ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠠᠭᠤᠳᠠᠰᠤ ᠡᠪᠬᠡᠬᠦ ᠪᠤᠶᠤ ᠬᠠᠭᠤᠳᠠᠰᠤ ᠦᠷᠬᠦᠯᠵᠢᠯᠡᠬᠦᠯᠬᠦ ᠦᠭᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/6/10
              ᠬᠠᠭᠤᠳᠠᠰᠤ ᠡᠪᠬᠡᠬᠦ ᠪᠤᠶᠤ ᠬᠠᠭᠤᠳᠠᠰᠤ ᠦᠷᠬᠦᠯᠵᠢᠯᠡᠬᠦᠯᠬᠦ ᠦᠭᠡ                             — ᠰᠤᠨᠢᠨ ᠬᠡᠪᠯᠡᠯ ᠢᠨᠦ ᠰᠢᠨ᠎ᠡ ᠵᠠᠭᠤᠴᠢᠯᠠᠭᠤᠷ ᠯᠤᠭ᠎ᠠ ᠵᠤᠯᠭᠠᠯᠴᠠᠬᠤᠢ      ᠤᠨ ᠴᠠᠭ ᠤᠨ ᠤᠷᠤᠰᠬᠠᠯ ᠢ ᠲᠠᠭᠠᠵᠤ ᠤᠯᠠᠨ ᠤᠯᠠᠨ ᠮᠡᠳᠡᠭᠡ ᠰᠡᠯᠳᠡ ᠶᠢ ᠠᠴᠢᠶᠠᠯᠠᠵᠤ ︽ᠠᠷᠦ ᠬᠤᠷᠴᠢᠨ ᠰᠤᠨᠢᠨ︾ ᠮᠠᠨᠢ ᠡᠳᠦᠭᠡ ᠳᠤ ᠬᠦᠷᠴᠦ ᠢᠷᠡᠯᠦᠭᠡ᠃ ᠤᠷᠤᠬᠰᠢ ᠬᠠᠷᠠᠵᠤ ᠰᠤᠨᠢᠨ ᠤ ᠪᠠᠨ ᠤᠯᠪᠠᠭ᠎ᠠ ᠶᠢ ᠮᠦᠷᠳᠡᠬᠦ  ᠪᠠᠷ 1992 ᠳᠤ ᠲᠠᠬᠢᠨ ᠬᠡᠪᠯᠡᠯ ᠰᠡᠷᠭᠦᠭᠡᠭᠳᠡᠭᠰᠡᠨ ︽ᠠᠷᠦ ᠬᠤᠷᠴᠢᠨ ᠰᠤᠨᠢᠨ︾ ᠤ ᠤᠨ ᠪᠤᠯᠭᠠᠨ ᠤ ᠡᠪᠬᠡᠮᠡᠯ ᠲᠠ ᠤᠯᠠᠨ ᠤ ᠭᠠᠷ ᠲᠤ ᠪᠠᠷᠢᠬᠳᠠᠵᠤ ᠨᠢᠳᠦᠨ ᠳᠤ ᠬᠠᠷᠠᠭᠳᠠᠨ᠎ᠠ᠃ ︽ᠴᠠᠰᠤᠨ ᠲᠡᠭᠡᠷ᠎ᠡ ᠮᠦᠷ ᠲᠠᠢ᠂ ᠴᠠᠭᠠᠰᠤᠨ ᠲᠡᠭᠡᠷ᠎ᠡ ᠨᠡᠷ᠎ᠡ ᠲᠠᠢ︾ ᠶᠢᠨ ᠪᠡᠶᠡᠯᠡᠯ ᠡᠨᠡ ᠭᠡᠵᠦ ᠴᠠᠭᠠᠰᠤᠨ ᠬᠡᠪᠯᠡᠯ ᠤᠨ ᠮᠦᠷ ᠪᠠᠳᠠᠭ ᠤᠳ ᠬᠡᠯᠡᠵᠦ ᠪᠠᠶᠢᠨ᠎ᠠ᠃ ᠤᠳᠴᠤ ᠦᠩᠭᠡᠷᠡᠭᠰᠡᠨ ᠦᠢᠯᠡ ᠬᠡᠷᠡᠭ ᠤᠨ ᠲᠡᠮᠳᠡᠭᠯᠡᠬᠡᠰᠦ ᠪᠤᠯᠵᠤ ᠤᠷᠤᠰᠬᠠᠯ ᠤᠰᠤᠨ ᠤ ᠮᠡᠳᠦ ᠬᠠᠭᠤᠳᠠᠰᠤ ᠬᠠᠭᠤᠳᠠᠰᠤ  ᠪᠠᠷ ᠠᠷᠯᠠᠨ ᠦᠯᠡᠳᠡᠵᠡᠢ᠃        ︽ᠬᠦᠭᠵᠢᠯᠳᠡ ᠪᠤᠯ ᠬᠠᠲᠠᠭᠤ ᠶᠤᠰᠤ︾᠃ ᠰᠤᠨᠢᠨ ᠬᠡᠪᠯᠡᠯ ᠮᠠᠨᠢ ᠤᠳᠤ ︽ᠬᠠᠭᠤᠴᠢᠨ ᠶᠠᠭᠤᠮ᠎ᠠ ᠤᠯᠠ ᠪᠤᠯᠵᠤ ᠰᠢᠨ᠎ᠡ ᠶᠠᠭᠤᠮ᠎ᠠ ᠵᠤᠯᠠ ᠪᠤᠯᠳᠠᠭ︾ ᠤᠨ ᠶᠤᠰᠤᠭᠠᠷ ᠴᠠᠭ ᠡᠷᠡᠨ ᠲᠠᠢ ᠠᠯᠬᠤᠭ᠎ᠠ ᠨᠢᠭᠡᠳᠦᠨ᠂ ᠰᠢᠨ᠎ᠡ ᠵᠠᠭᠤᠴᠢᠯᠠᠭᠤᠷ ᠲᠤ ᠠᠭᠤᠰᠤᠯᠴᠠᠨ ᠵᠤᠯᠭᠠᠯᠴᠠᠬᠤᠢ ᠶᠢᠨ ᠭᠤᠬᠴᠤᠭ᠎ᠠ ᠲᠡᠭᠡᠷ᠎ᠡ ᠬᠦᠷᠴᠦ ᠢᠷᠡᠭᠡᠳ ᠦᠭᠡᠷ᠎ᠡ ᠨᠢᠬᠡ ᠬᠡᠯᠪᠡᠷᠢ ᠪᠠᠷ ᠤᠩᠰᠢᠬᠴᠢ ᠤᠯᠠᠨ ᠲᠠᠢ ᠵᠤᠯᠭᠠᠬᠤ ᠪᠤᠯᠤᠯ᠎ᠠ᠃      1992 ᠤᠨ ᠤ 7 ᠰᠠᠷ᠎ᠠ ᠶᠢᠨ 1 ᠳᠤ  ᠪᠤᠯᠤᠬᠰᠠᠨ ︽ᠠᠷᠦ ᠬᠤᠷᠴᠢᠨ ᠰᠤᠨᠢᠨ︾ ᠬᠡᠪᠯᠡᠯ ᠰᠡᠷᠭᠦᠭᠡᠭᠳᠡᠭᠰᠡᠨ ᠶᠤᠰᠤᠯᠠᠯ ᠳᠤ ᠠᠷᠪᠠᠭᠠᠳ ᠡᠳᠦᠷ ᠤᠨ ᠡᠮᠦᠨᠡᠬᠡᠨ ᠠᠵᠢᠯ ᠰᠢᠯᠵᠢᠵᠦ ᠢᠷᠡᠭᠰᠡᠨ ᠪᠢ ᠶᠠᠭ ᠵᠠᠪᠳᠤᠨ ᠪᠠᠶᠢᠯᠴᠠᠬᠰᠠᠨ ᠶᠤᠮ᠃ ᠰᠤᠷᠤᠭᠰᠠᠨ ᠭᠠᠭᠴᠠ ᠮᠡᠷᠭᠡᠵᠢᠯ ᠬᠡᠪᠡᠯ ︽ᠰᠤᠨᠢᠨ ᠮᠡᠳᠡᠭᠡ ᠰᠤᠷᠪᠤᠯᠵᠢᠯᠠᠭ᠎ᠠ ᠨᠠᠶᠢᠷᠠᠭᠤᠯᠭ᠎ᠠ︾ ᠪᠤᠯᠤᠭᠠᠳ ᠲᠡᠷᠡ ᠬᠡᠬᠦ ᠤᠤ ᠳ᠋ᠧ᠂ ᠦᠭᠡᠷ᠎ᠡ ᠶᠠᠭᠤᠮ᠎ᠠ ᠴᠢᠳᠠᠬᠤ ᠦᠬᠡᠢ ᠬᠡᠬᠦ ᠤᠤ ᠳ᠋ᠧ᠂ ᠨᠢᠬᠡ ᠮᠡᠳᠡᠬᠦ ᠳᠤ ᠨᠢᠭᠡᠨᠳᠡ ᠨᠢᠭᠡᠨ ᠵᠢᠷᠠᠨ ᠤ ᠬᠠᠭᠠᠰ ᠢ ︽ᠠᠷᠦ ᠬᠤᠷᠴᠢᠨ ᠰᠤᠨᠢᠨ︾ ᠲᠠᠢ ᠪᠠᠨ ᠬᠠᠮᠳᠤ ᠲᠤᠭᠤᠯᠬᠤ ᠤᠶᠢᠷᠠᠳᠤᠴᠢᠬᠠᠬᠰᠠᠨ ᠪᠠᠶᠢᠨ᠎ᠠ᠃ 30 ᠰᠢᠬᠠᠮ ᠵᠢᠯ ᠨᠢ ᠤᠬᠤᠷᠬᠠᠨ ᠤᠨ ᠰᠠᠷ᠎ᠠ ᠪᠢᠰᠢ᠃ ᠬᠠᠭᠤᠳᠠᠰᠤ ᠴᠠᠭᠠᠰᠤᠨ᠎ᠠ ᠬᠤᠷᠭᠤᠯᠵᠢᠨ ᠦᠰᠦᠭ ᠲᠠᠢ ᠨᠦᠬᠦᠷᠯᠡᠵᠦ ᠬᠤᠷᠢᠨ ᠨᠠᠢᠮᠠᠨ ᠵᠢᠯ ᠤᠨ ᠨᠢᠭᠤᠷ ᠦᠵᠡᠭᠰᠡᠨ ᠨᠠᠶᠢᠷᠠᠭᠤᠯᠤᠬᠴᠢ ᠪᠤᠯᠤᠬᠰᠠᠨ ᠤ ᠬᠤᠪᠢ ᠠᠴᠠ ᠬᠠᠭᠤᠴᠢᠨ ᠤᠨ ᠤ ᠬᠠᠭᠤᠳᠠᠰᠤ ᠪᠢᠳᠡᠬᠦᠯᠡᠬᠦ ᠪᠠ ᠰᠢᠨ᠎ᠡ ᠤᠨ ᠤ ᠬᠠᠭᠤᠳᠠᠰᠤ ᠨᠡᠭᠡᠭᠡᠬᠦ ᠲᠠᠰᠢᠷᠠᠮ ᠳᠤ ᠬᠡᠳᠦᠨ ᠦᠬᠡ ᠬᠡᠯᠡᠬᠦ ᠦᠬᠡᠢ ᠪᠠᠶᠢᠵᠤ ᠦᠯᠦ ᠪᠤᠯᠤᠨ᠎ᠠ᠃      ᠰᠤᠨᠢᠨ ᠭᠡᠬᠦ ᠪᠠᠷ ᠴᠠᠭᠠᠰᠤ ᠱᠠᠭᠠᠷᠳᠠᠭᠳᠠᠨ᠎ᠠ᠃ ᠴᠠᠭᠠᠰᠤ ᠠᠴᠠ ᠮᠦᠨ ᠪᠢᠷ ᠪᠡᠬᠡᠰ ᠴᠤ ᠰᠠᠯᠤᠰᠢ ᠦᠭᠡᠢ᠃ ᠬᠡᠰᠡᠭ ᠴᠠᠭᠠᠰᠤᠨ ᠲᠡᠭᠡᠷᠡᠬᠢ ᠦᠭᠡ ᠦᠰᠦᠭ ᠦᠯᠡᠳᠡᠵᠦ ᠬᠤᠴᠤᠷᠬᠤ ᠳᠠᠭᠠᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠦᠨ᠎ᠡ ᠦᠷᠳᠡᠭ ᠲᠦᠷᠦᠨ᠎ᠡ᠃ ᠬᠡᠵᠢᠶ᠎ᠡ ᠶᠡᠵᠢᠶᠡᠨ ᠠᠴᠠ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠬᠦᠰᠢᠭᠡ ᠴᠢᠯᠠᠭᠤᠨ ᠲᠡᠭᠡᠷᠡᠬᠢ ᠦᠰᠦᠭ ᠤᠨ ᠤᠷᠤᠮ᠂ ᠲᠦᠷᠰᠦᠳᠦ ᠦᠰᠦᠭ ᠠᠴᠠ ᠡᠬᠢᠯᠡᠭᠦᠯᠦᠭᠡᠳ ᠦᠰᠦᠭ ᠪᠢᠴᠢᠭ ᠤᠨ ᠢᠯᠡᠷᠡᠭᠦᠯᠦᠯ ᠠᠴᠠ ᠶᠡᠭᠡ ᠮᠦᠷ ᠰᠤᠷᠠᠭ ᠮᠡᠳᠡᠵᠦ ᠰᠤᠳᠤᠯᠵᠤ ᠢᠷᠡᠭᠰᠡᠨ ᠶᠤᠮ᠃      ︽ᠠᠷᠦ ᠬᠤᠷᠴᠢᠨ ᠰᠤᠨᠢᠨ︾ ᠨᠢ ᠬᠤᠰᠢᠭᠤᠨ ᠱᠠᠳᠤᠨ ᠤ ᠰᠤᠨᠢᠨ ᠪᠤᠯᠤᠬᠰᠠᠨ ᠤ ᠬᠤᠪᠢ ᠳᠤ ᠡᠬᠢᠯᠡᠮᠡᠭᠴᠡ 8 ᠵᠦᠰᠦᠮ ᠤᠨ ᠲᠦᠷᠪᠡᠨ ᠨᠢᠭᠤᠷ ᠢᠶᠠᠷ ᠬᠡᠪᠯᠡᠭᠳᠡᠭᠰᠡᠨ ᠢᠶᠠᠨ ᠬᠤᠷᠢᠨ ᠵᠢᠯ ᠡᠶᠢᠮᠦ ᠶᠠᠩᠵᠤ ᠪᠠᠷ ᠦᠷᠬᠦᠯᠵᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠬᠦᠨ ᠳᠤ ᠮᠤᠩᠭᠤᠯ ᠰᠤᠨᠢᠨ ᠤ ᠲᠦᠷᠪᠡᠨ ᠨᠢᠭᠤᠷ ᠤᠨ ᠠᠭᠤᠯᠭ᠎ᠠ ᠬᠢᠭᠡᠳ ᠪᠤᠯᠤᠩ ᠤᠨ ᠲᠤᠬᠠᠢ ᠴᠤᠬᠤᠰ ᠲᠤᠷᠠᠳᠪᠠᠯ᠄ ᠬᠡᠯᠡᠯᠭᠡᠨ ᠦᠬᠡᠢ ᠲᠡᠷᠢᠬᠦᠨ ᠨᠢᠭᠤᠷ ᠲᠤ ᠨᠠᠮ ᠵᠠᠰᠠᠭ ᠤᠨ ᠴᠢᠬᠤᠯᠠ ᠰᠤᠨᠢᠨ ᠮᠡᠳᠡᠭᠡ ᠶᠢ ᠨᠡᠶᠢᠳᠡᠯᠡᠨ᠎ᠡ᠃ ᠬᠤᠶᠠᠳᠤᠭᠠᠷ ᠨᠢᠭᠤᠷ ᠲᠤ ᠮᠠᠯ ᠠᠵᠤ ᠠᠬᠤᠢ᠂ ᠮᠠᠯᠴᠢᠨ ᠲᠦᠮᠡᠨ᠂ ᠮᠠᠯᠵᠢᠬᠤ ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠳᠤᠷᠠᠯ᠂ ᠮᠠᠯ ᠡᠮᠨᠡᠯᠭᠡ᠂ ᠮᠡᠷᠭᠡᠵᠢᠯ ᠰᠢᠨᠡᠴᠢᠯᠡᠯᠳᠡ᠂ ᠪᠠᠶᠢᠭᠠᠯᠢ ᠠᠬᠤᠢ᠂ ᠪᠡᠯᠴᠢᠭᠡᠷ ᠬᠠᠳᠤᠯᠠᠩ ᠲᠠᠢ ᠬᠠᠮᠢᠶ᠎ᠠ ᠪᠦᠬᠦᠢ ᠠᠭᠤᠯᠭ᠎ᠠ ᠶᠢ ᠬᠠᠮᠤᠷᠤᠭᠰᠠᠨ ᠮᠡᠳᠡᠭᠡ ᠬᠢᠭᠡᠳ ᠰᠤᠷᠪᠤᠯᠵᠢᠯᠠᠭ᠎ᠠ ᠴᠢᠮᠡᠭᠡᠯᠡᠯ ᠢᠶᠠᠷ ᠭᠤᠤᠯᠳᠠᠭᠤᠯᠵᠤ᠂ ᠭᠤᠷᠪᠠᠳᠤᠭᠠᠷ ᠨᠢᠭᠤᠷ ᠪᠤᠯ ᠤᠯᠠᠨ ᠲᠦᠮᠡᠨᠴᠢ ᠨᠢᠭᠤᠷ ᠪᠠᠶᠢᠵᠤ᠂ ᠨᠠᠮ ᠤᠯᠠᠨ ᠲᠦᠮᠡᠨ᠂ ᠡᠪ ᠬᠠᠮᠳᠤ ᠵᠠᠯᠠᠭᠤᠴᠤᠳ ᠤᠨ ᠡᠪᠯᠡᠯ᠂ ᠡᠮᠡᠭᠳᠡᠶᠢᠴᠦᠳ᠂ ᠡᠷᠦᠬᠡ ᠶᠢᠨ ᠴᠡᠷᠢᠭ᠂ ᠰᠤᠶᠤᠯ ᠰᠤᠷᠭᠠᠨ ᠬᠦᠮᠦᠵᠢᠯ᠂ ᠬᠠᠤᠯᠢ ᠴᠠᠭᠠᠵᠠ᠂ ᠶᠤᠰᠤ ᠰᠤᠷᠳᠠᠬᠤᠨ᠂ ᠤᠯᠠᠮᠵᠢᠯᠠᠯᠳᠤ ᠵᠠᠩ ᠵᠠᠩᠰᠢᠯ᠂ ᠢᠳᠡᠭᠡᠨ ᠤᠮᠳᠠᠭᠠᠨ᠂ ᠡᠮ ᠡᠮᠨᠡᠯᠭᠡ ᠡᠷᠡᠭᠦᠯ ᠮᠡᠨᠳᠦ᠂ ᠨᠠᠶᠢᠷ ᠨᠠᠭᠠᠳᠤᠮ ᠭᠡᠬᠦᠴᠢᠯᠡᠨ ᠢ ᠪᠠᠭᠳᠠᠭᠠᠭᠰᠠᠨ ᠤᠯᠠᠨ ᠲᠠᠯ᠎ᠠ ᠶᠢᠨ ᠠᠭᠤᠯᠭ᠎ᠠ ᠪᠦᠬᠦᠢ ᠮᠡᠳᠡᠭᠡᠯᠡᠯ ᠪᠤᠶᠤ ᠤᠷᠠᠨ ᠴᠢᠮᠡᠭᠡᠯᠡᠯ ᠵᠢᠴᠢ ᠰᠤᠷᠪᠤᠯᠵᠢᠯᠠᠭ᠎ᠠ ᠶᠢ ᠨᠡᠶᠢᠳᠡᠯᠡᠵᠦ ᠪᠠᠶᠢᠬᠰᠠᠨ ᠪᠠ ᠲᠦᠷᠪᠡᠳᠦᠭᠡᠷ ᠨᠢᠭᠤᠷ ᠪᠤᠯ ᠤᠷᠠᠨ ᠵᠤᠬᠢᠶᠠᠯ ᠤᠨ ᠲᠤᠰᠬᠠᠢ ᠨᠢᠭᠤᠷ  ᠪᠦᠭᠡᠳ ︽ᠬᠤᠨᠳᠤ ᠨᠠᠭᠤᠷ︾ ᠲᠤᠰᠬᠠᠢ ᠪᠤᠯᠤᠩ ᠲᠠᠢ ᠶᠤᠮ᠃      ᠰᠡᠬᠦᠯ ᠤᠨ ᠨᠠᠢᠮᠠᠨ ᠵᠢᠯ ᠳᠤ 4 ᠵᠦᠰᠦᠮ ᠤᠨ ᠰᠤᠨᠢᠨ ᠪᠤᠯᠤᠨ ᠤᠤᠯ ᠤᠨ ᠬᠢ ᠠᠴᠠ ᠪᠠᠨ ᠲᠠᠬᠢᠨ ᠢᠶᠠᠷ ᠶᠡᠬᠡᠰᠦᠭᠰᠡᠨ ᠠᠴᠠ ᠡᠬᠡ ᠪᠢᠴᠢᠭ ᠤᠨ ᠲᠤᠭ᠎ᠠ ᠬᠢᠭᠡᠳ ᠦᠰᠦᠭ ᠤᠨ ᠲᠤᠭ᠎ᠠ ᠮᠦᠨ ᠲᠠᠭᠠᠭᠠᠳ ᠲᠠᠬᠢᠨ ᠲᠤᠭ᠎ᠠ ᠪᠠᠷ ᠱᠠᠭᠠᠷᠳᠠᠭᠳᠠᠵᠤ᠂ ᠨᠢᠬᠡ ᠬᠤᠶᠠᠳᠤᠭᠠᠷ ᠨᠢᠭᠤᠷ ᠲᠤ ᠶᠡᠭᠡ ᠲᠦᠯᠦᠪ ᠬᠤᠷᠠᠯ ᠤᠨ ᠮᠡᠳᠡᠭᠡ ᠪᠠᠷ ᠭᠤᠤᠯᠳᠠᠵᠤ᠂ ᠭᠤᠷᠪᠠᠳᠤᠭᠠᠷ ᠨᠢᠭᠤᠷ ᠲᠤ ︽ᠬᠦᠮᠦᠨ ᠨᠡᠶᠢᠭᠡᠮ︾᠂ ︽ᠦᠪ ᠰᠤᠶᠤᠯ︾᠂ ︽ᠰᠤᠶᠤᠯ  ᠲᠡᠦᠬᠡ︾᠂ ︽ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠯᠡᠩ︾᠂ ︽ᠮᠠᠯᠴᠢᠳ ᠤᠨ ᠬᠠᠨᠢ︾᠂ ︽ᠤᠨᠤᠯ ᠱᠦᠬᠦᠮᠡᠭ︾᠂ ︽ᠲᠤᠰᠬᠠᠢ ᠮᠡᠳᠡᠭᠡᠯᠡᠯ︾᠂ ︽ᠨᠡᠶᠢᠭᠡᠮ ᠠᠵᠢᠭᠯᠠᠯᠳᠠ︾ ᠵᠡᠷᠭᠡ ᠬᠦᠮᠦᠰᠭᠡ ᠳᠤ ᠬᠠᠷᠠᠭᠠᠯᠵᠠᠭᠤᠯᠤᠭᠰᠠᠨ ︽ᠦᠢᠯᠡᠰ ᠤᠨ ᠲᠦᠷᠦᠬᠡ︾᠂ ︽ᠨᠤᠳᠤᠭ ᠤᠨ ᠠᠯᠳᠠᠷᠳᠠᠳ︾᠂ ︽ᠦᠢᠯᠡᠰ ᠤᠨ ᠮᠦᠷ︾᠂  ︽ᠲᠡᠦᠬᠡ ᠶᠢᠨ ᠤᠯᠪᠠᠭ᠎ᠠ︾᠂ ︽ᠨᠤᠳᠤᠭ ᠰᠤᠶᠤᠯ︾  ᠂ ︽ᠴᠤᠤᠳᠤ ᠬᠦᠮᠦᠰ︾᠂ ︽ᠵᠠᠩ ᠠᠷᠠᠨᠰᠢᠨ ︵ᠮᠤᠩᠭᠤᠯ ᠠᠮᠢᠳᠤᠷᠠᠯ ᠠᠬᠤᠢ ᠶᠢᠨ ᠳᠤᠬᠠᠢ ᠬᠦᠦᠷᠨᠢᠯ᠂ ᠬᠤᠪᠴᠠᠰᠤ ᠵᠠᠰᠠᠯ᠂ ᠡᠳ᠋ᠯᠡᠯ ᠬᠡᠷᠡᠭᠯᠡᠭᠦᠷ᠂ ᠰᠢᠳᠦᠭᠡᠨ ᠵᠠᠩᠰᠢᠯ᠂  ᠬᠤᠷᠢᠮ ᠬᠤᠷᠠᠯ᠂ ᠵᠠᠩ ᠦᠢᠯᠡ᠂ ᠳᠠᠳᠬᠠᠯ ᠰᠤᠷᠳᠠᠯ ᠁︶︾  ᠂ ︽ᠬᠠᠭᠤᠴᠢ ᠬᠦᠦᠷᠨᠢᠯ︾᠂ ︽ᠲᠤᠮᠤᠭᠳᠤ ᠨᠤᠳᠤᠭ ︵ᠨᠤᠳᠤᠭ ᠤᠰᠤ᠂ ᠨᠠᠭᠤᠷ ᠭᠤᠤᠯ᠂ ᠠᠭᠤᠯᠠ ᠳᠠᠯ᠎ᠠ᠂ ᠤᠪᠤᠭ᠎ᠠ ᠱᠠᠩᠰᠢ ᠵᠡᠷᠭᠡ ᠶᠢᠨ ᠳᠤᠬᠠᠢ ᠳᠡᠥᠬᠡ ᠳᠤᠮᠤᠭ  ︶︾᠂ ︽ᠬᠤᠳᠠ ᠬᠦᠳᠡᠭᠡ ᠵᠢᠨ‌ᠵᠤᠭᠤᠭ ︵ᠮᠤᠩᠭᠤᠯᠴᠤᠳ ᠤᠨ ᠠᠳᠠᠯ ᠠᠮᠢᠳᠤᠷᠠᠯ ᠤᠨ ᠪᠠᠶᠢᠳᠠᠯ᠂ ᠦᠭᠡᠳᠡᠯᠡᠯ ᠬᠦᠭᠵᠢᠯ ᠤᠨ ᠪᠠᠶᠢᠳᠠᠯ ᠵᠢᠴᠢ ᠬᠤᠳᠠ ᠬᠦᠳᠡᠭᠡ ᠶᠢᠨ ᠠᠮᠢᠳᠤᠷᠠᠯ ᠤᠨ ᠰᠡᠭᠦᠳᠡᠷ ᠲᠠᠢ ᠲᠠᠯ᠎ᠠ᠂ ᠡᠭᠦᠳᠡᠨ ᠭᠡᠷ ᠲᠦᠷᠢᠶᠡᠰᠦᠯᠡᠵᠦ᠂ ᠬᠡᠦᠬᠡᠳ ᠬᠠᠷᠠᠵᠤ ᠰᠠᠭᠤᠭ᠎ᠠ ᠠᠷᠴᠠᠭ᠎ᠠ ᠦᠬᠡᠢ ᠪᠠᠶᠢᠳᠠᠯ᠂ ᠨᠤᠳᠤᠭ ᠤᠰᠤ ᠪᠠᠨ ᠬᠤᠳᠠᠯᠳᠤᠵᠤ ᠬᠦᠴᠢᠷᠳᠡᠢ ᠠᠮᠢᠳᠤᠷᠠᠵᠦ ᠪᠠᠶᠢᠭ᠎ᠠ ᠮᠡᠳᠦ   ᠶᠢᠨ ᠁︶︾᠂  ︽ᠬᠠᠶᠢᠷ᠎ᠠ ᠶᠢᠨ ᠬᠠᠯᠢᠶ᠎ᠠ  ︵ᠨᠡᠶᠢᠭᠡᠮ ᠤᠨ ᠳᠤᠷᠤᠢ ᠪᠠᠭᠤᠷᠠᠶᠢᠴᠤᠤᠯ ᠢ ᠳᠤᠰᠠᠯᠠᠵᠦ ᠳᠡᠮᠵᠢᠵᠦ ᠪᠠᠶᠢᠭ᠎ᠠ︶︾᠂ ︽ᠮᠤᠩᠭᠤᠯ ᠬᠡᠯᠡ︾᠂ ︽ᠮᠦᠩᠬᠡ ᠲᠤᠯᠭ᠎ᠠ ︵ᠰᠣᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠨ ᠤ ᠡᠯ᠎ᠡ ᠰᠣᠷᠣᠯᠭ᠎ᠠ ᠠᠮᠢᠳᠤᠷᠠᠯ᠂ ᠬᠦᠮᠦᠵᠢᠯ ᠪᠤᠯᠪᠠᠰᠤᠷᠠᠯ ᠤᠨ ᠲᠤᠬᠠᠢ ᠴᠢᠮᠡᠭᠡᠯᠡᠯ᠂ ᠪᠠᠭᠰᠢ ᠶᠢᠨ ᠦᠬᠦᠯᠡᠯ᠂ ᠭᠡᠷ ᠤᠨ ᠠᠬᠠᠮᠠᠳ ᠤᠨ ᠬᠡᠦᠬᠡᠳ ᠢᠶᠠᠨ ᠬᠦᠮᠦᠵᠢᠭᠦᠯᠦᠭᠰᠡᠨ ᠦᠯᠢᠭᠡᠷ ᠵᠢᠱᠢᠶ᠎ᠡ᠂ ᠵᠢᠱᠢᠶᠡᠴᠢ ᠰᠤᠷᠤᠭᠴᠢ᠂ ᠰᠠᠶᠢᠨ ᠬᠦᠮᠦᠨ ᠤ ᠰᠠᠶᠢᠨ ᠠᠵᠢᠯᠯᠠᠭ᠎ᠠ᠂ ᠰᠤᠷᠭᠠᠭᠤᠯᠢ ᠶᠢᠨ ᠲᠤᠬᠠᠢ ᠭᠦᠨᠴᠡᠳᠦ ᠴᠢᠮᠡᠬᠡᠯᠡᠯ︶︾᠂ ︽ᠮᠠᠯᠵᠢᠯ ᠰᠤᠶᠤᠯ ︵ᠮᠤᠩᠭᠤᠯᠴᠤᠳ ᠤᠨ ᠨᠡᠭᠦᠳᠡᠯ ᠰᠤᠶᠤᠯ ᠤᠨ ᠤᠯᠠᠮᠵᠢᠯᠠᠯ᠂ ᠲᠡᠦᠬᠡ ᠶᠢᠨ ᠤᠯᠠ ᠮᠦᠷ᠂ ᠲᠤᠷᠰᠢᠯᠭ᠎ᠠ᠂ ᠨᠤᠳᠤᠭ ᠤᠨ ᠮᠡᠷᠭᠡᠵᠢᠯ᠂ ᠲᠤᠮ ᠲᠤᠬᠢᠶ᠎ᠠ  ᠁︶︾᠂ ︽ᠪᠠᠶᠢᠭᠠᠯᠢ ᠤᠷᠴᠢᠨ ︵ᠪᠠᠶᠢᠭᠠᠯᠢ ᠠᠬᠤᠢ   ᠶᠢᠨ ᠬᠠᠮᠠᠭᠠᠯᠠᠯᠳᠠ᠂ ᠡᠪᠳᠡᠭᠳᠡᠯ᠂ ᠬᠦᠮᠦᠨ ᠪᠠᠶᠢᠭᠠᠯᠢ ᠶᠢᠨ ᠡᠶ᠎ᠡ  ᠵᠤᠬᠢᠴᠠᠯ᠂ ᠤᠯᠠᠮᠵᠢᠯᠠᠯᠳᠤ ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠳᠤᠷᠠᠯ  ᠤᠨ ᠬᠡᠪ ᠰᠢᠨᠵᠢ︶︾᠂ ︽ᠨᠠᠶᠢᠷ ᠨᠠᠭᠠᠳᠤᠮ ︵ᠱᠠᠭ᠎ᠠ ᠲᠤᠭᠯᠠᠭᠠᠮ᠂ ᠰᠢᠳᠠᠷ᠎ᠠ᠂ ᠪᠤᠭᠤ ᠵᠢᠷᠭᠢᠭᠡ᠂ ᠠᠮᠤᠷ ᠪᠠᠶᠠᠰᠬᠤᠯᠠᠩᠳᠤ ᠨᠠᠭᠠᠳᠤᠮ᠂ ᠠᠷᠠᠳ ᠤᠨ ᠲᠤᠮᠳᠠᠬᠢ ᠤᠶᠤᠨ ᠪᠢᠯᠢᠭ ᠲᠤ ᠲᠤᠰᠠᠳᠠᠢ ᠨᠠᠭᠠᠳᠤᠮ ᠁︶︾ ᠭᠡᠬᠦ ᠪᠤᠯᠤᠩ ᠲᠤᠬᠢᠶᠠᠵᠤ᠂ ᠲᠦᠷᠪᠡᠳᠦᠭᠡᠷ ᠨᠢᠭᠤᠷ ᠮᠦᠨ ᠤᠷᠠᠨ ᠵᠤᠬᠢᠶᠠᠯ ᠤᠨ ᠲᠤᠰᠬᠠᠢ ᠨᠢᠭᠤᠷ ᠢᠶᠠᠨ ᠪᠠᠷᠢᠮᠳᠠᠯᠠᠵᠤ ᠢᠷᠡᠭᠰᠡᠨ ᠪᠠᠶᠢᠨ᠎ᠠ᠃      ᠲᠤᠰ ᠬᠦᠮᠦᠨ ᠭᠤᠷᠪᠠᠳᠤᠭᠠᠷ ᠨᠢᠭᠤᠷ ᠢ ᠨᠢᠭᠡᠨᠳᠡ 28 ᠵᠢᠯ ᠭᠠᠷᠳᠠᠨ ᠨᠠᠶᠢᠷᠠᠭᠤᠯᠬᠤ ᠶᠢᠨ ᠲᠠᠭᠠᠤ ᠰᠤᠷᠪᠤᠯᠵᠢᠯᠠᠬᠴᠢ ᠶᠢᠨ ᠡᠭᠦᠷᠬᠡ ᠶᠢ ᠴᠤ ᠭᠦᠢᠴᠡᠳᠭᠡᠵᠦ ᠢᠷᠡᠪᠡ᠃      ᠨᠠᠶᠢᠷᠠᠭᠤᠯᠤᠬᠴᠢ ᠭᠡᠵᠦ ᠬᠡᠯᠡᠪᠡᠯ ᠨᠠᠭᠤᠢ ᠤᠯᠠᠨ ᠵᠦᠢᠯᠡᠰ ᠬᠤᠯᠪᠤᠬᠳᠠᠬᠤ ᠪᠤᠯᠬᠤᠷ ᠨᠠᠭᠠᠳᠤ ᠵᠠᠬ᠎ᠠ ᠠᠴᠠ ᠨᠢ ᠨᠢᠬᠡ ᠪᠠᠭ᠎ᠠ ᠰᠠᠭ᠎ᠠ ᠶᠠᠷᠢᠴᠢᠬᠠᠶ᠎ᠠ᠃      ᠶᠠᠭᠤᠨ ᠤ ᠤᠷᠢᠳ ᠡᠬᠡ ᠪᠢᠴᠢᠭ ᠵᠠᠰᠠᠬᠤ ᠬᠢᠭᠡᠳ ᠦᠰᠦᠭ ᠤᠨ ᠵᠦᠪ ᠪᠢᠴᠢᠯᠭᠡ ᠶᠢ ᠨᠢᠭᠡ ᠠᠯᠬᠤᠮ ᠢᠶᠠᠷ ᠪᠤᠳᠤᠭᠠᠳ᠂ ᠮᠢᠨᠦ ᠲᠠᠷᠢᠬᠢᠨ ᠳᠤ ᠪᠤᠶᠤ ᠨᠢᠳᠦᠨ ᠳᠤ ᠬᠠᠷᠠᠭᠳᠠᠬᠤ ᠰᠢᠤᠬᠠᠨ ᠰᠠᠭᠤᠭᠳᠠᠯ ᠢᠶᠠᠨ ᠲᠦᠰᠢᠨ ︽ᠡᠬᠡ ᠪᠢᠴᠢᠭ ᠵᠠᠰᠠᠬᠤ ᠬᠡᠵᠦ ᠶᠠᠭᠤ ᠪᠤᠢ︖︾᠂ ︽ᠦᠰᠦᠭ ᠬᠠᠷᠭᠤᠭᠤᠯᠬᠤ ᠬᠡᠵᠦ ᠶᠠᠭᠤ ᠪᠤᠢ︖︾ ᠭᠡᠰᠡᠨ ᠠᠰᠠᠭᠤᠯᠳᠠ ᠠᠶᠠᠨᠳᠠᠭᠠᠨ ᠯᠡ ᠤᠷᠤᠵᠤ ᠢᠷᠡᠬᠦ ᠶᠢᠨ ᠬᠠᠮᠳᠤ ᠬᠠᠷᠢᠭᠤᠯᠳᠠ ᠨᠢ ᠴᠤ ᠭᠠᠷᠴᠤ ᠢᠷᠡᠵᠦ ᠪᠠᠶᠢᠨ᠎ᠠ᠃      ᠨᠢᠬᠡ ᠨᠢᠬᠡ ᠦᠰᠦᠭ ᠲᠡᠭᠡᠷ᠎ᠡ ᠨᠢᠳᠦ ᠲᠤᠰᠴᠤ᠂ ᠠᠴᠤᠭ ᠰᠢᠯᠪᠢ᠂ ᠠᠷᠠᠭ᠎ᠠ ᠰᠢᠳᠦ᠂ ᠤᠷᠬᠢᠴᠠ ᠴᠠᠴᠤᠯᠭ᠎ᠠ ᠂ ᠨᠢᠷᠤᠭᠤ ᠭᠡᠳᠡᠰᠦ᠂ ᠴᠢᠩᠭ᠎ᠠ ᠬᠦᠨᠳᠡᠢ᠂ ᠲᠠᠶᠢᠨ ᠢᠯᠭᠠᠯ ᠤᠨ ᠲᠠᠭᠠᠪᠤᠷᠢ᠂ ᠡᠭᠡᠰᠢᠭ ᠵᠤᠬᠢᠴᠠᠬᠤ ᠶᠤᠰᠤᠨ ᠭᠡᠳᠡᠯ᠎ᠡ ᠭᠡᠶᠢᠬᠦᠯᠦᠭᠴᠢ ᠵᠤᠬᠢᠴᠠᠬᠤ ᠶᠤᠰᠤᠨ ᠭᠡᠳ ᠠᠪᠢᠶ᠎ᠠ ᠵᠦᠢ᠂ ᠦᠬᠡ ᠵᠦᠢ᠂ ᠤᠳᠬ᠎ᠠ ᠵᠦᠢ ᠳᠤ ᠬᠤᠯᠪᠤᠬᠳᠠᠬᠤ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠠᠴᠠ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ᠂ ᠶᠡᠭᠡ ᠲᠡᠭᠡᠳᠦ ᠰᠤᠷᠭᠠᠭᠤᠯᠢ ᠴᠢᠨᠠᠬᠰᠢᠯᠠᠪᠠᠯ ᠨᠠᠰᠤᠨ ᠲᠤᠷᠰᠢᠳᠠ ᠰᠤᠷᠴᠤ ᠡᠵᠡᠮᠰᠢᠨ ᠪᠠᠷᠢᠮᠳᠠᠯᠠᠬᠤ ᠴᠢᠬᠤᠯᠠᠳᠠᠢ ᠮᠤᠩᠭᠤᠯ ᠬᠡᠯᠡ ᠵᠦᠢ ᠶᠢᠨ ᠦᠨᠳᠦᠰᠦᠨ ᠮᠡᠳᠡᠯᠭᠡ ᠶᠢ ᠦᠢᠯᠡᠳᠦᠯᠭᠡ ᠲᠡᠭᠡᠷ᠎ᠡ ᠲᠤᠤᠱ ᠲᠤᠨᠢ ᠲᠠᠪᠳᠠᠵᠤ ᠭᠠᠷᠬᠤ ᠶᠢ ︽ᠡᠬᠡ ᠪᠢᠴᠢᠭ ᠵᠠᠰᠠᠬᠤ ᠪᠤᠶᠤ ᠦᠰᠦᠭ ᠬᠠᠷᠭᠤᠭᠤᠯᠬᠤ︾ ᠬᠡᠵᠦ ᠬᠡᠯᠡᠵᠦ ᠪᠤᠯᠤᠮᠠᠷ᠃      ᠤᠶᠢᠷ᠎ᠠ ᠶᠢᠨ ᠵᠢᠯ ᠤᠳ ᠲᠤ ᠭᠠᠷ ᠢᠶᠠᠷ ᠪᠢᠴᠢᠬᠦ ᠴᠦᠭᠡᠬᠡᠷᠡᠭᠰᠡᠨ ᠠᠴᠠ ᠪᠤᠶᠤ ᠦᠰᠦᠭ ᠤᠨ ᠪᠢᠴᠢᠯᠭᠡ ᠳᠤ ᠵᠠᠰᠠᠯᠳᠠ ᠤᠷᠤᠭᠤᠯᠤᠬᠰᠠᠨ ᠠᠴᠠ ᠵᠦᠪ ᠦᠰᠦᠭ ᠢᠶᠠᠨ ᠴᠦ ᠪᠤᠷᠤᠭᠤ ᠪᠤᠯᠭᠠᠵᠤ ᠪᠢᠴᠢᠬᠦ ᠭᠡᠳ ᠪᠠᠶᠢᠬᠤ ᠦᠵᠡᠭᠳᠡᠯ ᠤᠷᠤᠰᠢᠬᠤ ᠪᠤᠯᠤᠬᠰᠠᠨ᠃ ᠶᠠᠭ ᠦᠨᠡᠨᠳᠡᠭᠡᠨ ᠭᠠᠷ ᠢᠶᠠᠷ ᠪᠢᠴᠢᠬᠦ ᠦᠶ᠎ᠡ ᠳᠤ ᠦᠭᠡ ᠦᠰᠦᠭ ᠴᠢᠨᠢ ᠠᠶᠠᠨᠳᠠᠭᠠᠨ ᠭᠠᠷ ᠤᠨ ᠠᠶ᠎ᠠ ᠪᠠᠷ ᠬᠠᠳᠠᠩᠰᠢᠭᠰᠠᠨ ᠶᠤᠰᠤᠭᠠᠷ ᠵᠦᠪ ᠪᠢᠴᠢᠭᠳᠡᠬᠦ ᠤᠴᠢᠷ ᠲᠠᠢ ᠶᠤᠮ᠃      ᠰᠡᠳᠦᠪ ᠠᠴᠠ ᠭᠠᠳᠠᠭᠤᠷ ᠬᠡᠳᠦᠨ ᠦᠭᠡ ᠶᠠᠷᠢᠬᠤ ᠳᠤ ᠫᠠᠶᠢᠵᠠ ᠢᠯᠡᠷᠬᠡᠶᠢᠯᠡᠯ᠂ ᠬᠠᠨ᠎ᠠ ᠬᠠᠶᠠᠭᠠᠨ ᠲᠡᠭᠡᠷᠡᠬᠢ ᠦᠰᠦᠭ᠂ ᠬᠤᠷᠠᠯ ᠴᠤᠭᠯᠠᠭᠠᠨ᠂ ᠬᠦᠳᠡᠯᠭᠡᠭᠡᠨ‌ᠠᠵᠢᠯᠯᠠᠭᠠᠨ ᠤ ᠮᠡᠳᠡᠭᠳᠡᠯ ᠭᠡᠳ ᠨᠢᠳᠦᠨ ᠳᠤ ᠦᠷᠳᠦᠬᠦ ᠶᠢᠨ ᠲᠤᠭᠠᠯᠠᠩ ᠢᠶᠠᠷ ᠡᠮᠵᠡᠭ ᠪᠤᠷᠤᠭᠤ ᠨᠢ ᠨᠢᠭᠡᠯᠡ ᠢᠯᠡ ᠬᠠᠷᠠᠭᠳᠠᠬᠤ ᠪᠠᠷ ᠦᠨᠦᠬᠢ ︽ᠠᠵᠢᠯ ᠲᠦᠷᠦᠯ ᠤᠨ ᠡᠪᠡᠳᠴᠢᠨ ︾ ᠳᠤ ᠨᠢ ᠠᠷᠭ᠎ᠠ ᠦᠭᠡᠢ ᠨᠡᠷᠪᠡᠭᠳᠡᠵᠦ ᠭᠡᠳᠡᠭ ᠢᠶᠠᠨ ᠮᠡᠳᠡᠷᠡᠬᠦ ᠦᠬᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠪᠤᠯᠤᠬᠰᠠᠨ ᠤ ᠲᠠᠭᠠᠤ ᠦᠷᠦᠭᠡᠯ ᠤᠨ ᠪᠦᠭᠡᠰᠦ ᠶᠢ ᠲᠡᠭᠦᠬᠦ ᠶᠢᠨ ᠤᠷᠤᠨ ᠳᠤ ᠦᠪᠡᠷ ᠤᠨ ᠢᠶᠠᠨ ᠰᠤᠨᠢᠨ ᠤ ᠨᠢᠭᠤᠷ ᠢ ᠪᠤᠦ  ᠪᠦᠭᠡᠰᠦᠳᠡᠭᠦᠯᠦᠶ᠎ᠡ ᠬᠡᠮᠡᠨ ᠶᠡᠬᠡᠯ᠎ᠡ ᠬᠢᠴᠢᠶᠡᠨ ᠢᠷᠡᠭᠰᠡᠨ ᠬᠡᠵᠦ ᠬᠡᠯᠡᠬᠦ ᠳᠤ ᠬᠡᠳᠦᠷᠡᠭᠦᠯᠦᠯ ᠪᠢᠰᠢ᠃      ᠮᠠᠨ ᠤ ᠰᠤᠨᠢᠨ ᠤ ᠬᠡᠳᠦᠨ ᠦᠶ᠎ᠡ ᠶᠢᠨ ᠨᠠᠶᠢᠷᠠᠭᠤᠯᠤᠬᠴᠢ ᠰᠤᠷᠪᠤᠯᠵᠢᠯᠠᠬᠴᠢᠳ ᠤᠨ ᠲᠤᠬᠠᠢ ᠲᠡᠭᠡᠷ᠎ᠡ ᠬᠤᠭᠤᠴᠠᠭᠠᠨ ᠤ ︽ᠪᠢ ᠠᠷᠦ ᠬᠤᠷᠴᠢᠨ ᠰᠤᠨᠢᠨ ᠲᠠᠢ ᠪᠠᠨ︾ ᠲᠤᠰᠬᠠᠢ ᠪᠤᠯᠤᠩ ᠢᠶᠠᠷ ᠨᠡᠶᠢᠳᠡᠯᠡᠭᠰᠡᠨ ᠤ᠊ · ᠪᠤᠶ᠋ᠬᠠᠦ᠋ᠯᠵᠡᠢ ᠪᠠᠭᠰᠢ ᠶᠢᠨ ︽ᠴᠠᠭᠠᠰᠤᠨ ᠬᠡᠪᠯᠡᠯ ᠤᠨ ᠠᠷᠦ ᠬᠤᠷᠴᠢᠨ ᠰᠤᠨᠢᠨ ᠮᠢᠨᠢ︾ ᠭᠡᠬᠦ ᠵᠤᠬᠢᠶᠠᠯ ᠳᠤ ᠲᠤᠳᠤᠷᠬᠠᠢ ᠪᠢᠴᠢᠭᠰᠡᠨ ᠪᠤᠯᠬᠤᠷ ᠪᠢ ᠲᠠᠪᠳᠠᠨ ᠶᠠᠷᠢᠬᠤ ᠦᠬᠡᠢ᠃ ᠠᠳᠡ ᠡᠷᠭᠢᠴᠡᠭᠦᠯᠦᠨ ᠲᠤᠳᠤᠷᠬᠠᠶᠢᠯᠠᠬᠤ ᠠᠴᠠ᠂ ᠮᠠᠨ ᠤ ᠮᠤᠩᠭᠤᠯ ᠨᠠᠶᠢᠷᠠᠭᠤᠯᠬᠤ ᠬᠡᠯᠳᠡᠰ ᠤᠨ ᠬᠢᠨᠢ ᠶᠡᠷᠦᠳᠡᠭᠡᠨ ᠯᠡ ᠬᠡᠳᠦᠬᠡᠨ ᠬᠦᠮᠦᠨ᠃ ᠡᠬᠡ ᠪᠢᠴᠢᠭ ᠤᠨ ᠵᠠᠰᠠᠯᠳᠠ ᠬᠢᠨᠠᠯᠳᠠ ᠬᠢᠭᠡᠳ ᠨᠠᠶᠢᠷᠠᠭᠤᠯᠭ᠎ᠠ ᠳᠤ ᠬᠠᠮᠳᠤ ᠳᠠᠭᠠᠨ ᠵᠦᠪᠯᠡᠯᠴᠡᠵᠦ᠂ ᠦᠭᠡ ᠦᠬᠦᠯᠡᠪᠦᠷᠢ ᠶᠢᠨ ᠨᠡᠶᠢᠴᠡᠪᠦᠷᠢ ᠲᠠᠢ ᠡᠰᠡᠬᠦ᠂ ᠠᠯᠢ ᠨᠢᠬᠡ ᠪᠠᠳᠠᠭ ᠦᠭᠡ ᠶᠢᠨ ᠪᠠᠶᠢᠷᠢᠰᠢᠯ ᠰᠤᠯᠢᠭᠳᠠᠭᠰᠠᠨ ᠡᠰᠡᠬᠦ᠂ ᠨᠢᠭᠡ ᠮᠡᠳᠡᠭᠡ ᠶᠢᠨ ᠠᠭᠤᠯᠭ᠎ᠠ ᠳᠤ ᠨᠤᠷᠱᠤᠭᠤᠨ ᠪᠤᠶᠤ ᠡᠰᠡ ᠤᠶᠢᠯᠠᠭᠠᠬᠳᠠᠬᠤ ᠮᠢᠬᠠᠴᠢᠯᠠᠬᠰᠠᠨ ᠤᠷᠴᠢᠭᠤᠯᠭ᠎ᠠ ᠪᠠᠶᠢᠬᠤ ᠡᠰᠡᠬᠦ ᠠᠴᠠ ᠦᠭᠰᠦᠭᠦᠯᠦᠭᠡᠳ ᠴᠢᠮᠡᠭᠡᠯᠡᠯ ᠢ ᠶᠠᠭᠠᠬᠢᠵᠤ ᠤᠨᠤᠴᠢᠳᠠᠢ ᠤᠩᠰᠢᠪᠤᠷᠢᠳᠠᠢ ᠤᠷᠠᠯᠢᠭ ᠭᠠᠷᠴᠠᠬᠯᠠᠬᠤ ᠶᠢ ᠬᠡᠳᠦ ᠬᠡᠳᠦᠨ ᠲᠠᠯ᠎ᠠ ᠠᠴᠠ ᠨᠢ ᠶᠠᠷᠢᠯᠴᠠᠵᠤ ᠪᠠᠶᠢᠭᠠᠳ ᠠᠯᠢ ᠡᠪᠳᠡᠢ ᠭᠡᠰᠡᠨ ᠢᠶᠠᠨ ᠰᠤᠩᠭᠤᠵᠤ᠂ ᠴᠤᠬᠤᠮ ᠴᠤ ︽ᠭᠤᠷᠪᠠᠨ ᠡᠯᠳᠡᠭᠦᠷᠴᠢᠨ ᠨᠡᠶᠢᠯᠡᠪᠡᠯ ᠨᠢᠭᠡ ᠵᠤ᠋ ᠭᠧ ᠯᠢᠶᠠᠩ ᠲᠠᠢ ᠲᠡᠩᠴᠡᠨ᠎ᠡ︾ ᠭᠡᠳᠡᠭ ᠤᠨ ᠵᠢᠮ᠎ᠡ ᠶᠢ ᠮᠦᠷᠳᠡᠵᠦ ᠢᠷᠡᠭᠰᠡᠨ ᠬᠡᠵᠦ ᠬᠡᠯᠡᠵᠦ ᠪᠤᠯᠤᠨ᠎ᠠ᠃         ︽ᠡᠬᠡ ᠪᠢᠴᠢᠭ ᠨᠠᠶᠢᠷᠠᠭᠤᠯᠬᠤ ᠭᠡᠵᠦ ᠶᠠᠭᠤ ᠪᠤᠢ︖︾ ᠲᠡᠭᠡᠷ᠎ᠡ ᠬᠦᠷᠴᠦ ᠢᠷᠡᠪᠡᠯ᠂ ᠦᠬᠡᠰ ᠤᠨ ᠰᠠᠩ᠂ ᠦᠬᠡ ᠵᠦᠢ᠂ ᠦᠭᠦᠯᠡᠪᠦᠷᠢ ᠵᠦᠢ᠂ ᠨᠠᠶᠢᠷᠠᠭᠤᠯᠭ᠎ᠠ ᠵᠦᠢ ᠳᠤ ᠤᠷᠤᠵᠤ᠂ ᠦᠭᠡ ᠦᠭᠦᠯᠡᠪᠦᠷᠢ ᠶᠢᠨ ᠨᠡᠶᠢᠴᠡᠪᠦᠷᠢ ᠲᠠᠢ ᠡᠰᠡᠬᠦ᠂ ᠬᠡᠯᠡ ᠨᠠᠶᠢᠷᠠᠭᠤᠯᠭ᠎ᠠ ᠤᠷᠤᠰᠤᠮ᠎ᠠ ᠵᠤᠬᠢᠴᠠᠩᠭᠤᠢ ᠡᠰᠡᠬᠦ ᠭᠡᠳ ᠪᠠᠰᠠᠯᠠ ᠬᠡᠯᠡ ᠵᠦᠢ ᠶᠢᠨ ᠶᠡᠷᠦ ᠶᠢᠨ ᠮᠡᠳᠡᠯᠭᠡ ᠶᠢ ᠳᠠᠪᠳᠠᠵᠤ ᠭᠠᠷᠬᠤ ᠶᠠᠪᠤᠴᠠ ᠬᠡᠵᠦ ᠲᠤᠶᠢᠯ ᠤᠨ ᠲᠦᠭᠦᠮ ᠢᠶᠠᠷ ᠪᠠᠭᠴᠠᠯᠠᠶ᠎ᠠ᠃      ᠦᠰᠦᠭ ᠦᠷᠦᠬᠦ ᠲᠠᠯ᠎ᠠ ᠪᠠᠷ ᠬᠡᠯᠡᠪᠡᠯ᠂ ᠰᠤᠨᠢᠨ ᠢ ᠡᠬᠢᠯᠡᠮᠡᠭᠴᠡ ᠬᠤᠰᠢᠭᠤᠨ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠶᠢᠨ ᠠᠵᠢᠯᠳᠠᠨ ᠢᠶᠠᠷ ᠲᠤᠭᠤᠯᠭᠠᠨ ᠦᠰᠦᠭ ᠢᠶᠠᠷ ᠲᠡᠭᠦᠯᠬᠡᠵᠦ᠂ ᠬᠡᠪ ᠬᠢᠵᠦ ᠪᠠᠷᠯᠠᠳᠠᠭ ᠪᠠᠶᠢᠬᠰᠠᠨ᠃ ᠬᠡᠳᠦᠨ ᠵᠢᠯ ᠤᠨ ᠲᠠᠷᠠᠭ᠎ᠠ ᠺᠤᠮᠫᠢᠥᠲ᠋ᠧᠷ ᠢᠶᠠᠷ ᠦᠰᠦᠭ ᠴᠤᠬᠢᠵᠤ ᠲᠠᠷᠤᠮᠠᠯᠯᠠᠬᠤ ᠪᠤᠯᠤᠬᠰᠠᠨ ᠦᠶ᠎ᠡ ᠳᠤ ᠮᠦᠨ ᠲᠤᠰᠬᠠᠢ ᠦᠰᠦᠭ ᠦᠷᠦᠮᠳᠡᠭᠴᠢ ᠲᠠᠢ ᠪᠠᠶᠢᠪᠠ᠃ ᠰᠡᠭᠦᠯ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠬᠠᠷᠢᠨ ᠦᠰᠦᠭ ᠴᠤᠬᠢᠬᠤ ᠠᠵᠢᠯ ᠴᠤ ᠨᠠᠶᠢᠷᠠᠭᠤᠯᠤᠬᠴᠢ ᠶᠢᠨ ᠪᠤᠯᠵᠤ ᠡᠳᠦᠬᠡ ᠪᠤᠯᠳᠠᠯ᠎ᠠ ᠡᠶᠢᠮᠦᠷᠬᠦ ᠶᠠᠩᠵᠤ ᠪᠠᠷ  ᠦᠷᠬᠦᠯᠵᠢᠯᠡᠪᠡ᠃      ᠲᠤᠭ᠎ᠠ ᠪᠠᠷ ᠦᠭᠦᠯᠡᠬᠦᠢ ᠳᠤ᠄ 8 ᠵᠦᠰᠦᠮ ᠤᠨ ᠰᠤᠨᠢᠨ ᠤ ᠨᠢᠭᠡ ᠨᠢᠭᠤᠷ ᠲᠤ 2000 ᠦᠰᠦᠭ ᠤᠨ ᠡᠬᠡ ᠪᠢᠴᠢᠭ ᠬᠡᠷᠡᠭᠰᠡᠨ᠎ᠡ᠃ ᠭᠠᠷᠠᠭ ᠪᠦᠷᠢ ᠳᠤ ᠨᠢᠭᠡ ᠬᠤᠪᠢ ᠲᠠᠷᠤᠮᠠᠯᠯᠠᠳᠠᠭ᠃ ᠰᠠᠷ᠎ᠠ ᠶᠢᠨ ᠡᠴᠦᠰ ᠤᠨ ᠭᠠᠷᠠᠭ ᠤᠨ ᠬᠡᠪᠯᠡᠯ ᠪᠤᠶᠤ ᠵᠠᠷᠢᠮ ᠦᠶ᠎ᠡ ᠶᠢᠨ ᠨᠡᠮᠡᠯᠳᠡ ᠲᠤᠰᠬᠠᠢ ᠨᠢᠭᠤᠷ ᠤᠨ ᠬᠡᠪᠯᠡᠯ ᠢ ᠪᠤᠳᠤᠪᠠᠯ ᠨᠢᠭᠡ ᠵᠢᠯ ᠳᠤ 50 ᠰᠢᠬᠠᠮ ᠬᠤᠭᠤᠴᠠᠭ᠎ᠠ ᠶᠢᠨ ᠰᠤᠨᠢᠨ ᠬᠡᠪᠯᠡᠭᠳᠡᠵᠦ ᠪᠠᠶᠢᠪᠠ᠃ ᠨᠢᠭᠡ ᠨᠢᠭᠤᠷ ᠤᠨ ᠬᠠᠷᠢᠭᠤᠴᠠᠭᠰᠠᠨ ᠨᠠᠶᠢᠷᠠᠭᠤᠯᠤᠭᠴᠢ ᠶᠢᠨ ᠭᠠᠷ ᠢᠶᠠᠷ ᠵᠢᠯ ᠳᠤ 10 ᠲᠦᠮᠡᠨ ᠦᠰᠦᠭ ᠪᠦᠬᠦᠢ ᠰᠤᠨᠢᠨ ᠨᠠᠶᠢᠷᠠᠭᠤᠯᠤᠭᠳᠠᠵᠤ ᠪᠠᠶᠢᠬᠰᠠᠨ ᠪᠠᠶᠢᠨ᠎ᠠ᠃ ᠢᠩᠬᠢᠵᠦ ᠪᠤᠳᠤᠬᠤ ᠪᠠᠷ 20 ᠵᠢᠯ ᠳᠤ 200 ᠲᠦᠮᠡᠨ ᠦᠰᠦᠭ ᠤᠨ ᠡᠬᠡ ᠪᠢᠴᠢᠭ ᠨᠠᠶᠢᠷᠠᠭᠤᠯᠵᠤ᠂ ᠰᠡᠬᠦᠯ ᠤᠨ ᠨᠠᠢᠮᠠᠨ ᠵᠢᠯ ᠤᠨ 4 ᠵᠦᠰᠦᠮ ᠤᠨ ᠶᠡᠭᠡ ᠬᠡᠪᠳᠦ ᠰᠤᠨᠢᠨ ᠤ ᠨᠢᠭᠡᠯᠡ ᠨᠢᠭᠤᠷ ᠲᠤ ᠡᠬᠡ ᠪᠢᠴᠢᠭ ᠤᠨ ᠦᠰᠦᠭ ᠤᠨ ᠲᠤᠭ᠎ᠠ 4000 ᠢᠯᠡᠭᠦᠦ ᠦᠷᠦᠭᠳᠡᠬᠦ ᠪᠤᠯᠤᠬᠰᠠᠨ ᠢᠶᠠᠷ ᠵᠢᠯ ᠳᠤ ᠨᠢᠭᠡ ᠨᠢᠭᠤᠷ ᠤᠨ ᠬᠠᠷᠢᠭᠤᠴᠠᠭᠰᠠᠨ ᠨᠠᠶᠢᠷᠠᠭᠤᠯᠤᠭᠴᠢ ᠶᠢᠨ ᠭᠠᠷ ᠢᠶᠠᠷ 20 ᠲᠦᠮᠡᠨ ᠦᠰᠦᠭ ᠤᠨ ᠡᠬᠡ ᠪᠢᠴᠢᠭ ᠨᠠᠶᠢᠷᠠᠭᠤᠯᠤᠭᠳᠠᠵᠤ᠂ 8 ᠵᠢᠯ ᠳᠤ 160 ᠲᠦᠮᠡᠨ ᠦᠰᠦᠭ ᠪᠠᠷᠯᠠᠭᠳᠠᠵᠤ ᠤᠩᠰᠢᠬᠴᠢ ᠲᠦᠮᠡᠨ ᠳᠤ ᠬᠦᠷᠳᠡᠭᠡᠯ ᠪᠤᠯᠵᠤ ᠢᠷᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠵᠢᠯ ᠳᠤ ᠲᠤᠵᠢ ᠭᠤᠷᠪᠠᠳᠤᠭᠠᠷ ᠨᠢᠭᠤᠷ ᠤᠨ ᠨᠠᠶᠢᠷᠠᠭᠤᠯᠤᠭᠴᠢ ᠪᠠᠶᠢᠬᠰᠠᠨ ᠢᠶᠠᠷ ᠮᠢᠨᠦ ᠭᠠᠷ ᠢᠶᠠᠷ 360 ᠲᠦᠮᠡᠨ ᠦᠰᠦᠭ ᠴᠤᠭᠴᠠᠯᠠᠭᠳᠠᠵᠤ ᠢᠷᠡᠭᠰᠡᠨ ᠭᠡᠵᠦ ᠨᠠᠷᠢᠨ ᠲᠠᠩᠰᠠ ᠪᠤᠳᠤᠵᠤ ᠦᠵᠡᠭᠡᠳ ᠭᠠᠶᠢᠬᠠᠵᠤ ᠠᠪᠤᠪᠠ᠃        ᠰᠤᠨᠢᠨ ᠤ ᠨᠢᠭᠤᠷ ᠤᠨ ᠲᠤᠬᠢᠷᠠᠭᠤᠯᠤᠯᠳᠠ ᠳᠤ ᠪᠠᠰᠠᠴᠤ ᠡᠬᠡ ᠪᠢᠴᠢᠭ ᠤᠨ ᠠᠭᠤᠯᠭ᠎ᠠ ᠶᠢᠨ ᠭᠦᠨᠴᠡ ᠬᠦᠨᠳᠦᠴᠡ᠂ ᠦᠭᠡ ᠦᠰᠦᠭ ᠤᠨ ᠲᠤᠭ᠎ᠠ᠂ ᠵᠤᠬᠢᠶᠠᠯ ᠤᠨ ᠭᠠᠷᠴᠠᠭ ᠢ ᠨᠢᠭᠡ ᠤᠳᠠᠰᠤᠨ ᠲᠡᠭᠡᠷ᠎ᠡ ᠲᠠᠭᠠᠷᠠᠬᠤ ᠠᠴᠠ ᠵᠠᠶᠢᠯᠠᠰᠬᠢᠬᠦ᠂ ᠪᠤᠯᠤᠩ ᠤᠨ ᠪᠠᠭᠳᠠᠭᠠᠮᠵᠢ᠂ ᠨᠢᠭᠤᠷ ᠤᠨ ᠬᠡᠪ ᠵᠤᠬᠢᠮᠵᠢᠳᠠᠢ᠂ ᠦᠵᠡᠮᠦᠷᠢ ᠲᠠᠢ ᠵᠡᠷᠭᠡ ᠲᠠᠯ᠎ᠠ ᠪᠠᠷ ᠪᠤᠳᠤᠯᠬᠢᠯᠠᠬᠰᠠᠨ ᠤᠷᠢᠳᠠᠯ ᠲᠤᠤᠷ᠎ᠠ ᠴᠡᠭ ᠲᠤᠰᠤᠯ ᠢ ᠮᠦᠷ ᠤᠨ ᠡᠬᠢᠨ ᠳᠤ ᠤᠷᠤᠭᠤᠯᠬᠤ ᠦᠬᠡᠢ ᠪᠠᠶᠢᠬᠤ ᠮᠡᠳᠦ ᠶᠢᠨ ᠬᠠᠮᠤᠭ ᠨᠠᠭᠠᠳᠤ ᠵᠠᠬ᠎ᠠ ᠶᠢᠨ ᠠᠰᠠᠭᠤᠳᠠᠯ ᠢ ᠴᠤ ᠰᠢᠢᠳᠪᠦᠷᠢᠯᠡᠬᠦ ᠬᠡᠷᠡᠭᠳᠡᠢ ᠪᠠᠶᠢᠳᠠᠭ᠃      ᠠᠳᠡ ᠬᠦᠷᠳᠡᠯ᠎ᠡ ᠡᠷᠭᠢᠴᠡᠭᠦᠯᠬᠦ ᠪᠠᠷ ᠦᠭᠡ ᠦᠰᠦᠭ ᠯᠦᠭᠡ ᠦᠭᠦᠯᠡᠯᠳᠦᠨ ᠦᠵᠦᠭ ᠪᠢᠷ ᠬᠤᠷᠤᠶᠢᠯᠠᠵᠤ ᠢᠷᠡᠭᠰᠡᠨ ᠬᠡᠮᠡᠷ ᠲᠦᠷᠦᠭᠳᠡᠯ ᠤᠷᠤᠵᠤ᠂ ᠨᠠᠶᠢᠷᠠᠭᠤᠯᠤᠬᠴᠢ ᠪᠤᠶᠤ ᠰᠤᠷᠪᠤᠯᠵᠢᠯᠠᠬᠴᠢ ᠭᠡᠬᠦ ᠨᠡᠷ᠎ᠡ ᠳᠡᠭᠡᠨ ᠤᠰᠤᠯᠳᠠᠭᠰᠠᠨ ᠦᠭᠡᠢ ᠬᠡᠮᠡᠨ ᠴᠤᠬᠤᠰ ᠪᠤᠳᠤᠬᠤ ᠶᠢᠨ ᠲᠠᠭᠠᠤ ᠦᠰᠦᠭ ᠪᠢᠴᠢᠭ ᠤᠨ ᠰᠤᠶᠤᠷᠬᠠᠯ᠂ ᠦᠵᠦᠭ ᠪᠢᠷ ᠤᠨ ᠰᠤᠷᠢᠶ᠎ᠠ ᠪᠤᠯᠤᠬᠰᠠᠨ᠂ ᠦᠭᠡᠷᠡᠴᠢᠯᠡᠯᠳᠡ ᠨᠡᠭᠡᠭᠡᠯᠳᠡ ᠴᠢᠯᠦᠭᠡᠳᠦ ᠶᠠᠪᠤᠯᠴᠠᠭ᠎ᠠ ᠶᠢᠨ ᠵᠤᠷᠢᠭ ᠰᠠᠨᠠᠭ᠎ᠠ᠂ ᠴᠠᠭ ᠦᠶ᠎ᠡ ᠶᠢᠨ ᠭᠤᠤᠯ ᠬᠦᠭ ᠠᠶᠠᠰ ᠢ ᠴᠤᠤᠷᠢᠶᠠᠳᠤᠨ᠂ ᠨᠡᠶᠢᠬᠡᠮ ᠲᠡᠦᠬᠡ ᠶᠢᠨ ᠨᠢᠬᠡᠨ ᠶᠤᠰᠤᠨ ᠤ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠪᠠᠨ ᠭᠦᠢᠴᠡᠳᠭᠡᠭᠰᠡᠨ ᠬᠠᠮᠤᠭ ᠤᠨ ᠬᠠᠶᠢᠷᠠᠳᠤ ︽ᠠᠷᠦ ᠬᠤᠷᠴᠢᠨ ᠰᠤᠨᠢᠨ︾ ᠳᠠᠭᠠᠨ ᠲᠠᠯᠠᠷᠬᠠᠨ ᠲᠠᠯᠠᠷᠬᠠᠬᠤ ᠦᠬᠡᠢ ᠪᠠᠶᠢᠵᠤ ᠦᠯᠦ ᠪᠤᠯᠬᠤ ᠶᠢ ᠤᠬᠠᠪᠠ᠃      ᠦᠨᠥ ᠪᠢ ᠪᠠᠰᠠ ᠹᠠᠨ ᠰᠢᠶᠤᠤ ᠴᠢᠩ ᠤᠨ  ︽ᠨᠤᠳᠤᠭ ᠤᠰᠠᠳᠤᠭᠰᠠᠨ ᠲᠡᠮᠳᠡᠭᠯᠡᠯ ︵灭籍记︶︾ ᠭᠡᠬᠦ ᠵᠤᠬᠢᠶᠠᠯ ᠳᠠᠬᠢ ︽ ᠴᠠᠭᠠᠰᠤ —  ᠨᠤᠳᠤᠭ —  ᠪᠡᠶ᠎ᠡ ᠶᠢᠨ ᠭᠠᠷᠤᠯ︾ ᠭᠤᠷᠪᠠ ᠶᠢᠨ ᠭᠤᠷᠮᠤᠰᠤᠨ ᠬᠠᠷᠢᠴᠠᠭ᠎ᠠ ᠶᠢᠨ ᠲᠤᠭᠤᠷᠢᠨ ᠳᠤ ᠭᠤᠷᠪᠠᠨ ᠦᠶ᠎ᠡ ᠶᠢᠨ ᠬᠦᠮᠦᠨ ᠤ ︽ᠴᠠᠭᠠᠰᠤ︾ ᠡᠷᠢᠬᠦ ᠬᠤᠪᠢ ᠵᠠᠶᠠᠭ᠎ᠠ ᠶᠢ ᠪᠢᠴᠢᠭᠰᠡᠨ ᠢ ᠰᠠᠨᠠᠮᠰᠠᠷ ᠦᠭᠡᠢ ᠪᠤᠳᠤᠭᠠᠳ ᠤᠯᠪᠠ᠃ ᠡᠨᠡ ᠬᠡᠰᠡᠭ ᠴᠠᠭᠠᠰᠤ ᠨᠢ ᠥᠭᠡᠷ᠎ᠡ ᠬᠡᠳᠦᠨ ᠨᠡᠷᠡᠶᠢᠳᠦᠯ ︽ᠦᠷᠡᠴᠢᠯᠡᠨ ᠲᠡᠵᠢᠭᠡᠬᠦ ᠭᠡᠷ᠎ᠡ᠂ ᠭᠡᠷ ᠬᠦᠷᠦᠩᠭᠡ ᠶᠢᠨ ᠭᠡᠷ᠎ᠡ᠂ ᠲᠠᠩᠰᠠ ᠡᠪᠬᠡᠮᠡᠯ᠂ ᠲᠠᠨᠢᠯᠴᠠᠭᠤᠯᠭ᠎ᠠ ᠶᠢᠨ ᠪᠢᠴᠢᠭ᠂ ᠡᠷᠦᠬᠡ ᠠᠮᠠ ᠶᠢᠨ ᠲᠠᠩᠰᠠ︾ ᠭᠡᠰᠡᠨ ᠤᠯᠠᠨ ᠠᠭᠤᠯᠬᠤᠨ ᠢᠶᠠᠷ ᠵᠤᠬᠢᠶᠠᠯ ᠤᠨ ᠦᠢᠯᠡ ᠶᠠᠪᠤᠳᠠᠯ ᠢ  ᠬᠡᠯᠬᠢᠭᠰᠡᠨ ᠪᠠᠶᠢᠪᠠ᠃ ᠵᠤᠬᠢᠶᠠᠬᠴᠢ ︽ᠬᠠᠭᠤᠳᠠᠰᠤ ᠴᠠᠭᠠᠰᠤ︾ ᠶᠢᠨ ᠬᠦᠮᠦᠨ ᠳᠤ ᠦᠵᠡᠬᠦᠯᠬᠦ ᠬᠦᠨᠳᠦ ᠴᠢᠨᠠᠷ ᠤᠨ ᠲᠤᠬᠠᠢ᠄ ︽ᠪᠢᠳᠡ ᠬᠡᠳᠦᠶᠢᠪᠡᠷ ᠬᠠᠭᠤᠳᠠᠰᠤ ᠴᠠᠭᠠᠰᠤ ᠨᠢ ᠨᠢᠭᠡ ᠬᠦᠮᠦᠨ ᠢ ᠤᠷᠤᠯᠠᠵᠤ ᠲᠡᠶᠢᠯᠬᠦ ᠦᠭᠡᠢ ᠶᠢ᠂ ᠮᠦᠨ ᠨᠢᠭᠡ ᠰᠠᠭᠤᠷᠢ ᠪᠠᠶᠢᠰᠢᠩ ᠲᠠᠢ ᠲᠡᠩᠴᠡᠬᠦ ᠦᠬᠡᠢ ᠶᠢ ᠮᠡᠳᠡᠬᠦ ᠪᠤᠯᠪᠠᠴᠤ ᠬᠡᠷᠪᠡ ᠡᠨᠡ ᠬᠡᠰᠡᠭ ᠴᠠᠭᠠᠰᠤ ᠪᠠᠶᠢᠬᠤ ᠦᠭᠡᠢ ᠳᠤ ᠬᠦᠷᠪᠡᠯ᠂ ᠴᠢ ᠬᠡᠨ ᠭᠡᠳᠡᠭ ᠡᠰᠡᠬᠦᠯ᠎ᠡ ᠬᠡᠨ ᠪᠢᠰᠢ ᠭᠡᠳᠡᠭ ᠢ᠂ ᠴᠢᠮ᠎ᠠ ᠳᠤ ᠭᠡᠷ ᠪᠠᠶᠢᠰᠢᠩ ᠲᠠᠢ ᠪᠤᠶᠤ ᠦᠭᠡᠢ ᠡᠰᠡᠬᠦ ᠶᠢ ᠬᠡᠨ ᠴᠤ ᠬᠡᠯᠡᠭᠡᠳ ᠪᠤᠯᠬᠤ ᠶᠠᠭᠤᠮ᠎ᠠ ᠪᠢᠰᠢ᠂ ᠡᠨᠡ ᠬᠡᠰᠡᠭ ᠴᠠᠭᠠᠰᠤ ᠯᠡ ᠬᠡᠯᠡᠪᠡᠯ ᠪᠤᠯᠬᠤ ᠨᠢ ᠲᠡᠷᠡ︾ ᠭᠡᠵᠦ ︽ᠬᠠᠭᠤᠳᠠᠰᠤ ᠴᠠᠭᠠᠰᠤ ᠶᠢᠨ ᠬᠦᠴᠦᠨ ᠴᠢᠳᠠᠯ ︾ ᠢ ᠯᠠᠪᠰᠢᠷᠠᠭᠤᠯᠤᠨ ᠦᠭᠦᠯᠡᠭᠰᠡᠨ ᠪᠠᠶᠢᠳᠠᠭ᠃ ︽ᠨᠤᠳᠤᠭ ᠤᠰᠠᠳᠤᠬᠰᠠ ᠲᠡᠮᠳᠡᠭᠯᠡᠯ︾ ᠭᠡᠬᠦ ᠵᠤᠬᠢᠶᠠᠯ ᠤᠨ ᠦᠨ᠎ᠡ ᠦᠷᠳᠡᠭ ᠨᠢ ᠬᠠᠭᠤᠳᠠᠰᠤ ᠴᠠᠭᠠᠰᠤᠨ ᠤ ᠬᠦᠴᠦᠨ ᠴᠢᠳᠠᠯ ᠳᠤ ᠨᠢᠭᠤᠬᠳᠠᠵᠤ ᠪᠤᠢ ᠠᠵᠠᠢ᠃      ᠬᠠᠭᠤᠳᠠᠰᠤ ᠬᠡᠵᠦ ᠶᠠᠭᠤ ᠪᠤᠢ︖ ᠬᠠᠷᠠᠭᠠᠨ ᠰᠡᠷᠡᠯ ᠳᠤ ᠦᠷᠳᠦᠵᠦ ᠬᠤᠯᠠ ᠤᠶᠢᠷ᠎ᠠ ᠶᠢ ᠰᠡᠳᠬᠢᠭᠦᠯᠳᠡᠭ ᠬᠤᠵᠢᠮ ᠤᠨ ᠬᠦᠮᠦᠨ ᠵᠤᠨ ᠳᠤ ᠬᠠᠳᠠᠭᠠᠯᠠᠭᠳᠠᠵᠤ ᠦᠯᠡᠳᠡᠬᠦ ᠦᠰᠦᠭ ᠪᠢᠴᠢᠭ ᠤᠨ ᠲᠡᠮᠳᠡᠭᠯᠡᠭᠡᠰᠦ ᠠᠵᠠᠢ᠃ ᠡᠷᠭᠢᠴᠡᠭᠦᠯᠦᠯ ᠭᠡᠵᠦ ᠶᠠᠭᠤ ᠪᠤᠢ︖ ᠲᠤᠬᠠᠢ ᠶᠢᠨ ᠴᠠᠭ ᠤᠨ ᠤᠨ ᠤᠨ ᠤ ᠤᠴᠢᠷ᠂ ᠴᠠᠭ ᠴᠠᠭ ᠤᠨ ᠮᠡᠳᠡᠭᠡ᠂ ᠨᠠᠮ ᠲᠦᠷᠦ᠂  ᠵᠠᠰᠠᠭ ᠵᠠᠬᠢᠷᠭ᠎ᠠ᠂ ᠨᠡᠶᠢᠬᠡᠮ ᠠᠬᠤᠢ᠂ ᠬᠦᠮᠦᠨ ᠠᠷᠠᠳ᠂ ᠦᠨᠳᠦᠰᠦᠳᠡᠨ ᠤᠭᠰᠠᠭᠠᠳᠠᠨ ᠤ ᠲᠡᠦᠬᠡ ᠰᠤᠶᠤᠯ᠂ ᠵᠠᠩ ᠦᠢᠯᠡ᠂ ᠪᠠᠶᠢᠭᠠᠯᠢ ᠤᠷᠴᠢᠨ᠂ ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠳᠤᠷᠠᠯ ᠭᠡᠳ ᠤᠯᠠᠨ ᠬᠦᠷᠢᠶ᠎ᠡ ᠴᠠᠷ᠎ᠠ ᠶᠢ ᠬᠠᠮᠤᠷᠤᠭᠰᠠᠨ ᠮᠡᠳᠡᠭᠡ ᠰᠡᠯᠳᠡ ᠶᠢᠨ ᠡᠪᠬᠡᠭᠡᠰᠦ ᠶᠤᠮ᠃      ᠤᠩᠰᠢᠬᠴᠢ ᠶᠢᠨ ᠬᠠᠷᠠᠭᠠᠨ ᠳᠤ ᠡᠨᠡ ᠡᠬᠡ ᠪᠢᠴᠢᠭ  ᠴᠠᠭᠠᠰᠤᠨ ᠲᠡᠭᠡᠷᠡᠬᠢ ᠦᠰᠦᠭ ᠪᠢᠰᠢ ᠸᠢᠴᠠᠲ ᠲᠠᠪᠴᠠᠩ ᠢᠶᠠᠷ ᠬᠦᠷᠴᠦ ᠪᠠᠶᠢᠭ᠎ᠠ ᠶᠢ ᠪᠢᠳᠡ ᠠᠨᠳᠠᠬᠤ ᠦᠬᠡᠢ᠃ ᠡᠶᠢᠨᠬᠦ ᠰᠤᠨᠢᠨ ᠬᠡᠪᠯᠡᠯ ᠮᠠᠨᠢ ᠰᠢᠨ᠎ᠡ ᠵᠠᠭᠤᠴᠢᠯᠠᠭᠤᠷ  ᠯᠤᠭ᠎ᠠ ᠵᠤᠯᠭᠠᠯᠴᠠᠨ ᠬᠠᠭᠤᠳᠠᠰᠤ ᠦᠷᠬᠦᠯᠵᠢᠯᠡᠭᠰᠡᠭᠡᠷ  ᠂ ᠦᠷᠬᠦᠯᠵᠢᠯᠡᠭᠰᠡᠭᠡᠷ ᠁  ︵ᠣᠷᠠᠨᠲ᠋ᠠᠨ᠎ᠠ︶
  
ᠢᠷᠡᠯᠲᠡ᠄ ᠠᠷᠣ ᠬᠤᠷᠴᠢᠨ ᠬᠤᠰᠢᠭᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠮᠣᠭᠤᠯᠠᠩ ᠰᠠᠶᠢᠬᠠᠨ ᠴᠠᠭᠠᠯᠠᠵᠣ ᠪᠠᠶᠢᠡᠨᠣ︖
ᠴᠠᠭᠠᠨ ᠬᠤᠯᠣᠭᠠᠨ᠎ᠠ ᠵᠢᠯ ᠢᠶᠠᠨ ᠣᠡᠡᠳᠣᠬᠤ ᠢᠷᠣᠭᠡᠯ ᠮᠬᠠᠳᠠᠭᠠᠯ
ᠪᠣᠷᠬᠠᠨ ᠠᠪᠤ ᠮᠢᠨᠢ
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠠᠷᠪᠠ︶
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ︵ᠶᠢᠰᠦ︶
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05003979号