| ᠰ᠊᠂ ᠵᠠᠮᠢᠶᠠᠨ | | ᠦᠪᠡᠷ ᠤᠨ ᠬᠡᠯᠡ ᠪᠠᠨ ᠦᠷᠦᠭᠡᠯᠳᠦᠵᠤ ᠲᠠᠯᠪᠢᠭᠠᠳ | ᠦᠷᠦᠭᠡᠯ ᠤᠨ ᠬᠡᠯᠡ ᠪᠠᠷ ᠱᠤᠭᠰᠢᠭᠤᠯᠵᠤ ᠶᠠᠪᠤᠳᠠᠭ | ᠡᠪᠦᠭᠡ ᠲᠡᠭᠡᠳᠤᠰ ᠢᠶᠠᠷ ᠢᠶᠠᠨ ᠪᠠᠭ᠋ᠠᠷᠬᠠᠨ ᠤᠮᠤᠷᠬᠠᠭᠠᠳ | ᠦᠵᠡᠮᠤᠷᠢ ᠶᠢᠨ ᠶᠠᠭᠤᠮᠠ ᠰᠢᠭ᠋ ᠱᠠᠭᠰᠢᠵᠤ ᠰᠠᠭᠤᠳᠠᠭ | ︽ᠬᠠᠷᠠ ᠭᠡᠷ ᠲᠤ ᠪᠠᠨ ᠬᠠᠭᠠᠨ︾ ᠰᠢᠭ᠋ ᠭᠡᠳᠡᠶᠢᠵᠤ | ᠲᠡᠭᠷᠢ ᠶᠢᠨ ᠴᠢᠷᠠᠢ ᠶᠢ ᠲᠤᠭᠤᠨᠤ ᠪᠠᠷ ᠢᠶᠠᠨ ᠰᠢᠷᠳᠡᠭᠡᠳ | ᠬᠠᠭᠠᠯᠭᠠ ᠪᠠᠨ ᠭᠠᠷᠪᠠᠯ ᠬᠠᠷᠠᠭᠠ ᠨᠢ ᠰᠤᠯᠤᠩᠭᠠᠷᠠᠵᠤ | ᠲᠡᠷᠳᠡᠭᠡ ᠠᠭᠤᠯᠠ ᠶᠢ ᠲᠤᠬᠤᠢ ᠪᠠᠷ ᠢᠶᠠᠨ ᠬᠡᠮᠵᠢᠳᠡᠭ | ᠠᠯᠢ ᠪᠠᠶᠢᠭᠰᠠᠨ ᠢᠶᠠᠨ ᠬᠠᠶᠠᠭᠠᠨ ᠳᠤ ᠪᠠᠨ ᠤᠷᠬᠢᠭᠠᠳ | ᠨᠠᠭᠠᠳᠤᠮ ᠬᠡᠰᠤᠳᠡᠭ ᠮᠠᠨ ᠤ ᠬᠢᠨ ᠳᠤ ᠪᠤᠢ | ᠠᠯᠳᠠᠭᠰᠠᠨ ᠪᠦᠬᠦᠨ ᠢᠶᠠᠨ ᠵᠠᠶᠠᠭᠠᠨ ᠳᠤ ᠪᠠᠨ ᠲᠦᠯᠬᠢᠭᠡᠳ | ᠬᠠᠩᠭᠢᠨᠠᠳᠠᠯᠠ ᠳᠠᠭᠤᠯᠠᠳᠠᠭ ᠮᠠᠨ ᠤ ᠬᠢᠨ ᠳᠤ ᠪᠤᠢ | | | ︽ᠬᠠᠷᠠ ᠮᠤᠷᠢᠨ︾ ᠳᠤ ᠪᠠᠨ ᠠᠯᠠᠪᠬᠢᠨ ᠮᠤᠷᠳᠠᠪᠠᠯ | ᠵᠤᠭᠰᠤᠭᠠ ᠵᠢᠯᠤᠭᠤ ᠦᠭᠡᠢ ᠲᠠᠪᠭᠢᠳᠠᠭ | ᠬᠠᠯᠠᠭᠤᠨ ᠨᠢ ᠪᠠᠭ᠋ᠠᠨ ᠠᠬᠠᠳᠠᠭᠠᠳ ᠢᠷᠡᠪᠡᠯ | ᠬᠤᠷᠢᠭᠠ ᠴᠠᠷᠠᠭᠠ ᠦᠭᠡᠢ ᠫᠤᠤᠳᠠᠳᠠᠭ | ᠬᠠᠮᠤᠭ ᠮᠤᠩᠭᠤᠯ ᠤᠨ ᠦᠪ ᠰᠤᠶᠤᠯ ᠢᠶᠠᠨ | ᠬᠠ ᠭᠤᠶᠠ ᠪᠠᠷ ᠨᠢ ᠮᠦᠴᠢᠯᠡᠳᠡᠭ | ᠬᠠᠷᠠ ᠴᠠᠭᠠᠨ ᠬᠠᠷᠭᠤᠭᠰᠠᠨ ᠪᠦᠬᠦᠨ ᠳᠤ | ᠬᠠᠳᠠᠭ ᠲᠠᠳᠠᠨ ᠬᠢᠴᠢᠶᠡᠩᠭᠦᠶᠢᠯᠡᠳᠡᠭ | ᠤᠭᠤᠴᠢ ᠤᠰᠤ ᠦᠨᠡ ᠳᠤ ᠬᠦᠷᠬᠦ ᠳᠤ | ᠤᠯᠵᠤ ᠠᠯᠳᠠᠬᠤ ᠪᠠᠨ ᠭᠡᠨᠡᠳᠳᠡ ᠤᠬᠠᠭᠠᠷᠠᠳᠠᠭ | ᠤᠪᠤᠭᠠ ᠪᠠᠨ ᠲᠠᠬᠢᠭᠠᠳ ᠬᠤᠷᠠ ᠪᠠᠭᠤᠬᠤ ᠦᠭᠡᠢ ᠪᠤᠯ | ᠤᠩᠬᠤᠯᠢᠵᠤ ᠤᠨᠠᠭᠠᠳ ᠲᠡᠭᠷᠢ ᠳᠤ ᠪᠠᠨ ᠭᠤᠮᠤᠳᠠᠳᠠᠭ | ᠰᠦᠭᠦᠳᠴᠦ ᠮᠦᠷᠭᠦᠭᠡᠳ ᠲᠠᠭᠠᠳᠬᠠᠳᠠᠭ | ᠰᠦᠵᠢᠭ ᠶᠡᠭᠡᠳᠡᠳ ᠮᠠᠨ ᠤ ᠬᠢᠨ ᠳᠤ ᠪᠤᠢ | ᠰᠦ ᠪᠠᠨ ᠡᠷᠭᠦᠭᠡᠳ ᠢᠷᠦᠭᠡᠳᠡᠭ | ᠰᠡᠵᠢᠭ ᠪᠠᠭᠠᠳᠠᠳ ᠮᠠᠨ ᠤ ᠬᠢᠨ ᠳᠤ ᠪᠤᠢ | | | ᠲᠡᠷᠳᠡᠭᠡ ᠠᠭᠤᠯᠠ ᠨᠢ ᠨᠤᠷᠠᠵᠤ ᠪᠠᠶᠢᠬᠤ ᠳᠤ | ᠲᠡᠷᠭᠡᠨ ᠳᠤ ᠭᠠᠷᠤᠭᠠᠳ ᠬᠤᠳᠠ ᠤᠷᠤᠳᠠᠭ | ᠲᠡᠷᠭᠡᠳᠡ ᠨᠢ ᠭᠠᠵᠠᠷ ᠴᠦᠮᠦᠷᠴᠤ ᠪᠠᠶᠢᠬᠤ ᠳᠤ | ᠲᠡᠷᠡ ᠪᠠᠨ ᠰᠢᠯᠵᠢᠭᠦᠯᠦᠭᠡᠳ ᠤᠨᠳᠠᠵᠤ ᠤᠷᠬᠢᠳᠠᠭ | ᠮᠠᠭᠳᠠᠭᠠᠯ ᠲᠠᠭᠤᠨ ᠳᠤ ᠰᠤᠨᠤᠷ ᠨᠢ ᠳᠠᠳᠴᠤ | ᠮᠠᠩᠰᠢᠭᠤᠷᠠᠨ ᠬᠠᠯᠠᠰᠳᠠᠭ ᠵᠦᠭᠡᠯᠡᠨ ᠴᠢᠬᠢ ᠲᠠᠢ | ᠮᠠᠩᠬᠠᠨ ᠤᠷᠤᠢ ᠳᠤ ᠰᠡᠭᠦᠷᠡᠰᠤ ᠠᠯᠳᠠᠪᠠᠴᠤ | ᠦᠭᠡ ᠠᠯᠳᠠᠬᠤ ᠦᠭᠡᠢ ᠬᠠᠳᠠᠭᠤ ᠠᠮᠠ ᠲᠠᠢ | ᠮᠠᠷᠳᠠᠰᠢ ᠦᠭᠡᠢ ᠲᠡᠤᠬᠡ ᠶᠢᠨ ᠮᠠᠨ ᠤ ᠬᠢᠨ | ᠮᠠᠷᠭᠤᠰᠢ ᠦᠭᠡᠢ ᠦᠨᠤᠳᠤᠷ ᠤᠨ ᠮᠠᠨ ᠤ ᠬᠢᠨ | ᠮᠠᠭᠠᠳ ᠢᠷᠡᠬᠦ ᠮᠠᠷᠭᠠᠰᠢ ᠶᠢᠨ ᠮᠠᠨ ᠤ ᠬᠢᠨ | ᠮᠠᠨ ᠤ ᠬᠢᠨ ᠬᠠᠰᠢᠯᠠ ᠮᠠᠨ ᠤ ᠬᠢᠨ | | |