ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠠᠷᠤ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠤᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠵᠠᠩ ᠦᠢᠯᠡ ᠶᠢᠨ ᠪᠠᠶᠢᠳᠠᠯ ︵ᠭᠤᠷᠪᠠ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2016/5/28
      ᠭᠤᠷᠪᠠ᠂ ᠠᠷᠤ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠤᠨ ᠪᠤᠷᠤ ᠢᠳᠡᠭᠡ ᠶᠢ                ᠪᠤᠯᠪᠠᠰᠤᠷᠠᠭᠤᠯᠵᠤ ᠡᠳ᠋ᠯᠡᠬᠦ ᠵᠠᠩ ᠦᠢᠯᠡ       ᠪᠤᠷᠤ ᠢᠳᠡᠭᠡ   ᠨᠢ ᠭᠤᠤᠯᠳᠠᠭᠤ ᠤᠷᠤᠨ ᠨᠤᠲᠤᠭ ᠲᠤ ᠪᠠᠨ ᠲᠠᠷᠢᠳᠠᠭ ᠰᠠᠭᠠᠳᠠ ︵ᠰᠠᠭᠠᠭ︶ ᠪᠠ ᠰᠢᠯᠦᠭᠡᠢ ᠠᠴᠠ ᠭᠠᠳᠠᠨ᠎ᠠ ᠨᠠᠷᠢᠮᠤ ︵ᠬᠤᠨᠤᠭ ᠠᠮᠤ︶ ᠵᠢᠴᠢ ᠡᠮᠤᠨ᠎ᠡ ᠤᠷᠤᠨ ᠠᠴᠠ ᠤᠷᠤᠵᠤ ᠢᠷᠡᠭᠰᠡᠨ ᠪᠤᠭᠤᠳᠠᠢ ᠲᠤᠲᠤᠷᠭ᠎ᠠ ᠵᠡᠷᠭᠡ ᠶᠢᠨ ᠢᠳᠡᠭᠡ ᠪᠤᠳᠠᠭ᠎ᠠ ᠪᠤᠯᠬᠤ ᠶᠤᠮ᠃ ᠡᠳᠡᠭᠡᠷ ᠤᠨ ᠲᠤᠳᠤᠷ᠎ᠠ ᠠᠴᠠ ᠭᠤᠷᠠᠯ ︵ᠭᠤᠯᠢᠷ ᠢ ᠠᠷᠤ ᠬᠤᠷᠴᠢᠨ ᠳᠤ ᠤᠯᠠᠩᠭᠢ ᠨᠢ ᠭᠤᠷᠠᠯ ᠭᠡᠵᠤ ᠬᠡᠯᠡᠳᠡᠭ︶ ᠤᠨ ᠵᠦᠢᠯ ᠠᠴᠠ ᠲᠤᠷᠠᠳᠪᠠᠯ᠄       ︵1︶ ᠰᠠᠭᠠᠳᠠ ᠶᠢᠨ ᠭᠤᠯᠢᠷ᠄       ᠠᠷᠤ ᠬᠤᠷᠴᠢᠨ ᠳᠤ ᠰᠠᠭᠠᠳᠠ ︵ᠰᠠᠭᠠᠭ ᠢ ᠤᠯᠠᠩᠭᠢ ᠨᠢ ᠰᠠᠭᠠᠳᠠ ᠭᠡᠵᠤ ᠬᠡᠯᠡᠳᠡᠭ︶ ᠶᠢᠨ ᠭᠤᠯᠢᠷ ᠢᠶᠠᠷ ᠡᠯᠳᠡᠪ ᠵᠦᠢᠯ ᠤᠨ ᠲᠠᠩ ᠬᠢᠳᠡᠭ᠃ ᠲᠠᠩ ᠢ ᠪᠠᠰᠠ ᠲᠠᠳᠠᠰᠢ ᠭᠡᠵᠤ ᠨᠡᠷᠡᠯᠡᠳᠡᠭ᠃ ᠡᠭᠦᠨ ᠳᠤ ᠰᠠᠭᠠᠳᠠ ᠶᠢᠨ ᠭᠤᠯᠢᠷ ᠤᠨ ᠡᠷᠡᠭᠡᠢ ᠲᠠᠩ᠂ ᠬᠡᠷᠴᠢᠮᠡᠯ ᠲᠡᠩ᠂ ᠡᠯᠳᠡᠮᠡᠯ ᠲᠡᠩ᠂ ᠪᠠᠵᠠᠮᠠᠯ ᠲᠠᠩ᠂ ᠬᠤᠳᠬᠤᠮᠠᠯ ᠲᠠᠩ᠂ ᠵᠢᠭᠤᠷᠠᠮᠠᠯ ᠲᠠᠩ᠂ ᠵᠦᠰᠦᠮᠡᠯ ᠲᠡᠩ᠂ ᠴᠢᠳᠬᠤᠮᠠᠯ ᠲᠠᠩ᠂ ᠤᠷᠠᠮᠠᠯ ᠲᠠᠩ ᠵᠡᠷᠭᠡ ᠶᠢ ᠬᠢᠬᠦ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠴᠢᠳᠬᠤᠮᠠᠯ ᠪᠤᠤᠪᠤ᠂  ᠵᠢᠭᠤᠷᠠᠮᠠᠯ ᠪᠤᠤᠪᠤ᠂ ᠬᠠᠭᠰᠠᠭᠠᠮᠠᠯ ᠪᠤᠤᠪᠤ᠂ ᠬᠡᠷᠴᠢᠶ᠎ᠡ ᠪᠤᠤᠪᠤ᠂ ᠰᠢᠷᠠᠮᠠᠯ ᠪᠤᠤᠪᠤ᠂ ᠨᠠᠭᠠᠮᠠᠯ ᠪᠤᠤᠪᠤ ᠵᠢᠴᠢ ᠪᠠᠩᠰᠢ᠂ ᠱᠠᠯᠪᠢᠩ᠂ ᠬᠤᠶᠢᠮᠤᠭ ᠵᠡᠷᠭᠡ ᠢᠳᠡᠭᠡᠨ ᠬᠢᠳᠡᠭ ᠪᠦᠭᠡᠳ ᠬᠠᠮᠤᠭ ᠨᠡᠷᠡᠲᠡᠢ ᠨᠢ ᠲᠤᠬᠤᠯᠠᠢ ᠭᠡᠭᠴᠢ ᠶᠢᠨ ᠲᠡᠭᠡᠳᠤ ᠠᠮᠳᠠᠳᠤ ᠢᠳᠡᠭᠡᠨ ᠢ ᠬᠢᠳᠡᠭ᠃       ︵2︶ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ  ᠄       ᠤᠷᠢᠳᠤ ᠳᠤ ᠪᠠᠨ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ ᠢ ᠤᠷᠤᠨ ᠨᠤᠲᠤᠭ ᠲᠤ ᠪᠠᠨ ᠲᠠᠷᠢᠳᠠᠭ ᠦᠭᠡᠢ ᠪᠠᠶᠢᠵᠤ ᠭᠤᠤᠯᠳᠠᠭᠤ ᠡᠮᠤᠨ᠎ᠡ ᠤᠷᠤᠨ ︵ᠤᠮᠠᠷᠠᠳᠤ ᠶᠢᠨ ᠲᠠᠯ᠎ᠠ ᠭᠠᠵᠠᠷ ᠤᠨ ᠲᠠᠷᠢᠶᠠᠯᠠᠩ ᠤᠨ ᠤᠷᠤᠨ︶ ᠠᠴᠠ ᠲᠡᠮᠡᠭᠡᠨ ᠯᠤᠤᠭᠠᠷ ᠢᠶᠠᠷ ᠵᠦᠭᠡᠭᠡᠬᠦ ᠪᠠ ᠲᠠᠪᠤᠨ ᠫᠦᠰᠡ ᠶᠢᠨ ᠮᠠᠨᠵᠤ ᠬᠢᠳᠠᠳ ᠤᠨ ᠮᠠᠶᠢᠮᠠᠶᠢᠴᠢᠨ ᠠᠴᠠ ᠬᠤᠳᠠᠯᠳᠤᠨ ᠠᠪᠳᠠᠭ ᠪᠠᠶᠢᠭᠰᠠᠨ ᠶᠤᠮ᠃ ᠬᠤᠰᠢᠭᠤᠨ ᠲᠦᠪ ᠤᠷᠴᠢᠮ ᠢᠶᠠᠷ ᠢᠵᠸᠤ ᠮᠠᠶᠢᠮᠠᠢ ᠪᠠ ᠲᠠᠪᠤᠨ ᠫᠦᠰᠡ ᠬᠡᠵᠤ ᠪᠠᠶᠢᠳᠠᠭ ᠨᠢ ᠮᠤᠩᠭᠤᠯᠴᠤᠳ ᠲᠤ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ᠂ ᠲᠤᠳᠤᠷᠭ᠎ᠠ ᠪᠠ ᠬᠤᠨᠤᠭ ᠪᠤᠳᠠᠭᠠᠨ ᠤ ᠵᠦᠢᠯ ᠬᠠᠩᠭᠠᠵᠤ ᠪᠠᠶᠢᠭᠰᠠᠨ ᠪᠠ ᠮᠤᠩᠭᠤᠯᠴᠤᠳ ᠦᠪᠡᠷᠲᠡᠭᠡᠨ ᠲᠤᠳᠤᠷ᠎ᠠ ᠭᠠᠵᠠᠷ ᠠᠴᠠ ᠲᠡᠮᠡᠭᠡᠨ ᠯᠤᠤᠭᠠᠷ ᠢᠶᠠᠷ ᠠᠴᠢᠶᠠᠯᠠᠨ ᠠᠪᠴᠢᠷᠠᠳᠠᠭ ᠪᠠᠶᠢᠭᠰᠠᠨ ᠶᠤᠮ᠃ ᠰᠢᠨ᠎ᠡ ᠲᠤᠮᠳᠠᠳᠤ ᠤᠯᠤᠰ ᠪᠠᠶᠢᠭᠤᠯᠤᠭᠳᠠᠭᠰᠠᠨ ᠠᠴᠠ ᠰᠡᠭᠦᠯᠡᠷ ᠤᠯᠤᠰ ᠠᠴᠠ ᠵᠡᠭᠦᠨ ᠬᠤᠶᠢᠳᠤ  ᠶᠢᠨ ᠲᠠᠯ᠎ᠠ ᠭᠠᠵᠠᠷ ᠤᠨ ᠤᠮᠠᠷᠠᠳᠤ ᠶᠢᠨ ᠶᠡᠭᠡ ᠠᠳᠠᠷ ᠢ ᠬᠠᠭᠠᠯᠪᠤᠷᠢᠯᠠᠨ ᠲᠤᠮᠳᠠᠳᠤ ᠤᠯᠤᠰ ᠤᠨ ᠬᠠᠮᠤᠭ ᠲᠤᠮᠤ ᠲᠠᠸᠠᠷ ᠤᠨ ᠠᠮᠤ ᠶᠢᠨ ᠰᠠᠭᠤᠷᠢᠨ ᠭᠠᠵᠠᠷ ᠭᠠᠷᠭᠠᠭᠰᠠᠨ ᠢᠶᠠᠷ ᠠᠳᠡᠭᠢ ᠶᠢᠨ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ ᠢᠶᠠᠨ ᠭᠤᠤᠯᠳᠠᠭᠤ ᠲᠡᠨᠳᠡ ᠠᠴᠠ ᠤᠷᠤᠭᠤᠯᠳᠠᠭ ᠪᠤᠯᠵᠠᠢ᠃       ᠲᠤᠬᠤᠯᠠᠢ᠄       ᠲᠤᠬᠤᠯᠠᠢ ᠪᠤᠯ ᠠᠷᠤ ᠬᠤᠷᠴᠢᠨ ᠨᠤᠲᠤᠭ ᠤᠨ ᠤᠨᠴᠠ ᠠᠮᠳᠠᠳᠤ ᠬᠤᠭᠤᠯᠠ  ᠪᠤᠯᠤᠨ᠎ᠠ᠃ ᠲᠤᠬᠤᠯᠠᠢ ᠶᠢ ᠬᠢᠬᠦ ᠳᠤ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ ᠢᠶᠠᠨ ᠨᠤᠬᠤᠨ ᠡᠯᠳᠡᠭᠡᠳ ᠨᠢᠮᠭᠡᠷᠡᠭᠦᠯᠦᠭᠰᠡᠨ ᠤ ᠲᠠᠷᠠᠭ᠎ᠠ ᠪᠠᠷ ᠵᠢᠵᠢᠭᠯᠡᠨ ᠲᠦᠷᠪᠡᠯᠵᠢᠨ ᠬᠡᠷᠴᠢᠭᠡᠳ ᠱᠦᠯᠦᠨ ᠳᠤ ᠪᠠᠨ ᠲᠠᠪᠤᠰᠤ ᠴᠠᠭ᠎ᠠ ᠲᠠᠢ ᠨᠢᠭᠡ ᠴᠢᠨᠠᠵᠤ ᠠᠪᠤᠭᠠᠳ ᠵᠤᠤᠯᠢ ᠪᠠᠷ ᠱᠦᠭᠦᠵᠤ ᠰᠢᠪᠬᠠᠷᠠᠭᠤᠯᠤᠭᠰᠠᠨ ᠤ ᠬᠤᠶᠢᠨ᠎ᠠ ᠲᠠᠭᠢᠨ ᠲᠤᠭᠤᠭᠠᠨ ᠳᠤ ᠪᠠᠨ ᠦᠷᠦᠮ᠎ᠡ ᠪᠠᠨ ᠬᠢᠵᠤ᠂ ᠱᠦᠭᠦᠵᠤ ᠠᠪᠤᠭᠰᠠᠨ ᠲᠦᠷᠪᠡᠯᠵᠢᠨ ᠭᠤᠯᠢᠷ ︵ᠲᠠᠩ︶ ᠢᠶᠠᠨ ᠦᠷᠦᠮ᠎ᠡ ᠲᠠᠢ ᠲᠤᠭᠤᠭᠠᠨ ᠳᠤ ᠪᠠᠨ ᠬᠢᠵᠤ ᠨᠤᠬᠤᠵᠤ ᠠᠪᠤᠭᠠᠳ ᠰᠢᠷ᠎ᠠ ᠲᠤᠰᠤ ᠪᠤᠷᠮ᠎ᠠ ᠰᠢᠬᠢᠷ ᠬᠤᠯᠢᠵᠤ ᠢᠳᠡᠳᠡᠭ ᠨᠢᠭᠡ ᠵᠦᠢᠯ ᠤᠨ ᠲᠡᠭᠡᠳᠤ ᠵᠡᠷᠭᠡ ᠶᠢᠨ ᠠᠮᠳᠠ ᠲᠠᠢ  ᠬᠤᠭᠤᠯᠠ ᠶᠤᠮ᠃       ᠮᠤᠩᠭᠤᠯ ᠪᠤᠤᠵᠠ᠂ ᠮᠤᠩᠭᠤᠯ ᠪᠠᠩᠰᠢ᠄       ᠪᠤᠤᠵᠠ᠂ ᠪᠠᠩᠰᠢ ᠪᠤᠯ ᠭᠤᠯᠢᠷ ᠢᠶᠠᠨ ᠨᠤᠬᠤᠵᠤ ᠨᠢᠮᠭᠡᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠦᠭᠡᠷ ᠬᠤᠨᠢ ᠮᠢᠬ᠎ᠠ ᠪᠠᠨ ᠵᠡᠷᠯᠢᠭ ᠲᠠᠭᠠᠨ᠎ᠠ᠂  ᠵᠡᠷᠯᠢᠭ ᠭᠤᠭᠤᠳ᠂ ᠵᠡᠷᠯᠢᠭ ᠭᠦᠩᠭᠦᠷ ᠭᠤᠭᠤᠳ᠂ ᠵᠡᠷᠯᠢᠭ ᠰᠤᠩᠭᠢᠨ᠎ᠠ᠂ ᠴᠤᠷ᠎ᠠ ᠨᠤᠭᠤᠭ᠎ᠠ  ᠶᠢᠨ ᠠᠯᠢ ᠨᠢᠭᠡ ᠬᠤᠶᠠᠷ ᠵᠦᠢᠯ ᠢ ᠨᠠᠷᠢᠨ ᠬᠡᠷᠴᠢᠵᠤ  ᠂ ᠦᠭᠡᠷ ᠪᠤᠶᠤ ᠬᠤᠨᠢᠨ ᠤ ᠮᠢᠬ᠎ᠠ ᠪᠠᠨ ᠪᠠᠰᠠ ᠬᠢᠩᠭᠠᠷ᠎ᠠ ︵ᠪᠤᠤᠳᠤᠤ︶ ᠪᠠᠷ ᠨᠠᠷᠢᠨ ᠬᠡᠷᠴᠢᠨ ᠬᠢᠷᠤᠭᠠᠳ᠂ ᠨᠠᠷᠢᠨ ᠬᠡᠷᠴᠢᠭᠰᠡᠨ ᠮᠢᠬ᠎ᠠ ᠪᠤᠯᠤᠨ ᠨᠤᠭᠤᠭ᠎ᠠ ᠪᠠᠨ ᠨᠡᠶᠢᠯᠡᠭᠦᠯᠦᠨ ᠨᠤᠬᠤᠭᠠᠳ ᠨᠢᠮᠭᠡᠯᠡᠭᠰᠡᠨ ᠭᠤᠯᠢᠷ ᠢᠶᠠᠷ ᠢᠶᠠᠨ ᠪᠠᠭᠯᠠᠵᠤ ᠪᠤᠭᠤᠭᠠᠳ ᠨᠢᠭᠡ ᠲᠠᠯ᠎ᠠ ᠶᠢ ᠨᠢ ᠴᠢᠮᠬᠢᠵᠤ ᠨᠡᠶᠢᠯᠡᠭᠦᠯᠦᠭᠰᠡ ᠬᠤᠭᠤᠯᠠ ᠪᠤᠯᠤᠨ᠎ᠠ᠃ ᠵᠠᠷᠢᠮ ᠨᠢ ᠬᠡᠬᠡᠯᠢ ᠲᠠᠢ ᠬᠤᠭᠤᠯᠠ ᠭᠡᠬᠦ ᠪᠤᠶᠤ ᠭᠤᠯᠢᠷ ᠬᠢᠰᠤᠭ᠎ᠠ ᠪᠠᠷᠢᠯ᠎ᠠ ᠭᠡᠵᠤ ᠬᠡᠯᠡᠳᠡᠭ᠃ ᠪᠤᠵᠠ ᠶᠢ ᠪᠤᠯ ᠵᠢᠩᠨᠡᠭᠦᠷ ᠲᠠᠢ ᠲᠤᠭᠤᠭᠠᠨ ᠳᠤ ᠤᠰᠤᠨ ᠠᠭᠤᠷ ᠢᠶᠠᠷ ᠵᠢᠩᠨᠡᠵᠤ ᠪᠤᠯᠭᠤᠭᠠᠳᠠᠭ᠃ ᠪᠠᠩᠰᠢ ᠶᠢ ᠪᠤᠯ ᠵᠢᠩᠨᠡᠵᠤ ᠪᠤᠯᠭᠤᠭᠠᠬᠤ ᠠᠴᠠ ᠭᠠᠳᠠᠨ᠎ᠠ ᠤᠯᠠᠩᠭᠢ ᠨᠢ ᠬᠦᠰᠭᠦᠯᠦᠭᠡ ᠰᠠᠶᠢᠳᠠᠢ ᠱᠦᠯᠦᠨ ᠳᠤ ᠴᠠᠭ᠎ᠠ ᠬᠢᠵᠤ᠂ ᠪᠠᠭ᠎ᠠ ᠰᠠᠭ᠎ᠠ ᠮᠢᠬᠠᠨ ᠬᠡᠷᠴᠢᠮᠡᠯ ᠪᠠ ᠭᠤᠯᠭᠤᠷᠢᠬᠠᠢ ︵ᠹᠧᠨ︶ ᠲᠠᠢ ᠬᠤᠯᠢᠵᠤ ᠴᠢᠨᠠᠵᠤ ᠢᠳᠡᠳᠡᠭ᠃ ᠠᠷᠤ ᠬᠤᠷᠴᠢᠨ ᠳᠤ ᠵᠠᠷᠢᠮ ᠭᠠᠵᠠᠷ ᠤᠨ ᠬᠢᠨ ᠪᠠᠩᠰᠢ ᠪᠠ ᠪᠤᠤᠵᠠ ᠶᠢᠨ ᠲᠤᠳᠤᠷ ᠢ ᠬᠢᠷᠤᠭᠰᠠᠨ ᠰᠤᠷᠰᠤ ᠭᠡᠳᠡᠭ ᠪᠠᠶᠢᠵᠠᠢ᠃       ᠪᠤᠷᠤ ᠢᠳᠡᠭᠡᠨ ᠪᠤᠯᠬᠤ ᠪᠤᠤᠪᠤ᠄       ᠪᠤᠤᠪᠤ ᠶᠢ ᠬᠠᠭᠠᠷᠢᠬᠤ ᠪᠠ ᠲᠤᠰᠤᠨ ᠳᠤ ᠪᠤᠴᠠᠯᠭᠠᠬᠤ ᠬᠤᠶᠠᠷ ᠵᠦᠢᠯ ᠤᠨ ᠠᠷᠭ᠎ᠠ ᠪᠠᠷ ᠬᠢᠳᠡᠭ ᠪᠠᠶᠢᠵᠠᠢ᠃       ᠠᠷᠤ ᠬᠤᠷᠴᠢᠨ ᠳᠤ ᠵᠢᠯ ᠪᠦᠷᠢ ᠶᠢᠨ ᠡᠪᠤᠯ ᠤᠨ ᠡᠬᠢᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠠᠪᠤᠨ ᠤ ᠦᠶ᠎ᠡ ᠪᠤᠯᠬᠤᠯᠠᠷ ᠪᠤᠳᠠᠭ᠎ᠠ ᠴᠠᠷᠴᠠᠭᠠᠬᠤ᠂ ᠪᠤᠤᠪᠤ ᠬᠠᠭᠠᠷᠢᠬᠤ᠂ ᠪᠤᠤᠪᠤ ᠪᠤᠴᠠᠯᠭᠠᠬᠤ᠂ ᠵᠢᠪᠡᠷᠡᠢ ᠬᠢᠬᠦ ᠵᠡᠷᠭᠡ ᠪᠠᠷ ᠮᠠᠰᠢ ᠬᠦᠷ ᠬᠦᠭᠵᠢᠭᠡᠨ ᠲᠠᠢ ᠪᠤᠷᠤ ᠢᠳᠡᠭᠡᠨ ᠤ ᠪᠠᠵᠠᠭᠠᠯᠳᠠ ᠴᠢᠩᠭᠠᠷᠠᠳᠠᠭ᠃       ᠬᠠᠭᠠᠷᠢᠭᠰᠠᠨ ᠪᠤᠤᠪᠤ ᠶᠢᠨ ᠲᠦᠷᠦᠯ ᠵᠦᠢᠯ ᠳᠤ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ ᠢᠶᠠᠷ ᠰᠢᠬᠢᠷᠲᠤ ᠬᠠᠭᠠᠷᠢᠮᠠᠯ᠂ ᠵᠠᠭᠠᠭᠳᠤ ᠬᠠᠭᠠᠷᠢᠮᠠᠯ᠂ ᠵᠢᠪᠡᠷᠡᠢ ᠪᠤᠤᠪᠤ ᠶᠢᠨ ᠵᠦᠢᠯ᠂ ᠠᠳᠬᠤᠮᠠᠯ ᠪᠤᠤᠪᠤ᠂ ᠬᠦᠷᠳᠤᠨ ᠪᠤᠤᠪᠤ᠂ ᠨᠤᠬᠤᠮᠠᠯ ᠪᠤᠤᠪᠤ᠂ ᠬᠤᠷᠤᠭᠤ ᠪᠤᠤᠪᠤ᠂ ᠰᠠᠷᠬᠢᠨᠠᠭ ᠪᠤᠤᠪᠤ᠂ ᠮᠠᠨᠤ ᠪᠤᠤᠪᠤ᠂ ᠪᠠᠳᠮᠠᠳᠤ ᠪᠤᠤᠪᠤ᠂ ᠭᠤᠤᠷᠠᠢ ᠪᠤᠤᠪᠤ᠂ ᠬᠡᠷᠴᠢᠶ᠎ᠡ ᠪᠤᠤᠪᠤ᠂ ᠠᠳᠠᠭᠠᠷ ᠤᠨ ᠪᠤᠤᠪᠤ᠂ ᠬᠡᠬᠡᠰᠤᠨ ᠪᠤᠤᠪᠤ  ᠵᠡᠷᠭᠡ ᠮᠠᠰᠢ ᠤᠯᠠᠨ ᠵᠦᠢᠯ ᠤᠨ ᠪᠤᠤᠪᠤ ᠶᠢ ᠪᠦᠷ ᠰᠢᠷ᠎ᠠ ᠲᠤᠰᠤ ᠪᠠᠷ ᠬᠠᠭᠠᠷᠢᠬᠤ ᠪᠤᠶᠤ ᠪᠤᠴᠠᠯᠭᠠᠬᠤ ᠲᠤᠯᠠ ᠬᠠᠳᠠᠵᠤ ᠬᠠᠳᠠᠭᠤᠷᠠᠳᠠᠭ ᠦᠭᠡᠢ ᠪᠠᠶᠢᠳᠠᠭ᠃       ᠠᠷᠤ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠬᠡᠶᠢᠴᠢᠨ ᠵᠤᠴᠢᠨ ᠤ ᠲᠠᠪᠢᠰᠢ ︵ᠲᠠᠯᠪᠢᠰᠢ︶ ᠶᠢ ᠵᠠᠰᠠᠬᠤ ᠳᠤ ᠪᠠᠨ ᠶᠢᠰᠦᠨ ᠲᠡᠭᠳᠡᠷ ᠲᠠᠢ ᠲᠠᠯᠪᠢᠳᠠᠭ ᠶᠤᠮ᠃ ᠪᠤᠷᠬᠠᠨ ᠤ ᠲᠠᠬᠢᠯᠭ᠎ᠠ ᠶᠢᠨ ᠪᠤᠤᠪᠤ ᠶᠢ ᠪᠤᠯ ᠠᠷᠪᠠᠨ ᠲᠡᠭᠳᠡᠷ ᠲᠠᠢ ᠵᠠᠰᠠᠵᠤ ᠪᠠᠶᠢᠳᠠᠭ᠃ ᠬᠠᠮᠤᠭ ᠲᠡᠭᠡᠳᠤ ᠲᠡᠭᠳᠡᠷ ᠲᠤ ᠪᠠᠨ ᠬᠤᠷᠤᠳ ᠵᠡᠷᠭᠡ ᠶᠢᠨ ᠴᠠᠭᠠᠨ ᠢᠳᠡᠭᠡ ᠪᠠᠨ ᠦᠷᠦᠵᠤ ᠲᠠᠯᠪᠢᠳᠠᠭ᠃       ᠲᠠᠪᠢᠰᠢᠨ ᠳᠤ ᠪᠠᠨ ᠪᠦᠬᠦᠳᠡ ᠶᠢ ᠬᠤᠷᠤᠳ ᠬᠦᠭᠡᠷᠡᠭᠦᠯᠦᠭᠰᠡᠨ ᠦᠷᠦᠮ᠎ᠡ ᠵᠡᠷᠭᠡ ᠴᠠᠭᠠᠨ ᠢᠳᠡᠭᠡ ᠶᠢ ᠲᠠᠯᠪᠢᠬᠤ ᠳᠤ ᠪᠠᠨ ᠪᠤᠤᠪᠤ ᠰᠢᠭ᠋ ᠲᠡᠭᠳᠡᠷᠯᠡᠵᠤ ᠲᠠᠯᠪᠢᠳᠠᠭ ᠦᠭᠡᠢ᠂ ᠬᠠᠷᠢᠨ ᠫᠢᠯᠠ ᠲᠦᠭᠦᠷᠡᠩ ᠦᠷᠦᠵᠤ ᠲᠠᠯᠪᠢᠳᠠᠭ ᠶᠤᠮ᠃       ᠦᠨᠢᠶ᠎ᠡ ᠪᠠ ᠭᠡᠭᠦᠤ ᠪᠠᠨ ᠰᠠᠭᠠᠭᠰᠠᠨ ᠰᠠᠭᠠᠮ᠎ᠠ ᠶᠢᠨ ᠢᠶᠠᠨ ᠲᠡᠭᠡᠵᠢ ᠶᠢ ᠲᠡᠭᠷᠢ ᠭᠠᠵᠠᠷ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠪᠠ ᠤᠪᠤᠭᠠᠨ ᠱᠠᠩᠰᠢᠨ ᠳᠤ ᠪᠠᠨ ᠡᠷᠭᠦᠵᠤ ᠨᠠᠮᠠᠨᠴᠢᠯᠠᠨ ᠲᠠᠭᠠᠳᠬᠠᠳᠠᠭ᠃ ᠰᠡᠷᠵᠢᠮᠯᠡᠬᠦ ᠳᠤ ᠪᠠᠨ ᠰᠡᠷᠵᠢᠮ ᠰᠠᠪᠠᠨ ᠠᠴᠠ ᠪᠠᠨ ᠰᠢᠨᠠᠭ᠎ᠠ ᠪᠠᠷ ᠡᠷᠭᠦᠬᠦ ᠪᠢᠰᠢ ᠵᠠᠪᠠᠯ ᠰᠠᠴᠤᠯᠢ ᠪᠠᠷ ᠡᠷᠭᠦᠳᠡᠭ᠃ ᠰᠠᠴᠤᠯᠢ ᠭᠡᠳᠡᠭ ᠨᠢ ᠶᠢᠰᠤᠨ ᠨᠦᠭᠡ ᠲᠠᠢ ᠠᠭᠠᠷᠤᠤ ᠼᠠᠨᠳᠠᠨ ᠢᠶᠠᠷ ᠬᠢᠭᠰᠡᠨ ᠵᠢᠵᠢᠭᠬᠡᠨ ᠡᠷᠭᠦᠯᠳᠡ ᠶᠢᠨ ᠮᠤᠳᠤᠨ ᠪᠠᠭᠠᠵᠢ ᠪᠠᠶᠢᠳᠠᠭ᠃       ᠡᠶᠢᠨᠬᠦ ᠮᠤᠩᠭᠤᠯ ᠭᠠᠵᠠᠷ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ ᠦᠷᠭᠡᠨ ᠶᠡᠭᠡ ᠭᠡᠷᠡᠭᠴᠡᠭᠡ ᠲᠠᠢ ᠪᠦᠭᠡᠳ ᠠᠮᠳᠠ ᠲᠡᠭᠦᠯᠳᠡᠷ ᠪᠠᠶᠢᠳᠠᠭ ᠢᠶᠠᠷ ᠢᠶᠠᠨ ᠪᠤᠤᠪᠤ ᠱᠤᠤᠪᠤ ᠠᠴᠠ ᠭᠠᠳᠠᠨ᠎ᠠ ᠶᠠᠩᠵᠤ ᠶᠢᠨ ᠬᠤᠶᠠᠷ ᠤᠨ ᠪᠤᠯᠭᠤᠭᠰᠠᠨ ᠢᠳᠡᠭᠡᠨ ᠬᠤᠪᠢᠯᠭᠠᠵᠤ ᠬᠢᠳᠡᠭ ᠪᠠ ᠡᠭᠦᠨ ᠤ ᠲᠤᠳᠤᠷ᠎ᠠ ᠡᠳᠤᠷ ᠲᠤᠳᠤᠮ ᠤᠨ ᠢᠳᠡᠳᠡᠭ ᠨᠢ ᠭᠤᠤᠯᠳᠠᠭᠤ᠄ ᠭᠤᠯᠢᠷ ᠢᠶᠠᠨ ᠰᠠᠶᠢᠬᠠᠨ ᠨᠤᠬᠤᠭᠠᠳ ᠦᠩᠭᠦᠷᠢᠰᠢ ︵ᠦᠩᠭᠦᠷᠢᠭᠦᠯ︶ ᠪᠠᠷ ᠡᠯᠳᠡᠨ ᠨᠢᠮᠭᠡᠯᠡᠵᠤ᠂ ᠬᠡᠷᠴᠢᠮᠡᠯ  ᠭᠤᠯᠢᠷ ︵ᠪᠠᠰᠠ ᠲᠠᠩ ᠭᠡᠵᠤ ᠬᠡᠯᠡᠳᠡᠭ︶᠂ ᠲᠠᠳᠠᠮᠠᠯ  ᠭᠤᠯᠢᠷ᠂ ᠤᠷᠠᠮᠠᠯ ᠭᠤᠯᠢᠷ᠂ ᠢᠮᠡᠷᠮᠡᠯ ᠭᠤᠯᠢᠷ᠂ ᠲᠠᠰᠤᠯᠠᠭᠤᠷ ᠭᠤᠯᠢᠷ᠂ ᠲᠠᠳᠠᠰᠢ ᠢᠳᠡᠭᠡ᠂ ᠲᠤᠬᠤᠯᠠᠢ ᠵᠡᠷᠭᠡ ᠶᠢᠨ ᠬᠤᠭᠤᠯᠠ ᠢᠳᠡᠳᠡᠭ᠃       ᠡᠳᠡᠭᠡᠷ ᠭᠤᠯᠢᠷ ︵ᠲᠠᠩ︶ ᠵᠡᠷᠭᠡ ᠶᠢᠨ ᠢᠳᠡᠭᠡᠨ ᠢ ᠬᠢᠬᠦ ᠳᠤ ᠪᠠᠨ ᠦᠭᠡᠷ ᠬᠤᠨᠢᠨ ᠮᠢᠬ᠎ᠠ ᠪᠠᠨ ᠡᠯᠪᠡᠭ ᠡᠯᠳᠡᠩ ᠬᠦᠰᠭᠦᠯᠡᠵᠤ᠂ ᠴᠠᠭ᠎ᠠ ᠲᠠᠪᠤᠰᠤ ᠶᠢ ᠨᠢ ᠲᠡᠩᠨᠡᠭᠦᠯᠦᠨ ᠮᠠᠰᠢ ᠱᠦᠯᠦᠷᠬᠡᠤ ᠬᠢᠳᠡᠭ ᠲᠤᠯᠠ ᠡᠩ ᠤᠨ ᠲᠠᠭᠰᠢᠭᠤᠷ ᠲᠤᠮᠤᠭᠤ ᠶᠢ ᠪᠤᠯ ᠢᠳᠡᠭᠡᠨ ᠢᠶᠠᠷ ᠢᠶᠠᠨ ᠵᠠᠰᠠᠴᠢᠬᠠᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠵᠠᠩ ᠲᠠᠳᠬᠠᠯ ᠤᠨ ᠬᠤᠪᠢ  ᠳᠤ ᠮᠦᠬᠦᠯᠢᠭ ᠪᠤᠳᠠᠭ᠎ᠠ ᠲᠤᠰᠤᠯ ᠰᠦ ᠶᠢ ᠴᠦ ᠭᠠᠵᠠᠷ ᠤᠨᠠᠭᠠᠵᠤ ᠠᠰᠬᠠᠳᠠᠭ ᠦᠭᠡᠢ᠃ ᠤᠨᠴᠠᠭᠠᠶᠢᠯᠠᠨ ︽ᠰᠦ ᠪᠤᠯ ᠲᠠᠯᠠᠢ ᠰᠢᠭ᠋᠂ ᠢᠳᠡᠭᠡ ᠪᠤᠳᠠᠭ᠎ᠠ ᠠᠭᠤᠯᠠ ᠰᠢᠭ᠋ ᠬᠦᠨᠳᠤ︾ ᠭᠡᠰᠡᠨ ᠬᠦᠨᠳᠤᠳᠭᠡᠯ ᠲᠠᠢ ᠪᠠᠶᠢᠵᠤ᠂ ᠤᠴᠢᠷ ᠤᠳᠬ᠎ᠠ ᠲᠡᠭᠡᠷ᠎ᠡ ᠪᠠᠨ ᠬᠦᠨᠳᠤᠳᠭᠡᠯ ᠪᠠ ᠭᠠᠮᠨᠠᠯ ᠢ ᠡᠷᠭᠢᠮᠯᠡᠬᠦ ᠰᠠᠶᠢᠨ ᠰᠠᠶᠢᠬᠠᠨ ᠵᠠᠩ ᠵᠢᠷᠦᠮ ᠢ ᠪᠤᠢ ᠪᠤᠯᠭᠠᠭᠰᠠᠨ ᠪᠠᠶᠢᠳᠠᠭ᠃ ᠲᠠᠷᠤᠢ ᠡᠭᠡ ᠪᠠᠶᠢᠭᠠᠯᠢ ᠪᠠᠨ ᠰᠢᠳᠤᠬᠦ᠂ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠬᠤ ᠶᠡᠭᠡ ᠤᠳᠬ᠎ᠠ ᠰᠠᠨᠠᠭ᠎ᠠ ᠠᠭᠤᠯᠤᠭᠳᠠᠵᠤ ᠪᠠᠶᠢᠭ᠎ᠠ ᠶᠤᠮ᠃       ︵3︶ ᠰᠢᠯᠦᠭᠡᠢ ᠪᠤᠳᠠᠭᠠᠨ ᠤ ᠵᠦᠢᠯ ᠠᠴᠠ ᠴᠤᠬᠤᠰ ᠲᠤᠷᠠᠳᠬᠤ ᠨᠢ᠄       ᠰᠢᠯᠦᠭᠡᠢ ᠶᠢ ᠤᠤᠯ ᠠᠴᠠ ᠪᠠᠨ ᠤᠷᠤᠨ ᠨᠤᠲᠤᠭ ᠲᠤ ᠪᠠᠨ ᠨᠠᠮᠤᠭ ᠲᠠᠷᠢᠳᠠᠭ᠃ ᠮᠤᠩᠭᠤᠯ ᠠᠮᠤ ᠶᠢ ᠪᠤᠳᠤᠪᠠᠯ ᠲᠡᠶᠢᠮᠤ ᠶᠡᠭᠡ ᠬᠡᠪᠴᠢᠶ᠎ᠡ ᠪᠠᠷ ᠲᠠᠷᠢᠳᠠᠭ ᠪᠢᠰᠢ᠃ ᠰᠢᠯᠦᠭᠡᠢ ᠪᠠᠨ ᠢᠩᠳᠡᠨ ᠴᠠᠶᠢᠯᠠᠭᠠᠵᠤ ᠰᠢᠭᠤᠳ ᠠᠭᠰᠢᠭᠠᠵᠤ ᠢᠳᠡᠳᠡᠭ ᠪᠠ ᠭᠤᠯᠢᠷᠳᠠᠵᠤ ᠠᠪᠤᠭᠠᠳ ᠪᠤᠤᠪᠤ ᠬᠢᠵᠤ ᠢᠳᠡᠳᠡᠭ᠃       ᠡᠷᠭᠢᠯᠳᠡ ᠶᠢᠨ ᠪᠤᠤᠪᠤ᠄       ᠡᠷᠭᠢᠯᠳᠡ ᠶᠢᠨ ᠪᠤᠤᠪᠤ ᠪᠤᠯ ᠰᠢᠯᠦᠭᠡᠢ ᠶᠢᠨ ᠭᠤᠯᠢᠷ ᠢᠶᠠᠨ ᠵᠢᠭᠤᠷᠠᠵᠤ ᠢᠰᠭᠡᠭᠰᠡᠨ ᠤ ᠲᠠᠷᠠᠭ᠎ᠠ ᠪᠠᠷ ᠶᠡᠭᠡ ᠪᠠᠭ᠎ᠠ ᠨᠢ ᠲᠡᠩᠨᠡᠮ᠎ᠡ ᠪᠤᠤᠪᠤ ᠬᠠᠭᠠᠷᠢᠵᠤ ᠠᠪᠤᠭᠠᠳ ᠭᠤᠤᠯ ᠨᠢ ᠬᠠᠷᠢ ᠳᠤ ᠮᠤᠷᠳᠠᠭᠰᠠᠨ ᠬᠡᠤᠭᠡᠨ ᠢᠶᠠᠨ ᠡᠷᠭᠢᠬᠦ ᠳᠤ ᠵᠠᠷᠤᠳᠠᠭ᠂ ᠡᠭᠦᠨ ᠢ ᠪᠠᠨ ᠡᠷᠭᠢᠯᠳᠡ ᠶᠢᠨ ᠪᠤᠤᠪᠤ ᠭᠡᠳᠡᠭ᠃ ᠪᠠᠰᠠ ᠨᠠᠩᠭᠢ ᠶᠢᠨ ᠭᠤᠯᠢᠷ ᠢᠶᠠᠷ ᠢᠶᠠᠨ ᠵᠢᠩᠨᠡᠭᠰᠡᠨ ᠪᠤᠤᠪᠤ ᠪᠤᠶᠤ ᠪᠤᠷᠴᠠᠭ ᠲᠠᠢ ᠪᠤᠤᠪᠤ ᠬᠢᠵᠤ ᠬᠡᠤᠬᠡᠨ ᠢᠶᠠᠨ ᠡᠷᠭᠢᠳᠡᠭ ᠴᠦ ᠪᠤᠢ᠂ ᠡᠶᠢᠮᠤ ᠮᠠᠶ᠋ᠢᠭ ᠤᠨ ᠡᠷᠭᠢᠯᠳᠡ ᠶᠢ ᠠᠷᠤ ᠬᠤᠷᠴᠢᠨ ᠤ ᠲᠠᠷᠢᠶᠠᠯᠠᠬᠤ᠂ ᠬᠠᠭᠠᠰ ᠲᠠᠷᠢᠶᠠᠯᠠᠬᠤ ᠬᠠᠭᠠᠰ ᠮᠠᠯᠵᠢᠬᠤ ᠤᠷᠤᠨ ᠤ ᠮᠤᠩᠭᠤᠯᠴᠤᠳ ᠠᠷᠪᠢᠨ ᠭᠡᠷᠡᠭᠯᠡᠳᠡᠭ ᠶᠤᠮ᠃ ᠰᠡᠭᠦᠯ ᠤᠨ ᠦᠶ᠎ᠡ ᠪᠤᠯᠵᠤ ᠢᠷᠡᠭᠡᠳ ᠮᠠᠯᠵᠢᠬᠤ ᠤᠷᠤᠨ ᠤ ᠮᠤᠩᠭᠤᠯᠴᠤᠳ ᠤᠨ ᠵᠠᠷᠢᠮ ᠨᠢ ᠦᠭᠡᠷ ᠤᠨ ᠡᠪᠴᠢᠭᠦᠤ ᠪᠤᠶᠤ ᠬᠤᠨᠢᠨ ᠤ ᠤᠭᠤᠴᠠ ᠡᠪᠴᠢᠭᠦᠤ ᠵᠡᠷᠭᠡ ᠰᠢᠭᠦᠰᠦᠨ ᠤ ᠪᠠᠨ ᠲᠡᠭᠡᠷ᠎ᠡ ᠨᠢ ᠬᠠᠭᠠᠷᠢᠭᠰᠠᠨ ᠨᠠᠩᠭᠢ ᠶᠢᠨ ᠪᠤᠤᠪᠤ ᠨᠡᠮᠡᠵᠤ ᠡᠷᠭᠢᠬᠦ ᠪᠤᠯᠤᠭᠰᠠᠨ ᠴᠦ ᠪᠤᠢ᠃       ᠦᠳᠦᠷᠢᠭ ︵ᠦᠳᠦᠷᠮ᠎ᠡ︶ ᠤᠨ ᠪᠤᠤᠪᠤ᠄       ᠦᠳᠦᠷᠢᠭ ᠤᠨ ᠪᠤᠤᠪᠤ ᠭᠡᠳᠡᠭ ᠨᠢ ᠲᠤᠭᠤᠭ᠎ᠠ ᠪᠠᠭᠳᠠ ᠶᠠᠳᠠᠮ᠎ᠠ ᠲᠤᠮᠤᠬᠠᠨ ᠬᠠᠭᠠᠷᠢᠭᠰᠠᠨ ᠪᠤᠤᠪᠤ ᠶᠢ ᠬᠡᠯᠡᠳᠡᠭ᠃ ᠪᠤᠭᠴᠤ ᠭᠤᠯᠢᠷ ᠢᠶᠠᠨ ᠪᠤᠴᠠᠯᠣᠮ᠎ᠠ ᠣᠰᠣᠨ ᠳᠤ ᠪᠠᠨ ᠬᠢᠵᠤ᠂ ᠵᠡᠰ ᠭᠠᠤᠯᠢᠨ ᠰᠢᠨᠠᠭ᠎ᠠ ᠶᠢᠨ ᠲᠤᠬᠤ ᠪᠠᠷ ᠲᠠᠪᠰᠢᠨ ᠵᠢᠭᠢᠯᠭᠡᠨ ᠲᠡᠨᠡᠶᠢᠯᠭᠡᠵᠤ ᠨᠢᠮᠭᠡᠯᠡᠳᠡᠭ ᠲᠤᠮᠤ ᠪᠤᠤᠪᠤ ᠶᠢ ᠦᠳᠦᠷᠢᠭ ᠤᠨ ᠪᠤᠤᠪᠤ ᠭᠡᠵᠤ ᠨᠡᠷᠡᠶᠢᠳᠦᠭᠰᠡᠨ ᠪᠠᠶᠢᠳᠠᠭ᠃ ᠲᠦᠭᠦᠷᠢᠭ ᠮᠦᠷᠲᠡᠭᠡᠨ ᠲᠤᠮᠤ ᠪᠤᠯᠬᠤᠷ ᠢᠶᠠᠨ ᠦᠳᠦᠷᠢᠭ ᠤᠨ ᠲᠠᠯᠠᠪᠠᠢ ᠲᠠᠢ ᠠᠳᠠᠯᠢ ᠬᠡᠮᠡᠭᠰᠡᠨ ᠰᠠᠨᠠᠭ᠎ᠠ  ᠲᠠᠢ ᠨᠡᠷ᠎ᠡ  ᠪᠤᠯᠵᠠᠢ᠃   ᠵᠤᠬᠢᠶᠠᠭᠴᠢ᠄ ᠯᠠᠩᠪᠤᠷᠢᠨᠴᠢᠨ   ᠨᠠᠶᠢᠷᠠᠭᠤᠯᠤᠭᠴᠢ᠄  ᠪᠦᠷᠢᠨᠰᠠᠶᠢᠨ
  
ᠢᠷᠡᠯᠲᠡ᠄ ᠠᠷᠣ ᠬᠤᠷᠴᠢᠨ ᠬᠤᠰᠢᠭᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠴᠢᠶᠠᠯᠠᠪᠤᠷᠢ ᠶᠢᠨ ᠵᠢᠷᠭᠤᠭᠠᠨ ᠲᠡᠷᠭᠡ
ᠶᠡᠭᠡ ᠡᠷᠳᠡᠮᠳᠡᠨ ᠪᠢᠮᠪᠠ ᠶᠢᠨ ᠷᠢᠨᠴᠢᠨ ᠪᠠᠭᠰᠢ ᠳᠤ ᠭᠠᠶᠢᠬᠠᠭᠳᠠᠭᠰᠠᠨ ᠬᠦᠮᠤᠨ
ᠨᠤᠶᠠᠨ ᠠᠭᠤᠯᠠ ᠶᠢᠨ ᠤᠪᠤᠭ᠎ᠠ
ᠠᠷᠤ ᠬᠤᠷᠴᠢᠨ ᠤ ᠪᠦᠰᠡᠭᠦᠶᠢᠴᠦᠳ ᠤᠨ ᠦᠰᠦ ᠱᠠᠩᠬᠤᠯᠠᠵᠤ ᠲᠠᠪᠤᠨ ᠬᠠᠳᠬᠤᠭᠤᠷ ᠬᠡᠷᠡᠭᠯᠡᠬᠦ ᠲᠤᠬᠠᠢ
ᠢᠳᠡᠰᠢᠨ ᠮᠠᠯ ᠤᠨ ᠶᠠᠰᠤ ᠮᠢᠬ᠎ᠠ ᠶᠢ ᠲᠤᠶᠠᠴᠢᠵᠤ ᠰᠠᠯᠭᠠᠬᠤ ᠶᠤᠰᠤᠨ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05003979号