ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠤᠰᠢᠭᠤ ᠸᠠᠩ ᠤᠨ ᠬᠠᠨ ᠠᠭᠤᠯᠠ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/8/28
          ᠶᠡᠭᠡ ᠬᠠᠨ ᠠᠭᠤᠯᠠ      ᠠᠷᠤ ᠬᠤᠷᠴᠢᠨ ᠬᠠᠨ ᠠᠭᠤᠯᠠ ᠪᠤᠯ ᠡᠷᠳᠡ ᠤᠷᠢᠳᠦ ᠠᠴᠠ ᠪᠠᠨ ᠬᠤᠰᠢᠭᠤ ᠲᠠᠬᠢᠯᠭ᠎ᠠ ᠲᠠᠢ ᠶᠤᠮ᠃ ᠲᠠᠯᠠᠢ  ᠶᠢᠨ ᠲᠦᠪᠰᠢᠨ ᠠᠴᠠ 1581 ᠮᠧᠲᠷ ᠡᠷᠭᠦᠭᠳᠡᠵᠤ ᠪᠣᠢ᠃ ᠵᠢᠯ ᠪᠦᠷᠢ ᠶᠢᠨ ᠵᠤᠨ ᠤ ᠡᠬᠢᠨ ᠰᠠᠷ᠎ᠠ ᠳᠤ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ ᠠᠴᠠ ᠲᠡᠷᠢᠭᠦᠯᠡᠨ ᠮᠠᠯᠴᠢᠨ ᠠᠷᠠᠳ ᠬᠦᠷᠳᠡᠯ᠎ᠡ ᠬᠡᠳᠦᠨ ᠵᠠᠭᠤᠨ ᠭᠠᠵᠠᠷ ᠠᠴᠠ ᠴᠤᠭᠯᠠᠷᠠᠨ ᠬᠠᠨ ᠠᠭᠤᠯᠠ ᠪᠠᠨ ᠲᠠᠬᠢᠳᠠᠭ ᠪᠢᠯᠡ᠃      ᠬᠠᠨ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠬᠤᠰᠢᠭᠤᠳ ᠤᠨ ᠨᠡᠷᠡᠳᠦ ᠴᠤᠤᠳᠦ ᠪᠦᠬᠡᠴᠤᠳ᠂ ᠰᠠᠶᠢᠨ ᠮᠤᠷᠢᠳ ᠴᠤᠭᠯᠠᠷᠠᠨ ᠢᠷᠡᠵᠤ ᠬᠦᠷ ᠨᠠᠷᠭᠢᠶᠠᠨ ᠪᠤᠯᠵᠤ᠂ ᠠᠭᠤᠯᠠ ᠤᠰᠤ ᠪᠠᠨ ᠪᠠᠶᠠᠰᠬᠠᠨ ᠦᠢ ᠲᠦᠮᠡᠨ ᠢᠶᠠᠷ  ᠢᠶᠠᠨ ᠰᠦᠵᠢᠭ ᠢᠶᠠᠨ ᠭᠦᠢᠴᠡᠳᠬᠡᠨ ᠠᠯᠢᠪᠠ ᠰᠠᠶᠢᠨ ᠰᠠᠶᠢᠬᠠᠨ ᠢ ᠬᠦᠰᠡᠨ ᠲᠠᠭᠠᠳᠬᠠᠳᠠᠭ᠃ ᠬᠠᠨ ᠠᠭᠤᠯᠠ ᠪᠠᠨ ᠲᠠᠬᠢᠪᠠᠯ ᠲᠡᠭᠷᠢ ᠠᠪᠤ ᠴᠦ ᠷᠠᠰᠢᠶᠠᠨ ᠬᠤᠷ᠎ᠠ ᠬᠠᠶᠢᠷᠠᠯᠠᠨ ᠡᠪᠡᠰᠦ ᠤᠷᠭᠤᠮᠠᠯ ᠢ ᠠᠮᠢᠯᠠᠭᠤᠯᠤᠨ᠂ ᠠᠮᠢᠳᠠᠨ ᠭᠤᠤᠯᠳᠠᠨ  ᠳᠤ ᠭᠠᠩ ᠢ ᠲᠠᠶᠢᠯᠳᠠᠭ᠃      ᠬᠦᠮᠦᠰ ᠬᠡᠴᠢᠨᠡᠭᠡᠨ ᠬᠤᠯᠠ ᠶᠠᠪᠤᠵᠤ᠂ ᠬᠡᠳᠦᠨ ᠵᠠᠭᠤᠨ ᠤ ᠭᠠᠵᠠᠷ ᠤᠳᠤᠷᠯᠠᠨ ᠨᠡᠭᠦᠳᠡᠯᠯᠡᠭᠰᠡᠨ ᠴᠦ ᠬᠠᠨ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠪᠤᠯᠪᠠᠯ ᠬᠤᠨᠤᠵᠤ ᠦᠨᠵᠢᠨ ᠵᠠᠮᠨᠠᠵᠤ᠂ ᠲᠠᠩᠰᠤᠭ ᠰᠦᠷᠦᠭ ᠢᠶᠠᠷ ᠢᠶᠠᠨ ᠠᠭᠤᠯᠠ ᠪᠠᠨ ᠪᠠᠶᠠᠰᠬᠠᠨ ᠴᠠᠭᠠᠨ ᠢᠳᠡᠭᠡᠨ ᠢᠶᠠᠷ ᠢᠶᠠᠨ ᠨᠠᠪᠳᠠᠭ ᠰᠠᠪᠳᠠᠭ ᠲᠤ ᠪᠠᠨ ᠰᠠᠴᠤᠯᠢ ᠡᠷᠭᠦᠵᠤ ᠦᠭᠡᠳᠡ ᠡᠰᠡᠷᠡᠭ᠂ ᠬᠡᠢ ᠮᠤᠷᠢ ᠲᠠᠢ ᠶᠠᠪᠤᠬᠤ ᠶᠢ ᠪᠡᠯᠭᠡᠳᠡᠳᠡᠭ᠃           ᠭᠤᠭᠤᠰᠤᠳᠠᠢ ᠬᠠᠨ ᠠᠭᠤᠯᠠ      ᠠᠩᠬ᠎ᠠ ᠡᠷᠳᠡ ᠠᠴᠠ ᠠᠭᠤᠯᠠ ᠲᠠᠬᠢᠬᠤ ᠳᠤ ᠱᠦᠩ ᠲᠠᠷᠤᠳᠠᠭ ᠭᠡᠨ᠎ᠡ᠃ ᠬᠠᠨ ᠠᠭᠤᠯᠠ ᠶᠢ ᠲᠠᠬᠢᠬᠤ ᠦᠶᠡᠰ ᠦᠵᠦᠮᠦᠴᠢᠨ ᠭᠠᠵᠠᠷ ᠤᠨ ᠴᠤᠬᠤᠷ ᠮᠤᠷᠢ ᠲᠠᠢ ᠬᠦᠮᠦᠨ ᠢ ᠲᠠᠷᠤᠬᠤ ᠪᠠᠷ ᠨᠤᠮ ᠬᠦᠷᠢᠮ ᠤᠩᠰᠢᠵᠠᠢ᠃ ᠭᠤᠷᠪᠠᠨ ᠡᠳᠦᠷ ᠦᠩᠭᠡᠷᠡᠳᠡᠯ᠎ᠡ ᠴᠤᠬᠤᠷ ᠮᠤᠷᠢ ᠲᠠᠢ ᠬᠦᠮᠦᠨ ᠢᠷᠡᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠪᠤᠷᠤ ᠴᠤᠬᠤᠷ ᠮᠤᠷᠢ  ᠲᠠᠢ ᠤᠩᠨᠢᠭᠤᠳ ᠠᠶᠢᠮᠠᠭ ᠤᠨ ᠤᠨᠳᠤᠷᠬᠤ ᠭᠡᠭᠴᠢ ᠬᠦᠮᠦᠨ ᠢᠷᠡᠵᠠᠢ᠃ ᠬᠡᠳᠦᠨ ᠡᠳᠦᠷ ᠬᠦᠯᠢᠶᠡᠨ ᠶᠠᠳᠠᠭᠰᠡᠨ ᠬᠦᠮᠦᠰ ᠤᠨᠳᠤᠷᠬᠤ ᠶᠢ ᠤᠪᠤᠭ᠎ᠠ ᠶᠢᠨ ᠰᠠᠭᠤᠷᠢᠨ ᠳᠤ ᠰᠠᠭᠤᠯᠭᠠᠨ ᠱᠦᠩ ᠲᠠᠷᠤᠵᠤ ᠲᠠᠯᠪᠢᠭᠰᠡᠨ ᠭᠡᠨ᠎ᠡ᠃ ᠬᠠᠨ ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠤ ᠨᠢ ᠴᠤᠬᠤᠷ ᠪᠤᠷᠤ ᠮᠤᠷᠢ ᠲᠠᠢ ᠡᠪᠦᠭᠡᠨ ᠤ ᠬᠦᠷᠦᠭ ᠲᠠᠢ ᠪᠠᠶᠢᠳᠠᠭ ᠨᠢ ᠡᠶᠢᠮᠦ ᠢᠷᠡᠯᠳᠡ  ᠲᠠᠢ ᠭᠡᠳᠡᠭ᠃     ᠡᠷᠳᠡᠨ ᠠᠴᠠ ᠨᠠᠭᠠᠰᠢ ᠤᠪᠤᠭ᠎ᠠ ᠱᠠᠩᠰᠢ ᠶᠢᠨ ᠱᠦᠩ ᠲᠠᠷᠤᠬᠤ ᠳᠤ ᠬᠦᠨᠳᠡᠯᠡᠨ ᠭᠠᠵᠠᠷ ᠤᠨ ᠬᠦᠮᠦᠨ᠂ ᠲᠠᠨᠢᠯ ᠪᠤᠰᠤ ᠬᠦᠮᠦᠨ ᠤᠴᠢᠬᠤ ᠶᠢ ᠴᠢᠩᠭ᠎ᠠ ᠴᠡᠭᠡᠷᠯᠡᠵᠤ᠂ ᠤᠪᠤᠭ᠎ᠠ ᠱᠠᠩᠰᠢ ᠶᠢᠨ ᠨᠠᠶᠢᠷ ᠠᠴᠠ ᠵᠠᠶᠢᠯᠠᠨ ᠶᠠᠪᠤᠳᠠᠭ᠃ ᠤᠴᠢᠷ ᠨᠢ ᠨᠤᠳᠤᠭ ᠤᠷᠤᠨ᠂ ᠵᠢᠩᠬᠢᠨᠢ ᠨᠡᠷ᠎ᠡ ᠤᠪᠤᠭ ᠢ ᠨᠢ ᠮᠡᠳᠡᠪᠡᠯ ᠱᠦᠩ ᠲᠠᠷᠤᠬᠤ ᠠᠴᠠ ᠠᠶᠤᠳᠠᠭ᠃ ᠬᠠᠮᠢᠭ᠎ᠠ ᠤᠪᠤᠭᠠᠨ ᠲᠠᠬᠢᠯᠭ᠎ᠠ ᠲᠠᠢ ᠪᠤᠯ ᠵᠠᠮ ᠢᠶᠠᠨ ᠪᠤᠷᠤᠭᠤᠯᠠᠨ ᠨᠡᠷ᠎ᠡ ᠪᠠᠨ ᠨᠢᠭᠤᠵᠤ᠂ ᠦᠯᠦ ᠲᠠᠨᠢᠬᠤ ᠬᠦᠮᠦᠰ  ᠲᠠᠢ ᠵᠤᠭᠤᠭᠳᠠᠬᠤ ᠪᠤᠶᠤ ᠡᠯᠳᠡᠪ ᠤᠨ ᠵᠤᠴᠢᠯᠠᠭ᠎ᠠ ᠲᠠᠶᠢᠯᠠᠯᠭ᠎ᠠ ᠠᠴᠠ ᠰᠡᠷᠡᠮᠵᠢᠯᠡᠨ ᠠᠵᠠ ᠪᠤᠰᠤ ᠶᠢᠨ ᠤᠴᠢᠷ ᠭᠠᠷᠬᠤ ᠠᠴᠠ ᠬᠡᠷᠰᠡᠤᠯᠡᠳᠡᠭ᠃     ᠤᠢ ᠰᠢᠭᠤᠢ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠢᠭ᠌ᠴᠢ ᠰᠠᠬᠤᠯᠠᠭ ᠦᠨᠳᠦᠷ ᠰᠦᠷᠯᠢᠭ ᠭᠤᠭᠤᠰᠤᠳᠠᠢ ᠬᠠᠨ ᠠᠭᠤᠯᠠ ᠨᠤᠳᠤᠭ ᠤᠰᠤᠨ ᠤ ᠬᠦᠮᠦᠰ ᠲᠤ ᠲᠦᠰᠢᠭ ᠪᠤᠯᠤᠨ ᠰᠡᠬᠦᠶᠢᠵᠤ᠂ ᠵᠤᠳ ᠰᠢᠭᠤᠷᠭᠠᠨ ᠳᠤ ᠬᠠᠯᠬᠠᠪᠴᠢ ᠪᠤᠯᠵᠤ᠂ ᠠᠳᠤᠭᠤ ᠮᠠᠯ ᠳᠤ ᠤᠰᠤ ᠤᠮᠳᠠ᠂ ᠰᠢᠮ᠎ᠡ ᠲᠡᠵᠢᠭᠡᠯ ᠬᠠᠩᠭᠠᠭᠰᠠᠭᠠᠷ ᠢᠷᠡᠵᠠᠢ᠃     ᠨᠠᠰᠤᠳᠠᠨ ᠪᠤᠭᠤᠷᠤᠯᠴᠤᠳ ᠮᠠᠨᠢ ᠵᠤᠭᠤᠭ ᠲᠡᠯᠭᠡᠨ ᠦᠯᠢᠭᠡᠷ ᠬᠠᠭᠤᠴᠢᠯᠠᠬᠤ ᠳᠤ ᠪᠠᠨ᠄ ︽ᠭᠤᠭᠤᠰᠤᠳᠠᠢ ᠬᠠᠨ ᠠᠭᠤᠯᠠ ᠶᠢᠨ ᠪᠠᠶᠢᠷᠢᠰᠢᠯ ᠢ ᠠᠯᠤᠰ ᠠᠴᠠ ᠪᠠᠷᠠᠯᠠᠨ ᠰᠢᠨᠵᠢᠪᠡᠯ ᠶᠠᠭ ᠯᠠ ᠦᠬᠢᠨ ᠴᠠᠭᠠᠨ ᠬᠤᠯᠤᠭᠠᠨ᠎ᠠ ᠵᠡᠭᠦᠨ ᠬᠤᠶᠢᠰᠢ ᠪᠠᠨ ᠬᠠᠷᠠᠨ ᠬᠡᠪᠳᠡᠭᠰᠡᠨ ᠰᠢᠭ ᠭᠡᠨ᠎ᠡ᠂ ᠦᠬᠢᠨ ᠴᠠᠭᠠᠨ ᠬᠤᠯᠤᠭᠠᠨ᠎ᠠ ᠵᠡᠭᠦᠨ ᠬᠤᠶᠢᠰᠢ ᠪᠠᠨ ᠬᠠᠷᠠᠨ ᠬᠦᠳᠡᠯᠦᠰᠢ ᠦᠭᠡᠢ ᠬᠡᠪᠳᠡᠭᠰᠡᠨ ᠪᠤᠯᠬᠤᠷ ᠵᠡᠭᠦᠨ ᠦᠵᠦᠮᠦᠴᠢᠨ ᠳᠤ ᠬᠡᠰᠢᠭ ᠪᠤᠶᠠᠨ ᠨᠢ ᠴᠤᠭᠯᠠᠷᠠᠨ ᠠᠳᠤᠭᠤ ᠮᠠᠯ  ᠨᠢ ᠦᠨᠢᠷ ᠦᠰᠴᠦ᠂ ᠪᠠᠶᠠᠨ ᠮᠠᠯᠴᠢᠨ ᠡᠷᠳᠡ ᠤᠷᠢᠳᠤ ᠠᠴᠠ ᠪᠠᠨ ᠤᠯᠠᠨ ᠴᠤᠯᠭᠤᠷᠠᠭᠰᠠᠨ ᠭᠡᠳᠡᠭ᠂ ᠲᠦᠷᠦᠭᠦᠦ ᠵᠠᠭᠤᠨ ᠤ ᠵᠢᠷᠠᠭᠠᠳ ᠤᠨ ᠪᠤᠯᠳᠠᠯ᠎ᠠ ᠭᠤᠭᠤᠰᠤᠳᠠᠢ ᠬᠠᠨ ᠠᠭᠤᠯᠠ ᠶᠢᠨ ᠬᠦᠷᠦᠭ ᠢ ᠵᠡᠭᠦᠨ ᠦᠵᠦᠮᠦᠴᠢᠨ ᠤ ᠲᠠᠬᠢᠯ  ᠤᠨ ᠰᠦᠮ᠎ᠡ ᠳᠤ ᠲᠠᠬᠢᠵᠤ ᠪᠠᠶᠢᠯ᠎ᠠ︾ ᠭᠡᠵᠤ ᠬᠠᠨ ᠠᠭᠤᠯᠠ ᠶᠢᠨ ᠲᠤᠮᠤᠭ ᠢ ᠶᠠᠷᠢᠳᠠᠭ ᠪᠢᠯᠡ᠃      ᠭᠤᠭᠤᠰᠤᠳᠠᠢ ᠬᠠᠨ ᠠᠭᠤᠯᠠ ᠶᠢ ᠲᠤᠩᠭᠠᠯᠠᠭ ᠰᠠᠶᠢᠬᠠᠨ ᠡᠳᠦᠷ ᠠᠯᠤᠰ ᠠᠴᠠ ᠠᠵᠢᠭᠯᠠᠨ ᠦᠵᠡᠪᠡᠯ ᠬᠦᠨᠳᠡᠢ ᠵᠢᠯᠠᠭ᠎ᠠ ᠶᠢᠨ ᠤᠯᠠᠩᠬᠢ ᠨᠢ ᠵᠡᠭᠦᠨ ᠬᠤᠶᠢᠰᠢ ᠪᠠᠨ ᠰᠤᠨᠤᠯᠵᠠᠵᠤ᠂ ︽ᠦᠬᠢᠨ ᠴᠠᠭᠠᠨ ᠬᠤᠯᠤᠭᠠᠨ᠎ᠠ ᠰᠢᠳᠦ ᠪᠠᠨ ᠢᠷᠵᠠᠶᠢᠯᠭᠠᠨ ᠬᠡᠪᠳᠡᠯ᠎ᠡ︾ ᠭᠡᠳᠡᠭ ᠨᠢ ᠨᠡᠬᠡᠷᠡᠨ ᠠᠳᠠᠯᠢᠬᠠᠨ ᠰᠢᠭ᠋ ᠬᠠᠷᠠᠭᠳᠠᠳᠠᠭ᠃ ᠵᠡᠭᠦᠨ ᠬᠤᠶᠢᠨᠠᠬᠢ ᠠᠭᠤᠳᠠᠮ ᠪᠡᠯᠴᠢᠭᠡᠷ ᠲᠤ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠭᠰᠠᠨ ᠠᠶᠢᠯ ᠡᠷᠦᠬᠡ ᠠᠴᠠ ᠬᠡᠳᠦᠶᠢᠨ ᠮᠢᠩᠭᠠᠳᠤ ᠶᠢᠨ ᠪᠠᠶᠠᠨ ᠲᠠᠷᠠᠭ᠎ᠠ ᠲᠠᠷᠠᠭ᠎ᠠ  ᠪᠠᠷ ᠴᠤᠯᠭᠤᠷᠠᠨ ᠭᠠᠷᠤᠭᠰᠠᠭᠠᠷ ᠢᠷᠡᠵᠠᠢ᠃           ᠭᠦᠯᠢᠭᠡᠷ ᠬᠠᠨ ᠠᠭᠤᠯᠠ      ᠠᠩᠬ᠎ᠠ ᠡᠷᠳᠡ ᠳᠤ ᠪᠠᠨ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠬᠢᠨ ᠤᠯᠠᠷᠢᠯ ᠤᠨ ᠰᠠᠶᠢᠬᠠᠨ ᠢ ᠰᠤᠩᠭᠤᠨ ᠭᠦᠯᠢᠭᠡᠷ ᠬᠠᠨ ᠠᠭᠤᠯᠠ ᠶᠢ ᠲᠠᠬᠢᠳᠠᠭ ᠭᠡᠨ᠎ᠡ᠃ ᠲᠠᠯᠠᠢ ᠶᠢᠨ ᠲᠦᠪᠰᠢᠨ ᠠᠴᠠ 1521 ᠮᠧᠲᠷ ᠡᠷᠭᠦᠭᠳᠡᠵᠤ ᠪᠣᠢ᠃ ᠵᠢᠯ ᠪᠦᠷᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ᠂ ᠴᠠᠭᠠᠨ ᠭᠡᠭᠡᠨ᠂ ᠪᠠᠷᠠᠭᠤᠨ ᠭᠡᠭᠡᠨ᠂ ᠶᠤᠩᠽᠤᠩ ᠭᠡᠭᠡᠨ ᠨᠠᠷ ᠮᠤᠷᠢᠯᠠᠨ ᠰᠠᠭᠠᠳᠠᠵᠤ ᠠᠭᠤᠯᠠ ᠪᠠᠨ ᠲᠠᠬᠢᠨ ᠨᠤᠮ ᠰᠠᠩ ᠤᠩᠰᠢᠳᠠᠭ ᠪᠠᠶᠢᠵᠠᠢ᠃       ᠴᠤᠬᠤᠮ ᠠᠯᠢ ᠦᠶ᠎ᠡ ᠳᠤ ᠶᠤᠮ ᠪᠤᠦ ᠮᠡᠳᠡ᠃ ᠲᠠᠬᠢᠯᠭ᠎ᠠ ᠶᠢᠨ ᠡᠳᠦᠷ ᠬᠤᠰᠢᠭᠤ ᠸᠠᠩ᠂ ᠭᠡᠭᠡᠨ ᠨᠠᠷ ᠲᠠᠬᠢᠬᠤ ᠪᠠᠷ ᠬᠦᠷᠦᠭᠰᠡᠡ ᠪᠤᠯᠪᠠᠴᠤ ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠤ ᠬᠦᠷᠴᠦ ᠢᠷᠡᠭᠡᠳᠦᠢ ᠭᠡᠨ᠎ᠡ᠃ ᠭᠤᠷᠪᠠᠨ ᠡᠳᠦᠷ ᠪᠤᠯᠤᠭᠰᠠᠨ ᠴᠦ ᠰᠠᠬᠢᠭᠤᠰᠤ ᠬᠦᠷᠴᠦ ᠢᠷᠡᠬᠦ ᠦᠭᠡᠢ ᠳᠤ ᠸᠠᠩ ᠨᠤᠶᠠᠨ ᠶᠡᠬᠡᠳᠡ ᠠᠭᠤᠷᠯᠠᠵᠠᠢ᠃ ᠲᠡᠷᠡ ᠡᠳᠦᠷ ᠮᠦᠨ ᠸᠠᠩ ᠨᠤᠶᠠᠨ ᠤ ᠤᠨᠤᠭ᠎ᠠ ᠶᠢ ᠬᠡᠭᠡᠷ᠎ᠡ ᠶᠢᠨ ᠨᠤᠬᠠᠢ ᠲᠠᠳᠠᠭᠰᠠᠨ ᠳᠤ ᠶᠡᠭᠡ ᠪᠠᠷ ᠠᠭᠤᠷᠯᠠᠨ᠄ ︽ᠭᠦᠯᠢᠭᠡᠷ ᠬᠠᠨ ᠠᠭᠤᠯᠠ ᠶᠢ ᠲᠠᠬᠢᠬᠤ ᠬᠡᠷᠡᠭ ᠦᠭᠡᠢ︕︾ ᠭᠡᠵᠠᠢ᠃      ᠬᠦᠮᠦᠰ ᠬᠦᠯᠢᠶᠡᠨ ᠶᠠᠳᠠᠵᠤ ᠪᠠᠶᠢᠳᠠᠯ᠎ᠠ ᠭᠡᠭᠡᠨ ᠬᠤᠪᠢᠯᠭᠠᠨ ᠨᠠᠷ᠄ ︽ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠤ ᠬᠦᠷᠦᠭᠡᠳ ᠢᠷᠡᠯ᠎ᠡ︕︾ ᠭᠡᠵᠤ ᠴᠢᠮᠡᠭᠡ ᠦᠭᠬᠦ ᠳᠤ ᠬᠤᠰᠢᠭᠤ ᠸᠠᠩ ᠬᠦᠷᠦᠯᠴᠡᠨ ᠢᠷᠡᠭᠡᠳ᠄ ︽ᠰᠠᠬᠢᠭᠤᠰᠤ ᠶᠢ ᠦᠵᠡᠶ᠎ᠡ︾ ᠭᠡᠪᠡ᠃ ᠡᠭᠦᠨ ᠢ ᠰᠤᠨᠤᠰᠤᠭᠰᠠᠨ ᠭᠡᠭᠡᠨ ᠬᠤᠪᠢᠯᠭᠠᠨ ᠨᠡᠷ᠄ ︽ᠵᠠᠰᠠᠭ ᠨᠤᠶᠠᠨ ᠰᠠᠬᠢᠭᠤᠰᠤ ᠶᠢ ᠦᠵᠡᠵᠤ ᠪᠤᠯᠬᠤ ᠦᠭᠡᠢ︾ ᠭᠡᠵᠤ ᠢᠳᠬᠠᠪᠠᠴᠤ ᠸᠠᠩ ᠦᠯᠦ ᠤᠶᠢᠰᠢᠶᠠᠨ ᠵᠠᠪᠠᠯ ᠦᠵᠡᠬᠦ ᠭᠡᠰᠡᠨ ᠭᠡᠨ᠎ᠡ᠃      ᠭᠡᠭᠡᠨ ᠬᠤᠪᠢᠯᠭᠠᠨ ᠨᠠᠷ ᠸᠠᠩ ᠨᠤᠶᠠᠨ ᠤ ᠦᠭᠡ ᠶᠢ ᠵᠦᠷᠢᠴᠡᠬᠦ ᠳᠤ ᠲᠦᠪᠡᠭ ᠲᠠᠢ ᠲᠤᠯᠠ ᠠᠷᠭ᠎ᠠ ᠪᠤᠰᠤ᠄ ︽ᠮᠠᠨᠤᠰ ᠰᠤᠭᠤ ᠪᠠᠨ ᠡᠷᠭᠦᠵᠦ ᠪᠠᠶᠢᠶ᠎ᠠ᠂ ᠨᠤᠶᠠᠨ ᠰᠤᠭᠤ ᠪᠠᠷ ᠯᠠ ᠦᠵᠡ ᠳ᠋ᠠ︕︾ ᠭᠡᠵᠠᠢ᠃ ᠸᠠᠩ ᠨᠤᠶᠠᠨ ᠭᠡᠭᠡᠨ ᠤ ᠰᠤᠭᠤ ᠪᠠᠷ ᠦᠵᠡᠪᠡᠯ ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠤ ᠶᠠᠭ ᠮᠤᠷᠢᠨ ᠠᠴᠠ ᠪᠠᠨ ᠪᠠᠭᠤᠮᠠᠷ ᠪᠠᠶᠢᠵᠠᠢ᠃ ᠸᠠᠩ ᠨᠤᠶᠠᠨ ᠤ ᠱᠠᠭᠠᠶᠢᠬᠤ ᠶᠢ ᠮᠡᠳᠡᠭᠰᠡᠨ ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠤ ᠲᠤᠤᠷ᠎ᠠ ᠪᠠᠨ ᠮᠤᠷᠢᠨ ᠳᠤ ᠪᠠᠨ ᠮᠤᠷᠳᠠᠨ ᠲᠡᠭᠷᠢ  ᠶᠢᠨ ᠤᠷᠳᠤᠨ ᠳᠤ ᠶᠠᠪᠤᠵᠠᠢ᠃ ᠭᠡᠪᠡᠴᠦ ᠮᠤᠷᠢᠨ ᠳᠤ ᠪᠠᠨ ᠶᠠᠭᠠᠷᠠᠤᠬᠠᠨ ᠮᠤᠷᠳᠠᠭᠰᠠᠨ ᠠᠴᠠ ᠦᠷᠦᠭᠡᠰᠦᠨ ᠭᠤᠳᠤᠯ  ᠢᠶᠠᠨ ᠤᠨᠠᠭᠠᠴᠢᠬᠠᠵᠠᠢ᠃ ᠡᠭᠦᠨ ᠢ ᠨᠢ ᠨᠤᠶᠠᠨ ᠰᠦᠮ᠎ᠡ ᠳᠤ ᠠᠪᠴᠢᠷᠠᠨ ᠲᠠᠬᠢᠵᠤ ᠭᠡᠨ᠎ᠡ᠃      ᠲᠡᠷᠡ ᠤᠳᠠᠭ᠎ᠠ ᠬᠡᠴᠡᠭᠦᠦ ᠮᠦᠨᠳᠦᠷ ᠤᠷᠤᠵᠤ ᠠᠭᠤᠯᠠ ᠶᠢᠨ ᠤᠢ ᠤᠷᠭᠤᠮᠠᠯ᠂ ᠬᠦᠮᠦᠨ ᠠᠮᠢᠳᠠᠨ ᠳᠤ ᠠᠶᠤᠯ ᠭᠠᠮᠰᠢᠭ ᠪᠤᠯᠵᠠᠢ᠃ ᠸᠠᠩ ᠨᠤᠶᠠᠨ ᠲᠡᠭᠦᠨ ᠠᠴᠠ ᠰᠡᠭᠦᠯᠡᠷ ᠭᠦᠯᠢᠭᠡᠷ ᠬᠠᠨ ᠠᠭᠤᠯᠠ ᠶᠢ ᠲᠠᠬᠢᠬᠤ ᠪᠠᠨ ᠪᠤᠯᠢᠵᠤ᠂ ᠲᠠᠬᠢᠯᠭ᠎ᠠ ᠶᠢᠨ ᠤᠪᠤᠭ᠎ᠠ ᠶᠢᠨ ᠭᠠᠳᠠᠭᠤᠷ ᠲᠡᠮᠦᠷ ᠴᠠᠭᠠᠷᠢᠭ ᠢᠶᠠᠷ ᠴᠠᠭᠠᠷᠢᠭᠯᠠᠨ ᠤᠶᠠᠵᠤ᠂ ᠭᠤᠭᠤᠰᠤᠳᠠᠢ ᠬᠠᠨ ᠠᠭᠤᠯᠠ ᠶᠢ ᠲᠠᠬᠢᠬᠤ ᠪᠤᠯᠵᠠᠢ᠃ ᠨᠠᠰᠤᠳᠠᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ ᠮᠢᠩᠭ᠎ᠠ ᠶᠢᠰᠤᠨ ᠵᠠᠭᠤ ᠲᠦᠴᠢᠭᠡᠳ ᠤᠨ ᠪᠤᠯᠳᠠᠯ᠎ᠠ ᠤᠳᠤᠷ ᠨᠡᠭᠦᠳᠡᠯ ᠢᠶᠠᠷ ᠨᠠᠭᠠᠰᠢ ᠴᠠᠭᠠᠰᠢ ᠨᠡᠭᠦᠳᠡᠯᠯᠡᠨ ᠶᠠᠪᠤᠬᠤ ᠳᠤ ᠭᠦᠯᠢᠭᠡᠷ ᠬᠠᠨ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠤᠪᠤᠭ᠎ᠠ ᠶᠢᠨ ᠭᠠᠳᠠᠭᠤᠷᠬᠢ ᠲᠡᠮᠦᠷ ᠤᠳᠠᠰᠤ ᠨᠢ ᠴᠤᠤᠵᠢ ᠲᠠᠢ ᠪᠠᠷ ᠢᠶᠠᠨ ᠪᠠᠶᠢᠯ᠎ᠠ ᠭᠡᠳᠡᠭ᠃ ᠬᠦᠮᠦᠰ ᠠᠭᠤᠯᠠ ᠶᠢᠨ ᠪᠡᠯᠴᠢᠭᠡᠷ ᠲᠤ ᠨᠢ ᠮᠠᠯ ᠰᠦᠷᠦᠭ ᠢᠶᠠᠨ ᠬᠠᠷᠢᠭᠤᠯᠤᠨ ᠬᠡᠰᠢᠭ ᠪᠤᠶᠠᠨ ᠢ ᠨᠢ ᠬᠦᠷᠳᠡᠬᠦ ᠳᠤ  ᠪᠠᠨ ᠨᠤᠳᠤᠭ ᠤᠰᠤᠨ ᠤ ᠪᠠᠨ ᠨᠠᠪᠳᠠᠭ ᠰᠠᠪᠳᠠᠭ ᠲᠤ ᠰᠦᠰᠦᠭᠯᠡᠨ ᠤᠨ ᠵᠢᠯ ᠢ ᠤᠭᠳᠤᠭᠰᠠᠭᠠᠷ ᠪᠢᠯᠡ᠃     ᠵᠤᠬᠢᠶᠠᠭᠴᠢ᠄  ᠨᠠ᠊ · ᠵᠢᠷᠭᠠᠯ ᠨᠠᠶᠢᠷᠠᠭᠤᠯᠤᠭᠴᠢ᠄  ᠴ᠊ · ᠰᠠᠷᠠᠭᠤᠯ
  
ᠢᠷᠡᠯᠲᠡ᠄ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠵᠠᠰᠠᠭ ᠤᠨ ᠣᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠴᠢᠶᠠᠯᠠᠪᠤᠷᠢ ᠶᠢᠨ ᠵᠢᠷᠭᠤᠭᠠᠨ ᠲᠡᠷᠭᠡ
ᠶᠡᠭᠡ ᠡᠷᠳᠡᠮᠳᠡᠨ ᠪᠢᠮᠪᠠ ᠶᠢᠨ ᠷᠢᠨᠴᠢᠨ ᠪᠠᠭᠰᠢ ᠳᠤ ᠭᠠᠶᠢᠬᠠᠭᠳᠠᠭᠰᠠᠨ ᠬᠦᠮᠤᠨ
ᠨᠤᠶᠠᠨ ᠠᠭᠤᠯᠠ ᠶᠢᠨ ᠤᠪᠤᠭ᠎ᠠ
ᠠᠷᠤ ᠬᠤᠷᠴᠢᠨ ᠤ ᠪᠦᠰᠡᠭᠦᠶᠢᠴᠦᠳ ᠤᠨ ᠦᠰᠦ ᠱᠠᠩᠬᠤᠯᠠᠵᠤ ᠲᠠᠪᠤᠨ ᠬᠠᠳᠬᠤᠭᠤᠷ ᠬᠡᠷᠡᠭᠯᠡᠬᠦ ᠲᠤᠬᠠᠢ
ᠢᠳᠡᠰᠢᠨ ᠮᠠᠯ ᠤᠨ ᠶᠠᠰᠤ ᠮᠢᠬ᠎ᠠ ᠶᠢ ᠲᠤᠶᠠᠴᠢᠵᠤ ᠰᠠᠯᠭᠠᠬᠤ ᠶᠤᠰᠤᠨ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05003979号