠢ︾ ᠭᠡᠰᠡᠨ ᠣᠯᠳᠣᠢ ᠪᠢᠴᠢᠯᠭᠡ ᠪᠠᠷ ᠰᠠᠨᠠᠭᠠᠯᠵᠠᠵᠠᠢ᠃ ᠬᠡᠯᠡᠬᠦᠨ᠎ᠡ ᠪᠢᠳᠠᠭᠤᠬᠠᠨ ᠦᠵᠦᠭ ᠮᠢᠨᠢ ᠶᠠᠮᠠᠷᠬᠠᠨ ᠡᠪᠳᠠᠢ ᠶᠠᠭᠤᠮ᠎ᠠ ᠵᠢᠷᠤᠭᠯᠠᠨ᠎ᠠ᠃ ᠶᠠᠭᠠᠬᠢᠬᠤᠪ᠂ ︽ᠳᠡᠮᠡᠭᠡ ᠳᠡᠩᠭᠡ ᠪᠠᠷ︾ ᠤᠨ ᠤᠴᠢᠷ᠃ ᠳᠡᠷᠡ ᠪᠢᠴᠢᠯᠭᠡ ᠳᠤ ᠳᠡᠭᠦᠨ ᠤ ᠬᠠᠮᠢᠶᠠᠳᠠᠢ ᠤᠯᠳᠠᠭᠰᠠᠨ ᠬᠢᠷᠢ ᠪᠠᠷ ᠳᠡᠮᠳᠡᠭᠯᠡᠭᠰᠡᠨ ᠴᠦ ᠳᠠᠷᠠᠭᠠᠴᠢ ᠪᠠᠷ ᠰᠤᠨᠤᠰᠤᠨ ᠳᠤᠭᠤᠯᠤᠭᠰᠠᠨ ᠲᠠᠢ ᠪᠠᠨ ᠨᠡᠶᠢᠯᠡᠭᠦᠯᠦᠨ ᠨᠦᠬᠦᠯᠳᠡ ᠪᠤᠯᠭᠠᠬᠤ ᠮᠢᠨᠢ ᠨᠤᠷᠰᠤᠯ ᠪᠤᠯᠬᠤ ᠦᠭᠡᠢ ᠪᠤᠢ᠃      ᠤᠳᠤ ᠬᠡᠳᠦᠨ ᠵᠤᠷᠪᠤᠰᠤᠯᠠᠯ ᠢᠶᠠᠷ ᠳᠠᠬᠢᠯᠭ᠎ᠠ ᠶᠢᠨ ᠡᠷᠭᠦᠴᠡ ᠪᠤᠯᠭᠠᠶᠤ᠃      — ᠯᠠᠮᠠᠲᠠᠨ ᠡ᠂ ᠲᠠ ᠪᠤᠯ ᠠᠮᠢᠳᠤᠷᠠᠨ ᠤᠷᠤᠰᠢᠬᠤᠢ ᠶᠢᠨ ᠦᠷᠳᠡᠭ ᠢᠶᠠᠨ ᠰᠠᠶᠢᠬᠠᠨ ᠢᠯᠡᠷᠡᠭᠦᠯᠦᠭᠴᠢ᠃ ᠬᠡᠷᠡᠭ ᠤᠴᠢᠷ ᠲᠤ ᠰᠤᠨᠢᠭᠤᠴᠢ᠂ ᠭᠢᠷᠠᠬᠠᠶᠢᠴᠢ᠃ ︽ᠰᠤᠷᠬᠤᠢ ᠳᠤᠷ ᠬᠠᠯᠠᠰᠢᠷᠠᠯ ᠦᠭᠡᠢ᠂ ᠰᠤᠷᠭᠠᠬᠤᠢ ᠳᠤᠷ ᠴᠦᠬᠦᠷᠡᠰᠢ ᠦᠭᠡᠢ︾ ᠠᠯᠮᠠᠰ ᠵᠤᠷᠢᠭᠳᠠᠨ᠃      — ᠮᠠᠮᠠᠲᠠᠨ ᠡ᠂ ᠲᠠ ᠨᠤᠮ ᠤᠨ ᠤᠬᠠᠭᠠᠨ ᠳᠤ ᠰᠢᠮᠳᠠᠬᠤ ᠶᠢᠨ ᠰᠠᠴᠠᠭᠤ ︽ᠳᠦᠷᠪᠡᠨ ᠦᠨᠳᠦᠰᠦ︾ ᠳᠤ ᠱᠦᠯᠦᠩᠳᠡᠨ ᠬᠠᠮᠢᠶᠠᠳᠠᠢ ᠮᠡᠳᠡᠯᠭᠡ ᠮᠡᠳᠡᠴᠡ ᠶᠢ ᠴᠢᠳᠠᠮᠠᠭᠠᠢ ᠡᠵᠡᠮᠰᠢᠨ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠨ ᠡᠮᠴᠢᠯᠡᠭᠡᠳ ︽ᠳᠠᠪᠤᠨ ᠵᠠᠰᠠᠯ︾ ᠳᠤ ᠭᠠᠷᠰᠢᠨ ᠨᠠᠩᠳᠠ ᠭᠠᠯᠵᠠᠭᠤ᠂ ᠮᠤᠭᠠᠢ ᠳᠤ ᠬᠠᠳᠬᠤᠭᠳᠠᠭᠰᠠᠨ᠂ ᠯᠢᠮᠪᠠ ᠪᠤᠯᠴᠢᠷᠬᠠᠶᠢᠲᠤ ᠠᠷᠬᠠᠭ ᠵᠠᠰᠠᠯᠳᠠ ᠳᠤ ᠮᠡᠷᠭᠡᠰᠢᠵᠠᠢ᠃      — ᠬᠤᠸᠠᠷᠬᠠᠳᠠᠨ ᠡ᠂ ᠲᠠ ᠡᠪᠡᠰᠦᠨ ᠡᠮ ᠳᠤ ᠣᠭᠤᠭᠠᠳᠠ ᠳᠤᠷ᠎ᠠ ᠰᠤᠨᠢᠷᠬᠠᠯ ᠲᠠᠢ ᠶᠢᠨ ᠨᠢᠭᠡ ᠨᠢ᠃ ᠲᠦᠪᠡᠳ ᠤᠨ ᠤᠷᠪᠠᠯᠭᠠᠨ᠎ᠠ ᠨᠤᠳᠤᠭ ᠲᠠᠭᠠᠨ ᠪᠤᠴᠠᠨ ᠡᠮᠨᠡᠯᠭᠡ ᠶᠢᠨ ᠠᠵᠤ ᠶᠦᠭᠡᠨ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠨ ᠪᠦᠭᠡᠳ ᠵᠤᠤ ᠤᠳᠠ ᠶᠢᠨ ᠮᠤᠩᠭᠤᠯ ᠡᠮᠴᠢᠳ ᠤᠨ ᠬᠤᠶᠠᠷᠳᠠ ᠶᠢᠨ ᠪᠤᠯᠪᠠᠰᠤᠷᠠᠭᠤᠯᠤᠯ ᠢᠶᠠᠷ ᠵᠠᠭᠤᠭᠠᠳ ᠡᠮᠴᠢᠳ ︵ᠮᠠᠨ ᠤ ᠬᠤᠰᠢᠭᠤᠨ ᠤ ᠰᠡᠷᠡᠩ᠂ ᠪᠠᠶᠠᠨᠰᠠᠩ᠂ ᠮᠠᠨᠳᠤᠰᠠᠨᠠᠭ᠎ᠠ ᠮᠡᠳᠦ ᠶᠢᠨ ᠠᠷᠪᠠᠭᠠᠳ ᠡᠮᠴᠢ ᠪᠤᠢ︶ ᠢ ᠪᠤᠯᠪᠠᠰᠤᠷᠠᠭᠤᠯᠤᠨ ᠳᠡᠭᠡᠭᠰᠢᠯᠡᠭᠦᠯᠵᠠᠢ᠃ ᠳᠠᠨ ᠤ ᠤᠶᠤᠨ ᠤ ᠲᠠᠯᠠᠰ ᠤᠭᠤᠷᠠᠭ ᠤᠨ ᠱᠦᠯᠳᠦᠳᠦ ᠶᠢ ᠬᠦᠷᠳᠡᠭᠰᠡᠳ ᠡᠮᠴᠢᠯᠡᠭᠡ ᠶᠢᠨ  ᠹᠷᠣᠨᠲ ᠲᠤ ᠨᠢᠷᠤᠭᠤᠪᠴᠢᠯᠠᠨ ᠬᠦᠮᠦᠨ ᠵᠤᠨ ᠤ ᠡᠷᠡᠭᠦᠯ ᠡᠩᠭᠡ ᠳᠤ ᠴᠠᠭᠯᠠᠰᠢ ᠦᠭᠡᠢ ᠪᠤᠶᠠᠨ ᠦᠢᠯᠡᠳᠴᠦ ᠠᠯᠳᠠᠷ  ᠢ ᠴᠢᠨᠢ ᠳᠠᠭᠤᠷᠢᠰᠬᠠᠮᠤᠢ᠃ ᠳᠠᠨ ᠤ ᠮᠠᠬᠠᠪᠤᠳ ᠴᠣᠭᠴᠠᠰ ᠬᠠᠯᠢᠨ ᠳᠡᠭᠳᠡᠯ᠎ᠡ ᠭᠡᠳ ᠤᠶᠤᠨ ᠴᠤᠭᠴᠠᠯᠠᠪᠤᠷᠢ ᠠᠴᠠ ᠴᠢᠨᠢ ᠭᠡᠷᠡᠯ ᠬᠢᠯᠪᠠᠭ᠎ᠠ ᠰᠠᠴᠤᠷᠠᠨ ᠪᠤᠢ᠃ ᠲᠦᠷᠦᠭᠦᠨ ᠳᠤ ᠬᠡᠯᠡᠭᠰᠡᠨ ᠵᠠᠷᠢᠮ ᠬᠦᠮᠦᠨ ᠠᠮᠢᠳᠤᠷᠠᠭᠰᠠᠭᠠᠷ ᠭᠡᠳᠡᠭ ᠶᠤᠰᠤᠨ ᠡᠭᠦᠨ ᠢ ᠦᠭᠦᠯᠡᠭᠰᠡᠨ ᠪᠤᠯᠠᠢ᠃      — ᠪᠢᠰᠢᠯᠭᠠᠳᠠᠨ ᠡ᠂ ᠲᠠ ᠳᠠᠭᠠᠯᠠᠯ ᠳᠡᠭᠦᠰᠬᠦ ᠳᠡᠭᠡᠨ ᠬᠤᠶᠠᠷ ᠭᠠᠷ ᠶᠤᠭᠠᠨ ᠴᠡᠭᠡᠵᠢᠨ ᠳᠡᠭᠡᠨ ᠬᠠᠮᠳᠤᠳᠬᠠᠨ ᠵᠠᠯᠪᠠᠷᠢᠵᠤ᠂ ᠯᠠᠮᠠᠲᠠᠳ ᠪᠤᠯᠤᠨ ᠰᠤᠷᠤᠭᠴᠢᠳ ᠤᠨ ᠢᠶᠠᠨ ︽ᠯᠠᠮᠠ ᠴᠤᠳᠪᠠ ᠶᠢᠨ ᠲᠤᠩᠵᠢᠳ︾ ᠤᠩᠰᠢᠯᠭ᠎ᠠ ᠪᠠᠷ ᠪᠤᠷᠬᠠᠨ ᠤ ᠤᠷᠤᠨ ᠢ ᠵᠤᠷᠢᠭᠰᠠᠨ ᠭᠡᠪᠡᠦ᠃ ᠲᠡᠷᠡᠴᠢᠯᠡᠨ ᠱᠠᠷᠢᠯ ᠳᠡᠭᠳᠡᠭᠡᠯ ᠳᠤ ᠴᠢᠨᠳᠠᠷ ᠠᠴᠠ ᠴᠢᠨᠢ ᠫᠧᠯᠳᠦ᠋ᠩ ︵ᠪᠢᠰᠢᠯᠭᠠᠯ ᠳᠡᠭᠦᠰᠴᠤᠳ ᠤᠨ ᠴᠤᠭᠴᠠᠰ ᠲᠤ ᠪᠦᠳᠦᠬᠦ ᠡᠷᠳᠡᠨᠢ︶ ᠭᠠᠷᠴᠤ᠂ ᠡᠶᠢᠨᠬᠦ ᠫᠧᠯᠳᠦ᠋ᠩ  ᠨᠢ ᠬᠦᠮᠪᠦᠮ ᠬᠡᠶᠢᠳ ᠤᠨ ᠳᠡᠦᠬᠡᠨ᠎ᠡ ᠬᠤᠶᠠᠳᠡᠬᠢ᠃ ᠤᠯᠠᠭᠠᠨ ᠭᠡᠭᠡᠨ ᠤ ᠴᠤᠭᠴᠠᠰ ᠠᠴᠠ ᠴᠤ ᠫᠧᠯᠳᠦ᠋ᠩ ᠭᠠᠷᠤᠯ᠎ᠠ ᠬᠡᠰᠡᠨ᠃      ᠡᠳᠡᠭᠡᠷ ᠠᠯᠳᠠᠭ ᠤᠨᠤᠭ ᠵᠤᠷᠪᠤᠰᠤᠯᠠᠯ᠂ ᠭᠠᠯᠰᠠᠩ ᠪᠠᠭᠰᠢᠳᠠᠨ ᠤ ᠨᠠᠰᠤᠨ ᠲᠤᠷᠰᠢᠳᠠᠬᠢ ᠭᠢᠯᠪᠠᠭᠠᠳᠤ ᠦᠩᠭᠡᠷᠡᠭᠡᠯ ᠢ ᠬᠠᠷᠠᠬᠠᠨ ᠬᠠᠷᠠᠭᠤᠯᠤᠨ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠬᠠᠷᠠᠮᠰᠠᠯᠳᠤ ᠰᠡᠳᠬᠢᠯᠭᠡ ᠪᠠᠷ ᠢᠨᠳᠡᠷ ᠠᠴᠠ ᠪᠠᠭᠤᠬᠤᠨ᠎ᠠ ᠠᠨᠠᠷ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠦᠯᠢᠶᠡᠵᠦ᠄ ᠭᠠᠯᠰᠠᠩ ᠮᠠᠮᠠ ᠪᠤᠯ ᠠᠷᠢᠭᠤᠨ ᠰᠠᠨᠠᠭᠠᠳᠠᠢ ᠪᠤᠷᠬᠠᠨᠴᠢ ᠰᠡᠳᠬᠢᠯᠳᠡᠨ᠂ ᠡᠪᠡᠳᠴᠢᠨ ᠵᠤᠪᠠᠯᠠᠩᠳᠠᠨ ᠢ ᠡᠷᠬᠢᠮ ᠳᠤᠤᠷᠠᠳᠤ᠂ ᠶᠠᠳᠠᠭᠤ ᠪᠠᠶᠠᠨ᠂ ᠳᠠᠨᠢᠬᠤ ᠳᠠᠨᠢᠬᠤ ᠦᠭᠡᠢ ᠭᠡᠵᠦ ᠢᠯᠭᠠᠳᠠᠭ ᠦᠭᠡᠢ᠃ ᠬᠤᠯᠠᠬᠢᠴᠤᠳ ᠤᠨ ᠬᠤᠨᠤᠵᠤ ᠬᠡᠪᠳᠡᠬᠦ᠂ ᠬᠤᠭᠤᠯᠠ ᠤᠮᠳᠠ ᠳᠤ ᠰᠠᠨᠠᠭ᠎ᠠ ᠪᠤᠯᠵᠤ᠂ ᠤᠨᠤᠭ᠎ᠠ ᠬᠦᠯᠦᠰᠢ ᠳᠤᠨᠢ ᠡᠪᠡᠰᠦ ᠢᠳᠡᠰᠢ ᠭᠡᠵᠦ ᠳᠠᠷᠢᠰᠢ ᠳᠠᠷᠢᠮᠠᠯ ᠤᠨ ᠪᠤᠯᠤᠩ ᠴᠤᠯᠤᠩ ᠳᠤ ᠬᠠᠳᠤᠭᠤᠷ ᠡᠷᠭᠢᠭᠦᠯᠦᠨ ᠰᠢᠷᠬᠤᠨᠠᠭ ᠢᠶᠠᠨ ᠱᠠᠯ ᠨᠤᠷᠭᠠᠴᠢᠬᠠᠭᠰᠠᠨ ᠬᠠᠷᠠᠭᠳᠠᠳᠠᠭ ᠡ᠃ ᠴᠤᠬᠤᠮ ︽ᠠᠮᠢᠳᠠᠨ ᠵᠢᠷᠭᠤᠭᠠᠨ ᠵᠦᠢᠯ ᠢ ᠲᠤᠰᠠᠯᠠᠬᠤ︾ ᠪᠠᠷ ᠠᠮᠢᠨ ᠰᠠᠬᠢᠶ᠎ᠠ ᠪᠤᠯᠭᠠᠭᠴᠢ᠃      ᠮᠠᠮᠠ ᠮᠢᠨᠢ ᠬᠦᠮᠪᠦᠮ ᠳᠤ ᠪᠤᠴᠠᠬᠤ ᠳᠠᠭᠠᠨ ᠬᠠᠶᠢᠷᠠᠳᠠᠢ ᠤᠨᠤᠰᠢ ᠬᠠᠷ᠎ᠠ ᠡᠯᠵᠢᠭᠡᠨ ᠠᠴᠠ ᠪᠠᠨ ᠰᠠᠯᠵᠤ ᠶᠠᠳᠠᠴᠢᠬᠠᠭᠰᠠᠨ᠂ ᠶᠠᠭᠠᠬᠢᠨ ᠡᠳᠡᠯᠵᠦ ᠠᠷᠠᠴᠢᠯᠠᠬᠤ ᠶᠢ ᠳᠠᠪᠳᠠᠵᠤ ᠵᠠᠬᠢᠮᠵᠢᠯᠠᠵᠤ ᠯᠡ᠃ ᠳᠡᠭᠦᠨ ᠤ ᠵᠠᠬᠢᠮᠵᠢᠯᠠᠯ ᠢᠶᠠᠷ ᠭᠤᠴᠢ ᠬᠦᠷᠦᠭᠡᠳ ᠮᠤᠨᠤᠭᠰᠠᠨ ᠡᠯᠵᠢᠭᠡ ᠶᠢ ᠴᠢᠳᠠᠯ ᠢᠶᠠᠷ ᠠᠷᠠᠴᠢᠯᠠᠨ ᠪᠠᠶᠢᠵᠤ᠂ ᠡᠵᠡᠨ ᠤ ᠬᠢᠨᠢ ᠰᠠᠨᠠᠯ ᠢᠶᠠᠷ ᠡᠪᠳᠡᠶᠢᠭᠡᠨ ᠤᠷᠤᠨᠰᠢᠭᠤᠯᠤᠭᠰᠠᠨ ᠶᠤᠮ ᠡ ᠭᠡᠵᠦ ᠬᠦᠨᠳᠦᠬᠡᠨ ᠲᠤᠷᠠᠰᠤᠮᠵᠢᠯᠠᠨ᠎ᠠ᠃      ᠳᠠᠬᠢᠪᠠᠯ᠂ ᠮᠠᠨ ᠤ ᠭᠡᠷ ᠤᠭᠰᠠᠭ᠎ᠠ ᠶᠢᠨ ᠦᠭᠡᠳᠡ ᠦᠯᠵᠡᠢ ᠠᠵᠤ ᠲᠦᠷᠦᠭᠡ ᠨᠢ ᠪᠠᠭᠰᠢ ᠶᠢᠨ ᠡᠨᠡᠷᠢᠯ ᠬᠠᠶᠢᠷ᠎ᠠ᠂ ᠪᠠᠭᠰᠢ ᠳᠠᠭᠠᠨ ᠪᠤᠤ ᠤᠰᠤᠯᠳᠠᠵᠠᠭᠠᠶ᠎ᠠ ᠭᠡᠵᠦ ᠬᠡᠦᠬᠡᠳ ᠲᠡᠭᠡᠨ ᠦᠷᠭᠦᠯᠵᠢᠯᠡᠨ ᠵᠠᠬᠢᠳᠠᠭ ᠁      ᠡᠷᠬᠢᠮ ᠤᠩᠰᠢᠭᠴᠢᠳ ᠮᠢᠨᠢ᠂ ᠮᠢᠨᠤ ᠪᠡᠶ᠎ᠡ ᠡᠶᠢᠮᠡᠭᠦᠬᠡᠨ ᠪᠢᠴᠢᠯᠭᠡ ᠯᠦᠭᠡ ᠠᠩᠬᠠᠯᠭ᠎ᠠ ᠪᠤᠯᠬᠤᠷ ᠦᠰᠦ ᠪᠠᠨ ᠳᠡᠭᠦᠭᠰᠡᠨ ᠢᠶᠠᠨ ᠨᠢᠭᠤᠯ ᠦᠭᠡᠢ ᠳᠡᠮᠳᠡᠭᠯᠡᠷᠦᠨ᠃ ᠡᠴᠢᠨᠡᠨ ᠵᠢᠯ ᠵᠢᠭᠠᠯ ᠵᠤᠭᠤᠯ ᠶᠠᠭᠤᠮ᠎ᠠ ᠡᠪᠯᠡᠭᠦᠯᠡᠬᠦᠨ᠎ᠡ ᠡᠷᠳᠡᠮᠳᠡᠨ ᠡᠭᠡᠯᠴᠤᠤᠯ᠂ ᠬᠦᠭᠰᠢᠨ ᠪᠤᠶᠤ ᠬᠡᠦᠬᠡᠳ᠂ ᠳᠠᠨᠢᠬᠤ ᠪᠠ ᠦᠯᠦ ᠳᠠᠨᠢᠬᠤ᠂ ᠡᠷᠡᠭᠳᠡᠨ ᠡᠮᠡᠭᠳᠡᠨ᠂ ᠲᠠᠯᠢᠢᠭᠴᠢ ᠠᠮᠢᠳᠤ ᠬᠡᠳᠦᠨ ᠠᠷᠪᠠᠴᠤᠤᠯ ᠤᠨ ︽ᠬᠦᠮᠦᠨ ᠪᠢᠴᠢᠯᠭᠡ︾ ᠳᠤ ᠳᠠᠪᠬᠤᠷᠳᠠᠭᠤᠯᠣᠯ ᠦᠭᠡᠢ ᠰᠠᠨᠵᠠᠢ᠃ ᠵᠢᠴᠢ ᠳᠤᠷ ᠰᠠᠷᠠᠩ ᠪᠤᠯᠤᠨ ᠳᠡᠭᠦᠨ ᠤ ᠪᠠᠭᠰᠢ ᠠᠴᠠ ᠡᠨᠡ ᠪᠢᠴᠢᠭᠡ ᠰᠤᠪᠤᠷᠭ᠎ᠠ ᠪᠦᠷ ᠴᠦ ᠰᠠᠷᠠᠩ ᠰᠢᠵᠢᠮᠯᠡᠯ᠃ ᠢᠩᠭᠢᠭᠡᠳ ᠪᠤᠳᠤᠬᠤᠨ᠎ᠠ ᠮᠠᠨ ᠤ ᠬᠤᠶᠠᠭᠤᠯᠠ ᠶᠠᠮᠠᠷᠬᠠᠨ ᠬᠤᠪᠢ ᠪᠠᠷᠢᠯᠳᠤᠯ ᠪᠤᠢ ᠦᠦ ᠬᠡᠮᠡᠨ ᠪᠤᠳᠤᠨᠠᠮ ᠪᠤᠢ ‍ᠶ᠎ᠠ᠃      ᠪᠤᠷᠤᠭᠤᠳᠠᠨ ᠰᠣᠯᠣᠭᠠᠶᠢᠳᠠᠭᠤᠯᠣᠭᠰᠠᠨ ᠢ ᠰᠢᠭᠦᠮᠵᠢᠯᠡᠨ ᠵᠠᠯᠠᠷᠠᠭᠤᠯᠪᠠᠯ ᠶᠠᠮᠠᠷ ᠰᠠᠶᠢᠨ ᠦᠦ᠃      ᠬᠠᠷᠠᠬᠠᠳᠠᠴᠤᠳ ᠤᠨ ᠬᠡᠶᠢᠮᠦᠷᠢ ᠳᠡᠷᠪᠡᠭ︕
 
ᠢᠷᠡᠯᠲᠡ᠄ ᠦᠪᠦᠷ ᠮᠣᠩᠭᠤᠯ ᠤᠨ ᠵᠠᠰᠠᠭ ᠤᠨ ᠣᠷᠳᠤᠨ ᠤ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠮᠣᠭᠤᠯᠠᠩ ᠰᠠᠶᠢᠬᠠᠨ ᠴᠠᠭᠠᠯᠠᠵᠣ ᠪᠠᠶᠢᠡᠨᠣ︖
ᠴᠠᠭᠠᠨ ᠬᠤᠯᠣᠭᠠᠨ᠎ᠠ ᠵᠢᠯ ᠢᠶᠠᠨ ᠣᠡᠡᠳᠣᠬᠤ ᠢᠷᠣᠭᠡᠯ ᠮᠬᠠᠳᠠᠭᠠᠯ
ᠪᠣᠷᠬᠠᠨ ᠠᠪᠤ ᠮᠢᠨᠢ
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠠᠷᠪᠠ︶
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠶᠢᠰᠦ︶
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05003979号