ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠡᠮᠤᠨ᠎ᠡ ᠵᠠᠬ᠎ᠠ ᠶᠢᠨ ᠠᠩ ᠠᠩᠨᠠᠯ ᠤᠨ ᠲᠤᠬᠠᠢ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2016/7/12
     ᠠᠩ ᠭᠦᠷᠦᠭᠡ ᠬᠢᠬᠦ ᠪᠤᠯ ᠠᠷᠤ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠤᠨ ᠠᠯᠢ ᠡᠷᠳᠡᠨ ᠠᠴᠠ ᠤᠯᠠᠮᠵᠢᠯᠠᠵᠦ ᠢᠷᠡᠭᠰᠡᠨ ᠵᠠᠩ ᠵᠠᠩᠰᠢᠯ ᠪᠤᠯᠬᠤ ᠶᠤᠮ᠃ ᠡᠨᠡ ᠨᠢ ᠡᠷᠳᠡ ᠦᠶ᠎ᠡ ᠳᠡᠭᠡᠨ ᠨᠢᠭᠡ ᠵᠤᠶᠢᠯ ᠤᠨ ᠪᠡᠶ᠎ᠡ ᠲᠠᠮᠢᠷ᠂ ᠴᠡᠷᠢᠭ ᠤᠨ ᠰᠤᠷᠭᠠᠭᠤᠯᠢᠯᠡᠯ᠂ ᠵᠤᠭ᠎ᠠ ᠴᠡᠩᠬᠡᠯ ᠢ ᠪᠠᠭᠳᠠᠭᠠᠭᠰᠠᠨ ᠰᠤᠶᠤᠯ ᠤᠨ ᠠᠮᠢᠳᠤᠷᠠᠯ ᠤᠨ ᠠᠭᠤᠯᠭ᠎ᠠ ᠪᠤᠯᠵᠦ ᠪᠠᠶᠢᠭᠰᠠᠨ ᠠᠵᠢ᠃ ᠡᠶᠢᠮᠤ ᠠᠴᠠ ᠠᠷᠤ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠬᠡᠤᠬᠡᠳ ᠪᠠᠭᠠᠴᠤᠳ ᠢᠶᠠᠨ ᠬᠠᠷᠬᠠᠨ ᠪᠠᠭ᠎ᠠ ᠠᠴᠠ ᠨᠢ ᠠᠪᠠ ᠠᠩ ᠳᠤ ᠲᠠᠭᠠᠭᠤᠯᠤᠨ ᠰᠤᠷᠭᠠᠵᠦ᠂ ᠠᠩ ᠭᠦᠷᠦᠭᠡ ᠶᠢᠨ ᠬᠠᠯᠠ ᠪᠡᠷᠬᠡ ᠶᠢ ᠮᠡᠳᠡᠭᠦᠯᠵᠦ᠂ ᠭᠦᠴᠢᠷ ᠢ ᠲᠡᠪᠴᠢᠬᠦ ᠰᠦᠰᠤ ᠵᠤᠷᠢᠭ ᠢ ᠨᠢ ᠪᠤᠯᠪᠠᠰᠤᠷᠠᠭᠤᠯᠵᠦ᠂ ᠠᠩ ᠭᠦᠷᠦᠭᠡ ᠶᠢᠨ ᠠᠵᠢᠯᠯᠠᠭ᠎ᠠ ᠪᠠᠷ ᠬᠦᠴᠦ ᠴᠢᠳᠠᠯ᠂ ᠡᠷᠡᠯᠬᠡᠭ ᠰᠦᠰᠤ᠂ ᠮᠡᠷᠭᠡᠨ ᠤᠬᠠᠭᠠᠨ᠂ ᠴᠡᠴᠡᠨ ᠬᠠᠷᠪᠤᠯᠭ᠎ᠠ᠂ ᠤᠨᠤᠴᠢᠳᠠᠢ ᠰᠢᠳᠡᠯᠭᠡ ︵ᠴᠤᠬᠢᠭ᠎ᠠ︶ ᠵᠡᠷᠭᠡ ᠡᠷᠳᠡᠮ ᠴᠢᠳᠠᠪᠤᠷᠢ ᠪᠠᠨ ᠰᠢᠯᠭᠠᠯᠴᠠᠨ ᠮᠦᠷᠤᠶᠢᠴᠡᠬᠦ ᠤᠯᠠᠨ ᠲᠦᠮᠡᠨᠴᠢ ᠴᠢᠨᠠᠷᠳᠠᠢ ᠤᠶᠢᠯᠡᠳᠪᠤᠷᠢᠯᠡᠯ ᠲᠡᠮᠡᠴᠡᠯ ᠤᠨ ᠠᠵᠢᠯᠯᠠᠭ᠎ᠠ ᠪᠤᠯᠭᠠᠨ ᠶᠠᠪᠤᠭᠳᠠᠭᠤᠯᠵᠦ᠂ ︽ᠠᠩ ᠤᠨ ᠭᠠᠨᠵᠤᠭ᠎ᠠ︾ — ᠬᠦᠳᠡᠯᠮᠤᠷᠢ ᠶᠢᠨ ᠪᠦᠳᠤᠭᠡᠯ ᠤᠨ ᠵᠢᠷᠭᠠᠯ ᠴᠡᠩᠬᠡᠯ ᠢ ᠡᠳ᠋ᠯᠡᠭᠦᠯᠳᠡᠭ ᠨᠢᠭᠡᠨ ᠵᠤᠶᠢᠯ ᠤᠨ ᠤᠳᠬ᠎ᠠ ᠠᠭᠤᠯᠭ᠎ᠠ ᠲᠠᠢ ᠠᠵᠢᠯᠯᠠᠭ᠎ᠠ ᠪᠤᠯᠭᠠᠵᠦ ᠪᠠᠶᠢᠭᠰᠠᠨ ᠶᠤᠮ᠃ ᠠᠷᠤ ᠬᠤᠷᠴᠢᠨ ᠤ ᠡᠮᠤᠨ᠎ᠡ ᠵᠠᠬ᠎ᠠ ᠳᠤ ᠠᠩ ᠠᠮᠢᠳᠠᠨ ᠤ ᠨᠡᠷᠡᠶᠢᠳᠤᠯ ᠢᠶᠠᠷ ︽ᠲᠡᠤᠯᠡᠢ ᠭᠤᠷᠭᠤᠤᠯ ᠤᠨ ᠠᠪᠠ︾᠂ ︽ᠦᠨᠡᠭᠡ ᠴᠢᠨ᠋ᠸ᠎ᠠ ᠶᠢᠨ ᠠᠪᠠ︾᠂ ︽ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢᠨ ᠠᠪᠠ︾ ᠭᠡᠵᠦ ᠠᠳᠠᠯᠢ ᠪᠤᠰᠤ ᠪᠠᠷ ᠶᠠᠪᠤᠭᠳᠠᠭᠤᠯᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠬᠦᠷᠢᠶ᠎ᠡ ᠬᠡᠪᠴᠢᠶ᠎ᠡ ᠪᠠᠷ ᠨᠢ ᠪᠠᠰᠠ ᠪᠠᠭ᠎ᠠ ᠬᠡᠪᠴᠢᠶᠡᠨ ᠤ ᠠᠪᠠ᠂ ᠶᠡᠭᠡ ᠬᠡᠪᠴᠢᠶᠡᠨ ᠤ ᠠᠪᠠ᠂ ᠲᠠᠷᠤᠢ ︽ᠲᠠᠳᠠᠭᠠᠨ ᠠᠪᠠ︾᠂ ︽ᠬᠤᠮᠤᠷᠠᠭ᠎ᠠ ᠠᠪᠠ︾ ︵ᠬᠦᠷᠢᠶ᠎ᠡ ᠠᠪᠠ︶ ᠭᠡᠵᠦ ᠬᠢᠳᠡᠭ ᠪᠠᠶᠢᠵᠠᠢ᠃ ᠲᠤᠤᠷ᠎ᠠ ᠪᠢ ᠭᠤᠤᠯᠳᠠᠭᠤ ︽ᠬᠤᠮᠤᠷᠠᠭ᠎ᠠ ᠠᠪᠠ︾ ᠶᠢᠨ ᠲᠤᠬᠠᠢ ᠶᠠᠷᠢᠶ᠎ᠠ᠄      ᠠᠷᠤ ᠬᠤᠷᠴᠢᠨ ᠤ ᠡᠮᠤᠨ᠎ᠡ ᠵᠠᠬ᠎ᠠ ᠶᠢᠨ ᠠᠩ ᠠᠩᠨᠠᠯ ᠳᠤ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢᠨ ᠠᠪᠠ ᠶᠢ ᠭᠤᠤᠯᠳᠠᠭᠤ᠄ ᠪᠠᠯᠴᠢᠷᠤᠳ ᠨᠤᠳᠤᠭ ᠤᠨ ᠵᠡᠭᠡᠷᠡᠨᠳᠠᠢ ᠶᠢᠨ ᠰᠢᠯᠢ ᠪᠠᠷ  ᠂ ᠵᠢᠭᠠᠰᠤᠳᠠᠢ ᠨᠤᠳᠤᠭ ᠤᠨ ᠬᠤᠯᠪᠤᠭ᠎ᠠ ᠶᠢᠨ ᠵᠤ ᠪᠠᠷ᠂ ᠴᠠᠭᠠᠨᠳᠠᠯ᠎ᠠ ︵ᠵᠡᠭᠡᠷ᠎ᠡ ᠶᠢᠨ ᠬᠤᠳᠤᠭᠤᠷ︶ ᠢᠶᠠᠷ ᠬᠢᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠦᠨᠡᠭᠡ ᠴᠢᠨ᠋ᠸ᠎ᠠ ᠶᠢᠨ ᠠᠪᠠ ᠶᠢ ᠪᠤᠯ ᠭᠤᠤᠯᠳᠠᠭᠤ ᠪᠠᠷᠠᠭᠤᠨ ᠰᠠᠶᠢᠠᠠᠦ᠋ᠨᠳᠤᠷ᠂ ᠵᠡᠭᠦᠨ ᠰᠠᠶᠢᠠᠠᠦ᠋ᠨᠳᠤᠷ᠂ ᠪᠠᠷᠠᠭᠤᠨ ᠵᠡᠭᠦᠨ ᠠᠪᠠᠢ ᠵᠠᠬ᠎ᠠ ᠠᠭᠤᠯᠠ᠂ ᠴᠢᠨ᠋ᠸ᠎ᠠ  ᠶᠢᠨ ᠲᠠᠯ᠎ᠠ᠂ ᠭᠠᠩᠭᠠᠳᠠᠢ ᠶᠢᠨ ᠭᠤᠤ ᠭᠠᠩᠭ᠎ᠠ ᠵᠡᠷᠬᠡ ᠭᠠᠵᠠᠷ ᠬᠢᠵᠦ ᠪᠠᠶᠢᠭᠰᠠᠨ ᠪᠠ ᠲᠡᠤᠯᠠᠢ ᠭᠤᠷᠭᠤᠤᠯ ᠵᠡᠷᠭᠡ ᠵᠢᠵᠢᠭ ᠠᠩ ᠤᠳ ᠢ ᠭᠡᠰᠡᠷ ᠤᠨ ᠵᠣ᠂ ᠲᠠᠮᠤᠬ᠎ᠠ ︵ᠲᠠᠮᠠᠭ᠎ᠠ︶ ᠶᠢᠨ ᠮᠠᠩᠬ᠎ᠠ᠂ ᠠᠯᠳᠠᠢ ᠶᠢᠨ ᠮᠠᠩᠬ᠎ᠠ ᠵᠡᠷᠭᠡ ᠭᠠᠵᠠᠷ  ᠢᠶᠠᠷ ᠬᠢᠳᠡᠭ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠲᠦᠴᠢ ᠲᠠᠪᠢᠭᠠᠳ ᠤᠨ ᠳᠤ ᠵᠡᠭᠡᠷᠡᠨᠳᠠᠢ ᠰᠢᠯᠢ ᠶᠢᠨ ᠵᠡᠭᠡᠷ᠎ᠡ  ᠶᠢᠨ ᠠᠪᠠ ᠳᠤ ᠪᠠᠭᠠᠷᠢᠨ᠂ ᠤᠩᠨᠢᠭᠤᠳ᠂ ᠠᠷᠤ ᠬᠤᠷᠴᠢᠨ ᠵᠡᠷᠭᠡ ᠬᠤᠰᠢᠭᠤ ᠶᠢᠨ ᠠᠩᠴᠢᠳ ᠤᠷᠤᠯᠴᠠᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠠᠯᠳᠠᠨ ᠬᠤᠯᠪᠤᠭ᠎ᠠ ᠶᠢᠨ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢᠨ ᠠᠪᠠ ᠳᠤ ᠨᠠᠢᠮᠠᠨ᠂ ᠤᠩᠨᠢᠭᠤᠳ᠂ ᠵᠠᠷᠤᠳ᠂ ᠠᠷᠤ ᠬᠤᠷᠴᠢᠨ ᠵᠡᠷᠭᠡ ᠬᠤᠰᠢᠭᠤᠳ ᠤᠨ ᠠᠩᠴᠢᠨ ᠭᠦᠷᠦᠭᠡᠴᠢᠨ ᠤᠷᠤᠯᠴᠠᠵᠦ ᠪᠠᠶᠢᠯ᠎ᠠ ᠭᠡᠳᠡᠭ ᠶᠤᠮ᠃ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠠᠷᠤ ᠵᠠᠬ᠎ᠠ  ︽ᠠᠷᠪᠠᠨ ᠰᠤᠮᠤ ᠭᠤᠷᠪᠠᠨ ᠭᠤᠤᠯ︾ ᠬᠢᠨ ᠪᠠ ᠪᠠᠭᠠᠷᠢᠨ ᠤ  ︽ᠨᠠᠢᠮᠠᠨ ᠰᠤᠮᠤᠨ  ︾ ᠤ ᠬᠢᠨ ᠴᠦ ᠪᠦᠷ ᠬᠦᠷᠤᠯᠴᠡᠨ ᠢᠷᠡᠵᠦ᠂ ᠬᠤᠰᠢᠭᠤᠨ ᠡᠮᠤᠨ᠎ᠡ ᠵᠠᠬ᠎ᠠ ᠶᠢᠨ ᠬᠤᠮᠤᠷᠠᠭᠠᠨ ᠠᠪᠠ ᠳᠤ ᠤᠷᠤᠯᠴᠠᠵᠦ ᠪᠠᠶᠢᠭᠰᠠᠨ ᠭᠡᠳᠡᠭ᠃      ᠨᠢᠭᠡ᠂   ᠠᠪᠠ ᠶᠢᠨ ᠴᠠᠭ ᠬᠤᠭᠤᠴᠠᠭ᠎ᠠ      ᠡᠷᠳᠡ ᠲᠡᠤᠬᠡᠨ ᠳᠡᠭᠡᠨ ᠮᠤᠩᠭᠤᠯᠴᠤᠳ ᠲᠤ ᠲᠤᠭᠳᠠᠭᠰᠠᠨ ᠠᠪᠠ ᠬᠢᠬᠦ ᠴᠠᠭ ᠭᠡᠵᠦ ᠪᠠᠷᠤᠭ ᠪᠠᠶᠢᠭᠰᠠᠨ ᠦᠬᠡᠢ᠂ ᠵᠠᠩᠰᠢᠯ ᠢᠶᠠᠷ ᠵᠢᠯ ᠤᠨ ᠲᠦᠷᠪᠡᠨ ᠤᠯᠠᠷᠢᠯ ᠳᠤ ᠪᠦᠷ ᠠᠪᠠᠯᠠᠵᠦ᠂ ᠬᠠᠭᠠᠰ ᠰᠠᠷ᠎ᠠ ᠪᠤᠯᠬᠤ ᠪᠦᠷᠢ ᠨᠢᠭᠡ ᠤᠳᠠᠭ᠎ᠠ ᠠᠩ ᠬᠢᠳᠡᠭ ᠪᠠᠶᠢᠵᠠᠢ ᠭᠡᠨ᠎ᠡ᠃ ᠬᠤᠵᠢᠮ ᠨᠢ ᠬᠦᠮᠤᠰ᠂ ᠠᠩ ᠠᠷᠢᠶᠠᠳᠠᠨ ᠤ ᠦᠷᠡᠵᠢᠯ ᠤᠨ ᠬᠤᠭᠤᠴᠠᠭ᠎ᠠ  ᠶᠢ ᠲᠠᠨᠢᠵᠦ ᠮᠡᠳᠡᠭᠡᠳ ᠠᠩ ᠠᠷᠢᠶᠠᠳᠠᠨ ᠳᠤ ᠦᠷᠡᠵᠢᠯ ᠤᠨ ᠴᠠᠭ ᠲᠠᠯᠪᠢᠨ ᠦᠭᠴᠦ᠂ ᠶᠠᠮᠠᠷ ᠦᠶ᠎ᠡ ᠳᠤ ᠠᠪᠠᠯᠠᠪᠠᠯ ᠠᠩ ᠭᠦᠷᠦᠭᠡᠰᠤ ᠲᠠᠷᠭᠤ ᠲᠠᠢ ᠪᠠᠶᠢᠬᠤ᠂ ᠠᠪᠠᠯᠠᠬᠤ ᠳᠤ ᠲᠤᠬᠢᠷᠠᠮᠵᠢ ᠲᠠᠢ  ᠂ ᠶᠠᠮᠠᠷ ᠦᠶ᠎ᠡ ᠳᠤ ᠲᠤᠬᠢᠷᠠᠮᠵᠢ ᠦᠬᠡᠢ ᠭᠡᠰᠡᠨ ᠢ ᠤᠬᠠᠭᠠᠷᠠᠨ ᠤᠶᠢᠯᠠᠭᠠᠵᠠᠢ᠃ ᠲᠡᠭᠡᠭᠡᠳ ᠠᠩ ᠠᠪᠠ ᠶᠢᠨ ᠴᠠᠭ ᠬᠤᠭᠤᠴᠠᠭ᠎ᠠ ᠲᠤᠭᠳᠠᠭᠠᠬᠤ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠶᠡᠭᠡ ᠬᠤᠮᠤᠷᠠᠭ᠎ᠠ ᠠᠪᠠ᠂ ᠤᠨᠴᠠᠭᠠᠶᠢᠯᠠᠨ ᠬᠡᠳᠤᠨ ᠬᠤᠰᠢᠭᠤᠳ ᠤᠨ ᠬᠠᠮᠳᠤᠷᠠᠭᠰᠠᠨ ᠶᠡᠭᠡ ᠬᠡᠪᠴᠢᠶᠡᠨ  ᠤ ᠬᠤᠮᠤᠷᠠᠭ᠎ᠠ ᠠᠪᠠ ᠶᠢ ᠪᠤᠯ ᠲᠤᠯᠠᠭᠠᠨ ᠬᠠᠪᠤᠷ ᠤᠨ ᠰᠡᠭᠦᠯᠴᠢ᠂ ᠡᠪᠡᠰᠤ ᠨᠤᠭᠤᠭ᠎ᠠ ᠤᠷᠭᠤᠵᠦ ᠴᠡᠴᠡᠭ ᠬᠤᠸᠠᠷ ᠲᠡᠯᠭᠡᠷᠡᠭᠰᠡᠨ ᠵᠤᠨ ᠤ ᠡᠬᠢᠨ ᠤ ᠰᠠᠶᠢᠬᠠᠨ ᠤᠯᠠᠷᠢᠯ ᠳᠤ ᠶᠡᠪᠤᠭᠳᠠᠭᠤᠯᠳᠠᠭ ᠶᠤᠮ᠃ ᠤᠯᠠᠩᠬᠢ ᠳᠠᠭᠠᠨ ᠬᠠᠭᠤᠴᠢᠨ ᠤᠯᠠᠷᠢᠯ ᠤᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠤ ᠡᠳᠤᠷ ᠬᠢᠳᠡᠭ ᠵᠠᠩᠰᠢᠯ ᠲᠠᠢ ᠪᠢᠯᠠ᠃ ᠤᠨᠴᠠ ᠶᠠᠪᠤᠳᠠᠯ ᠤᠴᠢᠷ ᠠᠴᠠ ᠪᠤᠯᠵᠦ᠂ ᠲᠤᠭᠳᠠᠭᠰᠠᠨ ᠴᠠᠭ ᠠᠴᠠ ᠪᠠᠨ ᠡᠮᠤᠨ᠎ᠡ ᠬᠡᠳᠤᠨ ᠡᠳᠤᠷ ᠪᠤᠶᠤ ᠬᠤᠶᠢᠨ᠎ᠡ ᠬᠡᠳᠤᠨ ᠡᠳᠤᠷ ᠪᠠᠶᠢᠭᠰᠠᠨ ᠴᠦ ᠪᠤᠯᠤᠨ᠎ᠠ᠂ ᠭᠡᠬᠦ ᠳᠤ ᠪᠦᠷ ᠠᠪᠠ ᠶᠢᠨ ᠲᠠᠭᠠᠭᠠᠮᠠᠯ ᠠᠴᠠ ᠬᠠᠷᠢᠭᠤᠴᠠᠨ ᠵᠠᠷᠯᠠᠨ᠎ᠠ᠃ ᠡᠭᠦᠨ ᠠᠴᠠ ᠪᠤᠰᠤᠳ ᠴᠠᠭ ᠲᠤ ᠴᠠᠭ ᠠᠭᠤᠷ ᠤᠨ ᠪᠠᠶᠢᠳᠠᠯ᠂ ᠡᠪᠡᠰᠤ ᠪᠡᠯᠴᠢᠭᠡᠷ ᠤᠨ ᠤᠷᠭᠤᠯᠳᠠ᠂ ᠠᠪᠠ ᠶᠢᠨ ᠴᠢᠬᠤᠯᠴᠢᠯᠠᠭ᠎ᠠ  ᠪᠠᠨ ᠦᠨᠳᠤᠰᠤᠯᠡᠵᠦ᠂ ᠵᠠᠷᠢᠮ ᠳᠠᠭᠠᠨ ᠵᠢᠷᠭᠤᠭᠠᠨ ᠰᠠᠷ᠎ᠠ ᠬᠦᠷᠳᠡᠯᠡᠬᠢ ᠴᠠᠭ ᠦᠶ᠎ᠡ ᠳᠤ ᠠᠪᠠᠯᠠᠬᠤ ᠭᠡᠪᠡᠯ᠂ ᠠᠪᠠ  ᠶᠢᠨ ᠲᠠᠭᠠᠭᠠᠮᠠᠯ ᠠᠴᠠ ᠠᠪᠠᠯᠠᠬᠤ ᠭᠠᠵᠠᠷ ᠢᠶᠠᠨ ᠲᠤᠭᠳᠠᠭᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠠᠪᠠ ᠶᠢᠨ ᠵᠠᠷ ᠲᠠᠷᠬᠠᠭᠠᠵᠤ ᠴᠢᠮᠡᠭᠡᠯᠡᠳᠡᠭ ᠪᠠᠶᠢᠵᠠᠢ᠃ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠪᠤᠯ ᠵᠤᠨ ᠤ ᠬᠠᠯᠠᠭᠤᠨ ᠪᠣᠯᠴᠢᠬᠠᠬᠤ ᠲᠤᠯᠠ ᠦᠨᠳᠤᠰᠤᠨ ᠳᠡᠭᠡᠨ ᠠᠪᠠᠯᠠᠬᠤ ᠳᠤ ᠵᠤᠬᠢᠷᠠᠮᠵᠢ ᠦᠬᠡᠢ ᠪᠤᠯᠵᠦ ᠠᠪᠠᠯᠠᠳᠠᠭ ᠦᠬᠡᠢ ᠭᠡᠳᠡᠭ᠃ ᠨᠠᠮᠤᠷ ᠤᠨ ᠰᠡᠷᠢᠭᠦᠨ ᠤᠷᠤᠵᠦ ᠶᠢᠰᠤᠨ ᠰᠠᠷ᠎ᠠ ᠠᠴᠠ ᠰᠡᠭᠦᠯᠡᠷ᠂ ᠠᠩ ᠭᠦᠷᠦᠭᠡ ᠲᠠᠷᠭᠤᠯᠠᠭᠰᠠᠨ ᠦᠶ᠎ᠡ ᠳᠤ ᠪᠤᠶᠤ ᠡᠪᠤᠯ ᠤᠨ ᠴᠠᠰᠤᠨ ᠳᠤ ᠲᠠᠬᠢᠨ ᠠᠪᠠ  ᠶᠢᠨ ᠵᠠᠷ ᠲᠠᠯᠪᠢᠵᠦ ᠠᠪᠠ ᠠᠩᠨᠠᠯ ᠬᠦᠭᠵᠢᠶᠡᠨ ᠲᠠᠢ ᠪᠤᠯᠵᠦ᠂ ᠲᠠᠷᠠᠭ᠎ᠠ ᠵᠢᠯ ᠤᠨ ᠬᠢᠨᠢ ᠬᠠᠪᠤᠷ ᠪᠤᠯᠳᠠᠯ᠎ᠠ ᠦᠷᠭᠦᠯᠵᠢᠯᠡᠳᠡᠭ ᠪᠠᠶᠢᠨ᠎ᠠ᠃      ᠬᠤᠶᠠᠷ᠂   ᠠᠪᠠ ᠶᠢᠨ ᠪᠡᠯᠡᠳᠭᠡᠯ ᠬᠢᠬᠦ      ᠲᠡᠤᠬᠡ ᠶᠢᠨ ᠮᠡᠳᠡᠭᠡ ᠲᠡᠮᠳᠡᠭᠯᠡᠯ ᠢ ᠦᠨᠳᠤᠰᠤᠯᠡᠪᠡᠯ᠂ ᠮᠤᠩᠭᠤᠯᠴᠤᠳ ᠠᠩ ᠭᠦᠷᠦᠭᠡ ᠶᠢ ᠲᠡᠭᠡᠳᠤ ᠲᠡᠭᠷᠢ ︽ᠡᠪᠤᠭᠡᠨ ᠴᠠᠭᠠᠨ ᠪᠤᠷᠬᠠᠨ  ︾ ᠤ ︽ᠮᠠᠯ︾ ᠭᠡᠵᠦ ᠦᠵᠡᠳᠡᠭ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠠᠩ ᠠᠩᠨᠠᠯ ᠳᠤ ᠭᠠᠷᠬᠤ ᠠᠴᠠ  ᠪᠠᠨ ᠡᠮᠤᠨ᠎ᠡ ᠲᠡᠭᠡᠳᠤ ᠲᠡᠭᠷᠢ᠂ ᠴᠠᠭᠠᠨ ᠡᠪᠤᠭᠡᠨ ᠪᠤᠷᠬᠠᠨ ᠪᠠ ᠭᠠᠵᠠᠷ ᠤᠰᠤᠨ ᠤ ᠡᠵᠡᠳ ᠰᠠᠬᠢᠭᠤᠰᠤᠨ ᠨᠠᠪᠳᠠᠭ ᠰᠠᠪᠳᠠᠭ ᠲᠤ ᠡᠷᠭᠦᠴᠡ ᠪᠡᠷᠢᠨ ᠲᠠᠭᠠᠳᠬᠠᠨ ᠵᠠᠯᠪᠢᠷᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃ ᠮᠠᠨ ᠤ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠴᠦ ᠡᠭᠦᠨ ᠲᠠᠢ ᠠᠳᠠᠯᠢ ᠪᠠᠷ ᠠᠩ ᠳᠤ ᠮᠤᠷᠳᠠᠬᠤ ᠠᠴᠠ ᠪᠠᠨ ᠡᠮᠤᠨ᠎ᠡ ᠲᠠᠬᠢᠯᠭ᠎ᠠ ᠡᠷᠭᠦᠴᠡ ᠶᠢᠨ ᠰᠠᠩ ᠲᠠᠯᠪᠢᠵᠦ᠂ ᠢᠷᠤᠭᠡᠯ ᠭᠤᠶᠤᠳᠠᠯ ᠤᠩᠰᠢᠨ ᠪᠤᠷᠬᠠᠨ ᠲᠡᠭᠷᠢ ᠠᠴᠠ ᠠᠩ ᠤᠨ ᠭᠠᠨᠵᠤᠭ᠎ᠠ — ᠬᠡᠰᠢᠭ ᠰᠤᠶᠤᠷᠬᠠᠨ ᠬᠠᠶᠢᠷᠠᠯᠠᠬᠤ ᠶᠢ ᠭᠤᠶᠤᠵᠦ ᠲᠠᠭᠠᠳᠬᠠᠳᠠᠭ ᠶᠤᠮ᠃ ᠡᠶᠢᠮᠤᠷᠬᠦ ᠵᠠᠩ ᠤᠶᠢᠯᠡ ᠶᠢ ᠭᠦᠢᠴᠡᠳᠭᠡᠭᠰᠡᠳ᠂ ᠮᠠᠨᠤᠰ ᠲᠤ ᠯᠠᠪᠳᠠᠢ ᠠᠩ ᠤᠨ ᠬᠡᠰᠢᠭ ᠢᠶᠠᠨ ᠬᠠᠶᠢᠷᠠᠯᠠᠬᠤ ᠶᠤᠮ ᠭᠡᠵᠦ ᠪᠠᠳᠤ ᠢᠳᠡᠭᠡᠨ᠂ ᠠᠩ ᠭᠦᠷᠦᠭᠡᠨ ᠳᠤ ᠮᠤᠷᠳᠠᠨ ᠭᠠᠷᠵᠠᠭᠠᠳᠠᠭ ᠲᠤᠯᠠ᠂ ᠬᠡᠭᠡᠷ᠎ᠡ ᠭᠠᠳᠠᠨ᠎ᠠ ᠲᠠᠭᠠᠷᠠᠯᠳᠤᠭᠰᠠᠨ ᠠᠷᠢᠶᠠᠳᠠᠨ ᠠᠮᠢᠳᠠᠨ ᠢ ︽ᠲᠡᠭᠷᠢ ᠠᠪᠤ︾ ᠢᠪᠡᠭᠡᠵᠦ ᠪᠠᠶᠢᠭ᠎ᠠ ᠬᠡᠰᠢᠭ ᠭᠡᠵᠦ ᠵᠤᠷᠢᠭᠳᠠᠢ ᠠᠩᠨᠠᠨ᠂ ᠠᠯᠠᠭᠰᠠᠨ ᠠᠮᠢᠳᠠᠨ ᠤ ᠪᠠᠨ ᠵᠦᠯᠳᠤ ᠪᠠᠷ ᠨᠢ ᠲᠡᠭᠷᠢ ᠲᠠᠬᠢᠵᠦ᠂ ᠲᠡᠭᠷᠢ  ᠳᠤ ᠲᠠᠯᠠᠷᠬᠠᠳᠠᠭ᠃ ᠠᠷᠤ ᠬᠤᠷᠴᠢᠨᠴᠤᠳ ᠠᠩ ᠳᠤ ᠭᠠᠷᠬᠤ ᠠᠴᠠ ᠡᠮᠤᠨ᠎ᠡ ︽ᠠᠩ ᠬᠢᠬᠦ ᠪᠠᠷ ᠶᠠᠪᠤᠨ᠎ᠠ︾ ᠭᠡᠵᠦ ᠭᠠᠯ ᠲᠤᠯᠭ᠎ᠠ ᠶᠢᠨ ᠲᠡᠷᠭᠡᠳᠡ ᠬᠡᠯᠡᠳᠡᠭ ᠦᠬᠡᠢ᠂ ᠤᠴᠢᠷ ᠨᠢ ᠭᠠᠯ ᠤᠨ ᠪᠤᠷᠬᠠᠨ ᠤᠯᠠᠨ ᠦᠭᠡᠨ ᠳᠤ ᠲᠤᠷᠠᠳᠠᠢ ᠲᠤᠯᠠ  ︽ᠠᠩ ᠤᠨ ᠨᠢᠭᠤᠴᠠ︾ ᠶᠢ ᠠᠩ ᠭᠦᠷᠦᠭᠡᠰᠤ — ᠬᠡᠭᠡᠷ᠎ᠡ ᠶᠢᠨ ᠠᠮᠢᠳᠠᠨ ᠳᠤ ᠵᠠᠳᠠᠷᠠᠭᠤᠯᠤᠨ ᠯᠡᠪᠡᠷᠡᠭᠦᠯᠵᠦ᠂ ᠠᠩ ᠤᠨ ᠭᠠᠨᠵᠤᠭ᠎ᠠ ᠶᠢ ᠬᠤᠭᠤᠰᠤᠯᠠᠳᠠᠭ ᠭᠡᠵᠦ ᠦᠵᠡᠳᠡᠭ ᠤᠴᠢᠷ ᠠᠴᠠ ᠠᠩ ᠠᠩᠨᠠᠯ ᠳᠤ ᠶᠠᠪᠤᠬᠤ ᠪᠠᠨ ᠭᠠᠯ ᠤᠨ ᠲᠡᠷᠭᠡᠳᠡ ᠬᠡᠯᠡᠭᠦ ᠦᠬᠡᠢ ᠮᠦᠷᠳᠡᠭᠡᠨ ᠭᠠᠯ ᠳᠠᠭᠠᠨ ᠦᠭᠡᠬᠦ ᠲᠤᠰᠤ ᠡᠷᠭᠦᠨ ᠮᠢᠯᠢᠶᠠᠨ ᠲᠠᠬᠢᠭᠠᠳ ᠮᠤᠷᠳᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ᠃      ᠠᠩ ᠳᠤ ᠭᠠᠷᠬᠤ ᠠᠴᠠ ᠪᠠᠨ ᠡᠮᠤᠨ᠎ᠡ ᠠᠩ ᠤᠨ ᠪᠠᠭᠠᠵᠢ ᠵᠠᠪᠰᠡᠭ ᠪᠤᠯᠬᠤ ᠬᠠᠷᠪᠤᠭ᠎ᠠ ᠨᠠᠮᠨᠠᠭ᠎ᠠ᠂ ᠪᠢᠯᠠᠭᠤ ᠰᠢᠳᠠᠮ ᠳᠠᠭᠠᠨ ᠠᠮᠢᠳᠠᠨ ᠤ ᠴᠢᠰᠤ ᠲᠦᠷᠬᠢᠵᠦ ᠠᠮᠢᠯᠠᠭᠤᠯᠳᠠᠭ ᠵᠤᠷᠰᠢᠯ ᠲᠠᠢ ᠶᠤᠮ᠃ ᠠᠷᠤ ᠬᠤᠷᠴᠢᠨ ᠠᠪᠠ ᠶᠢᠨ ᠵᠡᠪᠰᠡᠭ ᠲᠤ ᠤᠩᠬᠢᠨ ᠪᠢᠯᠠᠭᠤ᠂ ᠲᠡᠭᠦᠵᠡᠩ ᠪᠢᠯᠠᠭᠤ ᠭᠡᠵᠦ ᠬᠤᠶᠠᠷ ᠵᠤᠶᠢᠯ ᠪᠠᠶᠢᠵᠦ︔ ᠬᠦᠷᠡᠯ᠂ ᠵᠡᠰ᠂ ᠭᠠᠤᠯᠢ᠂ ᠲᠤᠭᠤᠯᠭ᠎ᠠ ᠵᠡᠷᠭᠡ ᠪᠠᠷ ᠬᠢᠭᠰᠡᠨ ᠤᠩᠬᠢ ᠪᠤᠶᠤ ᠢ ᠵᠠᠷᠤᠳᠠᠭ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠬᠠᠶᠢᠪᠠᠩ ᠪᠢᠯᠠᠭᠤ ᠪᠤᠶᠤ ᠬᠠᠶᠠᠮᠠᠯ ᠪᠢᠯᠠᠭᠤ ᠭᠡᠵᠦ ᠪᠠᠰᠠ ᠪᠠᠶᠢᠳᠠᠭ᠃ ᠠᠷᠤ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠮᠤᠷᠢ ᠤᠨᠤᠭ᠎ᠠ ᠪᠠᠨ ᠴᠦ ᠵᠢᠯᠠᠭ᠎ᠠ᠂ ᠮᠤᠨᠴᠤᠭ ᠢᠶᠠᠷ ᠰᠠᠶᠢᠬᠠᠨ ᠵᠠᠰᠠᠨ ᠴᠢᠮᠡᠵᠦ ᠪᠠᠶᠢᠳᠠᠭ ᠵᠠᠩᠰᠢᠯ ᠲᠠᠢ᠂ ᠡᠮᠡᠭᠡᠯ ᠢ ᠪᠤᠯ ᠮᠤᠷᠢᠨ ᠤ ᠲᠦᠷᠪᠡᠨ ᠲᠠᠯ᠎ᠠ ᠪᠠᠷ ᠲᠡᠭᠰᠢᠬᠡᠨ ᠪᠠᠭᠤᠬᠤ ᠳᠤ ᠲᠤᠬᠢᠷᠠᠭᠰᠠᠨ ᠡᠮᠡᠭᠡᠯ ᠢ ᠰᠤᠩᠭᠤᠨ ᠬᠢᠳᠡᠭ᠂ ᠡᠨᠡ ᠨᠢ ᠦᠵᠦᠮᠦᠴᠢᠨ ᠤ ᠠᠳᠠᠯᠢ ᠠᠴᠠ ᠶᠢᠨ ᠬᠡᠯᠪᠡᠷᠢ ᠲᠠᠢ ᠪᠢᠰᠢ᠂ ᠵᠢᠷᠢᠮ ᠤᠨ ᠰᠢᠭ ᠶᠤᠸᠠᠮᠪᠤᠤ ᠬᠡᠯᠪᠡᠷᠢ ᠲᠠᠢ ᠴᠦ ᠪᠢᠰᠢ᠂ ᠬᠠᠯᠬ᠎ᠠ ᠶᠢᠨ ᠡᠮᠡᠭᠡᠯ ᠢ ᠪᠤᠳᠤᠪᠠᠯ ᠡᠮᠤᠨ᠎ᠡ ᠪᠦᠭᠦᠷᠭᠡ ᠨᠢ ᠵᠢᠭᠠᠬᠠᠨ ᠨᠠᠮ ᠪᠠᠶᠢᠵᠦ᠂ ᠠᠷᠤ ᠪᠦᠭᠦᠷᠭᠡ ᠨᠢ ᠵᠢᠰᠢᠭᠦᠬᠡᠨ ᠬᠡᠪᠳᠡᠭᠡ᠂ ᠰᠠᠭᠤᠳᠠᠯ ᠨᠢ ᠠᠭᠤᠵᠢᠮ ᠪᠠᠶᠢᠳᠠᠭ ᠢᠶᠠᠷ ᠢᠶᠠᠨ ᠪᠤᠰᠤᠳ ᠤᠯᠠᠨ ᠶᠠᠩᠵᠦ ᠶᠢᠨ ᠡᠮᠡᠭᠡᠯ ᠤᠳ ᠠᠴᠠ ᠢᠯᠭᠠᠭ᠎ᠠ ᠲᠠᠢ ᠪᠠᠶᠢᠳᠠᠭ ᠶᠤᠮ᠃ ᠠᠩ ᠤᠨ ᠨᠤᠬᠠᠶᠢᠳ ᠤᠨ ᠢᠶᠠᠨ ᠬᠦᠵᠦᠭᠦᠨ ᠳᠤᠨᠢ ︿ᠤᠯᠠᠭᠠᠨ ᠵᠢᠯᠠᠭ᠎ᠠ﹀ ᠵᠡᠭᠦᠯᠭᠡᠳᠡᠭ᠃ ᠪᠠᠰᠠ ︿ᠨᠤᠬᠠᠢ ᠶᠢᠨ ᠰᠠᠭᠠᠯᠳᠠ﹀ ᠵᠡᠭᠦᠯᠭᠡᠨ᠎ᠡ ᠭᠡᠳᠡᠭ ᠶᠤᠮ᠃ ᠨᠤᠬᠠᠢ ᠶᠢᠨ ᠰᠠᠭᠠᠯᠳᠠ ᠶᠢ ᠬᠢᠬᠦ ᠳᠤ ᠬᠠᠷ᠎ᠠ ᠪᠠ ᠤᠯᠠᠭᠠᠨ ᠦᠭᠡᠳᠡᠩ ᠪᠦᠰ ᠲᠡᠭᠡᠷ᠎ᠡ ᠬᠤᠸᠠᠷ ᠴᠡᠴᠡᠭ ᠤᠷᠠᠯᠠᠨ ᠬᠠᠳᠬᠤᠭᠰᠠᠨ ᠰᠠᠭᠠᠯᠳᠠ ᠲᠠᠢ ᠨᠤᠬᠠᠢ ᠬᠦᠳᠤᠯᠡᠵᠦ ᠪᠠᠶᠢᠪᠠᠯ ᠡᠨᠡ ᠠᠶᠢᠯ ᠤᠨ ᠪᠦᠰᠡᠭᠦᠢ ᠨᠢ ᠤᠷᠠᠨ ᠭᠡᠳᠡᠭ ᠢ ᠬᠦᠮᠤᠰ ᠲᠤ ᠮᠡᠳᠡᠭᠦᠯᠵᠦ ᠰᠤᠷ ᠪᠤᠶᠤ ᠪᠤᠯᠢᠭᠠᠷᠢ ᠠᠷᠠᠰᠤᠨ ᠰᠠᠭᠠᠯᠳᠠ ᠳᠠᠭᠠᠨ ᠮᠦᠩᠭᠦᠨ ᠲᠤᠪᠤᠷᠤᠤ ᠲᠠᠢ ᠪᠤᠯ ᠠᠮᠢᠳᠤᠷᠠᠯ ᠴᠢᠨᠡᠭᠡᠯᠢᠭ ᠪᠠᠶᠠᠨ ᠠᠶᠢᠯ ᠭᠡᠳᠡᠭ ᠢ ᠬᠠᠷᠠᠭᠤᠯᠤᠨ᠎ᠠ᠃ ᠰᠠᠭᠠᠯᠳᠠ ᠶᠢᠨ ᠭᠠᠷᠬ᠎ᠠ ᠢ ᠮᠦᠩᠭᠦ᠂ ᠭᠠᠤᠯᠢ᠂ ᠵᠡᠰ᠂ ᠲᠡᠮᠤᠷ ᠵᠡᠷᠭᠡ ᠠᠳᠠᠯᠢ ᠪᠤᠰᠤ ᠵᠤᠶᠢᠯ ᠢᠶᠠᠷ ᠬᠢᠭᠰᠡᠨ ᠬᠢᠯᠠᠯᠵᠢᠭᠰᠠᠨ ᠤᠯᠠᠭᠠᠨ ᠵᠢᠯᠠᠭ᠎ᠠ ᠲᠠᠢ ᠪᠠᠶᠢᠳᠠᠭ᠂ ᠡᠩ ᠤᠨ ᠬᠠᠷ᠎ᠠ ᠰᠤᠷ ᠲᠡᠭᠡᠷ᠎ᠡ ᠲᠦᠭᠦᠮᠬᠡᠨ ᠬᠡᠳᠤᠨ ᠪᠦᠭᠡᠵᠢ  ᠲᠠᠢ ᠬᠢᠭᠰᠡᠨ ᠰᠠᠭᠠᠯᠳᠠ ᠴᠦ ᠮᠤᠩ ᠦᠬᠡᠢ ᠤᠯᠠᠨ ᠪᠠᠶᠢᠳᠠᠭ᠂ ᠨᠤᠬᠠᠢ ᠶᠢᠨ ᠬᠦᠳᠤᠯᠤᠭᠦᠷ ᠤᠨ ᠭᠠᠷᠬ᠎ᠠ ᠶᠢ ᠮᠦᠩᠭᠦ᠂ ᠭᠠᠤᠯᠢ᠂ ᠵᠡᠰ᠂ ᠲᠡᠮᠤᠷ ᠢᠶᠠᠷ ᠬᠢᠭᠰᠡᠨ ᠪᠠᠶᠢᠳᠠᠭ ᠪᠦᠭᠡᠳ ᠬᠦᠳᠤᠯᠤᠭᠦᠷ ᠤᠨ ᠰᠤᠷ ᠲᠡᠭᠡᠰᠤ ᠶᠢ ᠲᠤᠷᠭ᠎ᠠ᠂ ᠮᠢᠨᠳᠠᠰᠤ᠂ ᠶᠤᠩᠬᠤᠷ ᠵᠡᠷᠭᠡ ᠶᠠᠩᠵᠦ ᠪᠦᠷᠢ ᠪᠠᠷ ᠬᠢᠳᠡᠭ ᠪᠢᠯᠠ᠃      ᠠᠪᠠ ᠶᠢᠨ ᠴᠢᠮᠡᠭᠡ ᠤᠯᠤᠭᠰᠠᠨ ᠤ ᠰᠡᠭᠦᠯᠡᠷ ᠠᠩᠴᠢᠳ᠂ ᠬᠡᠳᠤᠨ ᠡᠳᠤᠷ ᠤᠨ ᠡᠮᠤᠨ᠎ᠡ ᠠᠪᠠ ᠶᠢᠨ ᠮᠤᠷᠢᠳ  ᠢᠶᠠᠨ ᠪᠠᠷᠢᠵᠦ ᠰᠤᠶᠢᠳᠠᠭ᠃ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠠᠴᠠ ᠡᠮᠤᠨ᠎ᠡ ᠠᠩ ᠤᠨ ᠪᠠᠭ᠋ᠠᠳᠠᠳ᠂ ᠵᠤᠨ ᠤ ᠱᠦᠯᠦ ᠤᠤᠭᠤᠵᠠᠭᠠᠵᠦ᠂ ᠬᠦᠷᠢᠶ᠎ᠡ ᠠᠪᠠ ᠳᠤ ᠮᠤᠷᠳᠠᠬᠤ ᠬᠦᠴᠦ ᠲᠠᠮᠢᠷ ᠢᠶᠠᠨ ᠲᠡᠵᠢᠭᠡᠳᠡᠭ ᠪᠢᠯᠠ᠃ ᠨᠡᠩ ᠴᠦ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠦᠷᠪᠡᠨ ᠤ ᠰᠦᠨᠢ ᠨᠢ ᠡᠷᠡᠭᠳᠠᠢ ᠡᠮᠡᠭᠳᠠᠢ ᠵᠠᠯᠠᠭᠤᠴᠤᠳ ᠨᠢᠳᠤ ᠬᠠᠮᠬᠢᠯ ᠦᠬᠡᠢ ᠨᠠᠶᠢᠷᠠᠯᠠᠨ ᠨᠠᠭᠠᠳᠴᠦ᠂ ᠬᠡᠭᠡᠷ᠎ᠡ ᠲᠠᠯ᠎ᠠ ᠳᠤ ᠭᠠᠯ ᠲᠦᠯᠡᠵᠦ᠂ ᠰᠦᠷ ᠰᠠᠶᠢᠬᠠᠨ ᠠᠷᠠᠳ ᠤᠨ ᠲᠠᠭᠤᠤ ᠪᠠᠨ ᠰᠦᠨᠢ ᠶᠢᠨ ᠤᠭᠳᠠᠷᠭᠤᠢ ᠳᠤ ᠴᠤᠤᠷᠢᠶᠠᠳᠤᠭᠤᠯᠬᠤ ᠳᠤ᠂ ᠡᠪᠤᠭᠡᠳ ᠨᠠᠰᠤᠳᠠᠳ ᠴᠦ ᠲᠦᠳᠡᠭ ᠭᠠᠯ ᠤᠨ ᠲᠡᠷᠭᠡᠳᠡ ᠠᠷᠢᠬᠢ ᠤᠤᠭᠤᠵᠦ ᠠᠶᠢᠷᠠᠭ ᠪᠠᠯᠭᠤᠵᠦ᠂ ᠪᠠᠶᠠᠷ ᠬᠦᠷ ᠨᠡᠮᠡᠨ ᠠᠪᠠ ᠶᠢᠨ ᠵᠦᠩᠨᠡᠯ ᠪᠤᠯᠭᠠᠨ᠂ ᠦᠤᠷ ᠤᠨ ᠭᠡᠭᠡ ᠶᠢ ᠤᠭᠳᠤᠳᠠᠭ ᠶᠤᠮ᠃ ᠰᠦᠨᠢ ᠲᠦᠯᠢ ᠪᠠᠷ ᠬᠠᠮᠤᠭ ᠲᠦᠷᠦᠭᠦᠨ ᠤ ᠠᠩᠴᠢᠳ ᠬᠦᠳᠡᠯᠵᠦ᠂ ᠰᠢᠷ᠎ᠠ ᠭᠡᠭᠡ ᠲᠠᠳᠠᠬᠤ ᠦᠶ᠎ᠡ ᠪᠠᠷ ᠮᠤᠷᠢᠨ ᠤ ᠲᠦᠪᠦᠷᠭᠡᠨ ᠠᠯᠤᠰ ᠠᠴᠠ ᠰᠤᠨᠤᠰᠳᠠᠨ᠂ ᠦᠨᠳᠤᠰᠤᠨ ᠳᠡᠭᠡᠨ ᠪᠦᠬᠦᠨ ᠢᠶᠠᠷ ᠬᠦᠳᠡᠯᠤᠯᠴᠡᠨ ᠭᠠᠷᠴᠠᠭᠠᠳᠠᠭ ᠪᠢᠯᠠ᠃ ᠮᠤᠷᠢᠨ ᠤ ᠲᠦᠪᠦᠷᠭᠡᠨ᠂ ᠨᠤᠬᠠᠢ ᠶᠢᠨ ᠰᠠᠭᠠᠯᠳᠠ ᠬᠠᠩᠬᠢᠨᠠᠬᠤ ᠳᠤ ᠠᠪᠠ ᠶᠢᠨ ᠬᠡᠢ ᠲᠠᠢ ᠨᠤᠬᠠᠶᠢᠳ᠂ ᠮᠤᠷᠢᠳ ᠢ ᠡᠷᠬᠢᠨ ᠲᠤᠭᠤᠷᠢᠨ ᠭᠦᠶᠤᠵᠦ᠂ ᠬᠦᠮᠤᠰ ᠤᠨ ᠲᠡᠪᠡᠯ ᠬᠤᠷᠮᠤᠢ ᠠᠴᠠ ᠲᠠᠳᠠᠵᠦ ᠭᠠᠰᠠᠯᠤᠨ ᠭᠠᠩᠬᠢᠨᠠᠵᠦ᠂ ᠠᠪᠠ ᠶᠢᠨ ᠬᠦᠯᠦᠭ ᠮᠤᠷᠢᠳ ᠴᠦ ᠲᠠᠭᠤᠨ ᠵᠠᠯᠭᠠᠯᠳᠤᠨ ᠦᠤᠷᠰᠡᠵᠦ᠂ ᠠᠨᠢᠷ ᠴᠢᠮᠡᠭᠡ ᠲᠠᠷᠬᠠᠵᠦ᠂ ᠠᠪᠠ ᠶᠢᠨ ᠬᠦᠮᠤᠰ  ᠠᠮᠵᠢᠯᠳᠠ ᠲᠠᠢ ᠮᠤᠷᠳᠠᠭᠰᠠᠨ ᠢ ᠮᠡᠳᠡᠭᠡᠯᠡᠳᠡᠭ ᠪᠠᠶᠢᠨ᠎ᠠ᠃      ᠭᠤᠷᠪᠠ᠂   ᠠᠪᠠ ᠶᠢᠨ ᠬᠦᠭᠵᠢᠶᠡᠨ ᠶᠠᠪᠤᠴᠠ      ᠦᠤᠷ ᠶᠢᠨ ᠭᠡᠭᠡ ᠰᠠᠴᠤᠵᠦ᠂ ᠠᠯᠤᠰ ᠤᠨ ᠪᠠᠷ᠎ᠠ ᠬᠠᠷᠠᠭᠳᠠᠬᠤ ᠳᠤ ᠠᠩ ᠤᠨ ᠤᠯᠠᠨ ᠬᠦᠮᠤᠰ ᠪᠦᠷ ᠵᠢᠵᠢᠭ ᠲᠤᠪᠤᠷᠴᠠᠭ ᠦᠨᠳᠦᠷᠯᠢᠭ ᠭᠠᠵᠠᠷ ᠢ ᠡᠵᠡᠯᠡᠭᠡᠳ ᠵᠠᠪᠳᠤᠴᠢᠬᠠᠭᠰᠠᠨ ᠪᠠᠶᠢᠳᠠᠭ᠂ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠨᠤᠳᠤᠭ ᠤᠰᠤᠨ ᠤ ᠬᠢᠨ ᠪᠠ ᠵᠠᠬ᠎ᠠ ᠬᠦᠪᠡᠭᠡ ᠬᠤᠰᠢᠭᠤᠳ ᠤᠨ ᠬᠢᠨ ᠴᠦ ᠮᠠᠶᠢᠬᠠᠨ ᠬᠦᠰᠢᠭᠡ ᠪᠠᠨ ᠠᠪᠴᠤ᠂ ᠬᠤᠨᠤᠭ ᠤᠨ ᠭᠠᠵᠠᠷ ᠤᠨ ᠠᠯᠤᠰ ᠠᠴᠠ ᠬᠦᠷᠤᠯᠴᠡᠨ ᠢᠷᠡᠭᠰᠡᠨ ᠪᠠᠶᠢᠳᠠᠭ᠃ ᠨᠠᠰᠤᠳᠠᠨ ᠪᠤᠭᠤᠷᠤᠯᠴᠤᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ ᠪᠠᠯᠴᠢᠷᠤᠳ ᠨᠤᠳᠤᠭ ᠤᠨ ᠵᠡᠭᠡᠷᠡᠨᠳᠠᠢ ᠶᠢᠨ ᠰᠢᠯᠢ ᠬᠤᠸᠠ᠂ ᠵᠢᠭᠠᠰᠤᠳᠠᠢ ᠶᠢᠨ ᠠᠯᠳᠠᠨ ᠬᠤᠯᠪᠤᠭ᠎ᠠ ᠠᠭᠤᠯᠠ ᠶᠢᠨ ᠬᠢᠷ᠎ᠠ ᠬᠦᠨᠳᠡᠢ ᠪᠠᠷ ᠤᠯᠠᠨ ᠠᠷᠪᠢᠨ ᠵᠡᠭᠡᠷ᠎ᠡ ᠭᠤᠷ᠎ᠠ ᠪᠠᠭᠰᠢᠷᠠᠯᠳᠤᠨ ᠰᠦᠯᠵᠢᠯᠳᠤᠵᠦ᠂ ᠠᠳᠤᠭᠤ ᠮᠠᠯ ᠠᠳᠠᠯᠢ ᠤᠯᠠᠶᠢᠨ ᠰᠢᠷᠠᠯᠠᠭᠠᠳ᠂ ᠠᠪᠠ ᠶᠢᠨ ᠪᠠᠭ᠋ᠠᠳᠠᠳ ᠤᠨ ᠬᠤᠷᠤᠬᠠᠢ ᠶᠢ ᠬᠦᠳᠡᠯᠭᠡᠭᠡᠨ᠎ᠡ ᠭᠡᠵᠦ ᠬᠡᠯᠡᠳᠡᠭ᠃ ᠲᠡᠷᠡ ᠠᠷᠪᠢᠨ ᠵᠡᠭᠡᠷ᠎ᠡ ᠭᠤᠷ᠎ᠠ ᠣᠤ ᠮᠦᠷᠡᠨ ᠤ ᠤᠰᠤ᠂ ᠦᠯᠵᠡᠶᠢᠮᠦ᠋ᠷᠡᠨ ᠤ ᠤᠰᠤ ᠶᠢ ᠤᠮᠳᠠᠯᠠᠭᠠᠳ᠂ ᠵᠢᠪᠠᠷ ᠠᠪᠴᠤ ᠵᠡᠭᠡᠷᠡᠨᠳᠡᠢ  ᠶᠢᠨ ᠰᠢᠯᠢ᠂ ᠵᠡᠬᠡᠷ᠎ᠠ ᠶᠢᠨ ᠬᠤᠳᠤᠭᠤᠷ ᠢᠶᠠᠷ ᠢᠶᠠᠨ ᠲᠠᠷᠬᠠᠨ ᠪᠡᠯᠴᠢᠳᠡᠭ ᠭᠡᠳᠡᠭ᠃ ᠲᠡᠭᠡᠷ᠎ᠠ ᠵᠠᠭᠤᠨ ᠤ ᠭᠤᠴᠢ ᠳᠦᠴᠢᠭᠡᠳ ᠣᠨ ᠳᠤ ᠵᠡᠭᠦᠨ ᠪᠠᠷᠠᠭᠤᠨ ᠠᠪᠠᠢ ᠵᠠᠬ᠎ᠠ ᠠᠭᠤᠯᠠ ᠪᠠᠷ ᠵᠡᠷᠯᠢᠭ ᠠᠷᠭᠠᠯᠵᠢ ᠤᠭᠠᠯᠵᠠ ᠨᠤᠭᠤᠳ ᠵᠢᠷᠪᠡᠯᠵᠢᠨ ᠲᠠᠪᠬᠢᠳᠠᠭ ᠭᠡᠵᠤ ᠠᠷᠤ ᠬᠤᠷᠴᠢᠨ ᠠᠷᠠᠳ ᠤᠨ ᠲᠠᠭᠤᠨ ᠳᠤ ᠳᠠᠭᠤᠯᠠᠳᠠᠭ ᠪᠢᠯᠡ᠃ ᠠᠪᠠ ᠦᠳᠦᠭᠡᠬᠦ ᠬᠦᠮᠤᠰ ᠲᠠᠭᠤ ᠬᠤᠭᠤᠯᠠᠢ ᠠᠪᠤᠯᠴᠠᠨ᠂ ᠪᠠᠷᠬᠢᠷᠠᠨ ᠤᠶᠢᠮᠡᠯᠳᠤᠨ ᠡᠬᠢᠯᠡᠬᠦ ᠳᠤ ᠦᠷᠭᠦᠭᠰᠡᠨ ᠵᠡᠭᠡᠷ᠎ᠡ ᠭᠤᠷ᠎ᠠ ᠰᠦᠷᠦᠭ ᠰᠦᠷᠦᠭ ᠢᠶᠠᠷ ᠬᠤᠸᠠ ᠵᠢᠯᠠᠭ᠎ᠠ ᠶᠢᠨ ᠲᠡᠷᠳᠡᠭᠦᠷ᠂ ᠲᠡᠨᠢᠭᠡᠷ ᠬᠠᠩᠭᠠᠢ ᠵᠣ ᠶᠢᠨ ᠲᠤᠮᠳᠠᠭᠤᠷ᠂ ᠬᠦᠨᠳᠡᠢ ᠬᠦᠳᠤᠯ ᠤᠨ ᠭᠤᠪᠢ ᠬᠢᠷ᠎ᠠ ᠪᠠᠷ ᠴᠢᠨᠡᠭᠡ ᠮᠡᠳᠡᠨ ᠴᠠᠶᠢᠯᠵᠠᠨ ᠲᠠᠪᠬᠢᠯᠳᠤᠨ᠎ᠠ᠂ ᠲᠤᠪᠤ ᠲᠤᠯᠤᠭᠠᠳ ᠲᠤ ᠲᠤᠯᠤᠭᠠᠳ ᠢᠷᠡᠬᠦ ᠳᠤ ᠲᠡᠭᠡᠷ᠎ᠡ ᠨᠢ ᠵᠤᠭᠰᠤᠭ᠎ᠠ ᠠᠩᠴᠢᠳ᠂ ᠵᠧ︕ ᠬᠡᠢ︕ ᠭᠡᠵᠦ ᠬᠠᠰᠬᠢᠷᠤᠯᠳᠤᠬᠤᠶ᠎ᠠ᠂ ᠵᠡᠭᠡᠷ᠎ᠡ ᠭᠤᠷ᠎ᠠ ᠡᠷᠬᠢᠭᠡᠳ ᠦᠭᠡᠷ᠎ᠡ ᠲᠡᠰᠢ ᠲᠤᠳᠠᠭᠠᠨ᠎ᠠ᠃ ᠭᠡᠬᠦ ᠳᠤ ᠤᠯᠠᠨ ᠠᠩᠴᠢᠳ ᠲᠡᠷᠡ ᠲᠤᠤᠷ᠎ᠠ ᠨᠢ ᠵᠢᠯᠤᠭᠤ ᠲᠠᠯᠪᠢᠨ ᠨᠡᠭᠡᠳᠡᠭ ᠦᠬᠡᠢ᠂ ᠲᠡᠪᠬᠡᠷᠡᠨ ᠵᠤᠤᠵᠠᠢ ᠪᠤᠯᠢᠶᠠᠯᠴᠠᠬᠤ ᠮᠤᠷᠢᠳ ᠤᠨ ᠢᠶᠠᠨ ᠵᠢᠯᠤᠭᠤ ᠶᠢ ᠲᠠᠳᠠᠵᠦ᠂ ᠤᠤᠬᠠᠶᠢᠯᠠᠨ ᠬᠠᠰᠬᠢᠷᠴᠦ ᠵᠦᠪᠬᠡᠨ ᠬᠦᠭᠵᠢᠭᠡ ᠨᠡᠮᠡᠨ᠎ᠡ᠃ ᠠᠪᠠ ᠶᠢᠨ ᠨᠤᠬᠠᠶᠢᠳ ᠴᠦ ᠡᠵᠡᠨ ᠤ ᠪᠠᠨ ᠪᠦᠰᠡᠨ ᠠᠴᠠ ᠬᠦᠳᠡᠯᠦᠭᠡ ᠬᠤᠯᠪᠤᠭ᠎ᠠ ᠲᠠᠢ ᠲᠤᠯᠠ ᠲᠤᠷ᠎ᠠ ᠪᠠᠷ ᠢᠶᠠᠨ ᠭᠠᠳᠠᠭᠰᠢ ᠰᠠᠯᠵᠦ ᠬᠦᠶᠤᠵᠦ ᠴᠢᠳᠠᠬᠤ ᠦᠬᠡᠢ᠂ ᠵᠦᠪᠬᠡᠨ ᠦᠰᠤᠷᠬᠢᠯᠡᠬᠦ ᠲᠡᠳᠤᠢ᠃ ᠠᠩᠴᠢᠳ᠂ ᠨᠤᠬᠠᠢ ᠪᠠᠨ ᠬᠦᠳᠤᠯᠵᠦ ᠪᠠᠶᠢᠬᠤ ᠶᠢᠨ ᠵᠤᠷᠢᠯᠭ᠎ᠠ ᠨᠢ ᠴᠦ ᠭᠡᠳ ᠰᠠᠶᠢᠨ ᠨᠤᠬᠠᠢ ᠶᠢᠨ ᠬᠦᠴᠦ ᠶᠢ ᠬᠠᠮᠠᠭᠠᠯᠠᠬᠤ ᠶᠢᠨ ᠲᠦᠯᠦᠭᠡ ᠪᠠ ᠰᠢᠨ᠎ᠡ ᠨᠤᠬᠠᠶᠢᠳ ᠢ ᠠᠪᠠ ᠶᠢᠨ ᠰᠤᠷᠭᠠᠯ ᠲᠠᠢ ᠪᠤᠯᠭᠠᠬᠤ ᠶᠢᠨ ᠲᠦᠯᠦᠭᠡ ᠶᠤᠮ᠂ ᠨᠡᠩ ᠴᠢᠬᠤᠯᠠ ᠨᠢ ᠨᠤᠬᠠᠢ ᠵᠠᠷᠤᠬᠤ ᠬᠠᠮᠤᠭ ᠤᠨ ᠵᠠᠩᠬᠢᠯᠭ᠎ᠠ ᠶᠢᠨ ᠦᠶ᠎ᠡ ᠳᠤ ᠰᠠᠶ᠋ᠢ ᠨᠤᠬᠠᠢ ᠪᠠᠨ ᠡᠴᠢᠨ ᠲᠡᠭᠡᠷ᠎ᠡ  ᠨᠢ ᠲᠡᠮᠳᠡᠶᠢᠬᠡᠨ ᠬᠡᠷᠡᠭᠯᠡᠬᠦ ᠳᠤ ᠤᠷᠤᠰᠢᠨ᠎ᠠ᠃ ᠭᠦᠯᠦᠬᠡ ᠨᠤᠬᠠᠢ ᠨᠢ ᠬᠡᠳᠤᠷᠬᠡᠢ ᠭᠦᠶᠤᠵᠦ ᠴᠠᠩᠭᠠᠵᠦ ᠦᠬᠦᠭᠰᠡᠨ ᠶᠠᠪᠤᠳᠠᠯ ᠴᠦ ᠭᠠᠷᠴᠦ ᠦᠩᠭᠡᠷᠡᠭᠰᠡᠨ ᠪᠠᠶᠢᠳᠠᠭ᠃ ᠭᠡᠪᠡᠴᠦ ᠨᠤᠬᠠᠢ ᠪᠦᠬᠦᠨ ᠢ ᠴᠦᠮ ᠬᠦᠳᠤᠯᠳᠡᠭ ᠪᠢᠰᠢ᠂ ᠰᠤᠯᠠ ᠨᠤᠬᠠᠶᠢᠳ ᠨᠡᠩ ᠠᠷᠪᠢᠨ ᠪᠠᠶᠢᠳᠠᠭ ᠶᠤᠮ᠃ ᠰᠤᠯᠠ ᠨᠤᠬᠠᠶᠢᠳ ᠨᠢ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢ ᠦᠷᠭᠦᠭᠡᠬᠦ ᠳᠤ ᠨᠢᠭᠡ ᠮᠦᠰᠤᠨ ᠤ ᠬᠦᠴᠦᠨ ᠪᠤᠯᠳᠠᠭ ᠪᠢᠯᠠ᠃ ᠮᠠᠨ ᠤ ᠨᠤᠳᠤᠭ ᠲᠤ ᠴᠢᠨ᠋ᠸ᠎ᠠ ᠶᠢ ᠭᠦᠢᠴᠡᠬᠦ ᠮᠤᠷᠢᠳ ᠪᠤᠯ ᠮᠤᠩ ᠦᠬᠡᠢ ᠠᠷᠪᠢᠨ ᠪᠠᠶᠢᠳᠠᠭ᠂ ᠭᠡᠬᠦ ᠳᠤ ᠵᠡᠭᠡᠷ᠎ᠡ ᠶᠢ ᠭᠦᠢᠴᠡᠬᠦ ᠠᠭᠳᠠ ᠲᠤᠩ ᠬᠤᠪᠤᠷ ᠪᠠᠶᠢᠳᠠᠭ ᠶᠤᠮ᠃ ᠲᠡᠶᠢᠮᠤ ᠠᠴᠠ ᠠᠮᠤᠷ ᠲᠠᠶᠢᠪᠤᠩ ᠪᠡᠯᠴᠢᠵᠦ ᠪᠠᠶᠢᠭ᠎ᠠ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢ ᠨᠡᠬᠡᠮᠵᠢᠯᠡᠵᠦ ᠭᠦᠢᠴᠡᠬᠦ ᠭᠡᠭᠴᠢ ᠨᠢ ᠲᠤᠩ ᠪᠡᠷᠬᠡ ᠲᠠᠢ ᠶᠠᠪᠤᠳᠠᠯ ᠶᠤᠮ᠂ ᠠᠩᠴᠢᠳ ᠤᠯᠠᠩᠬᠢ ᠳᠠᠭᠠᠨ ᠵᠡᠭᠡᠷ᠎ᠡ ᠭᠤᠷ᠎ᠠ ᠪᠠᠨ ᠲᠠᠯᠠᠭᠠᠷ ᠬᠠᠶᠠᠳᠠᠭ ᠪᠢᠯᠠ᠃ ᠲᠡᠶᠢᠮᠤ ᠠᠴᠠ ᠦᠷᠭᠦᠬᠡᠨ ᠶᠠᠳᠠᠷᠠᠭᠠᠬᠤ ᠨᠢ ᠡᠷᠬᠢᠮ ᠲᠡᠭᠡᠳᠤ ᠠᠷᠭ᠎ᠠ ᠪᠤᠯᠬᠤ ᠶᠤᠮ᠃ ᠵᠤᠭᠰᠤᠯ ᠦᠬᠡᠢ ᠠᠮᠢ ᠲᠠᠯᠪᠢᠨ ᠭᠦᠶᠦᠭᠰᠡᠨ ᠵᠡᠭᠡᠷ᠎ᠡ ᠶᠢᠨ ᠰᠦᠷᠦᠭ ᠠᠴᠠ ᠠᠯᠢ ᠨᠢᠭᠡᠨ ᠤ ᠬᠢᠨᠢ ᠬᠦᠴᠦ ᠲᠠᠮᠢᠷ ᠨᠢ ᠪᠠᠷᠠᠭᠳᠠᠮᠠᠭᠴᠠ᠂ ᠬᠡᠳᠤᠭᠦᠯᠡ ᠰᠦᠷᠦᠭ ᠠᠴᠠ ᠪᠠᠨ ᠰᠠᠯᠤᠵᠦ᠂ ᠦᠭᠡᠷ᠎ᠡ ᠵᠦᠭ ᠲᠤ ᠲᠠᠪᠬᠢᠳᠠᠭ ᠤᠨᠴᠠᠯᠢᠭ ᠲᠠᠢ᠂ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢᠨ ᠶᠠᠳᠠᠷᠠᠭᠰᠠᠨ ᠦᠶ᠎ᠡ ᠪᠤᠯ ᠠᠩᠴᠢᠳ ᠤᠨ ᠠᠭᠳᠠ ᠮᠤᠷᠢᠨ ᠤ ᠬᠤᠷᠳᠤᠨ ᠢ ᠰᠢᠯᠭᠠᠵᠦ᠂ ᠠᠪᠠ ᠶᠢᠨ ᠨᠤᠬᠠᠶᠢᠳ ᠤᠨ ᠭᠦᠶᠤᠳᠡᠯ ᠢ ᠦᠵᠡᠬᠦ ᠴᠠᠭ ᠲᠤᠯᠠ ᠬᠦᠮᠤᠨ ᠪᠦᠬᠦᠨ ᠬᠦᠴᠦᠨ ᠲᠤᠷᠪᠢ᠂ ᠡᠷ᠎ᠡ ᠴᠢᠳᠠᠯ ᠢᠶᠠᠨ ᠲᠡᠷᠡ ᠦᠶ᠎ᠡ ᠳᠤ ᠭᠠᠷᠭᠠᠵᠦ᠂ ᠠᠪᠠ ᠶᠢᠨ ᠠᠪᠢᠶᠠᠰ ᠤᠬᠠᠭᠠᠨ ᠢᠶᠠᠨ ᠢᠯᠡᠷᠡᠭᠦᠯᠵᠦ᠂ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢᠨ ᠵᠦᠭ ᠲᠠᠭᠠᠷᠢᠨ ᠤᠷᠤᠳᠠᠭ ᠪᠢᠯᠠ᠃ ᠲᠡᠷᠡ ᠦᠶ᠎ᠡ  ᠶᠢᠨ ᠠᠪᠠ ᠶᠢᠨ ᠲᠠᠯᠠᠪᠠᠢ ᠶᠢ ᠬᠠᠷᠠᠬᠤ ᠳᠤ ᠲᠡᠨᠢᠭᠡᠷ ᠠᠭᠤᠳᠠᠮ ᠰᠢᠯᠢ ᠬᠤᠸᠠ ᠪᠠᠷ ᠨᠡᠶᠢᠳᠠᠮ ᠠᠭᠳᠠ ᠬᠦᠯᠦᠭ ᠲᠠᠪᠬᠢᠯᠳᠤᠵᠦ᠂ ᠠᠪᠠ ᠶᠢᠨ ᠨᠤᠬᠠᠢ ᠠᠪᠠᠭᠠᠨᠠᠯᠳᠤᠵᠦ᠂ ᠠᠩᠴᠢᠨ ᠬᠦᠮᠤᠰ ᠤᠨ ᠬᠠᠰᠬᠢᠷᠤᠯᠳᠠ ᠬᠤᠯᠢᠯᠳᠤᠨ ᠲᠦᠷᠴᠢᠬᠢᠨᠡᠵᠦ᠂ ᠰᠠᠭᠠᠯᠳᠠ ᠵᠡᠭᠦᠭᠰᠡᠨ ᠰᠠᠶᠢᠨ ᠨᠤᠬᠠᠶᠢᠳ᠂ ᠰᠠᠷᠪᠠᠭᠠᠨᠠᠵᠦ ᠮᠠᠭᠤᠳᠠᠭᠰᠠᠨ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢ ᠲᠤᠰᠤᠨ ᠤᠷᠤᠵᠦ ᠲᠠᠳᠠᠵᠦ ᠪᠠᠶᠢᠬᠤ᠂ ᠭᠠᠪᠰᠢᠭᠠᠶᠢᠯᠠᠵᠦ ᠤᠷᠤᠭᠠᠳ ᠭᠠᠭᠴᠠᠬᠠᠨ ᠴᠤᠬᠢᠬᠤ ᠭᠡᠳ ᠪᠢᠯᠠᠭᠤ ᠰᠢᠳᠠᠮ  ᠢᠶᠠᠨ ᠬᠤᠭᠤᠰᠤᠨ ᠴᠤᠬᠢᠵᠦ᠂ ᠲᠡᠮᠳᠡᠭ ᠪᠤᠯᠭᠠᠬᠤ ᠭᠡᠵᠦ ᠮᠠᠯᠠᠭᠠᠢ ᠪᠠᠨ ᠰᠢᠳᠡᠵᠦ ᠶᠠᠪᠤᠭᠤᠯᠤᠭᠠᠳ᠂ ᠵᠢᠯᠤᠭᠤ ᠲᠠᠳᠠᠨ ᠲᠤᠭᠤᠷᠢᠨ ᠡᠷᠬᠢᠵᠦ ᠪᠠᠶᠢᠬᠤ᠂ ᠰᠤᠷᠭᠠᠮᠭᠠᠢ ᠱᠠᠯᠠᠭᠠᠮᠠᠢ ᠠᠩᠴᠢᠨ ᠡᠷ᠎ᠡ᠂ ᠠᠪᠠ ᠶᠢᠨ ᠤᠯᠵᠠᠨ ᠲᠡᠭᠡᠷ᠎ᠡ ᠰᠢᠭᠤᠳ ᠵᠠᠶᠢᠳᠠᠯᠠᠨ ᠪᠠᠭᠤᠵᠦ ᠪᠠᠶᠢᠬᠤ ᠵᠡᠷᠭᠡ ᠠᠯᠢ ᠤᠯᠠᠨ ᠰᠠᠶᠢᠬᠠᠨ ᠦᠵᠡᠭᠳᠡᠯ ᠤᠳ ᠶᠠᠭ ᠯᠠ ᠺᠢᠨᠣ᠋ ᠲᠧᠯᠸᠢᠰ ᠭᠠᠷᠴᠦ ᠪᠠᠶᠢᠬᠤ ᠰᠢᠭ᠋ ᠬᠦᠮᠤᠰ ᠤᠨ ᠬᠠᠷᠠᠭᠠᠨ ᠳᠤ ᠵᠢᠷᠤᠭᠯᠠᠨ ᠬᠠᠷᠠᠭᠳᠠᠨ᠎ᠠ᠃ ᠢᠩᠬᠢᠭᠡᠳ ᠯᠡ ᠠᠳᠡ ᠨᠢ ᠨᠢᠭᠡ ᠤᠪᠤᠭ᠎ᠠ ᠠᠩᠴᠢᠳ᠂ ᠲᠠᠨᠳᠡ ᠨᠢ ᠨᠢᠭᠡ ᠪᠦᠯᠦᠭ ᠬᠦᠮᠤᠨ ᠴᠢᠬᠢᠯᠳᠤᠨ ᠪᠦᠬᠡᠮᠨᠡᠷᠡᠵᠦ᠂ ︽ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢᠨ ᠪᠠᠭᠤᠯᠭᠤᠷᠢ︾ ᠲᠡᠭᠡᠷ᠎ᠡ ᠪᠠᠭᠤᠵᠠᠭᠠᠳᠠᠭ ᠪᠢᠯᠠ᠃      ᠲᠦᠷᠪᠡ᠂   ᠠᠪᠠ ᠶᠢᠨ ᠤᠯᠵᠠ ᠭᠠᠨᠵᠤᠭ᠎ᠠ ᠬᠤᠪᠢᠶᠠᠬᠤ ᠶᠤᠰᠤᠨ      ᠠᠷᠤ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠤᠨ ᠠᠪᠠ ᠶᠢᠨ ᠶᠤᠰᠤ ᠵᠢᠷᠤᠮ᠂ ᠵᠠᠩ ᠵᠠᠩᠰᠢᠯ ᠬᠠᠳᠠᠭᠤ ᠴᠢᠩᠭ᠎ᠠ ᠪᠠᠶᠢᠳᠠᠭ ᠪᠦᠭᠡᠳ ᠠᠩ ᠤᠨ ᠭᠠᠨᠵᠤᠭ᠎ᠠ᠂ ᠠᠪᠠ ᠶᠢᠨ ᠤᠯᠵᠠ ᠶᠢ ᠬᠤᠪᠢᠶᠠᠬᠤ ᠲᠦᠷᠢᠮ ᠭᠤᠷᠢᠮ ᠴᠦ ᠨᠠᠷᠢᠨ ᠨᠢᠮᠪᠠᠢ ᠪᠠᠶᠢᠳᠠᠭ ᠶᠤᠮ᠃ ᠵᠡᠭᠡᠷ᠎ᠡ ᠶᠢ ᠮᠤᠷᠢ ᠪᠠᠷ ᠲᠠᠭᠠᠷᠢᠭᠤᠯᠵᠦ᠂ ᠨᠤᠬᠠᠢ ᠪᠠᠷ ᠲᠠᠳᠠᠭᠤᠯᠬᠤ᠂ ᠰᠢᠭᠤᠳ ᠵᠠᠶᠢᠳᠠᠯᠠᠨ ᠪᠠᠭᠤᠬᠤ ᠠᠯᠢ ᠨᠢᠭᠡᠨ ᠠᠷᠭ᠎ᠠ ᠪᠠᠷ ᠪᠠᠷᠢᠭᠰᠠᠨ ᠴᠦ ᠴᠦᠮ ᠡᠪᠴᠢᠭᠦᠤ ᠶᠢ ᠨᠢ ᠬᠠᠳᠠᠵᠦ ᠠᠯᠠᠭᠠᠳ᠂ ᠠᠩ ᠠᠩᠨᠠᠵᠦ ᠠᠯᠠᠭᠰᠠᠨ ᠬᠦᠮᠤᠨ ᠠᠷᠢᠶᠠᠳᠠᠨ ᠤ ᠵᠦᠯᠳᠤ ︵ᠵᠢᠷᠤᠭᠡ᠂ ᠡᠯᠢᠭᠡ᠂ ᠠᠭᠤᠰᠬᠢ᠂ ᠬᠤᠭᠤᠯᠠᠢ ᠵᠡᠷᠭᠡ ᠲᠤᠳᠤᠭᠠᠳᠤ ᠴᠤᠯᠤ︶ ᠶᠢ ᠠᠪᠴᠦ᠂ ᠠᠷᠠᠰᠤ ᠶᠢ ᠨᠢ ᠠᠪᠳᠠᠭ᠃ ᠠᠷᠢᠶᠠᠳᠠᠨ ᠠᠩᠨᠠᠭᠰᠠᠨ ᠬᠦᠮᠤᠨ ᠵᠦᠯᠳᠤ ᠪᠠ ᠠᠷᠠᠰᠤ ᠶᠢ ᠨᠢ ᠠᠪᠤᠮᠠᠭᠴᠠ ᠪᠤᠰᠤᠳ ᠠᠩᠴᠢᠳ ᠦᠪᠡᠷ ᠦᠪᠡᠷᠰᠡᠳ ᠤᠨ ᠢᠶᠠᠨ ᠬᠢᠳᠤᠭ᠎ᠠ ᠶᠢ ᠪᠠᠨ ᠭᠠᠷᠭᠠᠵᠦ ᠠᠯᠢ ᠠᠮᠵᠢᠭᠰᠠᠨ  ᠢᠶᠠᠷ ᠢᠶᠠᠨ ᠠᠷᠢᠶᠠᠳᠠᠨ ᠤ ᠮᠢᠬ᠎ᠠ ᠠᠴᠠ ᠨᠢ ᠤᠭᠳᠤᠴᠢᠨ ᠠᠪᠳᠠᠭ᠃ ᠨᠢᠭᠡᠳᠤᠭᠡᠷ ᠲᠤ ᠲᠤᠯᠤᠭᠠᠢ᠂ ᠠᠷᠠᠰᠤ ᠲᠦᠷᠪᠡᠨ ᠰᠢᠬᠢᠷ᠎ᠠ᠂ ᠬᠤᠶᠠᠳᠤᠭᠠᠷ ᠲᠤ ᠤᠭᠤᠴᠠ᠂ ᠬᠤᠳᠠᠭᠠᠷ ᠲᠦᠳᠦᠭᠡᠷ ᠲᠤ ᠭᠤᠶ᠎ᠠ᠂ ᠲᠠᠪᠤᠳᠤᠭᠠᠷ ᠵᠢᠷᠭᠤᠳᠤᠭᠠᠷ ᠲᠤ ᠬᠠ᠂ ᠲᠤᠯᠤᠳᠤᠭᠠᠷ ᠲᠤ ᠡᠪᠴᠢᠭᠦᠤ  ᠂ ᠨᠠᠢᠮᠠᠳᠤᠭᠠᠷ ᠲᠤ ᠲᠠᠷᠠᠮ᠎ᠠ᠂ ᠶᠢᠰᠤᠳᠤᠭᠡᠷ ᠠᠷᠪᠠᠳᠤᠭᠠᠷ  ᠲᠤ ᠦᠨᠳᠤᠷ ᠲᠦᠷᠪᠡᠨ ᠬᠠᠪᠢᠷᠭ᠎ᠠ ᠶᠢ ᠨᠤᠭᠳᠠᠭᠤᠯᠤᠨ ᠠᠪᠤᠨ᠎ᠠ᠃ ᠡᠭᠦᠨ ᠳᠤ ᠵᠡᠭᠡᠷ᠎ᠡ ᠭᠤᠷ᠎ᠠ ᠶᠢ ᠨᠤᠬᠠᠢ ᠪᠠᠷ ᠲᠠᠳᠠᠭᠤᠯᠵᠦ᠂ ᠨᠤᠬᠠᠢ ᠶᠢᠨ ᠡᠵᠡᠨ ᠨᠢ ᠤᠶᠢᠷᠠᠬᠠᠨ ᠪᠠᠶᠢᠵᠦ ᠬᠦᠷᠤᠯᠴᠡᠨ ᠢᠷᠡᠵᠦ ᠵᠠᠪᠳᠤᠭᠰᠠᠨ ᠪᠤᠯ ᠨᠤᠬᠠᠢ ᠶᠢᠨ ᠡᠵᠡᠨ ᠨᠢ ᠨᠢᠭᠡᠳᠤᠭᠡᠷ ᠬᠤᠪᠢ ᠪᠤᠯᠬᠤ ᠲᠤᠯᠤᠭᠠᠢ᠂ ᠠᠷᠠᠰᠤ᠂ ᠲᠦᠷᠪᠡᠨ ᠰᠢᠬᠢᠷ᠎ᠠ ᠶᠢ ᠠᠪᠤᠨ᠎ᠠ᠃ ᠬᠡᠷᠪᠡ ᠨᠤᠬᠠᠢ  ᠶᠢᠨ ᠡᠵᠡᠨ ᠨᠢ ᠬᠤᠯᠠ ᠪᠠᠶᠢᠵᠦ ᠬᠦᠷᠦᠯᠴᠡᠨ ᠢᠷᠡᠵᠦ ᠵᠠᠪᠳᠤᠭᠰᠠᠨ ᠦᠬᠡᠢ ᠪᠤᠯ ᠠᠯᠢ ᠨᠢᠭᠡᠨ ᠲᠦᠷᠦᠭᠦᠨ ᠳᠤ ᠵᠠᠪᠳᠤᠨ ᠢᠷᠡᠭᠰᠡᠨ ᠨᠢ ᠨᠢᠭᠡᠳᠤᠭᠡᠷ ᠬᠤᠪᠢ ᠶᠢ ᠠᠪᠳᠠᠭ ᠪᠠᠶᠢᠨ᠎ᠠ᠃ ᠨᠤᠬᠠᠢ ᠶᠢᠨ ᠡᠵᠡᠨ ᠨᠢ ᠵᠠᠪᠳᠤᠨ ᠢᠷᠡᠵᠦ ᠪᠠᠭᠤᠯᠭᠤᠷᠢ ᠶᠢᠨ ᠬᠤᠪᠢ ᠳᠤ ᠪᠠᠭᠳᠠᠭᠰᠠᠨ ᠪᠠᠶᠢᠪᠠᠯ ᠨᠤᠬᠠᠢ ᠶᠢᠨ ᠡᠵᠡᠨ ᠨᠢ ᠨᠢᠭᠡ ᠬᠤᠪᠢ ᠠᠪᠴᠦ᠂ ᠲᠠᠪᠬᠤᠷ ᠬᠤᠪᠢ ᠠᠪᠴᠦ ᠪᠤᠯᠬᠤ ᠦᠬᠡᠢ ᠪᠠᠶᠢᠳᠠᠭ᠃ ᠵᠡᠭᠡᠷ᠎ᠡ ᠶᠢᠨ ᠪᠠᠭᠤᠯᠭᠤᠷᠢ᠂ ᠠᠩ ᠤᠨ ᠭᠠᠨᠵᠤᠭ᠎ᠠ ᠳᠤ ᠢᠷᠡᠭᠰᠡᠳ ᠲᠡᠰ ᠲᠠᠷᠠᠭ᠎ᠠ ᠪᠠᠷ ᠢᠶᠠᠨ ᠭᠠᠷ ᠬᠦᠳᠠᠯᠤᠯᠴᠡᠨ ᠦᠪᠡᠷᠳᠡᠭᠡᠨ ᠪᠠᠭᠤᠯᠭᠤᠷᠢ ᠪᠠᠨ ᠰᠠᠯᠭᠠᠨ ᠠᠪᠳᠠᠭ ᠲᠤᠯᠠ ᠲᠠᠪᠬᠢᠯᠳᠤᠨ ᠢᠷᠡᠭᠰᠡᠨ ᠬᠦᠮᠤᠰ ᠪᠠᠷᠤᠭ ᠠᠷᠪᠠᠨ ᠮᠢᠨᠦ᠋ᠲ ᠪᠤᠯᠤᠯ ᠦᠬᠡᠢ ᠪᠠᠷ ᠤᠯᠵᠠ ᠪᠠᠨ ᠬᠤᠪᠢᠶᠠᠵᠦ ᠲᠠᠭᠤᠰᠬᠠᠳᠠᠭ᠃ ᠤᠨᠴᠠ ᠵᠠᠷᠢᠮ ᠠᠩ ᠤᠨ ᠪᠠᠭ᠋ᠠᠳᠠᠳ ᠬᠤᠴᠤᠷᠠᠵᠦ ᠢᠷᠡᠭᠰᠡᠨ ᠪᠤᠯᠪᠠᠴᠦ᠂ ᠬᠢᠳᠤᠭ᠎ᠠ ᠶᠢᠨ ᠮᠦᠷ ᠢᠶᠠᠷ ᠨᠢ ᠰᠡᠭᠦᠯ ᠤᠨ ᠬᠦᠮᠤᠨ ᠤ ᠭᠠᠷ ᠢ ᠨᠢ ᠲᠠᠷᠤᠵᠦ ᠪᠤᠰᠤᠳ ᠢ ᠰᠤᠴᠢᠭᠠᠭᠠᠳ ᠰᠡᠭᠦᠯ ᠤᠨ ᠬᠤᠪᠢ ᠶᠢ ᠪᠤᠯᠢᠶᠠᠬᠤ ᠭᠡᠳ ᠬᠡᠷᠡᠭᠦᠯ ᠵᠠᠭᠤᠷᠭᠠᠨ ᠭᠠᠷᠳᠠᠭ ᠶᠠᠪᠤᠳᠠᠯ ᠴᠦ ᠭᠠᠷᠤᠭᠰᠠᠨ ᠭᠡᠳᠡᠭ᠃ ᠠᠩ ᠤᠨ ᠶᠤᠰᠤ ᠵᠠᠩᠰᠢᠯ ᠤᠨ ᠦᠵᠡᠯᠳᠡ ᠪᠠᠷ ᠪᠤᠯ᠄ ᠠᠩ ᠭᠦᠷᠦᠭᠡ ᠠᠷᠢᠶᠠᠳᠠᠨ ᠠᠮᠢᠳᠠᠨ ᠪᠤᠯ ᠴᠦᠮ ᠲᠡᠭᠷᠢ ᠰᠠᠬᠢᠭᠤᠯᠤᠰᠤᠨ ᠤ ᠬᠦᠷᠦᠩᠭᠡ ᠮᠦᠨ᠃ ᠠᠩᠴᠢᠨ ᠠᠩ ᠠᠩᠨᠠᠨ ᠭᠦᠷᠦᠭᠡᠯᠡᠵᠦ᠂ ᠠᠩ ᠤᠨ ᠭᠠᠨᠵᠤᠭ᠎ᠠ ᠤᠯᠬᠤ ᠶᠠᠪᠤᠳᠠᠯ ᠨᠢ ᠪᠦᠷ ᠲᠡᠭᠷᠢ ᠠᠴᠠ ᠰᠤᠶᠤᠷᠬᠠᠭᠰᠠᠨ ︽ᠲᠡᠭᠷᠢ  ᠶᠢᠨ ᠬᠡᠰᠢᠭ︾ ᠮᠦᠨ ᠭᠡᠵᠦ ᠦᠵᠡᠳᠡᠭ᠃ ᠡᠨᠡ ᠬᠡᠰᠢᠭ ᠢ ᠠᠯᠢ ᠨᠢᠭᠡᠨ ᠭᠠᠭᠴᠠ ᠬᠦᠮᠤᠨ ᠳᠤ ᠦᠭᠬᠦ ᠪᠢᠰᠢ᠂ ᠬᠠᠷᠢᠨ ᠡᠨᠡ ᠠᠩ ᠳᠤ ᠤᠷᠤᠯᠴᠠᠭᠰᠠᠨ ᠬᠦᠮᠤᠨ ᠪᠦᠬᠦᠨ ︽ᠬᠡᠰᠢᠭ ᠬᠦᠷᠳᠡᠬᠦ︾ ᠡᠷᠬᠡ ᠲᠠᠢ ᠭᠡᠳᠡᠭ᠃ ᠡᠶᠢᠮᠤ  ᠠᠴᠠ ᠠᠩ ᠤᠨ ᠮᠢᠬ᠎ᠠ ᠶᠢ ᠶᠡᠭᠡ ᠪᠠᠭ᠎ᠠ ᠴᠦ ᠭᠡᠰᠡᠨ ︵ᠨᠢᠭᠡ ᠡᠮᠬᠦᠬᠦ ᠲᠡᠳᠤᠢ ᠴᠦ ᠭᠡᠰᠡᠨ︶ ᠠᠳᠠᠯᠢ ᠲᠡᠭᠰᠢ ᠪᠠᠷ ᠬᠤᠪᠢᠶᠠᠨ ᠦᠭᠳᠡᠭ᠂ ᠡᠭᠦᠨ ᠢ  ︽ᠱᠤᠷᠤᠯᠠᠭ᠎ᠠ︾ ᠭᠡᠳᠡᠭ᠂ ᠱᠤᠷᠤ ᠮᠤᠳᠤᠨ ᠳᠤ ᠡᠯᠭᠦᠵᠦ ᠢᠳᠡᠬᠦ ᠭᠡᠰᠡᠨ ᠤᠳᠬ᠎ᠠ ᠲᠠᠢ᠃ ᠡᠷᠳᠡ ᠲᠡᠤᠬᠡᠨ ᠳᠡᠭᠡᠨ ᠶᠡᠭᠡ ᠬᠦᠷᠢᠶ᠎ᠡ ᠠᠪᠠ ᠶᠢᠨ ᠠᠩ ᠤᠨ ᠭᠠᠨᠵᠤᠭ᠎ᠠ ᠶᠢ ᠡᠵᠡᠨ ᠬᠠᠭᠠᠨ ᠨᠤᠶᠠᠳ ᠪᠤᠶᠤ ᠠᠪᠠ ᠶᠢᠨ ᠶᠡᠷᠦᠩᠬᠡᠢ ᠲᠠᠭᠠᠭᠠᠮᠠᠯ ᠠᠴᠠ ᠰᠢᠭᠤᠳ ᠠᠩᠴᠢᠨ ᠨᠠᠷ ᠲᠤ ᠬᠤᠪᠢ ᠲᠠᠯᠪᠢᠨ ᠱᠠᠩᠨᠠᠯ ᠪᠤᠯᠭᠠᠨ ᠲᠦᠭᠡᠭᠡᠨ ᠦᠭᠳᠡᠭ ᠪᠠᠶᠢᠯ᠎ᠠ ᠭᠡᠳᠡᠭ ᠲᠤᠮᠤᠭ ᠶᠠᠷᠢᠶ᠎ᠠ ᠲᠠᠢ᠃      ᠲᠠᠤᠯᠠᠢ ᠶᠢᠨ ᠬᠦᠷᠢᠶ᠎ᠡ ᠠᠪᠠ ᠳᠤ ᠪᠤᠯ ᠫᠤᠤ ᠰᠠᠭᠠᠳᠠᠭ ᠬᠡᠷᠡᠭᠯᠡᠵᠦ ᠪᠤᠯᠳᠠᠭ ᠦᠬᠡᠢ᠂ ᠵᠦᠪᠬᠡᠨ ᠪᠢᠯᠠᠭᠤ ᠰᠢᠳᠠᠮ ᠬᠡᠷᠡᠭᠯᠡᠨ᠎ᠡ᠃ ᠪᠢᠯᠠᠭᠤ ᠶᠢ ᠶᠠᠪᠠᠭᠠᠨ ᠢᠶᠠᠷ ᠴᠤᠬᠢᠭᠰᠠᠨ ᠴᠦ ᠪᠤᠯᠤᠨ᠎ᠠ᠂ ᠭᠡᠳᠡᠯ᠎ᠡ ᠮᠤᠷᠢ ᠪᠠᠷ ᠲᠠᠪᠬᠢᠭᠤᠯᠵᠦ ᠪᠠᠶᠢᠭᠠᠳ ᠴᠤᠬᠢᠪᠠᠯ ᠬᠦᠴᠦᠳᠠᠢ ᠲᠡᠭᠡᠷ᠎ᠡ ᠪᠠᠨ ᠤᠨᠤᠪᠴᠢᠳᠠᠢ ᠭᠡᠵᠦ ᠤᠯᠠᠩᠬᠢ ᠬᠦᠮᠤᠰ ᠬᠡᠯᠡᠯᠴᠡᠳᠡᠭ ᠪᠢᠯᠠ  ᠃      ᠬᠡᠷᠪᠡ ᠬᠤᠮᠤᠷᠭᠠᠨ ᠠᠪᠠ ᠳᠤ ᠴᠢᠨ᠋ᠸ᠎ᠠ ᠤᠷᠤᠭᠰᠠᠨ ᠪᠠᠶᠢᠪᠠᠯ ᠵᠠᠪᠠᠯ ᠠᠯᠠᠬᠤ ᠬᠡᠷᠡᠭᠳᠠᠢ ᠪᠠᠶᠢᠳᠠᠭ᠃ ᠬᠡᠨ ᠬᠦᠮᠤᠨ ᠡᠷ᠎ᠡ ᠴᠢᠳᠠᠯ ᠪᠠ ᠮᠤᠷᠢᠨ ᠤ ᠬᠦᠴᠦ ᠪᠠᠷ ᠠᠯᠠᠭᠰᠠᠨ ᠪᠤᠯ ᠲᠡᠷᠡ ᠴᠢᠨ᠋ᠸ᠎ᠠ ᠲᠡᠭᠦᠨ ᠤ ᠬᠢ ᠪᠤᠯᠳᠠᠭ ᠤᠴᠢᠷ  ᠲᠠᠢ᠃ ᠲᠠᠤᠯᠠᠢ ᠪᠤᠯ ᠬᠡᠨ ᠤ ᠨᠤᠬᠠᠢ ᠪᠠᠷᠢᠭᠰᠠᠨ ᠢ ᠬᠠᠮᠢᠶᠠᠷᠬᠤ ᠦᠬᠡᠢ᠂ ᠬᠡᠨ ᠵᠠᠪᠳᠤᠵᠦ ᠪᠠᠭᠤᠪᠠᠯ ᠲᠡᠷᠡ ᠬᠦᠮᠤᠨ ᠠᠪᠳᠠᠭ᠃ ᠬᠤᠶᠠᠷ ᠬᠦᠮᠤᠨ ᠲᠠᠤᠯᠠᠢ ᠶᠢ ᠪᠤᠯᠢᠶᠠᠯᠳᠤᠬᠤ ᠶᠠᠪᠤᠳᠠᠯ ᠭᠠᠷᠪᠠᠯ᠂ ᠨᠠᠰᠤ ᠪᠠᠷ ᠲᠡᠭᠦᠤ ᠳᠤᠨᠢ ᠦᠭᠭᠦᠨ᠎ᠡ᠂ ᠶᠠᠮᠠᠷᠴᠦ ᠠᠩᠴᠢᠳ ᠭᠡᠳ ᠠᠪᠠ ᠶᠢᠨ ᠲᠠᠭᠠᠭᠠᠮᠠᠯ ᠠᠬᠠᠮᠠᠳ ᠤᠨ ᠦᠭᠡ ᠶᠢ ᠰᠤᠨᠤᠰᠬᠤ ᠬᠡᠷᠡᠭᠳᠠᠢ ᠪᠠᠶᠢᠳᠠᠭ᠃ ᠦᠨᠡᠭᠡ ᠶᠢ ᠪᠤᠯ ᠪᠠᠷᠢᠭᠰᠠᠨ ᠨᠤᠬᠠᠢ ᠶᠢᠨ ᠡᠵᠡᠨ ᠨᠢ ᠠᠪᠳᠠᠭ ᠵᠢᠷᠤᠮ ᠶᠤᠰᠤ ᠲᠠᠢ ᠶᠤᠮ᠃   ᠵᠤᠬᠢᠶᠠᠭᠴᠢ᠄ ᠪ᠊ · ᠲᠡᠮᠦᠷᠭᠤᠤᠯᠲᠤ   ᠨᠠᠶᠢᠷᠠᠭᠤᠯᠣᠭᠴᠢ᠄ ᠴ᠊ · ᠰᠠᠷᠠᠭᠤᠯ
 
ᠢᠷᠡᠯᠲᠡ᠄ ᠠᠷᠣ ᠬᠤᠷᠴᠢᠨ ᠬᠤᠰᠢᠭᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠴᠢᠶᠠᠯᠠᠪᠤᠷᠢ ᠶᠢᠨ ᠵᠢᠷᠭᠤᠭᠠᠨ ᠲᠡᠷᠭᠡ
ᠶᠡᠭᠡ ᠡᠷᠳᠡᠮᠳᠡᠨ ᠪᠢᠮᠪᠠ ᠶᠢᠨ ᠷᠢᠨᠴᠢᠨ ᠪᠠᠭᠰᠢ ᠳᠤ ᠭᠠᠶᠢᠬᠠᠭᠳᠠᠭᠰᠠᠨ ᠬᠦᠮᠤᠨ
ᠨᠤᠶᠠᠨ ᠠᠭᠤᠯᠠ ᠶᠢᠨ ᠤᠪᠤᠭ᠎ᠠ
ᠠᠷᠤ ᠬᠤᠷᠴᠢᠨ ᠤ ᠪᠦᠰᠡᠭᠦᠶᠢᠴᠦᠳ ᠤᠨ ᠦᠰᠦ ᠱᠠᠩᠬᠤᠯᠠᠵᠤ ᠲᠠᠪᠤᠨ ᠬᠠᠳᠬᠤᠭᠤᠷ ᠬᠡᠷᠡᠭᠯᠡᠬᠦ ᠲᠤᠬᠠᠢ
ᠢᠳᠡᠰᠢᠨ ᠮᠠᠯ ᠤᠨ ᠶᠠᠰᠤ ᠮᠢᠬ᠎ᠠ ᠶᠢ ᠲᠤᠶᠠᠴᠢᠵᠤ ᠰᠠᠯᠭᠠᠬᠤ ᠶᠤᠰᠤᠨ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05003979号